Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  February 2017

Sane Bimihi Nɛ Je Ní Kaneli A Ngɔ

Sane Bimihi Nɛ Je Ní Kaneli A Ngɔ

Bɔfo Paulo ngma kaa Yehowa “be hae nɛ a ka nyɛ pe bɔ nɛ nyɛ ma nyɛ.” (1 Kor. 10:13) Anɛ enɛ ɔ tsɔɔ kaa Yehowa le nɔ́ nɛ wa ma nyɛ maa da nya, nɛ e tsɔɔ ɔ ka nɛ e sa nɛ e ba wa nɔ lo?

Ke jã ji sane ɔ, lɛɛ mo susu nɔ́ nɛ lɔ ɔ ko tsɔɔ ɔ he nɛ o hyɛ. Nyɛminyumu ko nɛ e binyumu gbe e he ɔ bi ke: ‘Anɛ Yehowa susu he momo kaa ke wa binyumu ɔ gbe e he ɔ, i kɛ ye yo ɔ wa ma nyɛ maa da nya lo? Anɛ akɛnɛ Mawu le kaa wa ma nyɛ maa da nya he je nɛ e ha nɛ e ba lɛ jã lo?’ Anɛ sisi numi ngɛ he kaa wa ma de ke Yehowa kudɔɔ nɔ́ tsuaa nɔ́ nɛ yaa nɔ ngɛ wa si himi mi ngɛ blɔ pɔtɛɛ ko kaa jã a nɔ lo?

Ke wa susu Paulo munyu nɛ ngɛ 1 Korinto Bi 10:13 ɔ he kɛ ya tsitsaa a, wa ma nyɛ ma de ke: Nɔ́ ko be Ngmami ɔ mi nɛ tsɔɔ kaa Yehowa jeɔ blɔ nɛ e susuɔ nɔ́ nɛ wa ma nyɛ maa da nya a he kɛ toɔ, kɛkɛ e da lɔ ɔ nɔ kɛ tsɔɔ ka nɛ e sa kaa e ba wa nɔ. Nyɛ ha nɛ wa susu yi mi tomi eywiɛ komɛ a he je nɛ wa ma nyɛ ma de jã a he nɛ waa hyɛ.

Kekleekle ɔ, Yehowa ha adesahi he blɔ nɛ a kɛ peeɔ nɔ́ nɛ nɔ suɔ. Yehowa suɔ kaa waa hla nɔ́ nɛ wɔ nitsɛmɛ wa suɔ ngɛ wa si himi mi. (5 Mose 30:19, 20; Yosh. 24:15) Ke wa hla blɔ nɛ da a, wa ma nyɛ maa ngɔ wa hɛ kɛ fɔ Yehowa nɔ konɛ e tsɔɔ wɔ blɔ. (Abɛ 16:9) Se ke wa wo blɔ nɛ dɛ ɔ, wa maa na mi nɔ́. (Gal. 6:7) Ke Yehowa lɛ tsɔɔ ka nɛ e sa kaa e ba wa nɔ ɔ, lɔ ɔ ko tsɔɔ kaa e ha wɔ he blɔ konɛ waa hla nɔ́ nɛ wa suɔ niinɛ lo?

Nɔ́ nɛ ji enyɔ ɔ, Yehowa pui wa he piɛ kɛ ji ‘be yayami nɛ ba náa nɔ tlukaa’ a mi. (Fiɛlɔ 9:12) Akɛnɛ níhi nyɛɔ baa tlukaa he je ɔ, waa kɛ oslaahi, aloo haomihi nɛ a mi wa ma nyɛ maa kpe. Yesu tu nihi 18 nɛ mɔ ko ku kɛ pue a nɔ ɔ he munyu, nɛ e tsɔɔ kaa pi Mawu lɛ ha nɛ a gbo. (Luka 13:1-5) Nile be mi kaa nɔ ko ma susu kaa loko oslaa ko maa ba a, Yehowa le nihi nɛ a ma gbo ngɛ mi, kɛ nihi nɛ a maa je mi.

Nɔ́ nɛ ji etɛ ɔ, e sa nɛ wa ti nɔ tsuaa nɔ nɛ tsɔɔ kaa e fĩ Yehowa se. Mo kai kaa Satan tsɔɔ kaa Yehowa sɔmɔli be nyɛe nɛ a ye lɛ anɔkuale. Satan tsɔɔ kaa ke waa kɛ kahi kpe ɔ, wa ma kua Yehowa. (Hiob 1:9-11; 2:4; Kpoj. 12:10) Ke Yehowa tsi ka komɛ  a nya konɛ a ko ba wa nɔ akɛnɛ e le kaa wa be nyɛe maa da nya he je ɔ, anɛ lɔ ɔ be tsɔɔe kaa nɔ́ nɛ Satan de kaa wa sɔmɔɔ Mawu ngɛ níhi nɛ e haa wɔ ɔ he ɔ ji anɔkuale lo?

Nɔ́ nɛ ji eywiɛ ɔ, e he hia we kaa Yehowa nɛ le nɔ́ tsuaa nɔ́ nɛ maa ba wa nɔ. Ke wa de ke Mawu le ka nɛ waa kɛ maa kpe hwɔɔ se ɔ, lɔ ɔ ko tsɔɔ kaa e le nɔ́ tsuaa nɔ́ nɛ maa ya nɔ ngɛ wa si himi mi hwɔɔ se. Se Ngmami ɔ tsɔɔ we jã. Ngɛ anɔkuale mi ɔ, Mawu ma nyɛ maa le nɔ́ nɛ maa ba hwɔɔ se. (Yes. 46:10) Se Baiblo ɔ tsɔɔ kaa pi nɔ́ fɛɛ nɔ́ nɛ maa ba hwɔɔ se ɔ nɛ Mawu suɔ kaa e maa le. (1 Mose 18:20, 21; 22:12) Yehowa ngɛ suɔmi, nɛ e pee ɔ nɔ́ nɛ da, enɛ ɔ he ɔ, e ngmɛɔ wɔ blɔ konɛ waa hla nɔ́ nɛ wa suɔ.5 Mose 32:4; 2 Kor. 3:17.

Ke jã a, lɛɛ mɛni Paulo ngɛ tsɔɔe benɛ e de ke, ‘Mawu be hae nɛ a ka nyɛ pe bɔ nɛ nyɛ ma nyɛ’ ɔ? Nɔ́ nɛ Paulo ngɛ tsɔɔe ji nɔ́ nɛ Yehowa peeɔ ke waa kɛ ka ko ngɛ kpee, se pi loko waa kɛ ka a maa kpe. Bɔfo Paulo munyu ɔ haa nɛ wa náa nɔ mi mami kaa ke waa kɛ wa hɛ fɔ Yehowa nɔ ɔ, e maa ye bua wɔ konɛ waa da ka saisaa nɛ waa kɛ maa kpe ɔ nya. (La 55:22) Ha nɛ wa susu yi mi tomi enyɔ komɛ a he je nɛ Paulo tsɔɔ jã a he nɛ waa hyɛ.

Kekleekle ɔ, kahi nɛ waa kɛ kpee ɔ, “ekoeko be nɛ bɛ adesa nɔ hyɛ.” Enɛ ɔ tsɔɔ kaa adesahi tsuo kɛ kahi nɛ waa kɛ kpeɔ ɔ eko kpeɔ. Ke waa kɛ wa hɛ fɔ Mawu nɔ ɔ, wa ma nyɛ maa da ka nɛ ɔmɛ a nya. (1 Pet. 5:8, 9) Níhi nɛ Paulo tu he munyu loko e tu munyu nɛ ngɛ 1 Korinto Bi 10:13 ɔ tsɔɔ ka nɛ Israel bi ɔmɛ kɛ kpe benɛ a ngɛ nga a nɔ ɔ. (1 Kor. 10:6-11) Ka nɛ ɔmɛ ekoeko be nɛ adesa ko kɛ kpi hyɛ, aloo Israel bi nɛ a yeɔ anɔkuale ɔ be nyɛe maa da nya. Paulo de si eywiɛ ke “a ti ni komɛ” gbo tue. Aywilɛho sane ji kaa Israel bi ɔmɛ a ti ni komɛ nyɛ we nɛ a ye a he nɔ, ejakaa a kɛ a hɛ fɔɛ Mawu nɔ.

Enyɔne, ‘Mawu yeɔ anɔkuale.’ Bɔ nɛ Mawu kɛ e we bi hi si ha a tsɔɔ kaa e kua we nihi nɛ “suɔ lɛ, nɛ a yeɔ e mlaa amɛ a nɔ ɔ.” (5 Mose 7:9) Bɔ nɛ Mawu kɛ mɛ hi si ha a hu tsɔɔ kaa e yeɔ e siwo nɔ be tsuaa be. (Yosh. 23:14) Anɔkuale nɛ Mawu ye e we bi ɔ haa nɛ nihi nɛ a suɔ lɛ nɛ a buɔ lɛ tue ɔ náa nɔ mi mami kaa ke a kɛ kahi ngɛ kpee ɔ, Mawu maa ye e siwo enyɔ nɛ ɔmɛ a nɔ: (1) Ke waa kɛ ka ko ngɛ kpee ɔ, e be hae nɛ ka a nya nɛ wa pe bɔ nɛ wa ma nyɛ maa da nya, nɛ (2) ‘e ma ha nɛ waa je mi.’

Yehowa “woɔ wa bua ngɛ haomihi tsuo a mi”

Mɛni blɔ nɔ Yehowa guɔ nɛ e kɛ jeɔ nihi nɛ a ngɔɔ e hɛ kɛ fɔɔ e nɔ ɔ ngɛ ka mi? Ngɛ anɔkuale mi ɔ, ke Mawu suɔ ɔ, e ma nyɛ ma je ka a kɛ je. Se mo kai Paulo munyu nɛ ɔ: ‘Yehowa ma ha nyɛ he wami nɛ nyɛ kɛ da nya, konɛ nyɛɛ je mi.’ Enɛ ɔ he ɔ, ngɛ si fɔfɔɛhi fuu a mi ɔ, e haa wɔ níhi nɛ wa hia konɛ wa nyɛ nɛ waa to wa tsui si kɛ da ka a nya konɛ ‘waa je mi.’ Ha nɛ wa susu blɔ komɛ nɛ Yehowa guɔ nɔ kɛ jeɔ wɔ ngɛ kahi a mi he nɛ waa hyɛ:

  • E “woɔ wa bua ngɛ haomihi tsuo a mi.” (2 Kor. 1:3, 4) Yehowa ma nyɛ maa ngɔ e Munyu ɔ, e mumi klɔuklɔu ɔ, kɛ Baiblo ɔ mi anɔkuale ɔ nɛ e haa nɛ tsɔlɔ anɔkualetsɛ ɔ tsɔɔ wɔ ɔ nɔ kɛ ye bua wɔ konɛ wa dla wa juɛmi, wa ko ye tsui tsɔ, nɛ wa ko pee yeyeeye tsɔ.Mat. 24:45; Yoh. 14:16; Rom. 15:4.

  • E ma nyɛ maa gu mumi klɔuklɔu ɔ nɔ kɛ tsɔɔ wɔ blɔ. (Yoh. 14:26) Ke waa kɛ kahi ngɛ kpee ɔ, mumi ɔ ma nyɛ maa ye bua wɔ konɛ wa kai Baiblo ɔ mi sanehi, aloo sisi tomi mlaahi konɛ wa nyɛ nɛ waa pee juɛmi nɛ da.

  • E ma nyɛ ma ha nɛ e bɔfo ɔmɛ nɛ a ye bua wɔ.Heb. 1:14.

  • E ma nyɛ ma ha nɛ wa nyɛmimɛ nɛ a ‘wa wɔ’ kɛ gu munyu ko nɛ a maa tu, aloo nɔ́ ko nɛ a maa pee kɛ wo wɔ he wami ɔ nɔ.Kol. 4:11.

Ke jã a, lɛɛ mɛni wa ma nyɛ maa kase ngɛ Paulo munyu nɛ ngɛ 1 Korinto Bi 10:13 ɔ mi? Yehowa tsɔɔ we ka pɔtɛɛ nɛ e sa kaa e ba wa nɔ. Se ke waa kɛ ka ko ngɛ kpee ɔ, wa ma nyɛ ma ná nɔ mi mami kaa: Ke wa ngɔ wa hɛ kɛ fɔ Yehowa nɔ kulaa a, e be hae nɛ ka a mi nɛ wa pe bɔ nɛ adesa ko ma nyɛ maa da nya kɔkɔɔkɔ; be tsuaa be ɔ, e ma ha wɔ he wami nɛ wa kɛ da nya konɛ waa je mi. Hyɛ bɔ nɛ enɛ ɔ woɔ nɔ bua ha!