Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  December 2016

‘Mumi Mi Níhi A He Juɛmi ɔ Ma Ha Mo Wami, Kɛ He Jɔmi’

‘Mumi Mi Níhi A He Juɛmi ɔ Ma Ha Mo Wami, Kɛ He Jɔmi’

“Nihi nɛ baa a je mi ngɛ mumi ɔ blɔ tsɔɔmi nya a, mumi mi níhi a he a susuu.”ROM. 8:5.

LAHI: 22, 52

1, 2. Mɛni he je nɛ nihi nɛ a pɔ mɛ nu ɔ a bua jɔ ngmami nɛ ngɛ Roma Bi yi 8 ɔ he wawɛɛ ɔ?

DAA jeha a, ke wa ngɛ Yesu gbenɔ ɔ kaie ɔ, anɛ o kaneɔ Roma Bi 8:15-17 ɔ lo? Eko ɔ, o peeɔ jã. Ngmami nɛ ɔ tsɔɔ bɔ nɛ Kristofohi plɛɔ kɛ leɔ kaa a pɔ mɛ nu ha. Mawu mumi ɔ kɛ a mumi ɔ yeɔ he odase. Roma Bi 8:1 ɔ tsɔɔ kaa nihi nɛ a pɔ mɛ nu ɔ “ngɛ Kristo Yesu mi.” Lɔ ɔ he ɔ anɛ Roma Bi yi 8 ɔ kɔɔ nihi nɛ a pɔ mɛ nu ɔ pɛ a he lo? Aloo e kɔɔ nihi nɛ a ngɛ hɛ nɔ kami kaa a maa hi si ngɛ zugba a nɔ kɛ ya neneene ɔ hu a he?

2 Kristofohi nɛ a pɔ mɛ nu ɔ titli ji nihi nɛ Roma Bi yi 8 ɔ tu a he munyu. A ná “mumi ɔ” kaa nihi nɛ a ‘ngɛ Mawu blɔ hyɛe kaa e pee mɛ e bimɛ kɛ pi si, konɛ a nɔmlɔ tso ɔ nɛ ye e he kulaa.’ (Rom. 8:23) Niinɛ, a hɛ nɔ kami ji kaa a maa pee Mawu bimɛ ngɛ hiɔwe. Benɛ a baptisi mɛ se ɔ, Mawu ngɔ a he yayami kɛ pa mɛ kɛ gu kpɔmi nɔ́ ɔ nɔ. Mawu bu mɛ dali konɛ a nyɛ nɛ a pee e bimɛ.Rom. 3:23-26; 4:25; 8:30.

3. Mɛni he je nɛ e sa kaa nihi nɛ a ngɛ hɛ nɔ kami kaa a maa hi zugba a nɔ ɔ hu nɛ a susu Roma Bi yi 8 ɔ he ɔ?

3 Se kɛ̃ ɔ, Roma Bi yi 8 ɔ kɔɔ nihi nɛ a ngɛ hɛ nɔ kami kaa a maa hi zugba a nɔ ɔ hu a he, ejakaa ngɛ blɔ ko nɔ ɔ, Mawu bu mɛ nihi  nɛ da. Paulo munyu nɛ e tu kɛ sɛ hlami ngɛ Roma Bi ɔmɛ a womi ɔ mi ɔ, maa enɛ ɔ nɔ mi. Ngɛ yi 4 ɔ mi ɔ, e tu Abraham he munyu. Nyumu nɛ e ngɛ hemi kɛ yemi nɛ ɔ gbo loko Yehowa kɛ Mlaa a ha Israel bi ɔmɛ, nɛ e gbo loko Yesu ba gbo ngɛ wa yayami ɔmɛ a he. Se kɛ̃ ɔ, Yehowa na kaa Abraham ngɛ hemi kɛ yemi wawɛɛ, nɛ e bu lɛ dalɔ. (Kane Roma Bi 4:20-22.) Jã kɛ̃ nɛ Yehowa ma nyɛ maa bu Kristofohi nɛ a ngɛ mwɔnɛ ɔ nɛ a ngɛ hɛ nɔ kami kaa a maa hi si ngɛ zugba nɔ kɛ ya neneene ɔ dali. Enɛ ɔ he ɔ, ke mɛ hu a kɛ ga womi nɛ ngɛ Roma Bi yi 8 ɔ tsu ni ɔ, a ma ná he se.

4. Ke wa kane Roma Bi 8:21 ɔ, mɛni e sa kaa wa bi wa he?

4 Wa naa nɔ́ nɛ wa ma nyɛ maa da nɔ kɛ tsɔɔ kaa je ehe ɔ maa ba mi kokooko ngɛ Roma Bi 8:21. Kuku nɛ ɔ tsɔɔ kaa “adebɔ níhi tsuo maa ye a he, nɛ gbenɔ be he wami nae ngɛ a nɔ hu; nɛ a kɛ Mawu bimɛ ɔmɛ maa hi si ngɛ he jɔmi mi, nɛ a maa wo a hɛ mi nyami.” Wa maa hi je ehe ɔ mi jio, wa nine maa su hiɔwo ɔ nɔ jio, sane bimi ɔ ji kaa, anɛ o ngɛ nɔ mi mami kaa o maa hi je ehe ɔ mi lo? Ga womi nɛ ngɛ Roma Bi yi 8 ɔ mi ɔ maa ye bua mo konɛ o ná nɔ mi mami.

“HE LO NYA NÍHI A HE JUƐMI”

5. Mɛni sane nɛ hɛdɔ ngɛ he nɛ Paulo tu he munyu ngɛ Roma Bi 8:4-13 ɔ?

5 Kane Roma Bi 8:4-13. Ngɛ Roma Bi yi 8 ɔ mi ɔ, Paulo tu ‘nihi nɛ a baa a je mi ngɛ he lo nya,’ kɛ ‘nihi nɛ a baa a je mi ngɛ mumi ɔ blɔ tsɔɔmi nya a’ a he munyu. Eko ɔ, nihi ma susu kaa Paulo ngɛ slɔɔto nɛ ngɛ nihi nɛ a ji Kristofohi kɛ nihi nɛ a pi Kristofohi ɔ a kpɛti ɔ mi tsɔɔe. Se ngɛ anɔkuale mi ɔ, Paulo ngma munyu nɛ ɔ kɛ ya ha nihi ‘tsuo nɛ a ngɛ Roma nɛ Mawu suɔ mɛ, nɛ e tsɛ mɛ kɛ ba pee lɛ nitsɛ e ni klɔuklɔuhi ɔ.’ (Rom. 1:7) Lɔ ɔ he ɔ, Paulo ngɛ slɔɔto nɛ ngɛ Kristofohi nɛ a baa a je mi ngɛ he lo nya kɛ Kristofohi nɛ a baa a je mi ngɛ mumi ɔ blɔ tsɔɔmi nya a kpɛti ɔ tsɔɔe. Se mɛni slɔɔto ngɛ a kpɛti?

6, 7. (a) Mɛni blɔ komɛ a nɔ Baiblo ɔ kɛ munyungu nɛ ji “he lo” ɔ tsu ni ngɛ? (b) “He lo” nɛ Paulo kɛ tsu ní ngɛ Roma Bi 8:4-13 ɔ tsɔɔ mɛni?

6 Kekleekle ɔ, mo susu munyu nɛ ji “he lo” ɔ he nɛ o hyɛ. Mɛni nɛ Paulo ngɛ tsɔɔe benɛ e de ke “he lo” ɔ? Baiblo ɔ kɛ munyu nɛ ji “he lo” ɔ tsu ɔ ni ngɛ blɔ slɔɔtohi a nɔ. Be komɛ ɔ, Baiblo ɔ kɛ he lo ɔ tsuɔ ní ke e ngɛ wa nɔmlɔ tso ɔ he munyu tue. (Rom. 2:28; 1 Kor. 15:39, 50) E ma nyɛ maa tsɔɔ  weku kpa nɛ ngɛ nɔ ko kɛ nɔ ko a kpɛti hulɔ. Paulo na Yuda bi ɔmɛ kaa e “weku li ji mɛ ngɛ he lo nya.”Rom. 9:3.

7 Se kɛ̃ ɔ, nɔ́ nɛ Paulo de ngɛ Roma Bi yi 7 ɔ ha nɛ wa le nɔ́ nɛ “he lo” nɛ a tu he munyu ngɛ Roma Bi 8:4-13 ɔ tsɔɔ. E ngɔ si nɛ nɔ ko maa hi “ngɛ he lo nya a,” kɛ to “akɔnɔ ní yayamihi” nɛ ‘waa kɛ wa nɔmlɔ tso ɔ tsuɔ’ a he. (Rom. 7:5) Enɛ ɔ ha nɛ wa nu Paulo munyu nɛ ji “nihi nɛ baa a je mi ngɛ he lo nya a, he lo mi níhi a he a susuu” ɔ sisi saminya. Paulo ngɛ nihi nɛ a haa nɛ a we akɔnɔ yaya kɛ níhi nɛ a suɔ ɔ tsɔɔ mɛ nɔ́ nɛ e sa kaa a pee, nɛ a kɛ a juɛmi maa ní nɛ ɔmɛ a nɔ ɔ he munyu tue. Enɛ ɔ he ɔ, ni nɛ ɔmɛ ji nihi nɛ a dii a we akɔnɔ, a tsui nya ní peemi, aloo níhi nɛ a bua jɔ he ɔ se. Enɛ ɔ ma nyɛ maa pee bɔ mi nami, aloo ní kpa komɛ a he akɔnɔ.

8. Mɛni he je nɛ e da blɔ kaa Paulo bɔ Kristofohi nɛ a pɔ mɛ nu ɔ po kɔkɔ ngɛ ‘a je mi nɛ a maa ba ngɛ he lo nya a he’ ɔ?

8 Se eko ɔ, o ma bi si ke: Mɛni he je nɛ Paulo bɔ Kristofohi nɛ a pɔ mɛ nu ɔ kɔkɔ kaa oslaa ngɛ he kaa a maa ‘ba a je mi ngɛ he lo nya a’? Mwɔnɛ ɔ, anɛ Kristofohi nɛ Mawu kplɛɛ a nɔ kaa e huɛmɛ nɛ e bu mɛ dali ɔ ma nyɛ ma ya je oslaa kaa jã a mi lo? Aywilɛho sane ji kaa, Kristofo no fɛɛ Kristofo no ma nyɛ ma ha nɛ e he lo nɛ yi mluku ɔ nɛ kudɔ lɛ. Kaa nɔ hyɛmi nɔ́ ɔ, Paulo ngma kaa nyɛmimɛ komɛ nɛ a ngɛ Roma a bɔɔ “mɛ nitsɛmɛ a muklii [‘a we akɔnɔ,’ NW] mohu he mɔde.” Enɛ ɔ ma nyɛ maa pee bɔmi nami, niye ní, dã, aloo nɔ́ kpa ko he akɔnɔ. A kpɛti ni komɛ “kɛ munyu dɔkɔɔ gbeɔ nihi nɛ a juɛmi se ti we ɔ a yi mi, nɛ a sisiɔ mɛ.” (Rom. 16:17, 18; Filip. 3:18, 19; Yuda 4, 8, 12) Jehanɛ hu ɔ, mo kai kaa, nyɛminyumu ko hi Korinto asafo ɔ mi nɛ e “kɛ lɛ nitsɛ e tsɛ yo ngɛ si hwɔe.” (1 Kor. 5:1) Ke jã a, lɛɛ sisi numi ngɛ he kaa Mawu ha nɛ Paulo bɔ Kristofohi kɔkɔ ngɛ “He lo nya níhi a he juɛmi” he.Rom. 8:5, 6.

9. Mɛni Paulo kɔkɔ bɔmi nɛ ngɛ Roma Bi 8:6 a tsɔɔ we?

9 Kɔkɔ bɔmi nɛ ɔ kɔɔ wa he mwɔnɛ ɔ. Kristofo no ko nɛ e kɛ jehahi babauu sɔmɔ Mawu po ma nyɛ ma bɔni he lo nya níhi a he susumi. Anɛ Paulo ngɛ tsɔɔe kaa e sɛ nɛ wa susu ní komɛ kaa niye ní, ní tsumi, hɛja jemi, aloo suɔmi nɛ hii nyumu kɛ yo nɛ a sɛ gba si himi mi ɔ a kpɛti ɔ he lo? Ohoo. Ní nɛ ɔmɛ ji níhi nɛ Mawu sɔmɔli nyɛɔ peeɔ ngɛ si himi mi. Yesu ye ní, nɛ e ha nihi ní. E le kaa e he hia nɛ e jɔɔ e he. Nɛ  Paulo ngma kaa bɔmi nami he hia ngɛ gba si himi mi.

Anɛ níhi nɛ o sɛɛ ɔ he ní ɔ tsɔɔ kaa o ngɔ o juɛmi kɛ ma mumi mi níhi a nɔ aloo he lo nya níhi a nɔ? (Hyɛ kuku 10, 11)

10. Munyu nɛ ji “he lo nya níhi a he juɛmi” nɛ a kɛ tsu ní ngɛ Roma Bi 8:5, 6 a tsɔɔ mɛni?

10 Ke jã a, lɛɛ benɛ Paulo ngɛ ‘he lo nya níhi a he juɛmi’ he munyu tue ɔ, mɛni e ngɛ hlae maa tsɔɔ? Hela munyu nɛ Paulo kɛ tsu ní ɔ tsɔɔ kaa nɛ nɔ ko kɛ e juɛmi aloo e tsui tsuo maa ma nɔ́ ko nɔ. Womi mi lelɔ ko tsɔɔ kaa munyu nɛ ngɛ Roma Bi 8:5 ɔ kɔɔ “nihi nɛ behi fuu ɔ, a bua jɔɔ he lo nya níhi a he, a pɔɔ he munyu tumi,” nɛ a kɛ a juɛmi maa mɛ nitsɛmɛ a tsui nya ní peemi nɔ ɔ a he. A haa nɛ akɔnɔ nɛ ɔ tsɔɔ ɔ mɛ nɔ́ nɛ e sa kaa a pee ngɛ si himi mi.

11. Ke wa ngɛ sane bimi nɛ ji ‘Mɛni ji nɔ́ titli nɛ wa nyaa he?’ ɔ he susue ɔ, mɛni ji ní komɛ nɛ wa ma nyɛ ma susu he?

11 E he hia nɛ Kristofohi nɛ a ngɛ Roma a nɛ a kpa a mi konɛ a le níhi nɛ a kɛ peeɔ nɔ́ titli ngɛ a si himi mi. Anɛ e ma nyɛ maa ba kaa níhi nɛ a susuɔ he titli ji “he lo nya níhi” lo? E sa nɛ wɔ hu waa kpa wa mi konɛ waa le níhi nɛ a he hia wɔ wawɛɛ ngɛ si himi mi. Mɛni ji níhi nɛ wa bua jɔ he wawɛɛ nɛ wa pɔɔ he munyu tumi? Benɛ je ngɛ jɔe nɛ je ngɛ nae ɔ, mɛni ji níhi tutuutu nɛ wa pɔɔ se dimi? Eko ɔ, ni komɛ ma yɔse kaa nɔ́ nɛ a kɛ a juɛmi ma nɔ ji kaa a maa le bɔ nɛ dã slɔɔtohi tsuo ngɛ ha. Ni komɛ hu ma yɔse kaa a kɛ a juɛmi ma níhi nɛ a kɛ dlaa wehi a mi, tadehi nɛ ba nɔ, sika nɛ a kɛ woɔ ní tsumihi a mi, blɔ hiami, kɛ ní kpahi a nɔ. Tɔmi ko be ní nɛ ɔmɛ a he, ejakaa a ji níhi nɛ wa ma nyɛ maa pee ngɛ wa si himi mi. Kaa nɔ hyɛmi nɔ́ ɔ, be ko ɔ, Yesu pee wai, nɛ Paulo hu de Timoteo ke e ma nyɛ maa ‘nu wai bɔɔ.’ (1 Tim. 5:23; Yoh. 2:3-11) Se anɛ wai ji nɔ́ titli nɛ Yesu kɛ Paulo “pɔɔ he munyu tumi, nɛ a nyaa he” lo? Anɛ lɔ ɔ ji nɔ́ nɛ a suɔ wawɛɛ nɛ a ‘pɔɔ he ní sɛɛmi’ lo? Dɛbi. Wɔ hu nɛɛ? Mɛni ji nɔ́ titli nɛ wa nyaa he ngɛ si himi mi?

12, 13. Mɛni he je nɛ e sa kaa waa hyɛ níhi nɛ waa kɛ wa juɛmi maa nɔ ɔ saminya a?

12 E he hia nɛ waa kpa wa mi. Mɛni he je? Paulo ngma ke: ‘He lo nya níhi a he juɛmi ɔ kɛ gbenɔ baa.’ (Rom. 8:6) Enɛ ɔ ji nɔ́ ko nɛ hɛdɔ ngɛ he, ejakaa e ma nyɛ ma puɛ huɛ bɔmi nɛ ngɛ waa kɛ Yehowa wa kpɛti ɔ, nɛ hwɔɔ se ɔ, wa ma gbo. Se kɛ̃ ɔ, Paulo tsɔɔ we kaa ke nɔ ko bɔni ‘he lo nya níhi a he susumi’ pɛ ɔ, lɛɛ bɔ tsuaa bɔ nɛ ji ɔ, e ma gbo. Nɔ ɔ ma nyɛ ma tsake. Mo susu nyumu ɔ nɛ e hi Korinto asafo ɔ mi nɛ e ya di “he lo nya níhi” a se nɛ a fie lɛ ngɛ asafo ɔ mi ɔ he nɔ o hyɛ. Pee se ɔ, e kplɛɛ tsɔsemi nɛ a kɛ ha lɛ ɔ nɔ, nɛ e pee tsakemi. E kpa je mi bami yaya a, nɛ e ba sɔmɔ Yehowa ekohu.2 Kor. 2:6-8.

13 Ke nyumu nɛ ɔ nɛ e ya di he lo nya níhi a se vii ɔ po nyɛ nɛ e pee tsakemi ɔ, lɛɛ Kristofo no nɛ e ngɛ mwɔnɛ ɔ hu ma nyɛ maa pee tsakemi hluu tsɔ. Paulo kɔkɔ bɔmi ɔ tsɔɔ nɔ́ nɛ maa ba nihi nɛ a ‘kɛ a juɛmi maa he lo nya níhi a nɔ’ ɔ nɔ. E sa nɛ kɔkɔ bɔmi nɛ ɔ nɛ wo Kristofohi he wami nɛ a pee tsakemi!

“MUMI MI NÍHI A HE JUƐMI”

14, 15. (a) Benɛ Paulo bɔ wɔ kɔkɔ ngɛ “he lo nya níhi a he juɛmi” he se ɔ, mɛni e tsɔɔ kaa waa pee? (b) Ke a ke “mumi mi níhi a he juɛmi” ɔ, mɛni lɔ ɔ tsɔɔ we?

14 Benɛ bɔfo Paulo bɔ wɔ kɔkɔ ngɛ “he lo nya níhi a he juɛmi” he se ɔ, e tu he wami womi munyu nɛ nyɛɛ se nɛ ɔ: “Mumi mi níhi a he juɛmi ɔ haa nɔ wami, kɛ he jɔmi.” Wami kɛ he jɔmi ji jɔɔmihi nɛ a se be! Mɛni wa ma nyɛ maa pee konɛ wa nine nɛ su jɔɔmi nɛ ɔmɛ a nɔ?

15 “Mumi mi níhi a he juɛmi” ɔ tsɔɔ we kaa nɔ ko ma je e juɛmi kɛ je níhi nɛ yaa nɔ ngɛ si himi mi ɔ nɔ. E tsɔɔ we kaa e sɛ nɛ nɔ ɔ nɛ susu aloo e tu nɔ́ kpa ko he munyu kaa jã Baiblo ɔ, aloo suɔmi nɛ e ngɛ kɛ ha  Yehowa, kɛ hɛ nɔ kami nɛ e ngɛ kɛ ha hwɔɔ se ɔ he pɛ. Nyɛ ha nɛ wa kai kaa Paulo kɛ ni kpahi nɛ a hi si ngɛ kaseli ɔmɛ a be ɔ mi, nɛ a sa Mawu hɛ mi ɔ hu pee ní komɛ nɛ ni kpahi peeɔ ngɛ si himi mi ɔ eko. A ye ní, nɛ a nu ní. A kpɛti nihi fuu sɛ gba si himi mi, nɛ a fɔ bimɛ, nɛ a tsu ní hulɔ.Mar. 6:3; 1 Tes. 2:9.

16. E ngɛ mi kaa Paulo pee níhi nɛ nihi peeɔ ngɛ si himi mi ɔ eko mohu lɛɛ, se mɛni nɔ nɛ e ngɔ e juɛmi kɛ ma?

16 Se kɛ̃ ɔ, Mawu sɔmɔli nɛ ɔmɛ ha we nɛ níhi nɛ nɔ tsuaa nɔ nyɛɔ peeɔ ngɛ si himi mi ɔ nɛ he a juɛmi. Baiblo ɔ ha nɛ wa le kaa Paulo pee bo tsu kɛ hyɛ e he. Se Baiblo ɔ tsɔɔ hu kaa nɔ́ nɛ e ngɔ e juɛmi kɛ ma nɔ titli ji Kristofohi a fiɛɛmi ní tsumi kɛ ní tsɔɔmi ɔ. (Kane Bɔfo Ɔmɛ A Ní Tsumi 18:2-4; 20:20, 21, 34, 35.) Ní tsumi nɛ ɔmɛ ji ní tsumihi nɛ e wo e nyɛmimɛ nyumuhi kɛ yihi nɛ a ngɛ Roma a he wami kaa a ngɔ a he kɛ wo mi. Ngɛ anɔkuale mi ɔ, Paulo kɛ Mawu jami pee nɔ́ titli ngɛ e si himi mi. E he ba hia nɛ nyɛmimɛ nɛ a ngɛ Roma a nɛ a kase lɛ, nɛ jã kɛ̃ nɛ e sa kaa wɔ hu waa pee mwɔnɛ ɔ.Rom. 15:15, 16.

17. Ke waa kɛ wa ‘juɛmi ma mumi mi níhi a nɔ’ ɔ, mɛni se wa ma nyɛ ma ná?

17 Ke wa ngɔ wa juɛmi kɛ ma Yehowa sɔmɔmi nɔ ɔ, mɛni se wa ma ná? Roma Bi 8:6 a ha heto ke: “Mumi mi níhi a he juɛmi ɔ haa nɔ wami, kɛ he jɔmi.” Enɛ ɔ tsɔɔ kaa e sa nɛ wa ha nɛ mumi klɔuklɔu ɔ nɛ kudɔ wa juɛmi, nɛ wa susu níhi a he kaa bɔ nɛ Mawu susuɔ níhi a he ɔ. Wa ma nyɛ ma ná nɔmi mami kaa ke waa kɛ “mumi mi níhi” pee nɔ́ titli ngɛ wa si himi mi ɔ, wa bua maa jɔ. Nɛ nyagbenyagbe ɔ, wa maa hi si kɛ ya neneene ngɛ hiɔwe aloo ngɛ zugba a nɔ.

18. Ke waa kɛ ‘wa juɛmi ma mumi mi níhi a nɔ ɔ’, kɛ lɔ ɔ ma ha nɛ wa ná tue mi jɔmi ha kɛɛ?

18 Nyɛ ha nɛ wa kai kaa ‘mumi mi níhi a he juɛmi ɔ haa nɔ he jɔmi.’ Nihi fuu gboɔ dengme kɛ hlaa tue mi jɔmi. Bemi nɛ a hɛ dɔ wawɛɛ kɛ ngɛ tue mi jɔmi hlae ɔ, wɔɔ lɛɛ wa ngɛ tue mi jɔmi momo. Akɛnɛ wa bɔɔ mɔde kaa waa kɛ wa weku mi bimɛ kɛ nihi nɛ a ngɛ wa we asafo ɔmɛ a mi ɔ maa hi si saminya he je ɔ, wa ngɛ tue mi jɔmi. Wa le kaa waa kɛ wa nyɛmimɛ tsuo yi mluku. Enɛ ɔ he je ɔ, ngɛ behi kɛ behi a mi ɔ, nyagbahi ma nyɛ maa ba wa kpɛti. A tsɔɔ wɔ kaa ke e ba jã a, waa kɛ Yesu ga womi nɛ ɔ nɛ tsu ní: “O kɛ o nyɛmi ɔ ya kpata.” (Mat. 5:24) Ke wa kai kaa wa nyɛminyumu ɔ aloo wa nyɛmiyo ɔ hu ngɛ “he jɔmi Mawu ɔ” jae ɔ, e be yee ha wɔ kaa wa maa pee jã.Rom. 15:33; 16:20.

19. Ke waa kɛ wa juɛmi ma mumi mi níhi a nɔ ɔ, mɛni tue mi jɔmi nɛ se be nɛ wa ma ná?

19 Tue mi jɔmi kpa ko hu ngɛ nɛ se be. “Mumi mi níhi a he juɛmi” ma ha nɛ tue mi jɔmi maa hi waa kɛ wa Bɔlɔ ɔ wa kpɛti. Munyu nɛ Yesaya tu ɔ ba mi ngɛ e be ɔ mi, se mwɔnɛ ɔ hu ɔ, e ngɛ mi bae wawɛɛ. E de ke: ‘Nɔ nɛ ngɔɔ e hɛ kɛ fɔɔ mo Yehowa o nɔ, nɛ e heɔ mo yeɔ ɔ, o haa lɛ tue mi jɔmi.’Yes. 26:3; kane Roma Bi 5:1.

20. Mɛni he je nɛ o bua jɔ ga womi nɛ ngɛ Roma Bi yi 8 ɔ he ɔ?

20 Wa piɛɛ nihi nɛ a pɔ mɛ nu ɔ a he jio, wa piɛɛ nihi nɛ a maa hi si kɛ ya neneene ngɛ paradeiso mi ngɛ zugba a nɔ ɔ a he jio, wɔ tsuo wa ma nyɛ ma ná ga womi nɛ ngɛ Roma Bi yi 8 ɔ he se. Wa bua jɔ wawɛɛ kaa Baiblo ɔ wo wɔ he wami konɛ wa ko ha nɛ “he lo nya níhi” nɛ pee nɔ́ titli ngɛ wa si himi mi! Mohu ɔ, wa le kaa juɛmi ngɛ mi kaa waa kɛ ga womi nɛ nyɛɛ se nɛ ɔ ma tsu ní: “Mumi mi níhi a he juɛmi ɔ haa nɔ wami, kɛ he jɔmi.” Ke wa kɛ ga womi nɛ ɔ tsu ní ɔ, jɔɔmi nɛ wa ma ná a maa hi si kɛ ya neneene, ejakaa Paulo de ke: “Yayami he hiɔwo ji gbenɔ; se Mawu nɔke nɔ́ ɔ ji neneene wami nɛ wa naa ngɛ wa Nyɔmtsɛ Yesu Kristo mi.”Rom. 6:23.