‘Nihi nɛ Yehowa ji a Mawu ɔ ngɛ bua jɔmi!’​—LA 144:15.

LAHI: 111, 109

1. Mɛni he je nɛ be nɛ wa ngɛ mi ɔ ngɛ slɔɔto ɔ?

NGƐ adesa yi nɔ sanehi tsuo a mi ɔ, be nɛ wa ngɛ mi nɛ ɔ ngɛ slɔɔto kulaa. Yehowa ngɛ ‘asafo kuu ngua ko nɛ a je je mahi tsuo kɛ wɛtsohi kɛ nihi kɛ gbihi a mi’ ɔ nya buae kaa bɔ nɛ Baiblo ɔ gba kɛ fɔ si ɔ. Nihi nɛ a bua a nya a ba pee “ma kpetekpleenyɛ,” nɛ a he hiɛ pe ayɔ kpaanyɔ. A kɛ bua jɔmi ngɛ Mawu “sɔmɔe ngɛ blɔ nɛ ngɛ klɔuu nɔ nyɔ kɛ pia.” (Kpoj. 7:9, 15; Yes. 60:22) Wa nɛ́ nimli babauu nɛ a suɔ Mawu kɛ a nyɛmi nɔmlɔ kaa kikɛ hyɛ.

2. Mɛni suɔmi nɛ hí nɛ nihi nɛ a kɛ Mawu be huɛ bɔmi ɔ jeɔ kpo? (Moo hyɛ foni nɛ ngɛ ní kasemi ɔ sisije ɔ.)

2 Ngmami klɔuklɔu ɔ tsɔɔ hu kaa nihi ma ná suɔmi kpa ko nɛ e hí saasaa ngɛ wa be nɛ ɔ mi. Lɔ ɔ ji kaa nihi maa suɔ mɛ pɛ a he. Jã nɛ nihi nɛ a kɛ Mawu be huɛ bɔmi ko ɔ peeɔ a ní. Bɔfo Paulo ngma ke: “Ngɛ nyagbe ligbi ɔmɛ a mi ɔ, . . . adesahi maa pee nihi nɛ a suɔ mɛ nitsɛmɛ a he, sika suɔli, . . . nihi nɛ a suɔ níhi nɛ haa nɔ bua jɔmi pe bɔ nɛ a suɔ Mawu.” (2 Tim. 3:1-4) Suɔmi nɛ foɔ lɛ pɛ e nɔ́ mi nɛ ɔ kɛ suɔmi nɛ Kristofohi ngɛ kɛ ha Mawu ɔ kɔ we kulaa. Nihi nɛ a jeɔ su nɛ ɔmɛ kpo ɔ ná we bua jɔmi nitsɛnitsɛ nɛ a ngɛ hlae ɔ. Ngɛ anɔkuale mi ɔ, nihi nɛ a  jeɔ suɔmi nɛ ɔ kpo ɔ ha nɛ si himi ɔ “mi wa” wawɛɛ.

3. Mɛni he wa ma susu ngɛ munyu nɛ ɔ mi, nɛ mɛni he je?

3 Bɔfo Paulo yɔse kaa su nɛ ɔ nɛ nihi jeɔ kpo ɔ ma nyɛ maa pee ka kɛ ha Kristofohi. Enɛ ɔ he ɔ, e bɔ wɔ kɔkɔ kaa wa ‘je wa he kɛ je’ nihi nɛ a jeɔ suɔmi yaya nɛ ɔ kpo ɔ a he. (2 Tim. 3:5) Se wa be nyɛe ma je wa he kɛ je nimli nɛ ɔmɛ a he kulaa. Enɛ ɔ he ɔ, mɛni wa ma nyɛ maa pee konɛ wa je wa he kɛ je nihi nɛ a jeɔ su nɛ ɔ kpo ngɛ je ɔ mi ɔ a he konɛ waa bɔ mɔde nɛ waa sa Mawu nɛ ngɛ suɔmi ɔ hɛ mi? Nyɛ ha nɛ waa hyɛ slɔɔto nɛ ngɛ suɔmi nitsɛnitsɛ kɛ suɔmi nɛ a tu he munyu ngɛ 2 Timoteo 3:2-4 ɔ a kpɛti. Jã nɛ wa maa pee ɔ maa ye bua wɔ nɛ wa ma je suɔmi nɛ haa nɔ bua jɔmi nitsɛnitsɛ ɔ kpo saminya.

ANƐ O SUƆ MAWU ALOO O SUƆ MO NITSƐ O HE?

4. Mɛni he je nɛ tɔmi be he kaa wa maa suɔ wɔ nitsɛmɛ wa he bɔ nɛ sa a?

4 Mawu mumi ɔ ha nɛ bɔfo Paulo ngma ke, “adesahi maa pee nihi nɛ a suɔ mɛ nitsɛmɛ a he.” Anɛ tɔmi ngɛ he kaa nɔ ko maa suɔ e he lo? Dɛbi, tɔmi be he. Ngɛ anɔkuale mi ɔ, e hi kaa wa maa suɔ wa he bɔ nɛ sa. Jã nɛ Yehowa bɔ wɔ. Yesu de ke: “E sa nɛ o suɔ o nyɛmi kaa bɔ nɛ o suɔ o he ɔ.” (Maak. 12:31) Ke wa sume wa he ɔ, wa be nyɛe maa suɔ wa nyɛmi. Ngmami ɔ po de ke: “Hunomɛ hu nɛ a suɔ a yi ɔmɛ kaa mɛ nitsɛmɛ a nɔmlɔ tso ɔmɛ. Nyumu nɛ e suɔ e yo ɔ suɔ lɛ nitsɛ e he, ejakaa nyumu ko be nɛ e nyɛɔ lɛ nitsɛ e nɔmlɔ tso, mohu ɔ, e haa lɛ niye ní nɛ e fiɛ we e he.” (Efe. 5:28, 29) Enɛ ɔ he ɔ, e hi kaa wa maa suɔ wɔ nitsɛmɛ wa he bɔ nɛ sa.

5. Kɛ o maa kale nihi nɛ a suɔ mɛ nitsɛmɛ a he tsɔ ɔ ha kɛɛ?

5 Suɔmi nɛ a wo ta ngɛ 2 Timoteo 3:2 ɔ pi suɔmi kpakpa. E ji suɔmi yaya, nɛ e foɔ lɛ pɛ e nɔ́ mi. Nihi nɛ a suɔ a he tsɔ ɔ susuɔ a he pe bɔ nɛ e sa kaa a susu a he. (Kane Roma Bi 12:3.) Nɔ́ nɛ a susuɔ he pɛ ji mɛ nitsɛmɛ a he. A susuu we ni kpahi a he. Ke níhi yɛ nɔ saminya ha mɛ ɔ, a piaa ni kpahi mohu. Baiblo mi munyuhi a sisi tsɔɔmi womi ko ngɔ nihi nɛ a ngɛ jã a kɛ to lohwe ko nɛ e ngɛ kaa ‘kɔtɔkɔ aloo ablɛgogoe ɔ he. Lohwe nɛ ɔ kokloɔ e he kɛ woɔ e bwɔmi nɛ ngɛ bɔdɔɔ ɔ mi kɛ poɔ e he piɛ. Nɛ e jeɔ e he womi nɛ ngɛ kaa mio ɔ kpo kɛ tsɔɔ ni nɛmɛ nɛ a be eko ɔ.’ Nihi nɛ a foɔ mɛ nitsɛmɛ pɛ a nɔ́ mi ɔ be bua jɔmi nitsɛnitsɛ.

6. Ke wa suɔ Mawu ɔ, mɛni nɔ́ kpakpa wa náa kɛ jeɔ mi?

6 Baiblo mi ní leli komɛ tsɔɔ kaa benɛ bɔfo Paulo ngɛ suhi nɛ nihi ma je kpo ngɛ nyagbe ligbi ɔmɛ a mi ɔ he munyu tue ɔ, e tu nihi nɛ a suɔ mɛ nitsɛmɛ a he ɔ he munyu kekle loko e tu su yayahi nɛ piɛ ɔmɛ a he munyu, ejakaa ke nɔ ko suɔ lɛ nitsɛ e he ɔ, e jeɔ suhi nɛ piɛ ɔmɛ hu kpo. Se nihi nɛ a suɔ Mawu ɔ lɛɛ, a su ngɛ ekpa kulaa. Baiblo ɔ tsɔɔ kaa nihi nɛ a suɔ Mawu ɔ jeɔ bua jɔmi, tue mi jɔmi, tsui si tomi, mi mi jɔmi, kpakpa peemi, hemi kɛ yemi, he jɔmi, kɛ he nɔ yemi kpo. (Gal. 5:22, 23) La polɔ ɔ ngma ke, ‘Nihi nɛ Yehowa ji a Mawu ɔ ngɛ bua jɔmi.’ (La 144:15) Yehowa ji bua jɔmi Mawu, nɛ e we bi hu ngɛ bua jɔmi. Jehanɛ hu ɔ, Yehowa sɔmɔli be kaa nihi nɛ a suɔ mɛ nitsɛmɛ pɛ a he nɛ be fɛɛ be ɔ, a suɔ kaa nihi nɛ a ha mɛ níhi ɔ. Mohu ɔ, a ngɔɔ a he kɛ haa, nɛ a yeɔ bua ni kpahi.​—Níts. 20:35.

Mɛni wa maa pee konɛ wa ko suɔ wa he tsɔ? (Hyɛ kuku 7)

7. Mɛni sane bimihi maa ye bua wɔ konɛ waa hyɛ kaa wa suɔ Mawu niinɛ lo?

7 Kɛ wa ma plɛ kɛ le kaa wa ngɛ wɔ nitsɛmɛ wa he suɔe pe bɔ nɛ e sa kaa waa suɔ Mawu ha kɛɛ? Nyɛ ha nɛ wa susu ga womi nɛ ngɛ Filipi Bi 2:3, 4 ɔ he nɛ waa  hyɛ. E de ke: “Nyɛ ko ngɔ pɛ aloo yaka hɛ mi nyami hlami kɛ pee nɔ́ ko nɔ́ ko, mohu ɔ, nyɛɛ je he si bami mi nɛ nyɛɛ bu ni kpahi kaa a nɔ kuɔ pe nyɛ, be mi nɛ nyɛ fo we nyɛ nitsɛmɛ pɛ nyɛ nɔ́ mi, se mohu nyɛ foɔ ni kpahi hu a nɔ́ mi ɔ.” E sa nɛ wa ti nɔ fɛɛ nɔ nɛ bi e he ke: ‘Anɛ i kɛ jamɛ a ga womi ɔ ngɛ ní tsue lo? Anɛ i bɔɔ mɔde kaa ma pee Mawu suɔmi nya ní lo? Anɛ i bɔɔ mɔde kaa ma ye bua ni kpahi ngɛ asafo ɔ mi kɛ fiɛɛmi mi lo?’ E be gbɔjɔɔ kaa wa maa pee ní nɛ ɔmɛ. Ja wa mia wa hɛ mi loko wa ma nyɛ maa ngɔ wa he kɛ sã afɔle ha nihi. Se ke wa pee jã a, wa bua maa jɔ, ejakaa je mluku ɔ tsuo Nɔ Yelɔ ɔ bua maa jɔ wa he.

8. Mɛni nɛ suɔmi nɛ nihi ngɛ kɛ ha Mawu ɔ ha nɛ a pee?

8 Suɔmi nɛ nihi ngɛ kɛ ha Mawu ɔ ha nɛ a ngmɛɛ ní tsumi komɛ nɛ ma nyɛ ma ha mɛ sika fuu ɔ he konɛ a nyɛ nɛ a kɛ a be tsuo nɛ sɔmɔ Yehowa. Nyɛmiyo ko nɛ a tsɛɛ lɛ ke Ericka nɛ e ngɛ United States ɔ ji dɔkita. Jinɛ e ma nyɛ ma ba pee dɔkita ngua ngɛ hiɔ tsami mi, se e ba pee daa blɔ gbalɔ, nɛ e kɛ e huno sɔmɔ ngɛ mahi fuu a nɔ. Ericka de ke: “Bɔ nɛ wa ye bua nihi nɛ a tuɔ gbi kpa ngɛ ma slɔɔtohi a nɔ, kɛ huɛmɛ kpakpahi nɛ wa ná a ha nɛ wa ná bua jɔmi ngɛ si himi mi. E ngɛ mi kaa loloolo ɔ, dɔkita ji mi mohu lɛɛ, se i náa be babauu kɛ tsaa nihi ngɛ mumi mi, nɛ i yeɔ bua ngɛ asafo ɔ mi hulɔ. Enɛ ɔ haa mi bua jɔmi pe nɔ́ fɛɛ nɔ́.”

ANƐ O SUƆ JUETLI NƐ NGƐ HIƆWE ALOO JUETLI NƐ NGƐ ZUGBA A NƆ?

9. Mɛni he je nɛ nihi nɛ a suɔ sika a be bua jɔmi ɔ?

9 Paulo ngma ke, nihi maa pee “sika suɔli.” Jeha komɛ nɛ be ɔ, blɔ gbalɔ ko nɛ e ngɛ Ireland ɔ fiɛɛ kɛ ha nyumu ko. Nyumu ɔ je sika kɛ tsɔɔ nyɛminyumu ɔ nɛ e de lɛ ke: “Ye mawu ji nɛ ɔ nɛ!” E ngɛ mi kaa nihi fuu be a ní pee kaa bɔ nɛ nyumu ɔ pee ɔ, se ngɛ je ɔ mi mwɔnɛ ɔ, nihi fuu suɔ sika kɛ nɔ́ fɛɛ nɔ́ nɛ sika ma nyɛ ma he ɔ. Se Baiblo ɔ bɔ wɔ kɔkɔ ke: “Nɔ nɛ suɔ sika a, sika tɔɛ lɛ; nɔ nɛ suɔ nɛ e ná ní ɔ, ní babauu gbi e nya.” (Fiɛlɔ 5:10) Nihi nɛ a ngɛ jã a suɔ kaa a ma ná sika fuu, se jã nɛ a peeɔ ɔ haa nɛ a ‘piiɔ babauu.’​—1 Tim. 6:9, 10.

10. Mɛni Baiblo ɔ de ngɛ ní nami kɛ ohia he?

10 E ji anɔkuale kaa wɔ tsuo wa hia sika, ejakaa waa kɛ poɔ wa he piɛ. (Fiɛlɔ 7:12) Se ke nɔ ko nine su e hiami níhi pɛ a nɔ ɔ, anɛ e ma nyɛ ma ná bua jɔmi lo? Ee! (Kane Fiɛlɔ 5:12.) Yake bi Agur ngma ke: “Ko ha nɛ ma ná ní kpɔtɔɔ, nɛ ko ha nɛ ma ye ohia hulɔ; niye ní nɛ maa su mi ɔ, lɔ ɔ pɛ o ha mi.” Wa le nɔ́ he je nɛ e sume kaa e maa ye ohia a. Kaa bɔ nɛ e tsɔɔ nya a, e sume nɛ e ye ohia nɛ e ya ju, ejakaa Mawu sume jumi. Se mɛni he je nɛ e sɔle kaa Mawu nɛ ko ha nɛ e ná ní kpɔtɔɔ ɔ? E ngma ke: ‘Ke i ná ní kpɔtɔɔ ɔ, ma kua mo, nɛ ma de ke, “Mɛnɔ kulaa ji Yehowa?”’ (Abɛ 30:8, 9) Eko po ɔ, o le ni komɛ nɛ a ngɔ a hɛ kɛ fɔ níhi nɛ a ngɛ ɔ nɔ mohu pe Mawu.

11. Mɛni ga womi Yesu kɛ ha ngɛ sika he?

11 Nihi nɛ a suɔ sika be nyɛe maa sa Mawu hɛ mi. Yesu de ke: “Nɔ ko be nyɛe maa pee nyɔguɛ kɛ ha nyɔmtsɛmɛ enyɔ; ejakaa ke e ná we nɔ kake he ninyɛ nɛ e suɔ nɔ kpa a, lɛɛ e maa mɛtɛ nɔ kake he nɛ e ma kua nɔ kpa a. Nyɛ be nyɛe maa pee nyɔguɛhi kɛ ha Mawu, kɛ Ní Nami tsuo.” Se loko e maa tu munyu nɛ ɔ, e de ke: “Nyɛɛ jɔɔ juetli si tomi ha nyɛ he ngɛ zugba a nɔ, he nɛ wɔyewɔye kɛ kana puɛɔ ní ngɛ, nɛ juli ywiaa kɛ sɛɛ mi nɛ a ya juɔ ɔ. Mohu ɔ, nyɛɛ to juetli si ha nyɛ he ngɛ hiɔwe, he nɛ wɔyewɔye kɛ kana puɛ we ní ngɛ, nɛ juli be ywiae nɛ a sɛ mi nɛ a ya ju ɔ.”​—Mat. 6:19, 20, 24.

12. Ke wa pee wa si himi kpokploo ɔ, kɛ lɔ ɔ maa ye bua wɔ konɛ wa sɔmɔ Yehowa ha kɛɛ? Mo ha enɛ ɔ he nɔ hyɛmi nɔ́.

 12 Nihi babauu na kaa a si himi nɛ a pee kpokploo ɔ ha nɛ a ngɛ bua jɔmi, nɛ a náa be kɛ sɔmɔɔ Yehowa. Jack nɛ e ngɛ United States ɔ jua e we kɛ e ní tsumi ejakaa e le kaa jã nɛ e maa pee ɔ ma ha nɛ e ná be babauu konɛ e kɛ e yo ɔ tsuo nɛ a sɔmɔ kaa blɔ gbali. Jack de ke: “Jinɛ e he wa ha wɔ kaa wa maa ngmɛɛ wa we nɛ ngɛ fɛu kɛ wa weto ní kpa amɛ a he. Jehahi babauu nɛ i kɛ tsu ní ɔ, ligbi ko be nɛ i jeɔ ní tsumi kɛ baa we mi kɛ bua jɔmi. Se ye yo nɛ e ji blɔ gbalɔ ɔ lɛɛ, e ngɛ bua jɔmi be fɛɛ be. Ke pee ɔ, e deɔ ke e ngɛ nitsumitsɛ ko nɛ e se be! Amlɔ nɛ ɔ nɛ imi hu i ji blɔ gbalɔ ɔ, i kɛ lɛ tsuo wa ngɛ ní tsue ha nitsumitsɛ kake, nɛ ji Yehowa.”

Mɛni wa maa pee konɛ wa ko suɔ sika tsɔ? (Hyɛ kuku 13)

13. Mɛni maa ye bua wɔ konɛ waa le bɔ nɛ wa naa sika ha nitsɛnitsɛ?

13 Ke wa ngɛ hlae nɛ waa le bɔ nɛ wa naa sika ha nitsɛnitsɛ ɔ, lɛɛ e sa nɛ wa susu sane bimihi nɛ nyɛɛ se nɛ ɔmɛ a he saminya: ‘Anɛ i heɔ nɔ́ nɛ Baiblo ɔ de ngɛ sika he ɔ yeɔ niinɛ, nɛ i kɛ tsuɔ ní lo? Anɛ sika ji nɔ́ titli ngɛ ye si himi mi lo? Anɛ i suɔ he lo nya níhi pe Yehowa kɛ nimli lo? Anɛ i ngɛ hemi kɛ yemi kaa Yehowa ma ha mi ye hiami níhi lo?’ Wa ma nyɛ ma ná nɔ mi mami kaa Yehowa be nihi nɛ a ngɔɔ a hɛ kɛ fɔɔ e nɔ ɔ kuae gblegbleegble.​—Mat. 6:33.

ANƐ O SUƆ YEHOWA ALOO O SUƆ NÍHI NƐ HAA NƆ BUA JƆMI?

14. Mɛni ji juɛmi nɛ da nɛ e sa kaa wa ná ngɛ níhi nɛ haa nɔ bua jɔmi ɔ he?

14 Kaa bɔ nɛ a gba kɛ fɔ si ɔ, mwɔnɛ ɔ, nihi babauu “suɔ níhi nɛ haa nɔ bua jɔmi.” Kaa bɔ nɛ tɔmi ko be he kaa wa ma ná sika bɔɔ nɛ waa suɔ wa he bɔ nɛ sa a, jã kɛ̃ nɛ tɔmi ko hu be he kaa wa ma ná bua jɔmi bɔ nɛ sa. Yehowa sume nɛ waa tsi wa he nya ngɛ ní kpakpahi nɛ haa nɔ bua jɔmi ngɛ si himi mi ɔ he. Baiblo ɔ woɔ Yehowa sɔmɔli he wami ke: “Yaa nɛ o ya ye ní, nɛ o ná bua jɔmi. Yaa nu wai, nɛ o tsui nɛ nɔ o mi.”​—Fiɛlɔ 9:7.

15. Mɛni nɛ munyu nɛ ji, “nihi nɛ a suɔ níhi nɛ haa nɔ bua jɔmi” nɛ a tu he munyu ngɛ 2 Timoteo 3:4 ɔ tsɔɔ?

15 Timoteo womi nɛ ji enyɔ, yi etɛ kuku eywiɛ ɔ tsɔɔ kaa ni komɛ suɔ níhi nɛ haa  nɔ bua jɔmi, se a sume Mawu. Mo kadi kaa kuku ɔ de ke nihi maa suɔ níhi nɛ haa nɔ bua jɔmi “pe bɔ nɛ a suɔ Mawu.” Se ní lelɔ ko ngma ke: “Enɛ ɔ tsɔɔ we kaa a ngɛ suɔmi bɔɔ ko ha Mawu. E tsɔɔ kaa a sume Mawu kulaa.” Atsinyɛ jemi ko be he kaa enɛ ɔ ji kɔkɔ bɔmi nɛ hɛdɔ ngɛ he kɛ ha nihi nɛ a suɔ kaa a ma ná suɔmi kɛ ha níhi nɛ haa nɔ bua jɔmi ɔ! Munyu nɛ ji, “nihi nɛ a suɔ níhi nɛ haa nɔ bua jɔmi” ɔ tsɔɔ nihi nɛ ‘je mi ngɔɔmi yemi sisi mɛ.’​—Luka 8:14.

16, 17. Mɛni nɔ hyɛmi nɔ́ Yesu pee ha wɔ ngɛ hɛja jemi kɛ bua jɔmi nami blɔ fa mi?

16 Yesu tsɔɔ bɔ nɛ wa ma nyɛ ma ná bua jɔmi nɛ sa ha. Yesu ya ‘yo kpeemi okplɔɔ ngmɛmi’ kɛ ‘okplɔɔ ngmɛmi ngua ko’ sisi. (Yoh. 2:1-10; Luka 5:29) Benɛ dã ta ngɛ yo kpeemi ɔ sisi ɔ, Yesu pee nyakpɛ ní ko. E tsake nyu kɛ pee wai. Be ko hu nɛ nihi tu munyu kɛ si lɛ ngɛ ní nɛ e ye kɛ dã nɛ e nu he je ɔ, Yesu tsɔɔ mɛ kaa juɛmi nɛ a hɛɛ ɔ dɛ.​—Luka 7:33-36.

17 Se Yesu ngɔɛ ní yemi kɛ ní numi kɛ pee nɔ́ titli ngɛ e si himi mi. E ha nɛ Yehowa he hia lɛ pe nɔ́ fɛɛ nɔ́, nɛ e gbo dengme kɛ ye bua nihi hulɔ. E ngɔ e he kɛ ha, nɛ e na nɔ́ kɛ gbo ngɛ sɛumi tso nɔ bɔ nɛ pee nɛ a he nihi babauu a yi wami. Yesu de nihi nɛ a suɔ kaa a maa nyɛɛ e se ɔ ke: “Ke nihi pue nyɛ hɛ mi si, nɛ a wa nyɛ yi mi, nɛ a tu lakpa munyu yayami slɔɔtohi kɛ si nyɛ ngɛ ye he ɔ, nyɛ bua nɛ jɔ. Nyɛ nya nɛ nyɛ bua nɛ jɔ wawɛɛ, ejakaa nyɛ hiɔwo kle ngɛ hiɔwe. Jã kɛ̃ nɛ a wa gbali ɔmɛ nɛ a sɛ nyɛ hlami ɔ yi mi.”​—Mat. 5:11, 12.

Mɛni wa maa pee konɛ wa ko suɔ hɛja jemi tsɔ? (Hyɛ kuku 18)

18. Mɛni sane bimihi maa ye bua wɔ konɛ waa le nimli nɛ wa ji ngɛ hɛja jemi blɔ fa mi?

18 Kɛ wa ma plɛ kɛ le kaa wa suɔ hɛja jemi tsɔ ha kɛɛ? E maa hi kaa wa ma bi wa he ke: ‘Anɛ hɛja jemi he hia mi pe fiɛɛmi yami kɛ asafo mi kpehi a yami lo? Anɛ ma nyɛ ma ngɔ ní komɛ nɛ ye bua jɔ he kɛ sã afɔle konɛ ma sɔmɔ Mawu lo? Ke i ngɛ hlae nɛ ma je ye hɛja a, anɛ i susuɔ bɔ nɛ Yehowa naa jamɛ a hɛja jemi ɔ ha a he lo?’ Ke wa suɔ Mawu nitsɛnitsɛ ɔ, pi níhi nɛ wa le kaa Mawu sume ɔ pɛ nɛ wa ma kua, se wa ma kua níhi nɛ wa nuɔ he kaa Mawu bua jɔɛ he ɔ hulɔ.​—Kane Mateo 22:37, 38.

NƆ́ NƐ HAA NƆ BUA JƆMI NITSƐNITSƐ

19. Mɛnɔmɛ nɛ a be nyɛe ma ná bua jɔmi nitsɛnitsɛ gblee?

19 Satan je ɔ nɛ́ ha nɛ adesahi ngɛ nɔ́ nae maa pee jeha 6,000 ji nɛ ɔ ma nyagbe. Nimli nɛ a suɔ mɛ pɛ a he, kɛ nimli nɛ a suɔ sika kɛ hɛja jemi sɔuu lɛ a ngɛ je ɔ mi. A bɔɔ mɔde kaa a nine maa su níhi nɛ a ngɛ hlae ɔ nɔ kokooko, nɛ lɔ ɔ he hia mɛ pe nɔ́ fɛɛ nɔ́ ngɛ a si himi mi. Nimli kaa jã a be bua jɔmi nitsɛnitsɛ náe gblee ngɛ a si himi mi. Se kaa bɔ nɛ la polɔ ɔ de ɔ, ‘Nɔ nɛ Yakɔb Mawu ɔ ji e he piɛɛlɔ, nɛ e ngɔɔ e hɛ kɛ fɔɔ Yehowa e Mawu ɔ nɔ ɔ, e ngɛ bua jɔmi.’​—La 146:5.

20. Mɛni blɔ nɔ nɛ suɔmi nɛ o ngɛ kɛ ha Mawu ɔ haa mo bua jɔmi?

20 Mawu we bi suɔ Yehowa wawɛɛ, nɛ daa jeha a, ni hehi ba piɛɛɔ a he, nɛ mɛ hu a náa suɔmi kɛ haa Yehowa. Enɛ ɔ tsɔɔ kaa Mawu Matsɛ Yemi ɔ ngɛ nɔ yee, nɛ e be kɛe nɛ e maa ngɔ jɔɔmihi nɛ wa nɛ́ eko hyɛ kɛ ba zugba a nɔ. Ke wa pee Mawu suɔmi nya ní ɔ, lɔ ɔ haa nɛ Mawu Ope ɔ bua jɔɔ wawɛɛ nɛ wɔ hu wa náa bua jɔmi nitsɛnitsɛ. Nihi nɛ a suɔ Yehowa a ma ná bua jɔmi kɛ ya neneene! Ngɛ munyu nɛ nyɛɛ se ɔ mi ɔ, wa ma susu su yaya komɛ nɛ nihi nɛ a foɔ mɛ pɛ a nɔ́ mi ɔ jeɔ kpo ɔ he. Jehanɛ hu ɔ, waa kɛ jamɛ a su ɔmɛ maa to su kpakpahi nɛ Yehowa sɔmɔli jeɔ kpo ɔ he.