“Ke Bi ɔ ha nɛ nyɛ ye nyɛ he ɔ, nyɛ maa ye nyɛ he niinɛ.”—YOH. 8:36.

LAHI: 54, 36

1, 2. (a) Mɛni odase lɛ tsɔɔ kaa nihi suɔ nɛ a ná he yemi? (b) Mɛni lɛ jeɔ mɔde nɛ a bɔɔ kaa a maa ye a he ɔ mi kɛ baa?

MWƆNƐ Ɔ, he yemi ji nɔ́ ko nɛ nihi pɔɔ he munyu tumi wawɛɛ. Ngɛ je ɔ mi hehi fuu ɔ, nihi suɔ kaa a maa ye a he ngɛ yi mi wami, nɔ hɛ mi hyɛmi kɛ ohia si himi he. Nihi suɔ kaa mɛ nitsɛmɛ a maa hla níhi nɛ a suɔ, a suɔ nɛ a je a susumihi kpo faa, nɛ́ a pee níhi nɛ mɛ nitsɛmɛ a suɔ. Nɔ fɛɛ nɔ suɔ nɛ e ná he yemi.

2 Se níhi nɛ nihi peeɔ kɛ hlaa he yemi ɔ ngɔɔ nyagbahi fuu kɛ baa. Nihi tsɔɔ atua, a ngmɛɛɔ a ní tsumi dadehi a he kɛ pueɔ si, nɛ a peeɔ basabasa. Se anɛ ní nɛ ɔmɛ nɛ a peeɔ ɔ haa nɛ a náa he yemi nɛ a ngɛ hlae ɔ lo? Dɛbi. Mohu ɔ, nihi plaa, nɛ ni komɛ po gboɔ. Ní nɛ ɔmɛ tsuo ji odase nɛ maa anɔkuale munyu nɛ Mawu ha nɛ Matsɛ Solomon ngma a nɔ mi. E ngma ke: “Ni komɛ ngɔɔ blɔ nya nɛ a ná a kɛ yeɔ a nyɛmimɛ awi.”​—Fiɛlɔ 8:9.

3. Mɛni wa ma nyɛ maa pee konɛ wa ná bua jɔmi nitsɛnitsɛ?

3 Kaselɔ Yakobo tsɔɔ nɔ́ titli nɛ haa nɛ nɔ náa bua jɔmi nitsɛnitsɛ kɛ he yemi. E ngma ke: “Nɔ nɛ e hyɛɛ mlaa nɛ hi kɛ  pi si nɛ haa nɛ nɔ yeɔ e he ɔ mi fitsofitso, nɛ e yaa nɔ ngɛ mi ɔ, . . . e bua maa jɔ ngɛ níhi nɛ e peeɔ ɔ mi.” (Yak. 1:25) Yehowa, nɔ nɛ e ha wɔ mlaa nɛ hi kɛ pi si nɛ ɔ le níhi nɛ ma ha adesahi bua jɔmi kɛ he yemi nitsɛnitsɛ. E ha Adam kɛ Hawa he yemi nitsɛnitsɛ, kɛ nɔ́ tsuaa nɔ́ nɛ a hia konɛ a bua nɛ jɔ.

JINƐ ADESAHI NGƐ HE YEMI NITSƐNITSƐ

4. Mɛni he yemi nɛ Adam kɛ Hawa ná? (Moo hyɛ foni nɛ ngɛ ní kasemi ɔ sisije ɔ.)

4 Ke wa ngɛ Mose kekleekle womi ɔ yi kake kɛ enyɔ ɔ kanee ɔ, wa naa kaa Adam kɛ Hawa ná he yemi nɛ nihi ngɛ hlae mwɔnɛ ɔ. Nɔ́ ko nɔ́ ko he hia we mɛ, nɔ́ ko wui a he gbeye, nɛ nɔ ko hu wɛ mɛ yi mi. A hɛwi ngɛ niye ní, ní tsumi, kɛ hiɔ kɛ gbenɔ he. (1 Mose 1:27-29; 2:8, 9, 15) Anɛ enɛ ɔ tsɔɔ kaa huzu be he yemi nɛ Adam kɛ Hawa ná a he lo? Nyɛ ha nɛ waa hyɛ.

5. Ngɛ susumi nɛ nihi hɛɛ ngɛ he yemi he ɔ tsuo se ɔ, mɛni lɛ ma ha nɛ nihi nɛ a ná he yemi?

5 Mwɔnɛ ɔ, nihi fuu susuɔ kaa he yemi nitsɛnitsɛ tsɔɔ kaa nihi ma nyɛ maa pee nɔ́ fɛɛ nɔ́ nɛ a suɔ, nɛ ke nyagba ko maa je mi kɛ ba po ɔ, tsa pi a kɔmɔ. Womi nɛ ji The World Book Encyclopedia a tsɔɔ he yemi sisi kaa “he blɔ nɛ nɔ ko ngɛ nɛ e nyɛɔ peeɔ nɔ́ nɛ e suɔ.” Se womi ɔ de hu ke: “Ke ma ko wo mlaahi nɛ a he hia nɛ se nami ngɛ he kɛ ha nɔ fɛɛ nɔ, nɛ sisi numi ngɛ mlaa amɛ a he ɔ, lɔ ɔ lɛ haa nɛ ma a mi bi ɔmɛ nuɔ he kaa a ngɛ he yemi.” Munyu nɛ ɔ tsɔɔ kaa e sa nɛ huzu nɛ hi ní komɛ a he konɛ nɔ fɛɛ nɔ ngɛ ma a mi nɛ e ná he yemi. Ke jã a, lɛɛ mɛnɔ lɛ ngɛ he blɔ kaa e woɔ mlaahi nɛ da, kɛ mlaahi nɛ a he hia nɛ sisi numi ngɛ he ha nɔ fɛɛ nɔ?

6. (a) Mɛni he je nɛ Yehowa pɛ lɛ e ngɛ he yemi nɛ huzu be he ɔ? (b) Mɛni he yemi nɛ adesahi ma nyɛ ma ná, nɛ mɛni he je?

6 E sa nɛ waa le kaa Yehowa Mawu pɛ nɛ e ngɛ he yemi nɛ huzu be he. Mɛni he je? Ejakaa lɛ nɛ e bɔ níhi tsuo, nɛ lɛ ji je mluku ɔ tsuo Matsɛ. (1 Tim. 1:17; Kpoj. 4:11) Matsɛ David ngɔ munyuhi nɛ sa kɛ kale blɔ nya nɛ Yehowa ngɛ ɔ. (Kane 1 Kronika 29:11, 12.) Se adebɔ níhi tsuo nɛ a ngɛ hiɔwe kɛ zugba a nɔ ɔ lɛɛ huzu ngɛ a he yemi ɔ he. E sa nɛ a kplɛɛ nɔ kaa Yehowa Mawu pɛ lɛ e ngɛ he blɔ nɛ pe kulaa kaa e maa wo mlaahi nɛ da, kɛ mlaahi nɛ a he hia nɛ sisi numi ngɛ he ha adesahi. Benɛ Yehowa Mawu bɔ Adam kɛ Hawa a, e wo mɛ mlaahi nɛ hi kɛ pi si.

7. Mɛni ji ní komɛ nɛ adesahi peeɔ daa ligbi nɛ haa nɛ a bua jɔɔ ngɛ si himi mi?

7 E ngɛ mi kaa sisije ɔ, Adam kɛ Hawa nyɛɔ peeɔ níhi nɛ mɛ nitsɛmɛ a suɔ mohu lɛɛ, se huzu ngɛ he yemi nitsɛnitsɛ nɛ Mawu ha mɛ ɔ he. Ní komɛ ngɛ nɛ a peeɔ daa ligbi, se jamɛ a ní ɔmɛ ngɛ kaa mlaahi nɛ a yeɔ nɔ. Kaa nɔ hyɛmi nɔ́ ɔ, wa kekle fɔli ɔmɛ le kaa ke a maa hi wami mi ɔ, e sa nɛ a wo mumi, a ye ní, a hwɔ mahe kɛ ekpahi. Anɛ ní nɛ ɔmɛ nɛ a peeɔ ɔ tsɔɔ kaa a be he yemi lo? Dɛbi, ejakaa Yehowa nitsɛ to blɔ nya konɛ a ná bua jɔmi ngɛ ní nɛ ɔmɛ a peemi mi. (La 104:14, 15; Fiɛlɔ 3:12, 13) Mɛnɔ nɛ ke e ngɛ kɔɔhiɔ kpakpa ko mue, e ngɛ niye ní ko nɛ e suɔ yee, aloo e ná mahe kpakpa ko nɛ e hwɔ ɔ, e bua jɔɛ? Wa peeɔ ní nɛ ɔmɛ kɛ bua jɔmi, nɛ wa nɛ mɛ kaa mlaa aloo tlomi. Atsinyɛ jemi ko be he kaa Adam kɛ Hawa hu a bua jɔ ní nɛ ɔmɛ a peemi he.

8. Mɛni nɛ Mawu fã Adam kɛ Hawa kaa a pee, nɛ mɛni he je?

8 Yehowa wo Adam kɛ Hawa mlaa  pɔtɛɛ ko. E fã mɛ ke a fɔ nɛ a hyi zugba a nɔ nɛ a hyɛ nɔ. (1 Mose 1:28) Anɛ fami nɛ ɔ tsɔɔ kaa he yemi nɛ a ngɛ ɔ je a dɛ lo? Dɛbi! Fami nɛ ɔ ma ha nɛ Bɔlɔ ɔ maa gu adesahi a nɔ kɛ tsu e yi mi tomi ɔ he ní, nɛ zugba a tsuo ma plɛ pee paradeiso, nɛ adesahi nɛ a ye mluku maa hi nɔ kɛ ya neneene. (Yes. 45:18) Mwɔnɛ ɔ, nihi ma nyɛ maa hla kaa a be gba si himi mi sɛe, aloo ke a sɛ gba si himi mi po ɔ, a ma nyɛ maa hla kaa a be fɔe. Enɛ ɔ ti si kɛ wui Yehowa mlaa a. Se kɛ̃ ɔ, nihi suɔ nɛ a sɛ gba si himi mi nɛ a fɔ bimɛ ngɛ nyagbahi nɛ jeɔ mi kɛ ba a tsuo se. (1 Kor. 7:36-38) Mɛni he je? Ejakaa a hyɛɛ blɔ kaa a ma ná bua jɔmi ngɛ mi. (La 127:3) Kaa Adam kɛ Hawa bu Yehowa tue ɔ, jinɛ a ma ná bua jɔmi ngɛ a gba si himi ɔ kɛ a weku ɔ mi kɛ ya neneene.

NƆ́ NƐ HA NƐ HE YEMI NITSƐNITSƐ BƆ ADESAHI

9. Mɛni he je nɛ Mawu mlaa nɛ ngɛ 1 Mose 2:17 ɔ da nɛ nile ngɛ mi ɔ?

9 Yehowa wo Adam kɛ Hawa mlaa kpa ko. Se ngɛ mlaa nɛ ɔ mi ɔ, e tsɔɔ tue gblami nɛ a ma ná ke a yi mlaa a nɔ. Yehowa de ke: ‘Kpakpa kɛ yayami lemi tso ɔ lɛɛ, koo ye e yiblii, ejakaa ligbi nɛ o maa ye e yiblii ɔ, o ma gbo kokooko.’ (1 Mose 2:17) Anɛ mlaa nɛ ɔ he hia we, nɛ se nami be he lo? Anɛ mlaa nɛ ɔ ha Adam kɛ Hawa nu he kaa a be he yemi lo? Dɛbi. Ngɛ anɔkuale mi ɔ, Baiblo he ní leli komɛ tsɔɔ kaa sisi numi ngɛ he kaa Mawu wo jamɛ a mlaa a. Kaa nɔ hyɛmi nɔ́ ɔ, ní lelɔ ko de ke: ‘Mawu mlaa nɛ ngɛ [1 Mose 2:16, 17] ɔ tsɔɔ wɔ kaa Mawu pɛ lɛ le nɔ́ nɛ hi kɛ nɔ́ nɛ hí ha adesahi. Ke adesahi ma nyɛ ma ná “nɔ́ nɛ hi” ɔ he se ɔ, ja a ná hemi kɛ yemi ngɛ Mawu mi nɛ a bu lɛ tue. Se ke a bui Mawu tue ɔ, Mawu maa ngmɛɛ a he konɛ mɛ nitsɛmɛ a hla nɔ́ nɛ hi kɛ nɔ́ nɛ hí.’ Enɛ ɔ ji nɔ́ ko nɛ adesahi be nyɛe maa pee kɔkɔɔkɔ.

Blɔ nɛ Adam kɛ Hawa gu nɔ ɔ ngɔ haomi ngua kɛ ba! (Hyɛ kuku 9-12)

10. Mɛni he je nɛ e sɛ nɛ wa susu kaa he blɔ nɛ a kɛ hlaa nɔ́ nɛ nɔ nitsɛ suɔ kɛ he blɔ nɛ a kɛ tsɔɔ nɔ́ nɛ da kɛ nɔ́ nɛ dɛ ɔ ji nɔ́ kake ɔ?

10 Mwɔnɛ ɔ, ke nihi kane mlaa nɛ Yehowa wo Adam ɔ, a kpɛti nihi fuu deɔ ke Yehowa ha we Adam he blɔ nɛ e pee nɔ́ nɛ lɛ nitsɛ e suɔ. Se a li kaa slɔɔto ngɛ he blɔ nɛ waa kɛ hlaa nɔ́ nɛ wa suɔ kɛ he blɔ nɛ a kɛ tsɔɔ nɔ́ nɛ da kɛ nɔ́ nɛ dɛ ɔ a kpɛti. Adam kɛ Hawa ná he blɔ nɛ a kɛ maa hla kaa a maa bu Mawu tue aloo a be lɛ tue bue. Se Yehowa pɛ lɛ ngɛ he blɔ kaa e maa tsɔɔ nɔ́ nɛ hi kɛ nɔ́ nɛ hí. ‘Kpakpa kɛ yayami lemi tso’ ɔ ma anɔkuale munyu nɛ ɔ nɔ mi kɛ ha Adam kɛ Hawa. (1 Mose 2:9) Ngɛ anɔkuale mi ɔ, tsa pi be fɛɛ be nɛ wa ma nyɛ maa tsɔɔ nɔ́ nɛ maa je yi mi kpɔhi nɛ wa mwɔɔ ɔ mi kɛ ba. Wa be nyɛe maa tsɔɔ kaa wa maa ye manye be fɛɛ be. Enɛ ɔ he je nɛ behi fuu ɔ, ke nihi kɛ juɛmi kpakpa mwɔ yi mi kpɔ ko ɔ, e ngɔɔ nɔ́ nami aloo gbenɔ kɛ baa a nɛ. (Abɛ 14:12) Pi nɔ́ fɛɛ nɔ́ nɛ adesa ma nyɛ maa pee. Tso ɔ nɛ Yehowa wo Adam kɛ Hawa mlaa kaa a ko ye ɔ tsɔɔ mɛ kaa ja a bu lɛ tue loko a ma ná he yemi nitsɛnitsɛ. Ngɛ mɛni blɔ nɔ, nɛ anɛ Adam kɛ Hawa bu Yehowa tue lo?

11, 12. Mɛni he je nɛ yi mi kpɔ nɛ Adam kɛ Hawa mwɔ ɔ ngɔ haomi kɛ ba a? Ngɔɔ nɔ́ he tomi nɔ́ ko kɛ tsɔɔ mi.

11 Se aywilɛho sane ji kaa Adam kɛ Hawa gbo Mawu tue. Benɛ Satan de ke, ‘nyɛ hɛ ngmɛ ma bli, nɛ nyɛ maa hi kaa lɛ Mawu ɔ nitsɛ, nɛ nyɛ maa le kpakpa kɛ yayami’ ɔ, Hawa he lɛ ye. (1 Mose 3:5) Anɛ Satan tue nɛ Adam kɛ Hawa bu ɔ ha nɛ a ná he yemi pe sa a lo? Dɛbi. A nine sui nɔ́ nɛ Satan tsɔɔ kaa a ma ná a nɔ. Ngɛ anɔkuale mi ɔ, e kɛ we nɛ a ba yɔse kaa Yehowa blɔ tsɔɔmi nɛ a kua nɛ a ngɔ  mɛ nitsɛmɛ a blɔ ɔ ha nɛ a sɛ haomi mi. (1 Mose 3:16-19) Mɛni he je? Nɔ́ he je ji kaa Yehowa ha we adesahi he blɔ kaa mɛ nitsɛmɛ a mwɔ yi mi kpɔ ngɛ nɔ́ nɛ da kɛ nɔ́ nɛ dɛ he.​—Kane Abɛ 20:24; Yeremia 10:23.

12 Wa ma nyɛ maa ngɔ nɔ ko nɛ e ngɛ ɛloplee kudɔe kɛ to he. Loko e ma nyɛ ma ya su he nɛ e yaa a slɔkee ɔ, ja e gu hehi nɛ a tsɔɔ kaa ɛlopleehi nɛ a gu ɔ pɛ. Lingmi nɛ ɔ, a pee klamahi nɛ yeɔ bua ɛloplee kudɔli konɛ a le hehi nɛ a ma nyɛ maa gu ngɛ kɔɔhiɔ mi. Klama nɛ ɔmɛ yeɔ bua mɛ nɛ a kɛ ɛloplee blɔ tsɔɔli hu sɛɛɔ ní konɛ a ye bua mɛ nɛ a ya su he nɛ a yaa a slɔkee. Se ke ɛloplee kudɔlɔ ɔ kɛ blɔ tsɔɔmi nɛ ɔ tsu we ní, nɛ e gu he nɛ lɛ nitsɛ e suɔ ɔ, e kɛ haomi ngua maa ba. Adam kɛ Hawa pee a ní kaa ɛloplee kudɔlɔ ko nɛ e suɔ kaa e maa gu he nɛ lɛ nitsɛ e suɔ. A kua blɔ tsɔɔmi nɛ Mawu kɛ ha mɛ ɔ. Mɛni je mi kɛ ba? Ngɛ blɔ ko nɔ ɔ, a nɔ si, nɛ lɔ ɔ ngɔ yayami kɛ gbenɔ kɛ ba ha mɛ nitsɛmɛ kɛ a bimɛ tsuo. (Rom. 5:12) Akɛnɛ a suɔ kaa a maa mwɔ yi mi kpɔ ha mɛ nitsɛmɛ a he he je ɔ, he yemi nitsɛnitsɛ nɛ Mawu ha mɛ ɔ bɔ mɛ.

BƆ NƐ WA MA PLƐ KƐ NÁ HE YEMI NITSƐNITSƐ

13, 14. Kɛ wa ma plɛ kɛ ná he yemi nitsɛnitsɛ ha kɛɛ?

13 Eko ɔ, nihi ma susu kaa ke a ngɛ he yemi ngɛ nɔ́ fɛɛ nɔ́ mi ɔ, a he maa jɔ mɛ. Se e ji anɔkuale lo? Ke nɔ ko ngɛ he yemi ɔ, se nami fuu ngɛ he, se ke blɔ tsɔɔmi ko be, nɛ nɔ fɛɛ nɔ peeɔ nɔ́ nɛ e suɔ ɔ, jinɛ kɛ je ɔ mi maa hi ha kɛɛ? Enɛ ɔ he je ɔ, womi nɛ ji, The World Book Encyclopedia a de ke: “Ngɛ ma fɛɛ ma mi ɔ, mlaahi nɛ a wo ɔ ngɛ hwanyaa, ejakaa e sa nɛ mlaa a nɛ ha ma mi bi ɔmɛ he yemi, nɛ jamɛ a be ɔ mi nɔuu ɔ, e tsi nihi a nya ngɛ ní komɛ a mi.” Munyungu “hwanyaa” nɛ a kɛ tsu ní ɔ da. Ejakaa ke o susu he ɔ, o maa na kaa mlaahi nɛ adesahi wo ɔ hiɛ wawɛɛ nitsɛ. Enɛ ɔ he nɛ mlaa leli kɛ kojoli babauu tsɔɔ mlaahi a sisi konɛ a le bɔ nɛ a kɛ mlaa amɛ ma tsu ní ha a nɛ.

14 Se Yesu Kristo tsɔɔ nɔ́ ko nɛ e peemi  yi nɛ ke wa pee ɔ, wa ma ná he yemi nitsɛnitsɛ. E de ke: “Ke nyɛ hi si ngɛ ye munyu ɔ nya a, lɛɛ ye kaseli nitsɛnitsɛmɛ ji nyɛ, nɛ nyɛ maa le anɔkuale ɔ, nɛ anɔkuale ɔ ma ha nɛ nyɛ maa ye nyɛ he.” (Yoh. 8:31, 32) Nɔ́ nɛ Yesu tsɔɔ kaa ke wa pee ɔ, wa ma ná he yemi nitsɛnitsɛ ɔ biɔ nɛ waa pee ní enyɔ nɛ ɔmɛ: Kekleekle ɔ, e sa nɛ waa kplɛɛ anɔkuale nɛ e tsɔɔ ɔ nɔ. Enyɔne ji kaa e sa nɛ waa pee e kaseli. Ní nɛ ɔmɛ nɛ wa maa pee ɔ ma ha nɛ wa ná he yemi nitsɛnitsɛ. Se mɛni mi wa maa ye wa he ngɛ? Yesu tsɔɔ mi ke: “Nɔ fɛɛ nɔ nɛ e peeɔ yayami ɔ, e ji yayami nyɔguɛ. . . . Ke Bi ɔ ha nɛ nyɛ ye nyɛ he ɔ, nyɛ maa ye nyɛ he niinɛ.”​—Yoh. 8:34, 36.

15. Ngɛ mɛni blɔ nɔ nɛ he yemi nɛ Yesu wo he si ɔ ma ha nɛ ‘waa ye wa he nitsɛnitsɛ’?

15 E ngɛ heii kaa he yemi nɛ Yesu wo e kaseli ɔmɛ si kaa a ma ná a hi kulaa pe he yemi nɛ nihi babauu ngɛ hlae nɛ a ná ngɛ je ɔ mi mwɔnɛ ɔ. Benɛ Yesu de ke: “Ke Bi ɔ ha nɛ nyɛ ye nyɛ he ɔ, nyɛ maa ye nyɛ he niinɛ” ɔ, nɔ́ nɛ e ngɛ tsɔɔe ji kaa adesahi maa ye a he kɛ je ‘nyɔguɛ nɛ a ji kɛ ha yayami’ ɔ sisi. Nyɔguɛ si himi nɛ adesahi ngɛ mi nɛ ɔ mi wa nitsɛ. Pi níhi nɛ a hí pɛ nɛ yayami haa nɛ wa peeɔ, mohu ɔ, e ha we nɛ waa pee níhi nɛ wa le kaa a da kɛ níhi nɛ wa le kaa wa ma nyɛ maa pee. Ngɛ blɔ nɛ ɔ nɔ ɔ, wa ji yayami nyɔguɛhi. Enɛ ɔ he ɔ, wa haoɔ ɔ, wa naa nɔ́, kɛkɛ nyagbenyagbe ɔ, wa gbo. (Rom. 6:23) Bɔfo Paulo na kaa si fɔfɔɛ nɛ ɔ ji nyagba agbo, nɛ enɛ ɔ hao lɛ wawɛɛ. (Kane Roma Bi 7:21-25.) Ja a je yayami kɛ je loko wa ma ná he yemi nitsɛnitsɛ nɛ jinɛ Adam kɛ Hawa ngɛ ɔ.

16. Mɛni ma ha nɛ waa ye wa he nitsɛnitsɛ?

16 Yesu munyu nɛ ji, “ke nyɛ hi si ngɛ ye munyu ɔ nya a” tsɔɔ kaa Yesu ngɛ ní komɛ nɛ e sa kaa waa pee, aloo e ngɛ mlaa komɛ nɛ ke wa ye a nɔ ɔ, wa maa ye wa he. Akɛnɛ wa ji Kristofohi nɛ wa jɔɔ wa he nɔ he je ɔ, wa kua wa he, nɛ wa mwɔ wa yi mi kpɔ kaa wa maa hi si ngɛ Yesu tsɔɔmi ɔmɛ a nya kaa e kaseli. (Mat. 16:24) Kaa bɔ nɛ Yesu wo si ɔ, e kpɔmi afɔle sami ɔ ma bli blɔ ha wɔ konɛ wa ná he yemi nitsɛnitsɛ hwɔɔ se.

17. (a) Mɛni ma ha nɛ wa ná bua jɔmi nitsɛnitsɛ ngɛ si himi mi? (b) Mɛni he wa ma susu ngɛ munyu nɛ nyɛɛ se ɔ mi?

17 Yesu tsɔɔmi ɔmɛ nɛ waa kɛ ma tsu ní ɔ ma ha nɛ wa ná bua jɔmi nitsɛnitsɛ ngɛ si himi mi. Enɛ ɔ nɛ wa maa pee ɔ ma bli blɔ kɛ ha wɔ, nɛ hwɔɔ se ɔ, a ma kpɔ̃ wɔ kɛ je yayami kɛ gbenɔ nyɔguɛ yemi sisi. (Kane Roma Bi 8:1, 2, 20, 21.) Ngɛ munyu nɛ nyɛɛ se ɔ mi ɔ, wa ma susu bɔ nɛ wa maa pee ha nɛ waa ngɔ he yemi nɛ wa ngɛ mwɔnɛ ɔ kɛ tsu ní ngɛ nile mi ɔ he. Enɛ ɔ ma ha nɛ wa maa wo Yehowa, anɔkuale Mawu nɛ e haa nɔ he yemi nitsɛnitsɛ ɔ hɛ mi nyami kɛ ya neneene.