Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

“Ní Tsumi ɔ Yi Gbo”

“Ní Tsumi ɔ Yi Gbo”

BE SU nɛ a maa pee kpe ko nɛ e he hia wawɛɛ ngɛ Yerusalem. Matsɛ David fɔ̃ ma nikɔtɔma amɛ, matsɛ we ɔ mi ní tsuli, kɛ ta buli katsɛmɛ ɔmɛ nine. A bua jɔ benɛ a nu adafi fiami klɛdɛɛ ko ɔ. Yehowa kɛ ní tsumi wo David bi Salomo de kaa e ma tsu ko nɛ je kpa kulaa nɛ a maa jɔɔ nɔ kɛ ha anɔkuale Mawu ɔ jami. Mawu ngɔ tsu ɔ mami he blɔ tsɔɔmi kɛ ha Israel matsɛ David, nɛ lɛ hu e ngɔ kɛ ha Salomo. David de ke: ‘Ní tsumi ɔ yi gbo; ejakaa pi nimli a mɔ nɛ a yaa mami ɔ, se Yehowa Mawu ɔ nitsɛ e we.’—1 Kron. 28:1, 2, 6, 11, 12; 29:1.

Lɔ ɔ se ɔ, David bi ke: ‘Nyɛ ti mɛnɔ suɔ kaa e maa je e tsui mi faa nɛ e ke Yehowa nɔ́ ko lo?’ (1 Kron. 29:5) Kaa o ngɛ lejɛ ɔ, mɛni o ko pee? Anɛ o maa je o tsui mi kɛ fĩ ní tsumi ngua nɛ ɔ se lo? Israel bi ɔmɛ kɛ a nike ní ɔmɛ bɔni bami amlɔ nɔuu. Ngɛ anɔkuale mi ɔ, ‘a ke Yehowa ní kɛ je a tsui mi faa, nɛ a nya nɛ a bua jɔ a he kaa a nyɛ pee nɔ́ ko kaa ja.’—1 Kron. 29:9.

Jeha lafahi komɛ a se ɔ, Yehowa to nɔ́ ko nɛ pe sɔlemi we ɔ sisi. E to mumi mi sɔlemi we ngua a sisi. Lɔ ɔ ji blɔ nya nɛ Mawu to kaa kɛ gu Yesu kpɔmi afɔle sami ɔ nɔ ɔ, adesahi ma nyɛ maa su e he nɛ a ja lɛ. (Heb. 9:11, 12) Mwɔnɛ ɔ, mɛni blɔ nɔ nɛ Yehowa guɔ kɛ dlaa e kɛ adesahi a kpɛti? E guɔ fiɛɛmi ní tsumi ɔ nɔ. (Mat. 28: 19, 20) Kɛ gu ní tsumi nɛ ɔ nɔ ɔ, daa jeha a, a peeɔ Baiblo mi ní kasemi ayɔhi abɔ, a baptisi ɔ nihi akpehi abɔ, nɛ a toɔ asafo lafahi abɔ sisi.

Akɛnɛ ní tsumi ɔ yi ngɛ blie he je ɔ, e he hia nɛ a ná Baiblo kasemi womihi fuu, a ma Matsɛ Yemi Asa ehehi, nɛ a dla ekomɛ hulɔ. Jehanɛ hu ɔ, e he hia nɛ a ma kpe peemi asahi. Anɛ o he we yi kaa níhi nɛ wa ngɛ pee kɛ ngɛ sane kpakpa a fiɛɛe ɔ ji ní tsumi ngua nɛ ngɛ yiblii woe wawɛɛ lo?—Mat. 24:14.

Suɔmi nɛ wa ngɛ kɛ ha Mawu kɛ wa nyɛmi nɔmlɔ, kɛ Matsɛ Yemi fiɛɛmi ní tsumi ɔ nɛ biɔ oya yemi ɔ he je nɛ Mawu we bi ‘jeɔ a tsui mi faa nɛ a keɔ Yehowa nɔ́ ko’ ɔ nɛ. A pee ɔ jã kɛ guɔ a tsui mi nɛ a jeɔ kɛ haa nɔ́ ko kɛ yeɔ bua fiɛɛmi ní tsumi ɔ nɔ. Hyɛ bɔ nɛ wa bua jɔɔ ha kaa wa maa ‘ngɔ wa ní babauu ɔ kɛ wo Yehowa hɛ mi nyami.’ Wa bua jɔɔ hu kaa tsɔlɔ anɔkualetsɛ kɛ nile lɔ ɔ kɛ yemi kɛ buami nɛ ɔmɛ ngɛ ní tsumi nɛ pe kulaa ngɛ adesahi a yi nɔ sane mi ɔ tsue! —Abɛ 3:9.