Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  May 2016

‘Nyɛɛ Ya Je Ma Amɛ Tsuo A Ngɔ, Nɛ Nyɛɛ Pee Mɛ Ye Kaseli’

‘Nyɛɛ Ya Je Ma Amɛ Tsuo A Ngɔ, Nɛ Nyɛɛ Pee Mɛ Ye Kaseli’

‘Nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli. Nyɛɛ baptisi mɛ, nɛ nyɛɛ tsɔɔ mɛ nɛ a ye níhi tsuo nɛ i fa nyɛ ke nyɛɛ pee ɔ a nɔ.’MATEO 28:19, 20.

LAHI: 141, 17

1, 2. Ngɛ Yesu munyu nɛ ngɛ Mateo 24:14 ɔ nya a, mɛni sanehi wa ma nyɛ ma bi?

YESU gba fɔ si kaa ngɛ nyagbe ligbi ɔmɛ a mi ɔ, a maa fiɛɛ Matsɛ Yemi ɔ he sane kpakpa a kɛ ha nihi tsuo. (Mateo 24:14) Nihi le wɔ Yehowa Odasefohi ngɛ je kɛ wɛ kaa wa fiɛɛɔ. Ni komɛ a bua jɔɔ sɛ gbi nɛ wa fiɛɛɔ ɔ he, se ni komɛ a bua jɔɛ he. Se nihi nɛ a bua jɔɛ wa sɛ gbi ɔ he ɔ a ti ni komɛ po buu wɔ ngɛ wa fiɛɛmi ní tsumi ɔ he. Wɔ lɛ wa ha nɛ Yesu gbami ɔ ngɛ mi bae ɔ nɛ. Anɛ wa ngɛ he blɔ nɛ wa deɔ jã lo? Kɛ wa ma plɛ kɛ ná nɔ mi mami kaa fiɛɛmi nɛ wa fiɛɛɔ ɔ ji ní tsumi nɛ Yesu gba kɛ fɔ si kaa a ma tsu ɔ ha kɛɛ?

2 Jamihi fuu deɔ ke a fiɛɛɔ Yesu sɛ gbi ɔ. Se a fiɛɛɔ ngɛ sɔlemi tsuhi a mi, kɛ tiivi kɛ Intanɛti ɔ nɔ pɛ. Ngɛ jami komɛ hu a blɔ fa mi ɔ, a deɔ nihi bɔ nɛ mɛɛ a plɛ kɛ ba le Yesu ha. Jami kpa komɛ hu susu kaa ke a yeɔ bua nihi, nɛ a ma hiɔ tsami hehi, loo sukuuhi ɔ, lɔ ɔ tsɔɔ kaa a ngɛ fiɛɛe.  Se anɛ ní tsumi nɛ ɔmɛ ji fiɛɛmi ní tsumi nɛ Yesu tu he munyu ɔ lo?

3. Ngɛ Mateo 28:19, 20 ɔ nya a, mɛni níhi eywiɛ nɛ e sa kaa Yesu se nyɛɛli ɔmɛ nɛ a pee?

3 Anɛ Yesu ngɛ hlae nɛ nihi nɛ ba e kaseli ɔmɛ a ngɔ loko a fiɛɛ kɛ tsɔɔ mɛ lo? Dɛbi! Benɛ a tle Yesu si se ɔ, e de e se nyɛɛli lafahi abɔ ke: ‘Nyɛɛ ya je ma amɛ tsuo a ngɔ ngɛ he tsuaa he, nɛ nyɛɛ pee mɛ ye kaseli. Nyɛɛ baptisi mɛ nɛ nyɛɛ tsɔɔ mɛ nɛ a ye níhi tsuo nɛ i fa nyɛ ke nyɛɛ pee ɔ a nɔ.’ (Mateo 28:19, 20) Enɛ ɔ he ɔ, akɛnɛ wa ji Yesu se nyɛɛli he je ɔ, e he hia nɛ waa pee ní eywiɛ komɛ. E sa nɛ waa pee nihi kaseli, waa baptisi mɛ, nɛ waa tsɔɔ mɛ ní. Se kekleekle ɔ, e sa nɛ waa ya ni ɔmɛ a ngɔ. Baiblo he ní lelɔ ko de ke: “E ji nɔ fɛɛ nɔ nɛ heɔ Kristo yeɔ ɔ e blɔ nya ní tsumi kaa e ma ‘ya’ fiɛɛ, lɛ nitsɛ e ma mi jio, ma se jio.”Mateo 10:7; Luka 10:3.

4. ‘Nimli nɛ a maa hɛ kaa a hɛɛ lo’ ɔ biɔ mɛni peemi?

4 Mɛni Yesu ngɛ blɔ hyɛe kaa e kaseli ɔmɛ nɛ a pee? Anɛ e suɔ kaa a fiɛɛ ngɛ mɛ nitsɛmɛ a dɛ he, aloo e suɔ kaa a pee kake kaa asafo kɛ fiɛɛ? Akɛnɛ nɔ kake be nyɛe maa fiɛɛ ha “je ma amɛ tsuo” he je ɔ, e he hia nɛ e kaseli ɔmɛ nɛ a pee kake kaa asafo kɛ fiɛɛ. Enɛ ɔ nɛ ngɛ Yesu juɛmi mi benɛ e tsɛ e kaseli ɔmɛ kaa a ba “hɛ nimli kaa a hɛɛ lo” ɔ nɛ. (Kane Mateo 4:18-22.) Munyu nɛ Yesu tu kaa a maa hɛ nimli kaa a hɛɛ lo ɔ kɔ we nɔ kake ko nɛ ya fɔ gbowe kɛ e nya lo nɛ hii si ngɛ mlɛe kaa lo ko nɛ ba mi ɔ he. Mohu ɔ, lo gbemi he munyu nɛ Yesu tu ɔ ji lo nɛ a gbeɔ kɛ ya. Lo gbemi kaa kikɛ biɔ mɔde bɔmi wawɛɛ, nɛ e he hia kaa nimli fuu nɛ a pee kake kɛ tsu he ní.Luka 5:1-11.

5. Mɛni sane bimi eywiɛ nɛ e he hia kaa wa ná a heto, nɛ mɛni he je?

5 Loko wa maa le nihi nɛ a ngɛ sane kpakpa a fiɛɛe mwɔnɛ ɔ, e he hia nɛ wa ha sane bimi eywiɛ nɛ nyɛɛ se nɛ ɔmɛ a heto:

  • Mɛni sɛ gbi nɛ e sa kaa Yesu se nyɛɛli nɛ a fiɛɛ?

  • Mɛni juɛmi nɛ e sa kaa a kɛ tsu fiɛɛmi ní tsumi ɔ?

  • Mɛni blɔhi a nɔ e sa kaa a gu kɛ fiɛɛ?

  • Jije e sa kaa a fiɛɛ kɛ ya su, nɛ mɛni be e sa kaa a gbe fiɛɛmi ní tsumi ɔ nya?

Sane bimɛ nɛ ɔmɛ a heto ɔ maa ye bua wɔ nɛ wa maa le nihi nɛ a ngɛ yi wami hemi ní tsumi nɛ ɔ tsue, nɛ e maa wo wɔ he wami nɛ wa maa ya nɔ maa fiɛɛ.1 Timoteo 4:16.

MƐNI SƐ GBI E SA KAA A FIƐƐ?

6. Mɛni he je nɛ waa kɛ nɔ mi mami ma nyɛ ma de ke Yehowa Odasefohi ji nihi nɛ a ngɛ sɛ gbi nɛ e sa kaa a fiɛɛɔ ɔ fiɛɛe ɔ?

6 Kane Luka 4:43. Yesu fiɛɛ “matsɛ yemi ɔ he sane kpakpa a” nɛ e suɔ kaa e kaseli ɔmɛ hu nɛ a pee jã. Mɛnɔmɛ nɛ a ngɛ sɛ gbi nɛ ɔ fiɛɛe kɛ ngɛ nihi tsuo  hae? Yehowa Odasefohi pɛ! Nihi nɛ a sume wa sane po kplɛɛ nɔ kaa wɔ nɛ wa ngɛ jã pee. Kaa nɔ hyɛmi nɔ́ ɔ, mo kadi nɔ́ nɛ osɔfo ko nɛ e ji ma se sane kpakpa fiɛɛlɔ nɛ e sɔmɔ ngɛ mahi fuu a nɔ ɔ de Yehowa Odasefo no ko. Ngɛ ma fɛɛ ma nɛ osɔfo ɔ ya sɔmɔ ngɛ mi ɔ mi ɔ, e bi Yehowa Odasefohi nɛ a ngɛ jamɛ a ma amɛ a mi ɔ kaa mɛni sɛ gbi a fiɛɛɔ. Osɔfo ɔ de ke, “Heto kake nɛ mɛ tsuo a ha, nɛ enɛ ɔ tsɔɔ kaa a li nɔ́. Nɔ́ nɛ a deɔ ji: ‘Wa fiɛɛɔ Matsɛ Yemi ɔ he sane kpakpa a.’” Ngɛ anɔkuale mi ɔ, nɔ́ nɛ Osɔfo ɔ de ɔ tsɔɔ we kaa wa li nɔ́, mohu ɔ, lɔ ɔ tsɔɔ kaa wa pee kake kɛ ngɛ ní tsue kaa anɔkuale Kristofohi. (1 Korinto Bi 1:10) Mawu Matsɛ Yemi ɔ ji sɛ gbi titli nɛ ngɛ womi tɛtlɛɛ nɛ ji Hwɔɔmi Mɔ, E Ngɛ Yehowa Matsɛ Yemi ɔ He Gɔgɔ Fiae ɔ mi. A pee womi tɛtlɛɛ nɛ ɔ ngɛ gbihi 254 mi, nɛ a peeɔ eko fɛɛ eko nɛ baa a maa pee ayɔ 59. Ngɛ je ɔ mi tsuo ɔ, lɔ ɔ ji womi tɛtlɛɛ nɛ a gbaa kɛ haa nihi pe kulaa!

Yehowa Odasefohi pɛ ji nihi nɛ a fiɛɛɔ Mawu Matsɛ Yemi ɔ he sane kpakpa a

7. Kɛ wa plɛ kɛ le kaa osɔfohi nɛ a ngɛ jamihi nɛ a tsɛɛ a he ke Kristofohi ɔ mi ɔ fiɛɛ we sɛ gbi nɛ e sa kaa a fiɛɛ ɔ ha kɛɛ?

7 Osɔfohi nɛ a ngɛ jamihi nɛ a tsɛɛ a he ke Kristofohi ɔ mi ɔ fiɛɛ we Mawu Matsɛ Yemi ɔ he sane kpakpa a. Ke a ngɛ Matsɛ Yemi ɔ he munyu tue po ɔ, a ti nihi fuu tsɔɔ kaa e ji nɔ́ ko nɛ ngɛ adesa tsui mi. (Luka 17:21) A tsɔɔ we nihi kaa Matsɛ Yemi ɔ ji hiɔwe nɔ yemi nɛ Yesu ji e nya Matsɛ. Mohu ɔ, behi fuu ɔ, a tuɔ Yesu he munyu ke a ngɛ Bloonya aloo Ista yee. A tsɔɔ we nihi kaa e be kɛe nɛ Matsɛ Yemi ɔ ma ba kpata yayami peeli tsuo a hɛ mi ngɛ zugba a nɔ, nɛ e ma tsu adesahi a nyagbahi a he ní ha mɛ. (Kpojemi 19:11-21) E ngɛ heii kaa osɔfohi nɛ a ngɛ jamihi nɛ a tsɛɛ a he ke Kristofohi ɔ a mi ɔ li nɔ́ nɛ Yesu nɛ ji Mawu Matsɛ Yemi ɔ nya Matsɛ ɔ maa pee. Nɛ akɛnɛ a nui Yesu sɛ gbi ɔ sisi he je ɔ, a li nɔ́ he je nɛ e sa kaa a fiɛɛ.

MƐNI JUƐMI NƐ E SA KAA WA KƐ TSU FIƐƐMI NÍ TSUMI Ɔ?

8. Mɛni ji juɛmi nɛ ke nɔ ko hɛɛ kɛ ngɛ fiɛɛe ɔ e dɛ?

8 E sɛ kaa juɛmi nɛ Yesu kaseli ɔmɛ ma kɛ tsu fiɛɛmi ní tsumi ɔ nɛ pee sika nɛ a ma ná aloo a ma tsu nguanguahi. Yesu de ke: “Nyɛ ná lɛ yaka gu nɛ nyɛ wui he hiɔ; nyɛ hu nyɛ ngɔ ha nɛ nyɛ ko he hiɔwo.” (Mateo 10:8) Enɛ ɔ he ɔ, e sɛ nɛ waa ngɔ fiɛɛmi ní tsumi ɔ kɛ ye jua. (2 Korinto Bi 2:17) E sɛ nɛ Yesu kaseli ɔmɛ nɛ a bi hiɔwo ngɛ a fiɛɛmi ní tsumi ɔ he. (Kane Bɔfo Ɔmɛ A Ní Tsumi 20:33-35.) E ngɛ mi kaa blɔ tsɔɔmi nɛ Yesu kɛ ha a mi tɛ mohu lɛɛ, se sɔlemihi fuu kpakpaa sika ngɛ nihi a he konɛ a kɛ hyɛ a sɔlemi ɔ nɔ, nɛ a kɛ wo osɔfohi kɛ ni kpahi nɛ a tsuɔ ní ngɛ sɔlemi ɔ mi ɔ hiɔ. Enɛ ɔ ha nɛ osɔfohi fuu ná ní kpɔtɔɔ.Kpojemi 17:4, 5.

E sɛ nɛ a ngɔ fiɛɛmi ní tsumi ɔ kɛ ye jua

9. Mɛni Yehowa Odasefohi peeɔ kɛ tsɔɔ kaa a kɛ juɛmi kpakpa nɛ tsuɔ fiɛɛmi ní tsumi ɔ?

9 Anɛ Yehowa Odasefohi kpakpaa nihi a he sika ngɛ a Matsɛ Yemi Asahi a nɔ aloo kpokpa nɔ kpehi a sisi lo?  Ohoo! Nihi jeɔ a tsui mi nɛ a haa nɔ́ ko kɛ yeɔ bua fiɛɛmi ní tsumi ɔ. (2 Korinto Bi 9:7) Se kɛ̃ ɔ, jeha nɛ be ɔ, Yehowa Odasefohi ngɔ ngmlɛfia maa pee ayɔ akpe enyɔ kɛ fiɛɛ sane kpakpa a, nɛ daa nyɔhiɔ ɔ, a kɛ nimli nɛ a he hiɛ pe ayɔ nɛɛ kaseɔ Baiblo ɔ. A wui mɛ hiɔ ngɛ a fiɛɛmi ní tsumi ɔ he mohu lɛɛ, se kɛ̃ ɔ, a bua jɔ kaa a maa ngɔ mɛ nitsɛmɛ a sika kɛ tsu ní tsumi nɛ ɔ. Níhi a mi hlalɔ ko tu ní tsumi nɛ Yehowa Odasefohi tsuɔ ɔ he munyu ke: “Nɔ́ titli nɛ a kɛ ma a hɛ mi ji kaa a maa fiɛɛ, nɛ a maa tsɔɔ nihi ní.” E tsɔɔ hu kaa Yehowa Odasefohi be osɔfohi nɛ a woɔ mɛ hiɔ. Lɛɛ ke pi sika he nɛ wa fiɛɛɔ ngɛ ɔ, mɛni juɛmi nɛ waa kɛ tsuɔ fiɛɛmi ní tsumi ɔ mɔ? Wa jeɔ wa tsui mi kɛ tsuɔ ní tsumi nɛ ɔ, ejakaa wa suɔ Yehowa kɛ wa nyɛmi nɔmlɔ. Enɛ ɔ ha nɛ gbami nɛ ngɛ La 110:3 ɔ ba mi. (Kane.)

MƐNI BLƆHI A NƆ E SA KAA A GU KƐ FIƐƐ?

Wa fiɛɛɔ ngɛ he tsuaa he nɛ waa maa na nihi ngɛ (Hyɛ kuku 10)

10. Mɛni blɔhi a nɔ nɛ Yesu kɛ e kaseli ɔmɛ gu kɛ fiɛɛ?

10 Mɛni blɔhi a nɔ Yesu kɛ e kaseli ɔmɛ gu kɛ fiɛɛ? A ya he fɛɛ he nɛ a maa na nihi ngɛ. Kaa nɔ hyɛmi nɔ́ ɔ, a fiɛɛ ngɛ gbɛjegbɛhi a he, kɛ juahi a nɔ. A ya hlaa nihi ngɛ wehi a mi hulɔ. (Mateo 10:11; Luka 8:1; Bɔfo Ɔmɛ A Ní Tsumi 5:42; 20:20) Wehi a mi fiɛɛmi ji blɔ nɛ a ma nyɛ maa gu nɔ nɛ a nine maa su nihi tsuo a nɔ.

11, 12. Ngɛ sane kpakpa fiɛɛmi ní tsumi ɔ blɔ fa mi ɔ, mɛni slɔɔto ngɛ sɔlemi ɔmɛ kɛ Yehowa we bi a kpɛti?

11 Anɛ sɔlemi ɔmɛ hu fiɛɛɔ sane  kpakpa a kaa bɔ nɛ Yesu pee ɔ lo? Behi fuu ɔ, osɔfohi nɛ a woɔ mɛ hiɔ nɛ a fiɛɛɔ kɛ tsɔɔ a sɔlemi bi ɔmɛ. Osɔfo nɛ ɔmɛ pee we ni hehi kaseli, mohu ɔ, a suɔ kaa a maa baa nihi nɛ a nine su a nɔ momo ɔ a yi konɛ a ko je. Be komɛ ɔ, a woɔ a sɔlemi bi ɔmɛ he wami kaa a fiɛɛ. Kaa nɔ hyɛmi nɔ́ ɔ, ngɛ jeha 2001 ɔ mi ɔ, Pope John Paul nɛ ji enyɔne ɔ de ngɛ sɛ womi ko mi ke, e sa nɛ sɔlemi bi ɔmɛ nɛ a fiɛɛ Sane Kpakpa a kɛ kã kaa bɔ nɛ bɔfo Paulo pee ɔ. E tsɔɔ kaa Paulo de ke: “Ke i fiɛɛ we Sane Kpakpa a, musu tloo mi.” Lɔ ɔ se ɔ, Pope John Paul tsɔɔ kaa e sa nɛ nɔ fɛɛ nɔ nɛ ngɛ sɔlemi ɔ mi ɔ nɛ tsu fiɛɛmi ní tsumi nɛ ɔ, se pi kaa a ma tsɔse nihi bɔɔ ko pɛ nɛ a tsu. Se kɛ̃ ɔ, nihi bɔɔ pɛ nɛ a ngɛ jã pee.

12 Nɛ Yehowa Odasefohi hu nɛɛ? Mɛ pɛ ji nihi nɛ a fiɛɛɔ kaa kɛ je jeha 1914 ɔ mi ɔ, Yesu bɔni nɔ yemi kaa Matsɛ. A bu Yesu fami ɔ tue nɛ a ngɔ fiɛɛmi ní tsumi ɔ kɛ pee nɔ́ titli ngɛ a si himi mi. (Marko 13:10) Womi ko nɛ a tsɛɛ ke Pillars of Faith—American Congregations and Their Partners ɔ tsɔɔ kaa fiɛɛmi ní tsumi ɔ ji nɔ́ ko nɛ he hia Yehowa Odasefohi wawɛɛ nitsɛ. Womi ɔ tsɔɔ hu kaa, ke Yehowa Odasefohi na nihi nɛ hwuɔ ngɛ mɛ yee, loo a be nɔ ko, loo a be he wami ɔ, a bɔɔ mɔde kaa a maa ye bua mɛ. Se a hɛ ji nɔ́ titli nɛ a kɛ ma a hɛ mi ɔ nɔ. Lɔ ɔ ji kaa a maa fiɛɛ kɛ tsɔɔ nihi kaa je nɛ ɔ nyagbe su ta, nɛ a maa tsɔɔ nihi nɔ́ nɛ ke a pee ɔ, a ma he a yi wami. Yehowa Odasefohi kaseɔ blɔhi a nɔ nɛ Yesu kɛ e kaseli ɔmɛ gu kɛ fiɛɛ sɛ gbi ɔ, nɛ mɛ hu a peeɔ jã.

JIJE E SA KAA A FIƐƐ KƐ YA SU, NƐ MƐNI BE E SA KAA A GBE FIƐƐMI NÍ TSUMI Ɔ NYA?

13. Jije e sa kaa a fiɛɛ sane kpakpa a kɛ ya su?

13 Yesu tsɔɔ kaa e se nyɛɛli ɔmɛ maa fiɛɛ sane kpakpa a kɛ kpa ‘je ɔ mi tsuo’ nɛ a maa tsɔɔ nihi ní. A fã mɛ ke a pee ‘je ma amɛ tsuo kaseli.’ (Mateo 24:14; 28:19, 20) Enɛ ɔ tsɔɔ kaa a maa fiɛɛ sane kpakpa a ngɛ je kɛ wɛ.

14, 15. Mɛni tsɔɔ kaa Yehowa Odasefohi ha nɛ gbami nɛ Yesu gba kaa a maa fiɛɛ ngɛ je ɔ mi tsuo ɔ ngɛ mi bae? (Moo hyɛ fonihi nɛ ngɛ ní kasemi ɔ sisije ɔ.)

14 Yehowa Odasefohi pɛ ji nihi nɛ a ha nɛ gbami nɛ Yesu gba kaa a maa fiɛɛ sane kpakpa a ngɛ je kɛ wɛ ɔ ngɛ mi bae. Mɛni he je nɛ wa ngɛ dee jã a? Osɔfohi maa pee 600,000 nɛ ngɛ United States, nɛ Yehowa Odasefohi hu maa pee 1,200,000 nɛ a fiɛɛɔ sane kpakpa a ngɛ lejɛ ɔ. Katoliki osɔfohi maa pee 400,000 nɛ a ngɛ je kɛ wɛ, se Yehowa Odasefohi nɛ a hiɛ pe ayɔ 8 nɛ a ngɛ fiɛɛe ngɛ mahi kakaaka 240 a nɔ. Enɛ ɔ tsɔɔ heii kaa Yehowa Odasefohi ngɛ sane kpakpa a fiɛɛe ngɛ je kɛ wɛ, nɛ enɛ ɔ ngɛ Yehowa hɛ mi nyami woe, nɛ e ha nɛ nihi ngɛ Yehowa yi jee!La 34:1; 51:15.

15 Akɛnɛ wa ji Yehowa Odasefohi he je ɔ, oti nɛ waa kɛ ma wa hɛ mi ji kaa wa maa fiɛɛ ha nihi fuu loko nyagbe ɔ nɛ su. Bɔ nɛ pee nɛ wa nyɛ nɛ wa tsu ní tsumi nɛ ɔ, wa pee womihi, womi tɛtlɛɛhi, dɛ womihi, kpokpa nɔ kpe kɛ Kaimi ɔ he nine fɔmi womihi nɛ waa tsɔɔ a sisi kɛ ya gbihi nɛ hiɛ pe 700 mi. Wa gbaa womi nɛ ɔmɛ haa nihi nɛ wa he we mɛ nɔ́ ko. Jeha nɛ be nɛ ɔ pɛ ɔ, wa  pee Baiblo kasemi womihi maa pee ayɔ akpe eywiɛ kɛ nya ayɔ lafa enuɔ. Jehanɛ se hu ɔ, wa pee New World Translation of the Holy Scriptures ɔ nɛ hiɛ pe ayɔ 200 ngɛ gbihi nɛ hiɛɛ pe 130 mi. Ngɛ wa wɛbsaiti ɔ nɔ hu ɔ, o maa na níhi nɛ a pee ngɛ gbihi nɛ hiɛ pe 750 mi. Yehowa Odasefohi pɛ nɛ a ngɛ ní tsumi ngua nɛ ɔ tsue.

16. Mɛni ha nɛ wa le kaa Mawu mumi ɔ ngɛ Yehowa Odasefohi a nɔ ɔ?

16 Mɛni be fiɛɛmi ní tsumi ɔ maa ba nyagbe? Yesu tsɔɔ kaa a maa fiɛɛ sane kpakpa a hluu kɛ ya si benɛ nyagbe ɔ maa ba. Yehowa mumi klɔuklɔu ɔ ji nɔ́ nɛ ha nɛ wɔ Yehowa Odasefohi wa nyɛ nɛ wa ngɛ fiɛɛmi ní tsumi ɔ tsue ngɛ nyagbe ligbi nɛ ɔmɛ a mi. (Bɔfo Ɔmɛ A Ní Tsumi 1:8; 1 Petro 4:14) Eko ɔ, sɔlemi yali ma de ke mɛ hu mumi klɔuklɔu ɔ ngɛ a nɔ. Se anɛ jamɛatsɛmɛ ɔmɛ nyɛɔ nɛ a tsuɔ ní tsumi nɛ Yehowa Odasefohi ngɛ tsue ɔ lo? Sɔlemi komɛ bɔ mɔde kaa a maa fiɛɛ kaa bɔ nɛ wa fiɛɛɔ ɔ, se a nyɛ we. Ni komɛ suɔ kaa a maa fiɛɛ se a peeɔ jã be kpiti pɛ. Ni kpa komɛ hu fiɛɛɔ ngɛ wehi a mi, se pi Matsɛ Yemi ɔ he sane kpakpa a nɛ a fiɛɛɔ. Enɛ ɔ he ɔ, tsa pi mɛ nɛ a ngɛ ní tsumi nɛ Yesu je sisi ɔ nɔ tsae.

MƐNƆMƐ TUTUUTU NƐ A NGƐ SANE KPAKPA A FIƐƐE MWƆNƐ Ɔ?

17, 18. (a) Mɛni he je nɛ wa ma nyɛ ma de kɛ nɔ mi mami kaa Yehowa Odasefohi nɛ a ngɛ Matsɛ Yemi ɔ he sane kpakpa a fiɛɛe ngɛ je kɛ wɛ mwɔnɛ ɔ? (b) Mɛni lɛ woɔ wɔ he wami nɛ wa yaa nɔ nɛ wa tsuɔ ní tsumi nɛ ɔ?

17 Ke jã a, lɛɛ mɛnɔmɛ nɛ a ngɛ Matsɛ Yemi ɔ he sane kpakpa a fiɛɛe mwɔnɛ ɔ? Yehowa Odasefohi pɛ! Kɛ wa plɛ kɛ le kɛɛ? Ejakaa wa ngɛ sɛ gbi nɛ sa kaa a fiɛɛ ɔ fiɛɛe. Lɔ ɔ ji Matsɛ Yemi ɔ he sane kpakpa a nɛ. Blɔhi a nɔ nɛ wa guɔ kɛ fiɛɛɔ ɔ da, ejakaa wa hlaa nihi nɛ wa fiɛɛɔ kɛ haa mɛ. Waa kɛ juɛmi kpakpa nɛ fiɛɛɔ. Enɛ ɔ tsɔɔ kaa wa suɔ Yehowa nɛ wa suɔ wa nyɛmi nɔmlɔ. Wa fiɛɛɔ ngɛ je kɛ wɛ, ejakaa wa fiɛɛɔ haa nihi tsuo ngɛ gbi slɔɔtohi a mi. Wa maa ya nɔ maa fiɛɛ Matsɛ Yemi ɔ he sane kpakpa a kɛ ya su benɛ nyagbe ɔ maa ba!

18 Ke wa hyɛ bɔ nɛ Yehowa we bi ngɛ sane kpakpa a fiɛɛe ha ngɛ nyagbe ligbi nɛ ɔmɛ a mi ɔ, e ngɛ nyakpɛ kɛkɛ. Se mɛni yeɔ bua wɔ nɛ wa nyɛɔ peeɔ jã a? Bɔfo Paulo tsɔɔ nya ke: “Mawu ngɛ nyɛ he ní tsue, konɛ nyɛ ba ná bua jɔmi nɛ nyɛ kɛ pee e suɔmi nya ní.” (Filipi Bi 2:13) E ba kaa Yehowa maa wo wɔ he wami konɛ wa nyɛ nɛ waa bɔ mɔde wawɛɛ nɛ waa fiɛɛ sane kpakpa a!2 Timoteo 4:5.