Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Hwɔɔmi Mɔ—Nɔ́ Nɛ A Maa Kase  |  May 2016

Mo Ná Níhi Nɛ Yehowa Haa Wɔ ɔ He Se Kɛ Pi Si

Mo Ná Níhi Nɛ Yehowa Haa Wɔ ɔ He Se Kɛ Pi Si

‘Imi ji Yehowa, nyɛ Mawu ɔ nɛ. I suɔ kaa ma tsɔse nyɛ konɛ e hi ha nyɛ nitsɛmɛ.’YESAYA 48:17.

LAHI: 20, 37

1, 2. (a) Kɛ Yehowa Odasefohi peeɔ a ní ngɛ Baiblo ɔ he ha kɛɛ? (b) Mɛni Baiblo mi womi lɛ o bua jɔ he wawɛɛ?

YEHOWA ODASEFOHI fiɛ we Baiblo ɔ he. Baiblo ɔ woɔ wa bua, e haa nɛ wa náa hɛ kɛ nɔ fɔmi, nɛ e kɛ blɔ tsɔɔmi nɛ da haa wɔ. (Roma Bi 15:4) Tsa pi adesahi a sɛ gbi nɛ ngɛ mi, mohu ɔ, e ji “Mawu munyu.”1 Tesalonika Bi 2:13.

2 Eko ɔ, wɔ tsuo wa ngɛ Baiblo mi womi ko nɛ wa bua jɔ he wawɛɛ. Ni komɛ a bua jɔ Sane Kpakpa amɛ a he, ejakaa a haa nɛ a naa Yehowa su kpakpa amɛ nɛ Yesu je kpo ɔ. (Yohane 14:9) Ni kpa komɛ hu ngɛ nɛ a bua jɔɔ Baiblo ɔ mi gbami womihi a he. Womi nɛ ɔmɛ a kpɛti kake ji Kpojemi womi ɔ. E tsɔɔ ‘níhi nɛ maa ba mi ngɛ be kpiti mi.’ (Kpojemi 1:1) Ni komɛ ngɛ nɛ ke a kane La womi ɔ, e woɔ a bua, nɛ ni komɛ hu ngɛ nɛ a bua jɔɔ ga womi kpakpahi nɛ ngɛ Abɛ womi ɔ mi ɔ he. Enɛ ɔ tsɔɔ heii kaa a ngma Baiblo ɔ kɛ ha nɔ tsuaa nɔ.

3, 4. (a) Kɛ wa naa wa Baiblo kasemi womi ɔmɛ ha kɛɛ? (b) Mɛni womihi nɛ a peeɔ kɛ haa nimli pɔtɛɛ komɛ?

3 Akɛnɛ wa fiɛ we Baiblo ɔ he he je ɔ, wa bua jɔ wa Baiblo kasemi womi ɔmɛ a he, ejakaa Mawu Munyu ɔ nɔ nɛ a daa  kɛ ngmaa. Womihi, womiyohi, womi tɛtlɛɛhi kɛ womi kpahi nɛ wa nine suɔ nɔ ɔ tsuo je Yehowa ngɔ. Womi nɛ ɔmɛ yeɔ bua wɔ nɛ wa hɛɛ wɔ kɛ suu Yehowa he, nɛ wa hemi kɛ yemi ɔ mi waa.Tito 2:2.

4 A peeɔ wa womi ɔmɛ fuu kɛ haa Yehowa Odasefohi tsuo. Se womi komɛ ngɛ nɛ a pee kɛ ha ni komɛ pɔtɛɛ kaa nihewi kɛ yihewi aloo fɔli. A kɛ munyuhi kɛ videohi fuu fɔɔ wa wɛbsaiti ɔ nɔ kɛ haa nihi nɛ a pi Yehowa Odasefohi titli. Ní nɛ ɔmɛ tsuo tsɔɔ kaa Yehowa ngɛ si nɛ e wo kaa e ma tsɔse je ma amɛ tsuo ɔ nɔ yee.Yesaya 25:6.

5. Mɛni nɛ ke wa peeɔ ɔ, wa ma ná nɔ mi mami kaa Yehowa bua maa jɔ wa he?

5 E ngɛ mi kaa wa ti nihi fuu maa suɔ kaa wa ná be fuu kɛ kane Baiblo ɔ kɛ asafo ɔ womi ɔmɛ tsuo mohu lɛɛ, se pi be fɛɛ be nɛ wa náa deka kɛ peeɔ jã. Se ke waa kɛ wa be tsuɔ ní saminya nɛ wa kaneɔ Baiblo ɔ kɛ wa womi ɔmɛ nɛ wa kaseɔ ɔ, wa ma nyɛ ma ná nɔ mi mami kaa Yehowa bua maa jɔ wa he. (Efeso Bi 5:15, 16) Se nɔ́ ko ngɛ nɛ e sɛ kaa waa pee kɔkɔɔkɔ. Mɛni ji jamɛ a nɔ́ ɔ?

6. Mɛni ma nyɛ ma ha nɛ wa be níhi nɛ wa nine suɔ nɔ kɛ jeɔ Yehowa ngɔ ɔ a he se náe?

6 Ke wa hyɛ we nɛ hi ɔ, wa ma susu kaa Baiblo ɔ mi womi komɛ aloo asafo ɔ womi ɔmɛ ekomɛ kɔ we wa he. Kaa nɔ hyɛmi nɔ́ ɔ, ke wa susu kaa Baiblo mi womi ko kɔ we si fɔfɔɛ nɛ wa ngɛ mi ɔ he hu nɛɛ? Aloo ke wa susu kaa wa piɛɛ we nihi nɛ a ngma womi ko kɛ ha mɛ ɔ a he hu nɛɛ? Anɛ wa kaneɔ lɛ kɛfokɛfo aloo wa kane we kulaa po lo? Ke jã a, lɛɛ wa be munyu komɛ nɛ a he hia a he se náe. Mɛni wa ma nyɛ maa pee konɛ wa ko pee wa ní jã? E sa nɛ waa le kaa munyuhi tsuo nɛ wa nine suɔ nɔ ɔ jeɔ Yehowa ngɔ. Wa kaneɔ ngɛ Baiblo ɔ mi ke: ‘Imi ji Yehowa nyɛ Mawu ɔ nɛ. I suɔ kaa ma tsɔse nyɛ konɛ e hi ha nyɛ nitsɛmɛ.’ (Yesaya 48:17) Ngɛ munyu nɛ ɔ nɛ wa ngɛ kasee ɔ mi ɔ, wa ma susu ga womi etɛ nɛ maa ye bua wɔ konɛ wa ná níhi tsuo nɛ Yehowa haa wɔ ɔ a he se.

NÍHI NƐ O MA NYƐ MAA PEE KONƐ O NÁ BAIBLO KANEMI HE SE

7. Mɛni he je nɛ e he hia kaa waa kane Baiblo ɔ kɛ juɛmi nɛ da a?

7 O kɛ juɛmi nɛ da nɛ kane. Ngɛ anɔkuale mi ɔ, a ngma Baiblo mi womi ɔmɛ ekomɛ kɛ ha ni komɛ pɔtɛɛ. Se Baiblo ɔ tsɔɔ heii kaa ‘ngmami tsuaa ngmami ɔ, Mawu mumi ɔ lɛ ha nɛ nihi ngma, nɛ e hi.’ (2 Timoteo 3:16) Enɛ ɔ he je ɔ, e he hia nɛ waa kɛ juɛmi nɛ da nɛ kane Baiblo ɔ. Nyɛminyumu ko le kaa e ma nyɛ maa kase níhi fuu ngɛ Baiblo mi sane kake pɛ mi. Enɛ ɔ yeɔ bua lɛ nɛ e kaseɔ níhi nɛ a mi kuɔ. Enɛ ɔ he ɔ, loko wa maa kane Baiblo ɔ, e sa nɛ waa sɔle konɛ Yehowa nɛ ha nɛ wa ná juɛmi nɛ da konɛ waa nu ní kasemi nɛ ngɛ mi nɛ e suɔ kaa waa le ɔ sisi.Ezra 7:10; kane Yakobo 1:5.

Anɛ o ngɛ o Baiblo kanemi ɔ he se náe kɛ pi si lo? (Hyɛ kuku 7)

8, 9. (a) Ke wa ngɛ Baiblo ɔ kanee ɔ, mɛni sanehi wa ma nyɛ ma bi wa he? (b) Níhi nɛ Yehowa hlaa ngɛ asafo mi nikɔtɔma amɛ a he ɔ deɔ wɔ mɛni ngɛ Yehowa he?

8 Mo bi sanehi. Ke o ngɛ Baiblo ɔ kanee ɔ, moo mlɛ nɛ o bi o he sanehi nɛ nyɛɛ se nɛ ɔ: ‘Mɛni enɛ ɔ deɔ mi ngɛ Yehowa he? Mɛni blɔ nɔ ma nyɛ ma gu konɛ ma ngɔ munyu nɛ ɔ kɛ tsu ní ngɛ ye si himi mi? Kɛ ma plɛ kɛ ngɔ munyu nɛ ɔ ke ye bua ni kpahi ha kɛɛ?’ Ke wa  pueɔ wa yi mi tɛ ngɛ sane bimi nɛ ɔmɛ a he ɔ, wa ma ná Baiblo kanemi he se wawɛɛ nitsɛ. Nyɛ ha nɛ wa susu nɔ hyɛmi nɔ́ kake ko he nɛ waa hyɛ. Baiblo ɔ tsɔɔ ní komɛ nɛ e he hia kaa nɔ ko nɛ su he loko e sɔmɔ kaa asafo mi nɔkɔtɔma. (Kane 1 Timoteo 3:2-7.) Se kɛ̃ ɔ, tsa pi asafo mi nikɔtɔmahi ji wa ti nihi fuu, enɛ ɔ he ɔ, eko ɔ, wa ma susu kaa jamɛ a munyu ɔ he hia we wɔ ngɛ blɔ ko blɔ ko nɔ. Se nyɛ ha nɛ waa da sane bimi etɛ nɛ wa wo ta kɛ sɛ hlami ɔ nɔ konɛ waa na bɔ nɛ hlami ní nɛ ɔmɛ maa ye bua wɔ ha.

9 “Mɛni enɛ ɔ deɔ mi ngɛ Yehowa he?” Yehowa tsɔɔ wɔ níhi nɛ e ngɛ hlae ngɛ asafo mi nikɔtɔmahi a dɛ. E hyɛɔ blɔ kaa nyumuhi nɛ a nyɛɛɔ hɛ mi ngɛ asafo ɔ mi ɔ nɛ a ba a je mi saminya. Enɛ ɔ tsɔɔ kaa asafo ɔ he jua wa ha Yehowa. Baiblo ɔ tsɔɔ kaa “Mawu ngɔ e Bi ɔ kɛ sã bɔ,” nɛ e kɛ dani asafo ɔ kɛ pee lɛ nitsɛ e nɔ. (Bɔfo Ɔmɛ A Ní Tsumi 20:28) Enɛ ɔ he ɔ, Yehowa hyɛɔ blɔ kaa asafo mi nikɔtɔmahi nɛ a pee nɔ hyɛmi nɔ́ kpakpa kɛ ha asafo ɔ. A maa bu akɔtaa kɛ ha lɛ ngɛ bɔ nɛ a kɛ nihi nɛ a ngɛ asafo ɔ mi ɔ hiɔ si ha a he. E suɔ kaa asafo mi nikɔtɔma amɛ nɛ a hyɛ wa nɔ saminya. (Yesaya 32:1, 2) Ke wa kane hlami ní nɛ ɔmɛ a he ní ɔ, wa naa kaa Yehowa susuɔ wa he saminya.

Yehowa ngɛ blɔ hyɛe kaa wa ti nɔ tsuaa nɔ nɛ nu nɔ́ sisi, nɛ e kɛ hɛ si kami nɛ tsu níhi a he ní

10, 11. (a) Ke wa ngɛ níhi nɛ a ngɛ hlae ngɛ asafo mi nikɔtɔmahi a dɛ ɔ he ní kanee ɔ, kɛ waa kɛ ma nyɛ ma tsu ní ngɛ wɔ nitsɛmɛ wa si himi mi ha kɛɛ? (b) Kɛ waa kɛ ma nyɛ maa ye bua ni kpahi hu ha kɛɛ?

 10 “Mɛni blɔ nɔ ma nyɛ ma gu konɛ ma ngɔ munyu nɛ ɔ kɛ tsu ní ngɛ ye si himi mi?” Ke o ji asafo mi nɔkɔtɔma a, e sa nɛ o ya nɔ nɛ o nylɔ hlami ní nɛ ɔmɛ a mi nɛ o bɔ mɔde kaa o maa ya o hɛ mi ngɛ mi. Ke o ngɛ mɔde bɔe kaa o he nɛ su konɛ o “hyɛ Mawu asafo ɔ nɔ ɔ,” e sa nɛ o su hlami ní nɛ ɔmɛ a he bɔ nɛ sa. (1 Timoteo 3:1) Se Kristofohi tsuo ma nyɛ maa kase nɔ́ ko ngɛ hlami ní nɛ ɔmɛ a mi. Kaa nɔ hyɛmi nɔ́ ɔ, Yehowa ngɛ blɔ hyɛe kaa wa ti nɔ tsuaa nɔ nɛ nu nɔ́ sisi, nɛ e kɛ hɛ si kami nɛ tsu níhi a he ní. (Filipi Bi 4:5, NW; 1 Petro 4:7) Ke asafo mi nikɔtɔmahi “pee nɔ hyɛmi nɔ́ ha Mawu asafo ɔ,” wa ma nyɛ maa “kase” a hemi kɛ yemi ɔ.1 Petro 5:3; Hebri Bi 13:7.

11 “Kɛ ma plɛ kɛ ngɔ munyu nɛ ɔ ke ye bua ni kpahi ha kɛɛ?” Wa ma nyɛ maa ngɔ hlami ní nɛ ɔmɛ kɛ ye bua wa Baiblo kaseli kɛ nihi nɛ a bua jɔ wa munyu ɔ he ɔ, konɛ a na slɔɔto nɛ ngɛ asafo mi nikɔtɔmahi kɛ osɔfohi nɛ a ngɛ jami ɔmɛ a mi ɔ a kpɛti. Hlami ní nɛ ɔmɛ ma nyɛ maa ye bua wɔ konɛ wa kai kaa asafo mi nikɔtɔma amɛ ngɛ dengme gboe wawɛɛ. Enɛ ɔ maa ye bua wɔ nɛ wa maa bu mɛ. (1 Tesalonika Bi 5:12) Ke wa buɔ asafo mi nikɔtɔma amɛ wawɛɛ ɔ, a kɛ bua jɔmi ma tsu a ní tsumi ɔ.Hebri Bi 13:17.

12, 13. (a) Mɛni níhi a mi hlami lɛ waa kɛ womihi kɛ ní kpahi nɛ wa ngɛ ɔ ma nyɛ maa pee? (b) Mo ha nɔ hyɛmi nɔ́ ko nɛ tsɔɔ kaa ke wa le nɔ́ he je nɛ a ngma munyu ko ngɛ Baiblo ɔ mi ɔ, e maa ye bua wɔ konɛ waa nu níhi nɛ a mi kuɔ ɔ a sisi.

12 Mo hla níhi a mi. Ke wa ngɛ Baiblo ɔ kasee ɔ, wa ma nyɛ ma hla sane bimihi nɛ nyɛɛ se nɛ ɔ a heto:

  • Mɛnɔ ngma Baiblo mi womi nɛ ɔ?

  • Jije e ngma ngɛ nɛ mɛni be e ngma?

  • Mɛni ji níhi nɛ a he hia nɛ ya nɔ be mi nɛ e ngɛ jamɛ a womi ɔ ngmae ɔ?

Sane bimi nɛ ɔmɛ a heto ɔ ma nyɛ maa ye bua wɔ konɛ waa kase níhi nɛ a mi kuɔ.

13 Kaa nɔ hyɛmi nɔ́ ɔ, Ezekiel 14:13, 14 ɔ de ke: ‘“Ke ma ko pee yayami, nɛ e yi mi anɔkuale ɔ, tue gblami nɛ e ma ná ji, ma ha nɛ e niye ní se maa po, nɛ hwɔ maa ba ma a nɔ; nimlihi kɛ lohwehi tsuo a hɛ mi ma kpata. Ke e ba mi kaa ni etɛ nɛ ɔmɛ, Noa, Daniel, kɛ Hiob ngɛ jamɛ a zugba a nɔ tete po ɔ, a kpakpa peemi ɔ, mɛ nitsɛmɛ a yi wami pɛ e ma nyɛ he kɛ je hɛ mi kpatami ɔ mi.” Nyɔmtsɛ Yehowa lɛ de.’ Ke wa hla níhi a mi ɔ, wa maa na kaa Ezekiel ngma munyu nɛ ɔ jeha 612 se loko a fɔ Kristo. Noa kɛ Hiob gbo jeha lafahi a se loko a ngma munyu nɛ ɔ, se loloolo ɔ, Yehowa kai anɔkuale nɛ a ye ɔ. Se Daniel lɛɛ, jamɛ a be ɔ mi ɔ, e gbo we. Eko ɔ, be nɛ Yehowa de ke Daniel ji nɔmlɔ kpakpa kaa Noa kɛ Hiob ɔ, Daniel ye maa pee jeha 20. Mɛni wa kaseɔ ngɛ enɛ ɔ mi? Yehowa toɔ e sɔmɔli anɔkualetsɛmɛ a he  hɛ, nɛ a he jua wa ha lɛ. Nihewi kɛ yihewi hu piɛɛ he.La 148:12-14.

MO NÁ ASAFO Ɔ WOMI SLƆƆTOSLƆƆTO ƆMƐ A HE SE

14. Mɛni blɔ nɔ nihewi kɛ yihewi náa womihi nɛ a peeɔ haa mɛ ɔ he se ngɛ, nɛ kɛ ni kpahi hu ma plɛ kɛ ná he se ha kɛɛ? (Moo hyɛ foni nɛ ngɛ ní kasemi ɔ sisije ɔ.)

14 Womihi nɛ a pee kɛ ha nihewi kɛ yihewi. Wa kase kaa wa ma nyɛ ma ná Baiblo mi womi ɔmɛ tsuo a he se. Jã kɛ̃ nɛ wa ma nyɛ ma ná asafo ɔ womi ɔmɛ tsuo hu a he se. Nyɛ ha nɛ wa susu enɛ ɔ he nɔ hyɛmi ní bɔɔ komɛ a he nɛ waa hyɛ. Lingmi nɛ ɔ, Yehowa ha nihewi kɛ yihewi níhi fuu. [1] (Hyɛ nyagbe ningma.) Ní nɛ ɔmɛ yeɔ bua mɛ nɛ a nyɛɔ daa haomihi nɛ a kɛ kpeɔ ngɛ sukuu kɛ haomihi nɛ a kɛ kpeɔ ke a ngɛ wae ɔ a nya. Se ke wɔ tsuo wa kane munyu nɛ ɔmɛ kɛ womi nɛ ɔmɛ ɔ, mɛni se wa ma ná? Ke wa kaneɔ munyu nɛ ɔmɛ ɔ, lɔ ɔ ma ha nɛ wa maa le nyagbahi nɛ nihewi kɛ zangmawi kɛ kpeɔ, nɛ wa ma nyɛ maa ye bua mɛ nɛ waa wo mɛ he wami.

E sɛ nɛ Kristofohi nɛ a wa a nɛ a susu kaa a be munyuhi kɛ womihi nɛ a ngmaa kɛ haa nihewi kɛ zangmawi ɔ nya, lɔ ɔ he ɔ, a be kanee

15. Mɛni he je nɛ e sa kaa Kristofohi nɛ a wa a nɛ a kane munyuhi kɛ womihi nɛ a ngma kɛ ha nihewi kɛ yihewi ɔ?

15 E sɛ nɛ Kristofohi nɛ a wa a nɛ́ a susu kaa a be munyuhi kɛ womihi nɛ a ngmaa kɛ haa nihewi kɛ zangmawi ɔ nya, lɔ ɔ he ɔ, a be kanee. Kristofohi tsuo kɛ nyagbahi fuu nɛ a tuɔ he munyu ngɛ jamɛ a womi ɔmɛ a mi ɔ kpeɔ. Kaa nɔ hyɛmi nɔ́ ɔ, e he hia nɛ wɔ tsuo wa fã wa hemi kɛ yemi ɔ he, waa ye wa he nɔ, waa hwu kɛ si juami bi a nɔ nyɛmi, nɛ waa yu wa he ngɛ huɛ yaya bɔmi kɛ hɛja jemi yayahi a he. Enɛ ɔ he ɔ, e ngɛ mi kaa a pee jamɛ a womi ɔmɛ kɛ ha nihewi kɛ yihewi mohu lɛɛ, se munyuhi nɛ a ngɛ mi ɔ je Baiblo ɔ mi, nɛ Kristofohi tsuo ma nyɛ ma ná he se.

16. Mɛni hu lɛ wa womi ɔmɛ yeɔ bua nihewi kɛ yihewi nɛ a peeɔ?

16 Jehanɛ se hu ɔ, womihi nɛ a pee kɛ ha nihewi kɛ zangmawi ɔ ma nyɛ maa ye bua mɛ konɛ huɛ bɔmi nɛ ngɛ a kɛ Yehowa a kpɛti ɔ mi nɛ wa. (Kane Fiɛlɔ 12:1, 13.) Nikɔtɔmahi hu ma nyɛ ma ná he se. Kaa nɔ hyɛmi nɔ́ ɔ, munyu ko ngɛ April 2009 Awake! ɔ mi nɛ e yi ji, “Young People Ask . . . How Can I Make Bible Reading Enjoyable?” (Sane Nɛ Nihewi Kɛ Yihewi Biɔ . . . Mɛni Ma Pee Konɛ Ye Bua Nɛ Jɔ Baiblo Kanemi He?) Ga womi kpakpahi fuu ngɛ jamɛ a munyu ɔ mi. Daka ko hu ngɛ mi nɛ wa ma nyɛ maa po kɛ to konɛ waa hyɛ nɔ kɛ kase ní. Anɛ nihi nɛ a wa ná jamɛ a munyu ɔ he se lo? Yogbayo ko nɛ e ngɛ bimɛ ɔ tsɔɔ kaa Baiblo kanemi yeɔ ha lɛ wawɛɛ nitsɛ. Se e kɛ ga womihi nɛ ngɛ jamɛ a munyu ɔ mi ɔ tsu ní nɛ amlɔ nɛ ɔ, e bua ba jɔ Baiblo kanemi he. E tsɔɔ kaa Baiblo mi womi ɔmɛ tsuo kɛ a he kpaa gbi, nɛ e ngɛ kaa nɔ́ nɛ mɛ tsuo a tuɔ nɔ́ kake he munyu. E de hu ke: “Amlɔ nɛ ɔ, ye bua ba jɔ Baiblo kanemi he wawɛɛ nitsɛ.”

17, 18. Ke wa kaneɔ womihi nɛ a peeɔ kɛ haa ma bi ɔ, mɛni se wa ma nyɛ ma ná? Mo ha enɛ ɔ he nɔ hyɛmi nɔ́.

 17 Womihi nɛ a pee kɛ ha ma bi. Kɛ je jeha 2008 ɔ mi ɔ, a bɔni Hwɔɔmi Mɔ nɛ a kaseɔ ɔ peemi. A peeɔ jamɛ a Hwɔɔmi Mɔ ɔ kɛ haa Yehowa Odasefohi titli, se a peeɔ eko hu kɛ haa ma bi. Kɛ wa ma plɛ kɛ ná womi tɛtlɛɛ nɛ ɔmɛ hu a he se ha kɛɛ? Kaa nɔ hyɛmi nɔ́ ɔ, ke o fɔ nɔ ko nine kaa e ba Matsɛ Yemi Asa a nɔ, nɛ e ba a, o bua jɔɔ. Ke munyu tulɔ ɔ ngɛ munyu tue ɔ, o susuɔ o nubwɔ ɔ he. O biɔ o he ke, ‘Anɛ e ngɛ munyu ɔ sisi nue, nɛ munyu ɔ ma nyɛ ma tsake e si himi lo?’ Ke o na kaa e ngɛ munyu ɔ sisi nue, nɛ e ma nyɛ ma tsake e si himi ɔ, o bua jɔɔ, nɛ o nyaa jamɛ a munyu ɔ he wawɛɛ.

18 Jã kɛ̃ nɛ wa ma nyɛ maa nu he ke wa kane womihi nɛ a ngma kɛ ha ma bi ɔ. Kaa nɔ hyɛmi nɔ́ ɔ, Hwɔɔmi Mɔ ɔ nɛ a pee kɛ ha ma bi kɛ munyuhi nɛ a ngmaa kɛ fɔɔ jw.org ɔ nɔ ɔ ngɔɔ munyuhi nɛ a sisi numi yi kɛ tsɔɔ Baiblo mi munyuhi a nya. Ke wa kaneɔ munyu nɛ ɔmɛ ɔ, e ma ha nɛ wa maa nu Baiblo mi anɔkualehi nɛ wa le momo ɔ a sisi saminya, nɛ wa bua maa jɔ he wawɛɛ. Jehanɛ se hu ɔ, lɔ ɔ ma nyɛ ma ha nɛ wa maa le blɔ ehehi a nɔ nɛ wa maa gu kɛ tu wa hemi kɛ yemi ɔ he munyu kɛ tsɔɔ nihi ngɛ fiɛɛmi tso mi. Jã kɛ̃ nɛ Awake! womi tɛtlɛɛ ɔ hu haa nɛ hemi kɛ yemi nɛ wa ngɛ kaa Bɔlɔ ko ngɛ ɔ mi waa. E yeɔ bua wɔ nɛ wa leɔ bɔ nɛ wa ma plɛ kɛ fã wa hemi kɛ yemi ɔ he ha hulɔ.Kane 1 Petro 3:15.

19. Mɛni wa maa pee kɛ tsɔɔ kaa wa bua jɔɔ níhi nɛ Yehowa kɛ haa wɔ ɔ he?

19 E ngɛ heii kaa Yehowa ngɔ ga womi kɛ blɔ tsɔɔmihi fuu kɛ ha wɔ nɛ maa ye bua wɔ. (Mateo 5:3) Nyɛ ha nɛ waa ya nɔ nɛ waa kane womihi tsuo nɛ Yehowa pee kɛ ha wɔ ɔ, nɛ waa ngɔ munyuhi nɛ a ngɛ mi ɔ kɛ tsu ní. Ke wa peeɔ jã a, wa ma ná he se, nɛ lɔ ɔ hu maa tsɔɔ kaa wa bua jɔɔ níhi tsuo nɛ Yehowa kɛ haa wɔ ɔ he.Yesaya 48:17.

^ [1] (kuku 14) Womi nɛ ɔmɛ ekomɛ ji Questions Young People Ask—Answers That Work, Kpo 12, kɛ munyu nɛ ji, “Young People Ask,” nɛ a kɛ fɔɔ Intanɛti ɔ pɛ nɔ ɔ.