“Blɔ ɔ ji nɛ oo! nyɛɛ nyɛɛ blɔ ɔ nɔ.”YESAYA 30:21.

LAHI: 32, 48

1, 2. (a) Mɛni munyu a ngma ngɛ okadi tsohi a nɔ nɛ lɔ ɔ he nihi fuu a yi wami? (Moo hyɛ foni nɛ ngɛ ní kasemi ɔ sisije ɔ.) (b) Mɛni blɔ tsɔɔmi lɛ ma nyɛ ma he Mawu we bi a yi wami?

JEHA 100 kɛ se ji nɛ ɔ, a ngma munyu nɛ ji, “da si, hyɛ, bu tue” ngɛ okadi tsohi a nɔ ngɛ hehi nɛ tlee blɔhi poɔ lɔle blɔhi a mi ngɛ ɔ ngɛ Amerika Yiti Je ma amɛ a mi. Mɛni he je? Konɛ tlee ko nɛ ko fia lɔle ko. Munyu nɛ ɔ nɛ a ngma a he nihi fuu a yi wami.

2 Yehowa haa wɔ nɔ́ ko nɛ poɔ wa he piɛ nɛ hi kulaa pe jamɛ a okadi tso ɔmɛ. E tsɔɔ e we bi blɔ konɛ a nyɛ nɛ a ná neneene wami, nɛ a yu a he kɛ je oslaahi a he. Yehowa ngɛ kaa to hyɛlɔ ko nɛ ngɛ suɔmi nɛ e tsɔɔ e to ɔmɛ blɔ, nɛ e kɛ kɔkɔ bɔmi haa mɛ konɛ a ko gu blɔhi nɛ oslaa ngɛ a nɔ ɔ nɔ.Kane Yesaya 30:20, 21.

YEHOWA KƐ BLƆ TSƆƆMI HAA E WE BI KƐ JE BLEMA TƆƆ

3. Mɛni ha adesahi ya je blɔ nɛ kɛ nɔ yaa gbenɔ mi ɔ nɔ ɔ?

3 Kɛ je benɛ Yehowa bɔ adesa a, e kɛ blɔ tsɔɔmi pɔtɛɛ komɛ ha nihi. Kaa nɔ hyɛmi nɔ́ ɔ, Yehowa kɛ blɔ tsɔɔmi nɛ ngɛ heii ha adesahi ngɛ Eden abɔɔ ɔ mi konɛ a nyɛ nɛ a hi si kɛ ya  neneene nɛ a ná bua jɔmi. (1 Mose 2:15-17) Se Adam kɛ Hawa kɛ blɔ tsɔɔmi nɛ a Tsɛ nɛ ngɛ suɔmi ɔ ngɔ kɛ ha mɛ ɔ tsu we ní. Hawa bu ga nɛ sinɔ ko wo lɛ ɔ mohu tue, nɛ Adam hu ya bu e yo ɔ tue. Mɛni je mi kɛ ba? Mɛ ni enyɔ ɔmɛ tso a gbo, nɛ hɛ kɛ nɔ fɔmi ko be kɛ ha mɛ. Jehanɛ hu ɔ, akɛnɛ a gbo Mawu tue he je ɔ, lɔ ɔ ha nɛ adesahi tsuo ya je blɔ nɛ kɛ nɔ yaa gbenɔ mi ɔ nɔ.

4. (a) Mɛni he je nɛ ngɛ Nyu Kpekpemi ɔ se ɔ, e he ba hia nɛ a kɛ blɔ tsɔɔmi ehe nɛ ha adesahi ɔ? (b) Mɛni blɔ nɔ tsakemi nɛ ɔ nɛ ba a ha nɛ wa ba le bɔ nɛ Mawu buɔ wami ha?

4 Mawu kɛ blɔ tsɔɔmi ha Noa, nɛ lɔ ɔ ha nɛ e he nihi a yi wami. Ngɛ Nyu Kpekpemi ɔ se ɔ, Yehowa fã nihi kaa a ko ye muɔ aloo a nu muɔ. Mɛni he je? Ejakaa kɛ je jamɛ a be ɔ mi kɛ ma a, Yehowa ma ha nɛ adesahi ma bɔni lohwehi gbemi konɛ a ye. Tsakemi nɛ ɔ nɛ e kɛ ba a he je ɔ, e he hia nɛ e kɛ blɔ tsɔɔmi ehe nɛ ha mɛ. Blɔ tsɔɔmi ɔ ji: “Nɔ́ nɛ nyɛ ko ye ji lo nɛ muɔ ngɛ mi kɛ mwɔɔ; i kplɛɛ we enɛ ɔ, ejakaa muɔ ɔ, wami ngɛ mi.” (1 Mose 9:1-4) Mlaa nɛ ɔ ha nɛ wa ba le bɔ nɛ Mawu buɔ wami ha. Wami ɔ, Mawu nɔ́. Lɛ ji Bɔlɔ, nɛ lɛ nɛ e ha wɔ wami, lɔ ɔ he ɔ, e ngɛ he blɔ kaa e maa wo wɔ mlaa ngɛ wami he. Kaa nɔ hyɛmi nɔ́ ɔ, Mawu wo mlaa ke e sɛ nɛ nɔ ko nɛ e gbe e nyɛmi nɔmlɔ. Mawu naa wami kɛ muɔ kaa nɔ́ ko nɛ ngɛ klɔuklɔu, nɛ nɔ tsuaa nɔ nɛ e kɛ ma tsu ní ngɛ blɔ nɛ sɛ nɔ ɔ, e maa gbla e tue.1 Mose 9:5, 6.

5. Mɛni he wa ma susu ngɛ munyu nɛ ɔ mi, nɛ mɛni he je?

5 Ngɛ Noa gbenɔ se ɔ, Mawu ya nɔ nɛ e kɛ blɔ tsɔɔmi ha e we bi. Ngɛ munyu nɛ ɔ mi ɔ, wa ma susu nɔ hyɛmi ní bɔɔ komɛ nɛ tsɔɔ bɔ nɛ Mawu tsɔɔ e we bi blɔ ha a he. Enɛ ɔ ma ha nɛ wa pɛɛ si nɛ wa fia kaa waa kɛ Yehowa blɔ tsɔɔmi ma tsu ní kɛ ya su je ehe ɔ mi ɔ mi maa wa.

MA EHE, BLƆ TSƆƆMI EHE

6. Mɛni he je nɛ e he ba hia kaa Mawu we bi nɛ a kɛ mlaahi nɛ Mawu ha mɛ kɛ gu Mose nɔ ɔ nɛ tsu ní ɔ, nɛ mɛni su lɛ e sa kaa Israel bi ɔmɛ nɛ a je kpo?

6 Ngɛ Mose be ɔ mi ɔ, Yehowa ha e we bi blɔ tsɔɔmi nɛ mi tɛ̃ nɛ kɔɔ bɔ nɛ a maa ba a je mi ha kɛ bɔ nɛ a ma sɔmɔ lɛ ha a he. Mɛni he je? Ejakaa níhi tsake ekohu. Israel bi ɔmɛ kɛ jeha lafa enyɔ kɛ se sɔmɔ kaa nyɔguɛhi ngɛ Egipt. Jamɛ a be ɔ mi ɔ, nihi nɛ a bɔle mɛ ɔ sɔmɔɔ gbogboehi, a jaa wɔhi, nɛ a peeɔ níhi fuu nɛ sɛ Mawu hɛ mi. Benɛ Mawu kpɔ̃ e we bi kɛ je Egipt ɔ, e he ba hia nɛ a ná blɔ tsɔɔmi ehe. A ma ba pee ma nɛ a yeɔ Yehowa Mlaa pɛ nɔ. Níhi a mi hlami womi komɛ tsɔɔ kaa Hebri munyu nɛ a tsɔɔ sisi ke “mlaa” a, kɛ munyuhi nɛ ji “blɔ tsɔɔmi, kudɔmi, kɛ fami” ngɛ tsakpa. Mlaa a po Israel bi ɔmɛ a he piɛ kɛ je je mi bami yaya kɛ lakpa jami ní peepeehi nɛ mahi nɛ bɔle mɛ ɔ kɛ a he woɔ mi ɔ a he. Benɛ Israel bi ɔmɛ bu Mawu tue ɔ, Mawu jɔɔ mɛ. Nɛ ke a kua lɛ ɔ, a naa mi nɔ́ wawɛɛ nitsɛ.Kane 5 Mose 28:1, 2, 15.

7. (a) Moo tsɔɔ nɔ́ he je nɛ Yehowa kɛ blɔ tsɔɔmi ha e we bi ɔ. (b) Ngɛ mɛni blɔ nɔ nɛ Mlaa a hɛɛ Israel bi ɔmɛ ngɛ?

7 Ngɛ yi mi tomi kpa ko hu he je ɔ, e he ba hia nɛ Israel bi ɔmɛ nɛ a ná blɔ tsɔɔmi ehe. Mlaa a dla Israel bi ɔmɛ kɛ ha Mesia nɛ ji Yesu Kristo ɔ bami ɔ. Enɛ ɔ ji nɔ́ ko nɛ e he hia wawɛɛ nɛ piɛɛ Mawu yi mi tomi ɔmɛ a he. Mlaa a ha nɛ Israel bi ɔmɛ kaiɔ kaa a yi mluku. Jehanɛ hu ɔ, e ye bua mɛ nɛ a nu sisi kaa a hia kpɔmi  nɔ́ ɔ nɛ ji afɔle sami nɛ hi kɛ pi si nɛ ma je a he yayami ɔmɛ kɛ je kulaa a. (Galatia Bi 3:19; Hebri Bi 10:1-10) Jehanɛ ɔ, Mlaa a po weku nɛ Mesia a maa je mi kɛ ba a he piɛ, nɛ benɛ Mesia a pue ɔ, Mlaa a ye bua Israel bi ɔmɛ nɛ a le e mi tso. Ngɛ anɔkuale mi ɔ, Mlaa a ba pee kaa nɔ́ ko nɛ tsɔɔ Israel bi ɔmɛ blɔ be kpiti ko, aloo nɔ́ ko nɛ ‘hɛɛ mɛ’ kɛ ya su be nɛ Kristo ba.Galatia Bi 3:23, 24.

8. Mɛni he je nɛ e sa kaa wa ha nɛ sisi tomi mlaahi nɛ ngɛ Mose Mlaa a mi ɔ nɛ kudɔ wɔ ɔ?

8 Wɔ Kristofohi nɛ wa ngɛ mwɔnɛ ɔ hu ma nyɛ ma ná blɔ tsɔɔmi nɛ Yehowa kɛ ha ngɛ Mlaa a mi ɔ he se. Ngɛ mɛni blɔ nɔ? Wa ma nyɛ ma susu sisi tomi mlaahi nɛ a da nɔ kɛ wo Mlaa a he saminya. E ngɛ mi kaa pi mlaa nɛ ɔmɛ nɛ a ngɛ wɔ kudɔe amlɔ nɛ ɔ mohu lɛɛ, se loloolo ɔ, wa ma nyɛ maa ngɔ blɔ tsɔɔmihi nɛ ngɛ mi ɔ kɛ tsu ní ngɛ wa si himi mi daa ligbi. Waa kɛ blɔ tsɔɔmi nɛ ɔmɛ ma nyɛ ma tsu ní ngɛ Yehowa jami mi hulɔ. Yehowa ha nɛ a ngma mlaa nɛ ɔmɛ kɛ wo Baiblo ɔ mi konɛ wa nyɛ nɛ waa kase, waa kɛ sisi tomi mlaahi nɛ ngɛ mi ɔ nɛ tsu ní, nɛ wa bua hu nɛ jɔ kaa Yesu tsɔɔ wɔ nɔ́ ko nɛ pe Mlaa a. Moo bu nɔ́ nɛ Yesu de ɔ tue. E de ke: “Tse nyɛ nu kaa a de blematsɛmɛ ɔmɛ ke, ‘Ko puɛ gba!’ Se imi lɛɛ i ngɛ nyɛ dee ke, nɔ tsuaa nɔ nɛ hyɛɛ yo, nɛ e he peeɔ lɛ akɔnɔ ɔ, e kɛ lɛ puɛ gba momo ngɛ e tsui mi.” Lɔ ɔ he ɔ, tsa pi gba puɛmi pɛ he nɛ e sa kaa waa yu wa he ngɛ, mohu ɔ, e sa kaa waa yu wa he ngɛ susumi yayahi kɛ akɔnɔ yayahi a he.Mateo 5:27, 28.

9. Mɛni tsakemi Mawu pee nɛ lɔ ɔ he je ɔ, e he hia kaa e kɛ blɔ tsɔɔmi ehe nɛ ha e we bi?

9 Benɛ Yesu ba zugba a nɔ kaa Mesia a se ɔ, Yehowa ngɔ blɔ tsɔɔmi ehehi kɛ ha, nɛ e ha nɛ nihi le níhi fuu kɛ kɔ e yi mi tomi ɔ he. Mɛni he je nɛ enɛ ɔ he hia a? Ngɛ jeha 33 ɔ mi ɔ, Yehowa kpale pee tsakemi ko ngɛ e we bi a blɔ fa mi. E kua Israel ma a, nɛ e hla Kristofohi asafo ɔ kaa e we bi.

BLƆ TSƆƆMI NƐ A KƐ HA MUMI MI ISRAEL Ɔ

10. Mɛni he je nɛ a wo Kristofohi asafo ɔ mlaa ehehi ɔ, nɛ mɛni blɔ nɔ e slo mlaa nɛ ɔmɛ ngɛ mlaahi nɛ a wo Israel bi ɔmɛ ɔ he?

10 Yehowa ha Israel bi ɔmɛ Mose Mlaa a konɛ e kɛ tsɔɔ mɛ bɔ nɛ e sa kaa a ba a je mi ha, kɛ bɔ nɛ e sa kaa a sɔmɔ lɛ ha. Kɛ je kaseli ɔmɛ a be ɔ mi kɛ ma nɛ ɔ, Mawu hlaa e we bi kɛ jeɔ ma slɔɔtohi a mi, se pi ma kake pɛ mi hu. A tsɛɛ mɛ ke mumi mi Israel. Mɛ nɛ a peeɔ Kristofohi asafo ɔ nɛ. Yehowa kɛ mɛ so somi ehe ko. Yehowa ha mɛ blɔ tsɔɔmi ehe aloo e tsɔɔ mɛ níhi a mi fitsofitso ngɛ bɔ nɛ e sa kaa a ba a je mi ha kɛ bɔ nɛ e sa kaa a plɛ kɛ sɔmɔ lɛ ha a he. Niinɛ, “Mawu hyɛ we nɔ hɛ mi. Se mohu ma tsuaa ma mi ɔ, nɔ nɛ yee Mawu gbeye, nɛ e peeɔ nɔ́ nɛ da a, lɛ ji nɔ nɛ saa e hɛ mi.” (Bɔfo Ɔmɛ A Ní Tsumi 10:34, 35) A kɛ “Kristo mlaa a” tsuɔ ní. A ngma mlaa nɛ ɔmɛ ngɛ a tsui nɔ, se pi tɛ nɔ. Mlaa nɛ ɔ yeɔ bua Kristofohi ngɛ he tsuaa he nɛ a ngɛ.Galatia Bi 6:2.

11. Mɛni ní enyɔ komɛ a he nɛ “Kristo mlaa a” kɔɔ?

11 Mumi mi Israel ɔ ná blɔ tsɔɔmi nɛ Yehowa gu Yesu nɔ kɛ ha mɛ ɔ he se wawɛɛ. Benɛ e piɛ bɔɔ nɛ somi ehe ɔ ma bɔni ní tsumi ɔ, Yesu kɛ fami enyɔ komɛ nɛ a he hia wawɛɛ ha mɛ. Kake kɔɔ fiɛɛmi ní tsumi ɔ he. Nɛ kake hu kɔɔ bɔ nɛ e sa kaa Kristofohi nɛ a kɛ a sibi nɛ hi si  ha a he. A kɛ fami nɛ ɔmɛ ha Kristofohi tsuo, lɔ ɔ he ɔ, wa hɛ nɔ kami ji kaa wa maa hi si kɛ ya neneene ngɛ hiɔwe jio, wa maa hi si kɛ ya neneene ngɛ zugba a nɔ jio, e sa nɛ waa ye fami nɛ ɔmɛ a nɔ mwɔnɛ ɔ.

12. Mɛni he je nɛ fiɛɛmi ní tsumi ɔ ji blɔ tsɔɔmi ehe ɔ?

12 Blema a, e sa nɛ nihi nɛ a ngɛ je ma amɛ a mi ɔ nɛ a ba Israel konɛ a ba sɔmɔ Yehowa. (1 Matsɛmɛ 8:41-43) Se pee se ɔ, Yesu kɛ fami nɛ ngɛ Mateo 28:19, 20 ɔ ha e kaseli ɔmɛ. (Kane.) Yesu de e kaseli ɔmɛ ke a “ya” nɔ tsuaa nɔ ngɔ. Ngɛ Pentekoste ligbi ɔ nɔ ngɛ jeha 33 ɔ mi ɔ, Yehowa ha nɛ a le kaa e suɔ kaa a fiɛɛ sane kpakpa a kɛ kpa je ɔ mi tsuo. Jamɛ a ligbi ɔ, a kɛ mumi klɔuklɔu ɔ pɔ nihi maa pee 120 nɛ a ngɛ asafo ehe ɔ mi ɔ nu, nɛ a bɔni gbi slɔɔtoslɔɔtohi tumi. A fiɛɛ ha Yuda bi kɛ ma jeli nɛ a tsake kɛ ba Yuda jami ɔ mi ɔ tsuo. (Bɔfo Ɔmɛ A Ní Tsumi 2:4-11) Lɔ ɔ se ɔ, a bli a fiɛɛmi ní tsumi ɔ mi kɛ ho Samaria bi ɔmɛ a ngɔ ya. Jehanɛ ɔ, ngɛ jeha 36 ɔ mi ɔ, a bli fiɛɛmi ní tsumi ɔ mi kɛ ho Ma Jeli nɛ a pui mɛ ɔ po a ngɔ ya. Enɛ ɔ tsɔɔ kaa e sa nɛ Kristofohi nɛ a ya fiɛɛ ha nihi tsuo ngɛ je ɔ mi!

13, 14. (a) Mɛni ‘mlaa ehe’ nɛ Yesu wo wɔ ɔ biɔ nɛ waa pee? (b) Mɛni wa kaseɔ ngɛ nɔ́ nɛ Yesu pee ɔ mi?

13 Yesu wo e kaseli ɔmɛ ‘mlaa ehe’ ngɛ bɔ nɛ e sa kaa a kɛ a nyɛmimɛ nyumuhi kɛ yihi nɛ hi si ha a he hulɔ. (Kane Yohane 13:34, 35.) E sa nɛ daa ligbi ɔ, waa tsɔɔ mɛ kaa wa suɔ mɛ. Se e sa nɛ wa ná suɔmi ɔ kaa waa kɛ wa wami maa fɔ si ha mɛ hulɔ. Enɛ ɔ ji nɔ́ ko nɛ Mlaa a tsɔɔ we kaa waa pee.Mateo 22:39; 1 Yohane 3:16.

14 Yesu ji nɔ titli nɛ pee enɛ ɔ he nɔ hyɛmi nɔ́. E je suɔmi nɛ haa nɛ nɔ ngɔɔ e he kɛ sãa afɔle ɔ kpo. E suɔ e kaseli ɔmɛ hluu po kaa e kɛ e wami fɔ si ha mɛ. Nɛ e ngɛ blɔ hyɛe kaa e se nyɛɛli tsuo maa pee jã. Enɛ ɔ he ɔ, e sa nɛ waa je wa tsui mi nɛ waa da nyagbahi a nya, nɛ waa kɛ wa wami nɛ fɔ si ha wa nyɛmimɛ po.1 Tesalonika Bi 2:8.

BLƆ TSƆƆMIHI NƐ A HAA WƆ MWƆNƐ Ɔ, KƐ NƆ́ NƐ A MA HA WƆ HWƆƆ SE

15, 16. Mɛni tsakemihi lɛ ba ngɛ wa be nɛ ɔ mi, nɛ mɛni blɔ nɔ Mawu guɔ kɛ tsɔɔ wɔ blɔ?

15 Yesu hla “tsɔlɔ anɔkualetsɛ kɛ ní lelɔ ɔ” konɛ e ha e se nyɛɛli mumi mi niye ní “ngɛ be nɛ sa mi.” (Mateo 24:45-47) Niye ní nɛ ɔ eko ji blɔ tsɔɔmihi nɛ a kɛ haa Mawu we bi ke tsakemi ko ba. Mɛni tsɔɔ kaa tsakemihi ba ngɛ wa be nɛ ɔ mi?

16 Wa ngɛ “nyagbe ligbi ɔmɛ” a mi, nɛ e be kɛe nɛ wa maa na amanehlu ko nɛ wa nɛ hyɛ. (2 Timoteo 3:1; Marko 13:19) Jehanɛ ɔ, a sake Satan kɛ e daimonio ɔmɛ ke je hiɔ we kɛ ba fɔ zugba a nɔ, nɛ a ha nɛ adesahi ngɛ nɔ nae wawɛɛ. (Kpojemi 12:9, 12) Jehanɛ se hu ɔ, wa bu Yesu fami ɔ tue nɛ wa ngɛ fiɛɛe ngɛ je ɔ mi tsuo ngɛ gbi slɔɔtoslɔɔtohi a mi pe be ko nɛ be ɔ!

17, 18. Kɛ e sa kaa waa pee wa ní ngɛ blɔ tsɔɔmihi nɛ a kɛ haa wɔ ɔ a he ha kɛɛ?

17 Yehowa asafo ɔ ha wɔ níhi fuu nɛ maa ye bua wɔ konɛ wa tsu fiɛɛmi ní tsumi ɔ. Anɛ o kɛ ní nɛ ɔmɛ tsuɔ ní lo? Ke wa ya asafo mi kpehi ɔ, a tsɔɔ wɔ blɔhi a nɔ nɛ wa maa gu konɛ waa kɛ ní nɛ ɔmɛ nɛ tsu ní saminya. Anɛ o buɔ blɔ tsɔɔmi nɛ ɔmɛ kaa a je Mawu ngɔ lo?

18 Ke wa ngɛ hlae nɛ Mawu nɛ jɔɔ wɔ ɔ, e sa nɛ waa bu blɔ tsɔɔmihi tsuo nɛ e guɔ  Kristofohi asafo ɔ nɔ kɛ haa wɔ ɔ tue. Ke waa kɛ blɔ tsɔɔmihi tsuɔ ní mwɔnɛ ɔ, e he be wae ha wɔ kaa waa kɛ blɔ tsɔɔmihi ma tsu ní ngɛ “haomi ngua” a mi, be mi nɛ a ma kpata Satan je yaya nɛ ɔ hɛ mi ɔ. (Mateo 24:21) Lɔ ɔ se ɔ, ke a je Satan kɛ je nɛ wa su je ehe ɔ nɛ a peeɔ dami ní ngɛ mi ɔ mi ɔ, wa maa hia blɔ tsɔɔmi ehe.

Ngɛ je ehe ɔ mi ɔ, a ma ha wɔ womi kpo nɛ blɔ tsɔɔmi ehe ngɛ mi konɛ wa kɛ tsu ní ngɛ Paradeiso ɔ mi (Hyɛ kuku 19, 20)

19, 20. Mɛni womi kpohi a nya lɛ a ma bli, nɛ mɛni se wa ma ná ngɛ he?

19 Ngɛ Mose be ɔ mi ɔ, e he ba hia nɛ Israel bi ɔmɛ nɛ a ná blɔ tsɔɔmi ehe, lɔ ɔ he ɔ, Mawu ha mɛ Mlaa a. Pee se ɔ, e he ba hia nɛ Kristofohi asafo ɔ nɛ a ye “Kristo mlaa” a nɔ. Jã kɛ̃ nɛ Baiblo ɔ ha nɛ wa na kaa ngɛ je ehe ɔ mi hu ɔ, a ma ha wɔ womi kpo nɛ blɔ tsɔɔmi ehe ngɛ mi. (Kane Kpojemi 20:12.) Womi kpo nɛ ɔmɛ maa tsɔɔ adesahi níhi nɛ Yehowa ngɛ hlae ngɛ a dɛ ngɛ jamɛ a be ɔ mi. Ke adesahi tsuo kɛ nihi nɛ a tle mɛ si ɔ kase womi nɛ ɔ, a maa nyɛ maa le níhi nɛ Mawu suɔ kaa a nine nɛ su nɔ. Womi kpo ɔmɛ maa ye bua wɔ konɛ waa le Yehowa susumi ngɛ níhi a he. Jehanɛ hu ɔ, wa maa nu Baiblo ɔ sisi saminya, nɛ wa maa suɔ wa sibi, nɛ wa ma ná bumi kɛ ha wa sibi ngɛ Paradeiso ɔ mi. (Yesaya 26:9) Hyɛ níhi abɔ nɛ wa maa kase nɛ wa maa tsɔɔ nihi ngɛ wa Matsɛ Yesu Kristo blɔ tsɔɔmi sisi!

20 Ke waa kɛ blɔ tsɔɔmihi nɛ ‘a ngma ngɔ wo womi kpo ɔmɛ a mi ɔ’ tsu ní, nɛ wa ye Yehowa anɔkuale ngɛ nyagbe ka a mi ɔ, e maa ngma wa biɛ ngɛ ‘wami womi’ ɔ mi kɛ ya neneene. Wa ma nyɛ ma ná neneene wami! Enɛ ɔ he ɔ, e he hia nɛ waa DA SI, aloo waa kase Baiblo ɔ saminya, nɛ waa HYƐ, aloo waa nu nɔ́ nɛ Baiblo ɔ ngɛ wɔ tsɔɔe ɔ sisi, nɛ waa BU TUE, aloo waa kɛ Yehowa blɔ tsɔɔmihi nɛ tsu ní amlɔ nɛ ɔ. Ke wa peeɔ ní nɛ ɔmɛ ɔ, wa ma nyɛ maa po haomi ngua a, nɛ wa maa kase Yehowa wa Mawu nɛ e ngɛ juɛmi kɛ suɔmi ɔ he ní kɛ ya neneene.Fiɛlɔ 3:11; Roma Bi 11:33.