Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

 NƆ HE SANE

Roma Sista Komɛ Ba Plɛ Mumi Mi Nyɛmimɛ

Roma Sista Komɛ Ba Plɛ Mumi Mi Nyɛmimɛ

JEHAHI babauu nɛ be ɔ, ye senɔ Araceli mi mi fu mi nɛ e kpa ngmlaa wo ye yi, nɛ e de mi ke: “O kɛ mi nɛ ko tu munyu hu. I sume nɛ ma nu nɔ́ ko ngɛ nyɛ jami ɔ he hu. Nyɛ jami ɔ peeɔ mi tai. I sume nyɛ sane kulaa!” Munyu nɛ e tu ɔ dɔ mi wawɛɛ. Amlɔ nɛ ɔ, i ye jeha 91, se loloolo ɔ, ye hɛ ji munyu nɛ e tu ɔ nɔ. Se kaa bɔ nɛ Fiɛlɔ 7:8 tsɔɔ ɔ, sane “nyagbe hi pe sisije.”Felisa.

Felisa: A fɔ mi ngɛ Spain, nɛ wa weku ɔ be nɔ́ ko tsɔ. Wa yaa Katoliki sɔlemi ɔ, nɛ waa kɛ Mawu jami fiɛ we. Ngɛ anɔkuale mi ɔ, ye weku li ɔmɛ a kpɛti nihi 13 sɔmɔ kaa Roma osɔfohi aloo a tsu ní ha sɔlemi ɔ. Ye yayo nyɛminyumu ko ji osɔfo nɛ e tsɔɔ ní ngɛ Katoliki sukuu ko hulɔ. Benɛ e gbo ɔ, Pope John Paul nɛ ji enyɔne ɔ wo e hɛ mi nyami, nɛ e tsɔɔ kaa e ji he tsɔli ɔmɛ a kpɛti nɔ kake. Ye papaa ji sɔlɔ, nɛ ye yayo ji ngmɔ hulɔ. A fɔ wɔ nihi kakaaka kpaanyɔ, imi ji nɔkɔtɔma.

Benɛ i ye jeha 12 ɔ, a bɔni ta hwumi ngɛ Spain ma a mi. Benɛ ta a ba nyagbe ɔ, a wo ye papaa tsu, ejakaa e bua jɔɛ bɔ nɛ amlaalo ɔ plɛɔ kɛ tsuɔ níhi a he ní ha a he. Si himi ɔ mi ba wa ha ye yayo, nɛ nɔ́ nɛ wa maa ye po pee dengme. Enɛ ɔ he ɔ, e ngɔ ye seni yihi etɛ nɛ ji Araceli, Lauri, kɛ Ramoni kɛ ho Roma sistahi a hihe ko ngɛ Bilbao ya konɛ a ya hi lejɛ ɔ. A naa niye ní nɛ a yeɔ nɛ a tɔɔ ngɛ lejɛ ɔ.

Araceli: Jamɛ a be ɔ mi ɔ, i ye jeha 14, Lauri ye jeha 12, nɛ Ramoni ye jeha 10. Wa hɛ jaa ngɛ wa weku ɔ he wawɛɛ. Ngɛ Roma sistahi a hihe ɔ, ní tsumi nɛ wa tsuɔ ji lejɛ ɔ dlami. Jeha enyɔ se ɔ, Roma sista amɛ ngɔ wɔ kɛ ho Roma sistahi a hihe ngua ko nɛ ngɛ Zaragoza a ya. A hyɛɛ nihi nɛ a bwɔ ɔ a nɔ ngɛ lejɛ ɔ. Wa tsuɔ ní wawɛɛ nɛ wa dlaa kpata a mi, enɛ ɔ he ɔ, pɔ tɔɔ wa he wawɛɛ.

Felisa: Benɛ a ngɔ ye nyɛmiyi ɔmɛ kɛ ho Zaragoza ya a, ye yayo kɛ ye tsɛko nɛ lɛ ji osɔfo ngɛ ma a mi ɔ ma a juɛmi nya si kaa a maa ngɔ imi hu kɛ ho lejɛ ɔ ya. A ngɛ hlae nɛ ma je ma a mi konɛ nyumuyo ko nɛ ngɛ ye se nyɛɛe ɔ nɛ ko na mi hu. Akɛnɛ i suɔ Mawu he je ɔ, ye bua jɔ kaa ma ya hi Roma sistahi a hihe ɔ. I yaa sɔlemi daa ligbi, nɛ i suɔ kaa ma pee Katoliki bi a ma se sane kpakpa fiɛɛlɔ kaa bɔ nɛ ye tsɛko bi ɔ ngɛ pee ngɛ Africa a.

Muɔ nɔ: Roma sistahi a hihe ɔ nɛ ngɛ Zaragoza, ngɛ Spain; hiɔ nɔ: Nácar-Colunga Baiblo ɔ

Se benɛ i ngɛ sɔlemi we ɔ, i na kaa i nyɛ we nɛ  ma pee níhi fuu nɛ i suɔ kaa ma pee ɔ. I suɔ kaa ma ya sɔmɔ Mawu ngɛ ma kpa ko nɔ, se Roma sista amɛ wui mi he wami nɛ ma pee jã. Enɛ ɔ he ɔ, benɛ i ye jeha kake ngɛ lejɛ ɔ, i kpale kɛ ho we mi ya, nɛ i ya sɔmɔ ye tsɛko ɔ nɛ ji Roma osɔfo ɔ. I tsuɔ we mi ní tsumihi, nɛ daa gbɔkuɛ ɔ, waa kɛ Rosary ɔ sɔleɔ. Ye bua jɔɔ he kaa ma to mɔmɔhi nɛ ngɛ sɔlemi we ɔ, nɛ ma tsu Maria amaga a kɛ “he tsɔli” ɔmɛ a amaga amɛ a he.

Araceli: Benɛ i ngɛ Zaragoza a, i kã kekleekle kita nɛ e he hia kaa nɔ ko nɛ kã loko e ba pee Roma sista a. Lɔ ɔ se ɔ, Roma sista amɛ gba i kɛ ye nyɛmimɛ ɔmɛ ɔ wa mi. A ngɔ mi kɛ ho Roma sistahi a hihe ko ngɛ Madrid ɔ ya, nɛ a ngɔ Lauri hu kɛ ho Roma sistahi a hihe ko ngɛ Valencia a ya. Ramoni lɛɛ e tlɔ Zaragoza. Benɛ i ngɛ Madrid ɔ, i kã kita enyɔne nɛ a kãa loko nɔ ko ba peeɔ Roma sista a. Nihi fuu ba hi Roma sistahi a hihe ɔ. Nimli nɛ ɔmɛ a kpɛti ni komɛ ji sukuu bihi kɛ nihi nɛ a bwɔ. Enɛ ɔ he ɔ, ní tsumi ngɛ lejɛ ɔ wawɛɛ nitsɛ. I tsu ní ngɛ hiɔ tsami he nɛ ngɛ Roma sistahi a hihe ɔ.

I hyɛ blɔ kaa ma ba pee Roma sista. I susu kaa wa ma ná deka kɛ ha Baiblo ɔ kanemi kɛ e kasemi, se e ya bɛ mi jã. Nɔ ko kane we Baiblo ɔ hyɛ, nɛ nɔ ko hu tui Mawu kɛ Yesu a he munyu hyɛ. I kase Latin gbi ɔ bɔɔ, nɛ e i kase Katoliki “he tsɔli” ɔmɛ a he ní, nɛ i ja Maria. Behi fuu ɔ, wa tsuɔ ní tsumi kpakpataa.

I ba bɔni pɔtɔtɔɛ he numi wawɛɛ, nɛ i hao. I na kaa ke i ya tsu ní nɛ i ye bua ye weku li mohu ɔ, se nami maa hi he pe ní nɛ i ngɛ tsue ngɛ Roma sista amɛ a hihe ɔ nɛ sika a ngɛ ni kpahi a kotoku mi sɛe ɔ. Lɔ ɔ he ɔ, i kɛ Roma sista amɛ a nya dalɔ ɔ sɛɛ he ní, nɛ i de lɛ kaa i suɔ nɛ ma je. Se e ha nɛ a ngmɛ si nya mi wo ye yi. E susu kaa lɔ ɔ ma ha nɛ ma tsake ye juɛmi.

Roma sista amɛ je mi ngɛ tsu ɔ mi, se benɛ a yɔse kaa loloolo ɔ, i suɔ kaa ma je sɔlemi we ɔ, a kpale ngmɛ si nya mi wo ye yi. A pee jã si etɛ sɔuu, nɛ benɛ a na kaa i tsakee we ye juɛmi ɔ, a de mi kaa ke i suɔ kaa ma je ɔ, lɛɛ ma ngma munyu nɛ nyɛɛ se nɛ ɔ: “I ngɛ jee, ejakaa i suɔ nɛ ma sɔmɔ Satan mohu pe Mawu.” E pee mi dii bɔɔ. I suɔ kaa ma je niinɛ, se i mwɔ ye mi kpɔ kaa nɔ́ nɛ a ngɛ hlae nɛ ma ngma a lɛɛ, i be ngmae. Nyagbenyagbe ɔ, i de mɛ kaa i suɔ nɛ i kɛ osɔfo ɔ ma ya tu munyu. I bɔ lɛ nɔ́ ya nɔ ɔ. Osɔfo nɔkɔtɔma a ha osɔfo ɔ he blɔ kaa e ha nɛ ma kpale kɛ ho Roma sistahi a hihe nɛ ngɛ Zaragoza a ya. Benɛ i ya hi lejɛ ɔ nyɔhiɔ bɔɔ ko se ɔ, a ngmɛ mi blɔ nɛ i je kɛ ho we mi ya. Be bɔ ɔ se ɔ, Lauri kɛ Ramoni hu je Roma sistahi a hihe ɔ kɛ ho we mi ya.

 WOMI KO NƐ GBA WA MI

Felisa

Felisa: Pee se ɔ, i sɛ gba si himi mi, nɛ i ya hi Cantabria, ngɛ Spain. Loloolo ɔ, i yaa sɔlemi daa. Ligbi ko Hɔgba nɛ i ya sɔlemi ɔ, osɔfo ɔ mi mi fu nɛ e kpa ngmlaa nɛ e de ke, “Tse nyɛ na womi nɛ ɔ!” Kɛkɛ nɛ e ngɔ The Truth That Leads to Eternal Life womi ɔ kɛ tsɔɔ wɔ nɛ e de wɔ ke, “Ke nɔ ko ha nyɛ ti nɔ ko womi nɛ ɔ eko ɔ, nyɛ kɛ ba ha mi, loo nyɛ sake kɛ fɔ he!”

Jamɛ a be ɔ mi ɔ, i be womi ɔ eko, se i suɔ kaa ma ná eko. Ligbi bɔɔ komɛ a se ɔ, yi enyɔ komɛ ba wa we ɔ mi. A ji Yehowa Odasefohi, nɛ a ha mi jamɛ a womi ɔ eko. I kane womi ɔ jamɛ a gbɔkuɛ ɔ nɔuu. Benɛ a kpale ba slaa mi ɔ, a bi mi ke ji ma suɔ kaa a kɛ mi nɛ kase Baiblo ɔ lo, nɛ i kplɛɛ nɔ.

Truth womi ɔ

I suɔ nɛ ma sa Mawu hɛ mi be fɛɛ be. I ba kase anɔkuale nɛ kɔɔ Yehowa he ɔ, nɛ suɔmi nɛ i ngɛ ha lɛ ɔ mi ba bɔni wami. I suɔ nɛ ma tu Yehowa he munyu kɛ tsɔɔ nɔ fɛɛ nɔ. I ha nɛ a baptisi mi ngɛ jeha 1973 ɔ mi. Be fɛɛ be nɛ ma ná he blɔ ɔ, i bɔɔ mɔde nɛ i kɛ ye weku li ɔmɛ sɛɛɔ anɔkuale ɔ he ní. Se ye weku li ɔmɛ a bua jɔɛ anɔkuale ɔ he, titli ɔ, ye nyɛmiyo Araceli. A susu kaa nɔ́ nɛ i ngɛ kasee ɔ dɛ.

Araceli: Akɛnɛ benɛ i ngɛ Roma sistahi a hihe ɔ a kɛ mi hí si saminya he je ɔ, ye bua jɔɛ Katoliki jami ɔ he hu. Se daa Hɔgba a, i yaa sɔlemi, nɛ i kɛ Rosary ɔ sɔleɔ daa ligbi. Loloolo ɔ, i suɔ nɛ ma nu Baiblo ɔ sisi, i de Mawu ke e ye bua mi. Kɛkɛ nɛ Felisa de mi níhi nɛ e kase ɔ. E bua jɔ níhi nɛ e kase ɔ he wawɛɛ hluu po kaa i susu kaa e ngɛ godo nue. I kplɛɛ we nɔ́ nɛ e de ɔ nɔ.

Araceli

Pee se ɔ, i kpale kɛ ho Madrid ya nɛ i ya tsu ní ngɛ lejɛ ɔ nɛ i sɛ gba si himi mi. Jehahi babauu ba pue mi, nɛ i to he hɛ kaa nihi nɛ a yaa sɔlemi daa a kɛ Yesu tsɔɔmi ɔmɛ tsu we ní. Enɛ ɔ he ɔ, i kpa sɔlemi yami. I be hemi kɛ yemi ngɛ “he tsɔli” ɔmɛ a mi, nɛ i he we yi hu kaa hɛl la ko ngɛ, nɛ i susuu we hu kaa ke nɔ ko pee yayami kɛ si Mawu ɔ, osɔfo ma nyɛ maa ngɔ nɔ ɔ he yayami kɛ pa lɛ. I kpata amagahi nɛ i kɛ tsuɔ ní ngɛ jami mi ɔ tsuo a hɛ mi. I li kaa nɔ́ nɛ i ngɛ pee ɔ da loo e dɛ. Ye nine mi wo nyu mohu lɛɛ, se i yaa nɔ nɛ i sɔleɔ ha Mawu nɛ i deɔ lɛ ke: “I suɔ nɛ ma le mo. Moo ye bua mi!”  I kai kaa Yehowa Odasefohi ba si ye sinya a si abɔ, se i pui a nya mi. I he we jami ko yi hu.

Jamɛ a be ɔ mi ɔ, ye senɔ Lauri ngɛ France, nɛ Ramoni hu ngɛ Spain. Maa pee jeha 1980 ɔ mi ɔ, Yehowa Odasefohi kɛ mɛ bɔni Baiblo ɔ kanemi. I susu kaa mɛ hu a ngɛ mɛ sisie kaa bɔ nɛ a sisi Felisa a. Yiheyo ko ngɛ wa kpɔ ɔ mi nɛ a tsɛɛ lɛ ke Angelines. Ligbi ko ɔ, i kɛ lɛ kpe, nɛ wa ba pee huɛmɛ. Lɛ hu e ji Yehowa Odasefo no. Angelines kɛ e huno ɔ bi mi si abɔ ke ji ma suɔ kaa a kɛ mi nɛ kase Baiblo ɔ. E ngɛ mi kaa i de ke ye bua jɔɛ jami ko he hu mohu lɛɛ, se a yɔse kaa i suɔ wawɛɛ kaa ma le níhi nɛ ngɛ Baiblo ɔ mi ɔ. Nyagbenyagbe ɔ, i de mɛ ke: “I suɔ kaa i kɛ nyɛ maa kase Baiblo ɔ. Se i suɔ nɛ ma kane ngmamihi ngɛ imi nitsɛ ye Baiblo ɔ mi!” I ngɛ Nácar-Colunga Baiblo ɔ eko.

NYAGBENYAGBE Ɔ, BAIBLO Ɔ PEE WƆ KAKE

Felisa: Benɛ a baptisi mi ngɛ jeha 1973 ɔ mi ɔ, Yehowa Odasefohi nɛ a ngɛ Santander nɛ ji, Cantabria ma ngua a mi ɔ a yibɔ ji 70. Wa hiaa blɔ kɛ yaa tsitsatsitsa nɛ wa fiɛɛɔ ngɛ kɔpehi abɔ nɛ a ngɛ lejɛ ɔ ní ɔmɛ a mi ɔ. Waa kɛ lɔle nguahi lɛ hiaa blɔ ɔ, nɛ pee se ɔ, waa kɛ lɔle tsɔwihi yaa kɔpe ɔmɛ a mi.

I kɛ nihi fuu kase Baiblo ɔ, nɛ a baptisi a kpɛti nihi 11. Nihi nɛ i kɛ mɛ kaseɔ Baiblo ɔ a ti nihi hiɛhiɛɛ ji Katoliki bi. I na kaa e sa nɛ ma to ye tsui si ha mɛ. Kaa bɔ nɛ e he be loko i yɔse kaa níhi nɛ i he ye ngɛ Katoliki jami ɔ mi ɔ ji lakpa a, jã kɛ̃ nɛ e ma he be loko mɛ hu a ma yɔse kaa níhi nɛ a he ye ɔ ji lakpa. I le kaa Baiblo ɔ kɛ Yehowa mumi klɔuklɔu ɔ pɛ lɛ ma nyɛ maa ye bua nɔ ko nɛ e tsake e susumi nɛ e nu anɔkuale ɔ sisi. (Hebri Bi 4:12) A baptisi ye huno Bienvenido nɛ jinɛ e ji polisi ɔ ngɛ jeha 1979 ɔ mi. Ye yayo hu bɔni Baiblo ɔ kasemi, se e kɛ we nɛ e gbo.

Araceli: Benɛ Yehowa Odasefohi kɛ mi bɔni Baiblo ɔ kasemi ɔ, i susu kaa i be nyɛe ma he mɛ maa ye. Se benɛ be ba pue mi ɔ, i susuu we jã hu. Yehowa Odasefohi tsɔɔ nihi Baiblo ɔ, nɛ a kɛ níhi nɛ a kaseɔ ngɛ Baiblo ɔ mi ɔ tsuɔ ní. Hemi kɛ yemi nɛ i ngɛ ngɛ Baiblo ɔ mi ɔ mi ba bɔni wami, nɛ i ná bua jɔmi pe sa a. Nihi nɛ a ngɛ wa kpɔ ɔ mi ɔ na kaa ye ní peepee tsake, nɛ a de mi ke, “Araceli, koo je blɔ nɛ o ngɛ nɔ nyɛɛe ɔ nɔ gblegbleegble!”

I kai kaa i sɔle nɛ i de Yehowa ke, “Yehowa, i naa mo si, kaa o ngmɛɛ we ye he, nɛ o ha mi he blɔhi fuu nɛ i na nɔ́ nɛ i ngɛ hlae ɔ, lɔ ɔ ji Baiblo ɔ mi anɔkuale nile ɔ.” I de ye nyɛmiyo Felisa konɛ e ngɔ ye he yayami kɛ pa mi akɛnɛ i kɛ lɛ tu munyu basabasa a he je. Kɛ je lɔ ɔ se ɔ, waa kɛ wa sibi sɛ nya hu, waa kɛ bua jɔmi sɛɛɔ Baiblo ɔ he ní. A baptisi mi ngɛ jeha 1989 ɔ mi, benɛ i ye jeha 61 ɔ.

Felisa: Amlɔ nɛ ɔ, i ye jeha 91. Ye huno ɔ gbo je ye he, nɛ i nyɛ we nɛ i tsuɔ babauu kaa sa a hu. Se loloolo ɔ i kaneɔ Baiblo ɔ daa ligbi, i yaa asafo mi kpehi, nɛ ligbi nɛ ma nyɛ ɔ, i yaa fiɛɛmi.

Araceli: I suɔ kaa i kɛ osɔfo ɔmɛ kɛ Roma sista amɛ tsuo maa sɛɛ Yehowa he ní, eko ɔ, akɛnɛ imi hu be ko nɛ be ɔ, i ji Roma sista a he je. I kɛ a ti ni komɛ sɛɛ ní kɛ bua jɔmi, nɛ i ha a ti nihi fuu womihi kɛ womi tɛtlɛɛhi. I kaiɔ osɔfo ɔmɛ a ti nɔ kake. I kɛ lɛ sɛɛ ní si enyɔ ko. E kplɛɛ nɔ́ nɛ i de lɛ ɔ nɔ. Lɔ ɔ se ɔ, e de mi ke: “He nɛ i wa kɛ su nɛ ɔ, jije ma ya ekohu? Mɛni ye sɔlemi bi ɔmɛ kɛ ye weku li ɔmɛ ma de?” I bi lɛ ke: “Mɛni Mawu hu ma de?” E na kaa nɔ́ nɛ i ngɛ dee ɔ da, nɛ i na kaa aywilɛho nu lɛ. Se e ngɛ kaa nɔ́ nɛ e nyɛ we nɛ e ná kã kɛ pee tsakemi.

I kaiɔ be nɛ ye huno ɔ de mi kaa e suɔ kaa e kɛ mi maa ya asafo mi kpe ɔ. Jamɛ be ɔ mi ɔ, e ye jeha 80, nɛ lɔ ɔ ji kekleekle be nɛ e ya asafo mi kpe. Kɛ je lɔ ɔ se ɔ, e pui asafo mi kpehi a yami mi hyɛ. E kase Baiblo ɔ, nɛ e je fiɛɛmi yami sisi. I kaiɔ bɔ nɛ waa kɛ bua jɔmi tsuɔ fiɛɛmi ní tsumi ɔ ha a. Ye huno ɔ gbo benɛ e piɛ ligbi enyɔ nɛ a maa baptisi lɛ.

Felisa: Benɛ i bɔni Yehowa sɔmɔmi ɔ, ye seni etɛ ɔmɛ te si kɛ wo mi. Se pee se ɔ, mɛ hu a ba kplɛɛ anɔkuale ɔ nɔ. Enɛ ɔ ji ní kpakpahi nɛ ya nɔ ngɛ ye si himi mi ɔ a kpɛti kake. Wɔ tsuo wa ba ná suɔmi kɛ ha Yehowa Mawu, nɛ wa peeɔ kake kɛ sɛɛɔ e kɛ e Munyu ɔ he ní! Amlɔ nɛ ɔ, wɔ tsuo wa ngɛ Yehowa sɔmɔe. *

^ kk. 29 Araceli ye jeha 87, Felisa ye jeha 91, nɛ Ramoni ye jeha 83. Loloolo ɔ, mɛ tsuo a ngɛ Yehowa sɔmɔe ngɛ anɔkuale mi. Lauri hu e ye Yehowa anɔkuale kɛ ya si benɛ e gbo ngɛ jeha 1990 ɔ mi.