Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Yohane 8:12-59

MI MUNYUHI

  • Yesu ngɛ Gba Sisi Himi Gbijlɔ ɔ sisi (1-13)

  • Yesu tsɔɔ ní ngɛ gbijlɔ ɔ sisi (14-24)

  • Kristo ɔ he susumi slɔɔtohi (25-52)

  • Tsɛ ɔ yeɔ Yesu he odase (12-30)

    • Yesu, “je ɔ la a” (12)

  • Abraham bimɛ (31-41)

    • “Anɔkuale ɔ ma ha nɛ nyɛ maa ye nyɛ he” (32)

  • Abosiami bimɛ (42-47)

  • Yesu kɛ Abraham (48-59)

8  12  Lɔ ɔ se ɔ, Yesu kɛ mɛ tu munyu ekohu nɛ e de ke: “Imi ji je ɔ la a nɛ. Nɔ fɛɛ nɔ nɛ e nyɛɛɔ ye se ɔ, e be diblii mi nyɛɛe kɔkɔɔkɔ, mohu ɔ, e ma ná wami la a.” 13  Enɛ ɔ he ɔ, Farisi bi ɔmɛ de lɛ ke: “O ngɛ mo nitsɛ o he odase yee; odase nɛ o ngɛ yee ɔ, pi anɔkuale.” 14  Yesu ha mɛ heto ke: “Ke i ngɛ imi nitsɛ ye he odase yee po ɔ, odase nɛ i ngɛ yee ɔ ji anɔkuale, ejakaa i le he nɛ i je kɛ ba, kɛ he nɛ i yaa. Se nyɛɛ lɛɛ nyɛ li he nɛ i je kɛ ba, kɛ he nɛ i yaa. 15  Nyɛ kojoɔ ngɛ he lo nya;* imi lɛɛ i kojo we nɔ ko kulaa. 16  Se kɛ̃ ɔ, ke i kojoɔ po ɔ, ye kojomi ɔ ji anɔkuale, ejakaa pi imi nɔ kake too nɛ i ngɛ, mohu ɔ, Tsɛ ɔ nɛ e tsɔ mi ɔ piɛɛ ye he. 17  Jehanɛ se hu ɔ, a ngma ngɛ nyɛ nitsɛmɛ nyɛ Mlaa a mi ke: ‘Ni enyɔ a we odase ɔ ji anɔkuale.’ 18  I yeɔ imi nitsɛ ye he odase, nɛ Tsɛ ɔ nɛ e tsɔ mi ɔ hu yeɔ ye he odase.” 19  Kɛkɛ nɛ a bi lɛ ke: “Jije o Tsɛ ɔ ngɛ?” Yesu ha mɛ heto ke: “Nyɛ li mi, nɛ nyɛ li ye Tsɛ ɔ hulɔ. Kaa nyɛ le mi ɔ, jinɛ nyɛ ko le ye Tsɛ ɔ hulɔ.” 20  E tu munyu nɛ ɔmɛ ngɛ he nɛ sika tsumi daka amɛ ngɛ ɔ ngɛ sɔlemi we ɔ. Se nɔ ko nui lɛ, ejakaa e ngmlɛfia a sui lolo. 21  Enɛ ɔ he ɔ, e de mɛ ekohu ke: “I yaa, nɛ nyɛ ma hla mi, se kɛ̃ ɔ, nyɛ ma gbo ngɛ nyɛ he yayami ɔ mi. He nɛ i yaa a, nyɛ be nyɛe maa ba lejɛ ɔ.” 22  Kɛkɛ nɛ Yuda bi ɔmɛ bɔni demi ke: “E maa gbe e he maji? Ejakaa e de ke, ‘He nɛ i yaa a, nyɛ be nyɛe maa ba lejɛ ɔ.’” 23  E ya nɔ nɛ e de mɛ ke: “Nyɛɛ lɛɛ nyɛ je sisi ní ɔmɛ a mi; imi lɛɛ i je hiɔwe ní ɔmɛ a mi. Nyɛɛ lɛɛ nyɛ je je nɛ ɔ mi; imi lɛɛ pi je nɛ ɔ mi nɛ i je. 24  Enɛ ɔ he je nɛ i de nyɛ ke nyɛ ma gbo ngɛ nyɛ he yayami ɔmɛ a mi ɔ nɛ. Ejakaa ke nyɛ he we yi kaa imi ji jamɛ a nɔ ɔ, nyɛ ma gbo ngɛ nyɛ he yayami ɔmɛ a mi.” 25  Enɛ ɔ he ɔ, a bɔni lɛ bimi ke: “Mɛnɔ ji mo?” Yesu ha mɛ heto ke: “Mɛni he je po nɛ i kɛ nyɛ ngɛ munyu tue ɔ? 26  I ngɛ níhi fuu nɛ ma de ngɛ nyɛ he kɛ kojo nyɛ. Ngɛ anɔkuale mi ɔ, Nɔ nɛ e tsɔ mi ɔ ji anɔkualetsɛ, nɛ níhi nɛ i nu kɛ je e ngɔ ɔ, lɔ ɔmɛ a he munyu nɛ i ngɛ tue ngɛ je ɔ mi ɔ nɛ.” 27  A li kaa Tsɛ ɔ he munyu nɛ e kɛ mɛ ngɛ tue ɔ. 28  Lɔ ɔ se ɔ, Yesu de ke: “Ke nyɛ wo nɔmlɔ Bi ɔ nɔ se ɔ, loko nyɛ maa le kaa imi ji lɛ, nɛ nyɛ maa le kaa i tui imi nitsɛ ye yi mi kɛ pee we nɔ́ ko; mohu ɔ, kaa bɔ nɛ Tsɛ ɔ tsɔɔ mi ɔ, jã i deɔ. 29  Nɛ Nɔ nɛ e tsɔ mi ɔ kɛ mi ngɛ; e si we imi nɔ kake too, ejakaa i peeɔ níhi nɛ e bua jɔ he be fɛɛ be.” 30  Benɛ e ngɛ munyu nɛ ɔmɛ tue ɔ, nihi fuu ná hemi kɛ yemi ngɛ e mi. 31  Kɛkɛ nɛ Yesu ya nɔ nɛ e de Yuda bi nɛ a he lɛ ye ɔ ke: “Ke nyɛ hi si ngɛ ye munyu ɔ nya a, lɛɛ ye kaseli nitsɛnitsɛmɛ ji nyɛ, 32  nɛ nyɛ maa le anɔkuale ɔ, nɛ anɔkuale ɔ ma ha nɛ nyɛ maa ye nyɛ he.” 33  A he nɔ nɛ a de lɛ ke: “Abraham nina ji wɔ, nɛ wa yi nyɔguɛ kɛ ha we nɔ ko hyɛ. Mɛni he je nɛ o de ke, ‘Nyɛ maa ye nyɛ he ɔ’?” 34  Yesu ha mɛ heto ke: “Niinɛ, ngɛ anɔkuale mi ɔ, i ngɛ nyɛ dee ke, nɔ fɛɛ nɔ nɛ e peeɔ yayami ɔ, e ji yayami nyɔguɛ. 35  Jehanɛ se hu ɔ, nyɔguɛ hí we mi kɛ yɛ neneene; bi ɔ hiɔ si kɛ yaa neneene. 36  Lɔ ɔ he ɔ, ke Bi ɔ ha nɛ nyɛ ye nyɛ he ɔ, nyɛ maa ye nyɛ he niinɛ. 37  I le kaa Abraham nina ji nyɛ. Se nyɛ ngɛ hlae nɛ nyɛ maa gbe mi, ejakaa ye munyu ɔ wɛ ngɛ nyɛ mi. 38  Níhi nɛ i na benɛ i ngɛ ye Tsɛ ɔ ngɔ ɔ, jamɛ a ní ɔmɛ a he munyu nɛ i tuɔ, se nyɛɛ lɛɛ nyɛ peeɔ níhi nɛ nyɛ nu kɛ je nyɛ tsɛ ɔ ngɔ.” 39  A he nɔ nɛ a de lɛ ke: “Wa tsɛ ji Abraham.” Yesu de mɛ ke: “Kaa Abraham bimɛ ji nyɛ ɔ, jinɛ nyɛ ko pee nyɛ ní kaa Abraham. 40  Se amlɔ nɛ ɔ, imi nɛ i de nyɛ anɔkualehi nɛ i nu kɛ je Mawu ngɔ ɔ, nyɛ ngɛ hlae nɛ nyɛ maa gbe mi. Abraham pee we nɔ́ nɛ ɔ. 41  Nyɛ tsɛ ɔ ní tsumihi nɛ nyɛ ngɛ tsue ɔ nɛ.” A de lɛ ke: “Pi ajuama bɔmi* mi nɛ a fɔ wɔ ngɛ; wa ngɛ Tsɛ kake, lɛ ji Mawu.” 42  Yesu de mɛ ke: “Ke Mawu ji nyɛ Tsɛ ɔ, jinɛ nyɛ maa suɔ mi, ejakaa Mawu ngɔ nɛ i je kɛ ba, nɛ i ngɛ hiɛ ɔ. I bɛ ngɛ imi nitsɛ ye he wami nya, mohu ɔ, Mawu lɛ e tsɔ mi. 43  Mɛni he je nɛ nyɛ nui nɔ́ nɛ i ngɛ dee ɔ sisi ɔ? Ejakaa nyɛ be nyɛe maa bu ye munyu ɔ tue. 44  Nyɛ je nyɛ tsɛ Abosiami ɔ mi, nɛ nyɛ suɔ kaa nyɛ maa pee nɔ́ nɛ nyɛ tsɛ ɔ suɔ. Lɛɛ lɛɛ nɔmlɔ gbelɔ ji lɛ kɛ je sisije, nɛ e da we si kpɛii ngɛ anɔkuale ɔ mi, ejakaa anɔkuale be e mi. Ke e ngɛ lakpa yee ɔ, lɛ nitsɛ e su ji lɔ ɔ nɛ, ejakaa lakpatsɛ ji lɛ, nɛ lɛ ji lakpa a e tsɛ. 45  Se imi mohu nɛ i deɔ nyɛ anɔkuale ɔ, nyɛ he we mi yi. 46  Nyɛ ti mɛnɔ lɛ e ma nyɛ maa bu mi fɔ ngɛ yayami ko he? Ke anɔkuale lɛ i tuɔ ɔ, lɛɛ mɛni he je mɔ nɛ nyɛ he we mi yi ɔ? 47  Nɔ nɛ e je Mawu mi ɔ buɔ níhi nɛ Mawu deɔ ɔ tue. Enɛ ɔ he je nɛ nyɛ bui tue ɔ nɛ, ejakaa pi Mawu mi nɛ nyɛ je.” 48  Yuda bi ɔmɛ he nɔ nɛ a de lɛ ke: “Ke wa de ke, ‘Samaria no ji mo, nɛ daimonio ngɛ o mi’ ɔ, e be mi lo?” 49  Yesu he nɔ nɛ e de ke: “Daimonio ko be ye mi, mohu ɔ, i woɔ ye Tsɛ ɔ hɛ mi nyami, nɛ nyɛɛ lɛɛ nyɛ pueɔ ye hɛ mi si. 50  Se i hla we hɛ mi nyami kɛ ha we imi nitsɛ ye he; Nɔ ko ngɛ nɛ lɛɛ lɛɛ e ngɛ hlae nɛ e ngɛ kojoe. 51  Niinɛ, ngɛ anɔkuale mi ɔ, i ngɛ nyɛ dee ke, ke nɔ ko yeɔ ye munyu ɔ nɔ ɔ, e be gbenɔ nae kɔkɔɔkɔ.” 52  Yuda bi ɔmɛ de lɛ ke: “Amlɔ nɛ ɔ lɛɛ wa na kaa daimonio ngɛ o mi. Abraham gbo, nɛ gbali ɔmɛ hu gbo, se moo lɛɛ o ngɛ dee ke, ‘Ke nɔ ko yeɔ ye munyu ɔ nɔ ɔ, e be e nya gbenɔ sae kɔkɔɔkɔ.’ 53  Anɛ o pe wa nɛnɛ Abraham nɛ e gbo ɔ lo? Gbali ɔmɛ hu gbo. Mɛnɔ nɛ moo lɛɛ o susu kaa o ji?” 54  Yesu ha mɛ heto ke: “Ke i woɔ imi nitsɛ ye hɛ mi nyami ɔ, ye hɛ mi nyami ɔ pi nɔ́ ko. Ye Tsɛ ɔ nɛ nyɛ deɔ ke nyɛ Mawu ji lɛ ɔ lɛ woɔ ye hɛ mi nyami. 55  Se kɛ̃ ɔ, nyɛ li lɛ, se imi lɛɛ i le lɛ. Nɛ ke i de nyɛ ke i li lɛ ɔ, ma pee lakpatsɛ kaa nyɛ nɔuu. Se i le lɛ, nɛ i ngɛ e munyu nɔ yee. 56  Nyɛ tsɛ Abraham kɛ bua jɔmi hyɛ blɔ kaa e maa na ye ligbi ɔ, nɛ e na nɛ e bua jɔ wawɛɛ.” 57  Kɛkɛ nɛ Yuda bi ɔmɛ bi lɛ ke: “Mo nɛ o yi jeha 50 po lolo ɔ, o na Abraham lo?” 58  Yesu de mɛ ke: “Niinɛ, ngɛ anɔkuale mi ɔ, i ngɛ nyɛ dee ke: “Loko Abraham maa ba wami mi ɔ, i ngɛ.” 59  Enɛ ɔ he ɔ, a kukuɔ tɛhi nɛ a maa fiaa Yesu, se e laa e he nɛ e je sɔlemi we ɔ.

Sisi ningma

Aloo “Nyɛ daa adesa mlaahi a nɔ kɛ kojoɔ.”
Hela, porneiʹa. Hyɛ Munyu Komɛ A Sisi Tsɔɔmi.