Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Yohane 3:1-36

MI MUNYUHI

  • Yesu kɛ Nikodemo (1-21)

    • Fɔmi ekohu (3-8)

    • Mawu suɔ je ɔ (16)

  • Nyagbe odase nɛ Yohane ye ngɛ Yesu he (22-30)

  • Nɔ nɛ e je hiɔwe kɛ ba a (31-36)

3  Nyumu ko ngɛ nɛ a tsɛɛ lɛ ke Nikodemo. E ji Farisi bi ɔmɛ a ti nɔ kake, nɛ e ji Yuda bi ɔmɛ a nɔ yelɔ hulɔ.  Nyumu nɛ ɔ ba e ngɔ nyɔ mi, nɛ e ba de lɛ ke: “Rabi, wa le kaa o ji tsɔɔlɔ nɛ o je Mawu ngɔ kɛ ba, ejakaa ke Mawu piɛɛ we nɔ ko he ɔ, e be nyɛe maa pee okadihi nɛ o ngɛ pee nɛ ɔmɛ.”  Yesu he nɔ nɛ e de lɛ ke: “Niinɛ, ngɛ anɔkuale mi ɔ, i ngɛ mo dee kaa ke a fɔ we nɔ ko ekohu* ɔ, e be nyɛe maa na Mawu Matsɛ Yemi ɔ.”  Nikodemo bi lɛ ke: “Kɛ a ma plɛ kɛ fɔ nɔmlɔ nɛ e wa a ekohu kɛɛ? Tse e be nyɛe maa sɛ e nyɛ fɔmi kotoku mi si enyɔne konɛ a kpale fɔ lɛ, aloo e ma nyɛ?”  Yesu ha lɛ heto ke: “Niinɛ, ngɛ anɔkuale mi ɔ, i ngɛ mo dee kaa ke a ji nyu kɛ mumi mi kɛ fɔ we nɔ ko ɔ, e be nyɛe maa sɛ Mawu Matsɛ Yemi ɔ mi.  Nɔ́ nɛ a je he lo mi kɛ fɔ ɔ ji he lo, nɛ nɔ́ nɛ a je mumi mi kɛ fɔ ɔ ji mumi.  E ko pee mo nyakpɛ kaa i de mo ke: Nyɛ nimli nɛ ɔmɛ ɔ, e sa nɛ a fɔ nyɛ ekohu.  Kɔɔhiɔ fiaa kɛ yaa he nɛ e suɔ, nɛ nyɛ nuɔ e fiami ɔ he, se nyɛ li he nɛ e je kɛ ba, kɛ he nɛ e yaa. Jã kɛ̃ nɛ e ji ngɛ nɔ fɛɛ nɔ nɛ a je mumi mi kɛ fɔ lɛ ɔ hu blɔ fa mi.”  Nikodemo he nɔ nɛ e bi lɛ ke: “Kɛ ní nɛ ɔmɛ ma plɛ kɛ ba mi ha kɛɛ?” 10  Yesu ha heto ke: “Mo nɛ o ji Israel bi ɔmɛ a tsɔɔlɔ ɔ nɛ o li ní nɛ ɔmɛ ɔ? 11  Niinɛ, ngɛ anɔkuale mi ɔ, i ngɛ mo dee ke, nɔ́ nɛ wa le ɔ, wa deɔ, nɛ nɔ́ nɛ wa na a, wa yeɔ he odase, se odase nɛ wa yeɔ ɔ, nyɛ ngɔɛ. 12  Ke i de mo zugba a nɔ níhi nɛ loloolo ɔ, o he we yi ɔ, lɛɛ ke i de mo hiɔwe níhi ɔ, kɛ o ma plɛ kɛ he ye kɛɛ? 13  Jehanɛ hu ɔ, nɔmlɔ ko kuɛ kɛ yɛ hiɔwe, se nɔ nɛ e kple si kɛ je hiɔwe kɛ ba a, nɛ ji nɔmlɔ Bi ɔ. 14  Nɛ kaa bɔ nɛ Mose wo sinɔ ɔ nɔ kɛ ya hiɔwe ngɛ nga a nɔ ɔ, jã kɛ̃ nɛ e sa nɛ a wo nɔmlɔ Bi ɔ nɔ kɛ ya hiɔwe, 15  konɛ nɔ fɛɛ nɔ nɛ e heɔ lɛ yeɔ ɔ nɛ e ná neneene wami. 16  “Ejakaa Mawu suɔ je ɔ saminya, nɛ lɔ ɔ he ɔ, e ngɔ e Bi kake too ɔ kɛ ha, konɛ nɔ fɛɛ nɔ nɛ e heɔ lɛ yeɔ ɔ, a ko kpata e hɛ mi, mohu ɔ, e ná neneene wami. 17  Ejakaa Mawu tsɔ we e Bi ɔ kɛ bɛ je ɔ mi kaa e ba kojo je ɔ, mohu ɔ, konɛ a gu e nɔ kɛ he je ɔ yi wami. 18  Nɔ fɛɛ nɔ nɛ e heɔ lɛ yeɔ ɔ, a be lɛ kojoe. Nɔ fɛɛ nɔ nɛ e be lɛ hee maa ye ɔ, a kojo lɛ momo, ejakaa e he we Mawu Bi kake too ɔ biɛ ɔ yi. 19  Amlɔ nɛ ɔ, nɔ́ nɛ a maa da nɔ kɛ kojo ɔ ji nɛ ɔ nɛ: kaa la a ba je ɔ mi, se nimli suɔ diblii ɔ mohu pe la a, ejakaa a ní peepee ɔmɛ dɛ. 20  Ejakaa nɔ fɛɛ nɔ nɛ e peeɔ ní yayahi ɔ sume la a, nɛ e bɛ la a nya konɛ e ní peepee ɔmɛ nɛ a ko ba je kpo.* 21  Se nɔ fɛɛ nɔ nɛ e peeɔ nɔ́ kpakpa a baa la a nya, konɛ a je e ní peepee ɔmɛ kpo nɛ́ a na kaa a kɛ Mawu suɔmi nya ní kɔ.” 22  Enɛ ɔ se ɔ, Yesu kɛ e kaseli ɔmɛ je kɛ ho Yudea kɔpe ɔmɛ a mi ya, nɛ e kɛ mɛ hi si ngɛ lejɛ ɔ be bɔɔ, nɛ e ngɛ nihi baptisie. 23  Se Yohane hu ngɛ nihi baptisie ngɛ Ainɔn, ngɛ Salim kasa nya, ejakaa nyu babauu ngɛ lejɛ ɔ, nɛ nihi ngɛ e ngɔ bae nɛ e ngɛ mɛ baptisie; 24  jamɛ a be ɔ mi ɔ, a wui Yohane tsu lolo. 25  Jehanɛ ɔ, Yohane kaseli ɔmɛ kɛ Yuda no ko sã nya ngɛ he tsukɔmi he. 26  Enɛ ɔ he ɔ, a ba Yohane ngɔ nɛ a ba de lɛ ke: “Rabi, nyumu ɔ nɛ e kɛ mo hi Yɔdan Pa a se nɛ o ye e he odase ɔ, hyɛ, e ngɛ nihi baptisie, nɛ ni ɔmɛ tsuo ngɛ e ngɔ yae.” 27  Yohane ha mɛ heto ke: “Nɔmlɔ ko nine be nyɛe maa su nɔ́ kake ngmelu po nɔ kaa ja a ngɔ kɛ ha lɛ kɛ je hiɔwe. 28  Nyɛ nitsɛmɛ nyɛ yeɔ odase ha mi kaa i de ke, ‘Pi imi ji Kristo ɔ, se a tsɔ mi kɛ sɛ jamɛ a nɔ ɔ hlami.’ 29  Nɔ nɛ e nɔ́ ji ayɛflo ɔ, lɛ ji ayɛflo huno ɔ nɛ. Se ayɛflo huno ɔ huɛ ɔ, ke e daa si nɛ e nu ayɛflo huno ɔ he ɔ, e bua jɔɔ wawɛɛ nitsɛ ngɛ ayɛflo huno ɔ gbi nɛ e nu ɔ he je. Enɛ ɔ he ɔ, bua jɔmi nɛ i ná a pi si. 30  E sa nɛ jamɛ a nɔ ɔ nɛ e hi nɔ yae, se imi lɛɛ e sa nɛ ma hi si bae.” 31  Nɔ nɛ e je hiɔwe kɛ ba a pã nihi tsuo. Nɔ nɛ e je zugba a nɔ ɔ, zugba a nɔ no ji lɛ, nɛ e tuɔ zugba a nɔ níhi a he munyu. Nɔ nɛ e je hiɔwe kɛ ba a pã nihi tsuo. 32  Níhi nɛ e na kɛ níhi nɛ e nu ɔ, lɔ ɔmɛ a he odase nɛ e yeɔ, se adesa ko kplɛɛ we odase nɛ e yeɔ ɔ nɔ. 33  Nɔ fɛɛ nɔ nɛ e kplɛɛɔ odase nɛ e yeɔ ɔ nɔ ɔ maa nɔ mi* kaa anɔkualetsɛ ji Mawu. 34  Ejakaa nɔ nɛ Mawu tsɔ ɔ, Mawu munyuhi nɛ e tuɔ, ejakaa Mawu pee we e mumi ɔ he kpɛle.* 35  Tsɛ ɔ suɔ Bi ɔ, nɛ e ngɔ nɔ́ fɛɛ nɔ́ kɛ wo e dɛ. 36  Nɔ nɛ e heɔ Bi ɔ yeɔ ɔ ngɛ neneene wami; nɔ nɛ e bui Bi ɔ tue ɔ be wami nae, mohu ɔ, Mawu we abofu ɔ hiɔ e nɔ.

Sisi ningma

E ma nyɛ maa pee kaa “a ji hiɔwe kɛ fɔ we nɔ ko.”
Aloo “a ko ba kã e ní peepee ɔmɛ a hɛ mi.”
Hela, “sɔuɔ nya.”
Aloo “susuu we e mumi ɔ loko e kɛ haa nɔ; pee we e mumi ɔ he hɔni.”