Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Yohane 21:1-25

MI MUNYUHI

  • Yesu je e he kpo kɛ tsɔɔ e kaseli ɔmɛ (1-14)

  • Petro ma e suɔmi ɔ nɔ mi kɛ ha Yesu (15-19)

    • “Ha ye jijɔ tsɔwi ɔmɛ niye ní” (17)

  • Nɔ́ nɛ maa ba kaseli nɛ Yesu suɔ mɛ ɔ a nɔ hwɔɔ se (20-23)

  • Nya gbe munyu (24, 25)

21  Ngɛ enɛ ɔ se ɔ, Yesu kpale je e he kpo kɛ tsɔɔ kaseli ɔmɛ ngɛ Tiberia Wo ɔ nya. Blɔ nɔ nɛ e gu kɛ je e he kpo kɛ tsɔɔ mɛ ɔ ji nɛ ɔ nɛ.  Simon Petro, Toma (nɔ nɛ a tsɛɛ lɛ ke Hayo ɔ), Nataniɛl nɛ e je Kana ngɛ Galilea a, Zebedeo binyumu ɔmɛ, kɛ kaseli kpahi enyɔ bua a he nya ngɛ he kake.  Simon Petro de mɛ ke: “I yaa wo.” A de lɛ ke: “Waa kɛ mo maa ya.” A je kpo nɛ a ya sɛ lɛ mi, se jamɛ a nyɔ ɔ mi ɔ, a gbi lo kake ngmelu po.  Se benɛ je mi ngɛ tsɔe ɔ, Yesu ba da si ngɛ wo ɔ nya, se kaseli ɔmɛ li kaa Yesu.  Kɛkɛ nɛ Yesu de mɛ ke: “Ye bimɛ, tse nyɛ be nɔ́* ko nɛ nyɛ maa ye, aloo nyɛ ngɛ nɔ́ ko?” A ha lɛ heto ke: “Ohoo, wa be nɔ́ ko!”  E de mɛ ke: “Nyɛ pue ya a ngɛ lɛ ɔ hiɔ nɔ je nɛ nyɛ maa gbe eko.” Lɔ ɔ he ɔ, a pue ya a, se a nyɛ we nɛ a sã, ejakaa a gbe lo babauu nitsɛ.  Kɛkɛ nɛ kaselɔ ɔ nɛ Yesu suɔ e sane ɔ de Petro ke: “E ji Nyɔmtsɛ ɔ!” Benɛ Simon Petro nu kaa Nyɔmtsɛ ɔ lɛ e daa si ɔ, e wo tade nɛ e woɔ ngɛ e tade ɔ nɔ ɔ,* ejakaa jinɛ e hɛɛ e he gu,* nɛ e tu kɛ wo wo ɔ mi.  Se kaseli kpa amɛ hi lɛ nyafii ɔ mi kɛ ba, nɛ a ngɛ ya a nɛ lo hyi lɛ tɔtɔɔtɔ ɔ sãe, ejakaa a kɛ kpo he kɛ we. A kɛ kpo he kɛmi maa pee nanewɛɛ 300* pɛ.  Benɛ a ba su wo ɔ nya a, a na la nɛ a kɛ hã slɛ kɛ e nɔ lo kɛ abolo. 10  Yesu de mɛ ke: “Nyɛɛ ngɔ lo ɔ nɛ nyɛ gbe piɔ ɔ eko kɛ ba.” 11  Lɔ ɔ he ɔ, Simon Petro ya sɛ lɛ ɔ mi nɛ e ya sã ya a nɛ lo nguanguahi hyi lɛ tɔtɔɔtɔ ɔ kɛ ba wo ɔ nya, lo 153 lɛ ngɛ mi. E ngɛ mi kaa lo ɔ hiɛ mohu lɛɛ, se ya a gba we. 12  Yesu de mɛ ke: “Nyɛɛ ba nɛ nyɛ ba ye nyɛ mɔtu ní.” Kaseli ɔmɛ a ti nɔ kake ngmelu po ná we kã nɛ e ma bi lɛ ke: “Mɛnɔ ji mo?” ejakaa a le kaa Nyɔmtsɛ ɔ. 13  Yesu ba nɛ e ba ngɔ abolo ɔ kɛ ha mɛ, nɛ e ha mɛ lo ɔ hulɔ. 14  Benɛ a tle Yesu si kɛ je gbeje ɔ, enɛ ɔ ji si etɛne nɛ e je e he kpo kɛ tsɔɔ kaseli ɔmɛ. 15  Nɛ benɛ a ye mɔtu ní ɔ ta a, Yesu de Simon Petro ke: “Simon, Yohane bi, anɛ o suɔ mi pe ní nɛ ɔmɛ lo?” E ha lɛ heto ke: “Ee, Nyɔmtsɛ, o le kaa i suɔ o sane.” Yesu de lɛ ke: “Ha ye jijɔ bimɛ ɔmɛ niye ní.” 16  Yesu kpale bi lɛ si enyɔne ke: “Simon, Yohane bi, o suɔ mi lo?” E he nɔ ke: “Ee, Nyɔmtsɛ, o le kaa i suɔ o sane.” Yesu de lɛ ke: “Hyɛ ye jijɔ tsɔwi ɔmɛ a nɔ.” 17  Yesu bi lɛ si etɛne ke: “Simon, Yohane bi, o suɔ ye sane lo?” Petro hao kaa e bi lɛ si etɛne ke: “O suɔ ye sane lo?” Lɔ ɔ he ɔ, e de lɛ ke: “Nyɔmtsɛ, o le nɔ́ fɛɛ nɔ́; o le kaa i suɔ o sane.” Yesu de lɛ ke: “Ha ye jijɔ tsɔwi ɔmɛ niye ní. 18  Niinɛ, ngɛ anɔkuale mi ɔ, i ngɛ mo dee ke, benɛ o wɛ ɔ, mo nitsɛ lɛ o woɔ o tade nɛ o nyɛɛɔ kɛ yaa he nɛ o suɔ. Se ke o ba bwɔ ɔ, o maa kpã o ninehi a mi nɛ nɔ kpa maa wo tade ha mo, nɛ e maa ngɔ mo kɛ ya he nɛ o sume.” 19  E de enɛ ɔ kɛ tsɔɔ gbenɔ pɔtɛɛ nɛ e ma gbo kɛ wo Mawu hɛ mi nyami ɔ. Benɛ e de enɛ ɔ se ɔ, e de lɛ ke: “Yaa nɔ nɛ o nyɛɛ ye se.” 20  Petro po e he nɛ e na kaselɔ ɔ nɛ Yesu suɔ lɛ ɔ nɛ e ngɛ a se nyɛɛe. Lɛ ji nɔ nɛ benɛ a ngɛ gbɔkuɛ ní ɔ yee ɔ, e kpasa Yesu gugue mi nɛ́ e bi ke: “Nyɔmtsɛ, mɛnɔ lɛ e maa tsɔɔ o se blɔ ɔ?” nɛ. 21  Lɔ ɔ he ɔ, benɛ Petro hɛ ngmɛ gba e nɔ ɔ, e bi Yesu ke: “Nyɔmtsɛ, nyumu nɛ ɔ hu nɛɛ?” 22  Yesu de lɛ ke: “Ke i suɔ kaa e hi si kɛ yaa si be nɛ ma ba a, mɛni lɔ ɔ kɔɔ ngɛ o he? Moo lɛɛ yaa nɔ nɛ o nyɛɛ ye se.” 23  Enɛ ɔ he ɔ, munyu nɛ ɔ pɛ ngɛ nyɛmimɛ ɔmɛ a kpɛti kaa kaselɔ nɛ ɔ be gboe. Pohu Yesu de we ke e be gboe, mohu ɔ, nɔ́ nɛ e de ji: “Ke i suɔ kaa e hi si kɛ yaa si be nɛ ma ba a, mɛni lɔ ɔ kɔɔ ngɛ o he?” 24  Kaselɔ nɛ ɔ lɛ e ye ní nɛ ɔmɛ a he odase nɛ e ngma ní nɛ ɔmɛ ɔ nɛ, nɛ wa le kaa odase nɛ e ye ɔ ji anɔkuale. 25  Ngɛ anɔkuale mi ɔ, ní kpahi fuu hu ngɛ nɛ Yesu pee nɛ ke a ke a maa ngma lɛ tsuo fitsofitso ɔ, i kpa we si kaa womi kpohi nɛ a maa ngma a maa ya je ɔ nitsɛ mi.

Sisi ningma

Aloo “lo.”
Aloo “e fĩ tade nɛ e woɔ ngɛ e tade ɔ nɔ ɔ kɛ wo e he.”
Aloo “e wo nɔ́ ko hanyahanya.”
Maa pee mita 90. Hela, “maa pee kɔni fã 200.”