Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Yohane 2:1-25

MI MUNYUHI

  • Kana yo kpeemi ɔ; nyu plɛ pee wai (1-12)

  • Yesu ha nɛ sɔlemi we ɔ tsɔ (13-22)

  • Yesu le nɔ́ nɛ ngɛ adesa mi (23-25)

2  Ngɛ ligbi etɛne ɔ nɔ ɔ, a ngmɛ yo kpeemi okplɔɔ ko ngɛ Kana, ngɛ Galilea, nɛ Yesu yayo ngɛ lejɛ ɔ.  A fɔ Yesu kɛ e kaseli ɔmɛ hu nine kɛ ya yo kpeemi okplɔɔ ngmɛmi ɔ sisi.  Benɛ wai ɔ ta a, Yesu yayo de lɛ ke: “A be wai.”  Se Yesu de lɛ ke: “Yo, mɛni nɛ enɛ ɔ kɔɔ ngɛ imi kɛ mo wa he?* Ye ngmlɛfia a sui lolo.”  E yayo de ni nɛmɛ nɛ a ngɛ sɔmɔe ɔ ke: “Nɔ́ fɛɛ nɔ́ nɛ e ma de nyɛ ɔ, nyɛɛ pee.”  Jamɛ a be ɔ mi ɔ, tɛ buɛhi ekpa nɛ a kɛ nyu woɔ mi ngɛ lejɛ ɔ kaa bɔ nɛ Yuda bi ɔmɛ a he tsukɔmi mlaa a tsɔɔ ɔ. Nyu susumi nɔ́* enyɔ loo etɛ yaa eko fɛɛ eko mi.  Yesu de mɛ ke: “Nyɛɛ yɛ nyu kɛ wo a mi nɛ a hyi tɔtɔɔtɔ.” Lɔ ɔ he ɔ, a wo a mi nyu nɛ a hyi tɔtɔɔtɔ.  Lɔ ɔ se ɔ, e de mɛ ke: “Jehanɛ ɔ, nyɛɛ yɛ eko kɛ ya ha nɔ nɛ e ngɛ okplɔɔ ngmɛmi ɔ nɔ hyɛe ɔ.” Kɛkɛ nɛ a yɛ eko.  Benɛ nɔ nɛ e ngɛ okplɔɔ ngmɛmi ɔ nɔ hyɛe ɔ sa e nya nyu nɛ amlɔ nɛ ɔ e plɛ pee wai ɔ, akɛnɛ e li he nɛ e je kɛ ba he je ɔ (se sɔmɔli ɔmɛ nɛ a yɛ nyu ɔ lɛɛ a le), nɔ nɛ e ngɛ okplɔɔ ngmɛmi ɔ nɔ hyɛe ɔ tsɛ ayɛflo huno ɔ 10  nɛ e de lɛ ke: “Nɔ fɛɛ nɔ jeɔ wai kpakpa a kpo kekle, nɛ ke nihi de loko e jeɔ nɔ́ nɛ e hí ɔ kpo. Se moo lɛɛ o ngɔ wai kpakpa a kɛ to kɛ ba si amlɔ nɛ ɔ.” 11  Yesu pee nɔ́ nɛ ɔ ngɛ Kana, ngɛ Galilea kɛ je okadihi nɛ e pee ɔmɛ a sisi, nɛ e ha nɛ e hɛ mi nyami ɔ je kpo, nɛ e kaseli ɔmɛ he lɛ ye. 12  Ngɛ enɛ ɔ se ɔ, e kɛ e yayo kɛ e nyɛminyumu ɔmɛ kɛ e kaseli ɔmɛ kple kɛ ho Kapenaum ya, se a se ya kɛ we ngɛ lejɛ ɔ. 13  Jehanɛ ɔ, Yuda bi ɔmɛ a He Tsɔmi ɔ su ta, nɛ Yesu kuɔ kɛ ya Yerusalɛm. 14  E ya na nihi nɛ a ngɛ nahi kɛ jijɔhi kɛ lahuɛhi juae ɔ, kɛ nihi nɛ a tsakeɔ sika kɛ haa nihi ɔ nɛ a hii si ngɛ a sɛhi a mi ngɛ sɔlemi we ɔ. 15  Enɛ ɔ he ɔ, e bla kpahi kɛ pee kpa, nɛ e fiee ni ɔmɛ tsuo kɛ a jijɔ ɔmɛ kɛ a na amɛ kɛ je sɔlemi we ɔ, nɛ e plɛ sika tsakeli ɔmɛ a sika a kɛ pue si, nɛ e plɛ a we okplɔɔ ɔmɛ ngɔ bu si. 16  Nɛ e de ni nɛmɛ nɛ a ngɛ lahuɛ ɔmɛ juae ɔ ke: “Nyɛɛ ngɔ ní nɛ ɔmɛ kɛ je hiɛmɛ nɛ ɔ kɛ ho! Nyɛ kpa jua yemi ngɛ ye Tsɛ ɔ we ɔ!”* 17  E kaseli ɔmɛ kai kaa a ngma ke: “Hɛdɔ nɛ i ngɛ ngɛ o we ɔ he ɔ maa ye mi.” 18  Lɔ ɔ he ɔ, Yuda bi ɔmɛ he nɔ nɛ a bi lɛ ke: “Akɛnɛ o ngɛ ní nɛ ɔmɛ pee he je ɔ, mɛni okadi o ma nyɛ maa pee kɛ tsɔɔ wɔ?” 19  Yesu ha mɛ heto ke: “Nyɛɛ hule sɔlemi we nɛ ɔ kɛ pue si, nɛ ma ngɔ ligbi etɛ kɛ wo nɔ kɛ ma si.” 20  Kɛkɛ nɛ Yuda bi ɔmɛ de ke: “Jeha 46 sɔuu nɛ a kɛ ma sɔlemi we nɛ ɔ, nɛ moo o maa ngɔ ligbi etɛ kɛ wo nɔ kɛ ma si lo?” 21  Se sɔlemi we nɛ e ngɛ he munyu tue ɔ ji e nɔmlɔ tso ɔ nɛ. 22  Se benɛ a tle lɛ si kɛ je gbeje ɔ, e kaseli ɔmɛ kai kaa e pɔɔ munyu nɛ ɔ tumi, nɛ a he ngmami ɔ kɛ nɔ́ nɛ Yesu de ɔ ye. 23  Se kɛ̃ ɔ, benɛ e ngɛ Yerusalɛm ngɛ He Tsɔmi gbijlɔ ɔ mi ɔ, nihi babauu ná hemi kɛ yemi ngɛ e biɛ ɔ mi benɛ a na okadihi nɛ e ngɛ pee ɔ. 24  Se Yesu nitsɛ lɛɛ e kɛ e hɛ fɔɛ a nɔ, ejakaa e le mɛ tsuo 25  nɛ e he hia we kaa e ha nɛ nɔ ko nɛ e ye adesa he odase, ejakaa e le nɔ́ nɛ ngɛ adesa mi.

Sisi ningma

Hela, “Yo, mɛni kɛ ha imi kɛ mo?” Enɛ ɔ ji aguase mi gbi nɛ tsɔɔ kaa nɔ ko kplɛɛ we nɔ́ ko nɔ. “Yo” nɛ e kɛ tsu ní ɔ tsɔɔ we kaa e bui nɔ.
E ma nyɛ maa pee kaa nyu susumi nɔ́ nɛ ɔ ji bat nɛ e peeɔ lita 22 (galɔn 5.81).
Aloo “nyɛ kpa lejɛ ɔ ngɔmi kɛ pee jua nɔ, aloo ní tsumi he.”