Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Yohane 16:1-33

MI MUNYUHI

  • A ma nyɛ maa gbe Yesu kaseli ɔmɛ (1-4a)

  • Mumi klɔuklɔu ɔ ní tsumi (4b-16)

  • Kaseli ɔmɛ a kɔmɔ yemi ɔ ma plɛ pee nyami (17-24)

  • Je ɔ nɔ kunimi nɛ Yesu ye ɔ (25-33)

16  “I de nyɛ ní nɛ ɔmɛ konɛ nyɛ nane nɛ e ko tɔ̃tɔ̃.  Nihi maa fiee nyɛ kɛ je kpe he ɔ. Ngɛ anɔkuale mi ɔ, ngmlɛfia a ma be mi nɛ nɔ fɛɛ nɔ nɛ e gbeɔ nyɛ ɔ ma susu kaa e ngɛ Mawu sɔmɔe ngɛ blɔ klɔuu nɔ.  Se a maa pee ní nɛ ɔmɛ, ejakaa a li Tsɛ ɔ, nɛ a li imi hulɔ.  Se kɛ̃ ɔ, i de nyɛ ní nɛ ɔmɛ konɛ ke ngmlɛfia a nɛ ní nɛ ɔmɛ maa ba mi ɔ su ɔ, nyɛ kai kaa i de nyɛ. “Sisije ɔ, i de we nyɛ ní nɛ ɔmɛ, ejakaa i kɛ nyɛ ngɛ.  Se amlɔ nɛ ɔ, i yaa Nɔ nɛ e tsɔ mi ɔ ngɔ; se kɛ̃ ɔ, nyɛ ti nɔ kake po bi we mi ke, ‘Jije o yaa?’  Se akɛnɛ i de nyɛ ní nɛ ɔmɛ he je ɔ, aywilɛho hyi nyɛ tsui tɔ.  Se kɛ̃ ɔ, anɔkuale i ngɛ nyɛ dee ɔ nɛ, kaa bɔ nɛ pee nɛ e hi ha nyɛ he je nɛ i yaa a nɛ. Ejakaa ke i yɛ ɔ, yemi kɛ bualɔ ɔ be nyɛ ngɔ bae; se ke i ho ɔ, ma tsɔ lɛ kɛ ba nyɛ ngɔ.  Nɛ ke jamɛ a nɔ ɔ ba a, e kɛ odase nɛ e pi si ma ha je ɔ ngɛ yayami he, kɛ dami he, kɛ kojomi he:  kekleekle ɔ, ngɛ yayami he, ejakaa a he we mi yi; 10  lɔ ɔ se ɔ, ngɛ dami he, ejakaa i yaa Tsɛ ɔ ngɔ, nɛ nyɛ be mi nae hu; 11  lɔ ɔ se ɔ, ngɛ kojomi he, ejakaa a kojo nɔ nɛ e ngɛ je nɛ ɔ nɔ yee ɔ. 12  “Loloolo ɔ, i ngɛ níhi fuu nɛ ma de nyɛ, se nyɛ be nyɛe maa pɛtɛ a he amlɔ nɛ ɔ. 13  Se ke jamɛ a nɔ* ɔ, nɛ ji anɔkuale mumi ɔ ba a, e ma kudɔ nyɛ kɛ ya anɔkuale ɔ tsuo mi, ejakaa lɛ nitsɛ e be e yi mi toe kɛ tu munyu, mohu ɔ, nɔ́ nɛ e nu ɔ, lɔ ɔ nɛ e ma de, nɛ e maa jaje níhi nɛ maa ba a ngɔ tsɔɔ nyɛ. 14  Jamɛ a nɔ ɔ maa wo ye hɛ mi nyami, ejakaa e nine maa su nɔ́ nɛ ji ye nɔ́ ɔ eko nɔ, nɛ e maa jaje ngɔ tsɔɔ nyɛ. 15  Nɔ́ fɛɛ nɔ́ nɛ Tsɛ ɔ ngɛ ɔ, ye nɔ́. Enɛ ɔ he je nɛ i de ke e nine maa su nɔ́ nɛ ji ye nɔ́ ɔ eko nɔ, nɛ e maa jaje ngɔ tsɔɔ nyɛ ɔ nɛ. 16  E piɛ bɔɔ pɛ nɛ nyɛ be mi nae hu, nɛ jehanɛ hu ɔ, e piɛ bɔɔ pɛ nɛ nyɛ maa na mi.” 17  Kɛkɛ nɛ e kaseli ɔmɛ a ti ni komɛ bi a sibi ke: “Demi nɛ e de wɔ ke, ‘E piɛ bɔɔ pɛ nɛ nyɛ be mi nae, nɛ jehanɛ hu ɔ, e piɛ bɔɔ pɛ nɛ nyɛ maa na mi,’ kɛ ‘ejakaa i yaa Tsɛ ɔ ngɔ’ ɔ, mɛni ji a sisi?” 18  Enɛ ɔ he ɔ, a ngɛ dee ke: “Demi nɛ e de wɔ ke, ‘E piɛ bɔɔ pɛ’ ɔ, mɛni ji e sisi? Wa li nɔ́ nɛ he munyu nɛ e ngɛ tue ɔ.” 19  Yesu le kaa a ngɛ hlae nɛ a ma bi lɛ sane, enɛ ɔ he ɔ, e bi mɛ ke: “Anɛ nyɛ ngɛ nyɛ sibi sanehi bie akɛnɛ i de ke: ‘E piɛ bɔɔ pɛ nɛ nyɛ be mi nae, nɛ jehanɛ hu ɔ, e piɛ bɔɔ pɛ nɛ nyɛ maa na mi’ ɔ he je lo? 20  Niinɛ, ngɛ anɔkuale mi ɔ, i ngɛ nyɛ dee ke, nyɛ ma fo ya, nɛ nyɛ maa ye aywilɛho, se je ɔ ma nya; nyɛ maa ye kɔmɔ, se nyɛ kɔmɔ yemi ɔ ma plɛ pee bua jɔmi. 21  Ke yo ko ngɛ fɔe ɔ, e yeɔ kɔmɔ, ejakaa e ngmlɛfia a su, se ke e ná nɛ e fɔ bi ɔ, e kai we amanehlu nɛ e na a hu, ejakaa e bua jɔ kaa e fɔ nɔmlɔ kɛ ba je ɔ mi. 22  Enɛ ɔ he ɔ, nyɛ hu jã kɛ̃ nɛ amlɔ nɛ ɔ, nyɛ ngɛ kɔmɔ yee; se ma na nyɛ ekohu, nɛ nyɛ tsui ma nya, nɛ nɔ ko be nyɛ bua jɔmi ɔ ngɔe ngɛ nyɛ dɛ. 23  Jamɛ a ligbi ɔ, nyɛ be mi sane ko sane ko bie. Niinɛ, ngɛ anɔkuale mi ɔ, i ngɛ nyɛ dee kaa ke nyɛ bi Tsɛ ɔ nɔ́ ko ɔ, e ma ha nyɛ ngɛ ye biɛ mi. 24  Kɛ ba si piɔ ɔ, nyɛ bi we nɔ́ kake po ngɛ ye biɛ mi. Nyɛ bi, nɛ nyɛ nine maa su nɔ, konɛ nyɛ bua jɔmi ɔ nɛ e pi si. 25  “I ngɔ níhi kɛ to níhi a he nɛ i kɛ de nyɛ ní nɛ ɔmɛ. Ngmlɛfia a ma, be mi nɛ i kɛ níhi be níhi a he toe kɛ de nyɛ nɔ́ ko hu, mohu ɔ, ma tu Tsɛ ɔ he munyu kɛ tsɔɔ nyɛ heii. 26  Jamɛ a ligbi ɔ, nyɛ ma bi Tsɛ ɔ níhi ngɛ ye biɛ mi; enɛ ɔ nɛ i ngɛ dee ɔ, pi nɛ i ngɛ tsɔɔe kaa imi nɛ ma bi níhi kɛ ha nyɛ. 27  Ejakaa Tsɛ ɔ nitsɛ suɔ nyɛ sane akɛnɛ nyɛ hu nyɛ suɔ ye sane nɛ nyɛ he ye kaa i ba kaa Mawu nane mi dalɔ ɔ he je. 28  I ba kaa Tsɛ ɔ nane mi dalɔ, nɛ i ba je ɔ mi. Amlɔ nɛ ɔ, i ngɛ je ɔ mi jee kɛ yaa Tsɛ ɔ ngɔ.” 29  E kaseli ɔmɛ de ke: “Hyɛ! Jehanɛ ɔ lɛɛ o kɛ wɔ ngɛ munyu tue heii nɛ o ngɔɛ níhi kɛ tui níhi a he. 30  Amlɔ nɛ ɔ, wa le kaa o le níhi tsuo nɛ o hia we nɛ nɔ ko nɛ e ba bi mo sane. Enɛ ɔ ha nɛ wa he ye kaa Mawu ngɔ nɛ o je kɛ ba.” 31  Yesu he nɔ nɛ e de mɛ ke: “Amlɔ nɛ ɔ lɛɛ nyɛ he ye lo? 32  Hyɛ! Ngmlɛfia a ma, nɛ ngɛ anɔkuale mi ɔ, e su, be mi nɛ nyɛ maa gbɛ kɛ fĩa nɛ nyɛ ti nɔ fɛɛ nɔ maa ho lɛ nitsɛ e we mi ya, nɛ nyɛ maa je imi nɔ kake too ye he. Se pi imi nɔ kake too nɛ i ngɛ, ejakaa Tsɛ ɔ kɛ mi ngɛ. 33  I de nyɛ ní nɛ ɔmɛ konɛ kɛ gu ye nɔ ɔ, nyɛ ná tue mi jɔmi. Nyɛ maa na amanehlu ngɛ je ɔ mi, se nyɛɛ pee kã! I ye je ɔ nɔ kunimi.”

Sisi ningma

Munyu nɛ ji “nɔ” kɛ “lɛ” nɛ a kɛ tsu ní ngɛ kuku 13 kɛ 14 mi ɔ daa si kɛ ha “yemi kɛ bualɔ ɔ” nɛ a tu e he munyu ngɛ kuku 7 ɔ mi ɔ. Yesu ngɔ munyu nɛ ji, “yemi kɛ bualɔ ɔ” kɛ tsu ní kɛ tu mumi klɔuklɔu ɔ he munyu kaa nɔmlɔ. Mumi klɔuklɔu ɔ ji he wami, se pi nɔmlɔ, nɛ ngɛ Hela gbi ɔ mi ɔ, munyungu nɛ a kɛ tsu ní ɔ dɛ si kɛ ha we nyumu aloo yo.