Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Yohane 13:1-38

MI MUNYUHI

  • Yesu fɔ e kaseli ɔmɛ a nane he (1-20)

  • Yesu tsɔɔ kaa Yudas ji nɔ se blɔ tsɔɔlɔ (21-30)

  • Kita ehe (31-35)

    • “Ke suɔmi ngɛ nyɛ kpɛti ɔ” (35)

  • A gba kɛ fɔ si kaa Petro ma kua Yesu (36-38)

13  Jehanɛ ɔ, loko He Tsɔmi gbijlɔ ɔ maa su ɔ, akɛnɛ Yesu le kaa ngmlɛfia nɛ e kɛ maa je je nɛ ɔ mi kɛ ya Tsɛ ɔ ngɔ ɔ su he je ɔ, bɔ nɛ e suɔ lɛ nitsɛ e nihi nɛ a ngɛ je ɔ mi ha a, jã nɔuu nɛ e suɔ mɛ hluu kɛ ya si nyagbe.  Gbɔkuɛ ní yemi ɔ ngɛ nɔ yae, nɛ Abosiami ngɔ kɛ wo Yudas Iskariɔt, Simon binyumu ɔ tsui mi momo kaa e tsɔɔ Yesu se blɔ.  Enɛ ɔ he ɔ, akɛnɛ Yesu le kaa Tsɛ ɔ ngɔ níhi tsuo kɛ wo e dɛ, nɛ Mawu ngɔ nɛ e je kɛ ba nɛ e kpale kɛ yaa Mawu ngɔ he je ɔ,  e te si ngɛ gbɔkuɛ niye ní ɔ se, nɛ e je tadehi nɛ e wo ngɛ e tade ɔ nɔ ɔ ngɔ fɔ si. Nɛ e ngɔ papahu kɛ muɔ e mlɛ mi.*  Lɔ ɔ se ɔ, e ngɔ nyu kɛ wo tsesi mi nɛ e bɔni kaseli ɔmɛ a nane he fɔmi, nɛ e ngɔ papahu ɔ nɛ e kɛ muɔ e mlɛ mi* ɔ kɛ tsu a nane ɔmɛ a he.  Kɛkɛ nɛ e ba Simon Petro ngɔ. Petro de lɛ ke: “Nyɔmtsɛ, o ma ye nane he fɔmi lo?”  Yesu ha lɛ heto ke: “Nɔ́ nɛ i ngɛ pee ɔ, amlɔ nɛ ɔ, o nui sisi, se pee se ɔ, o ma ba nu ní nɛ ɔmɛ a sisi.”  Petro de lɛ ke: “Ngɛ anɔkuale mi ɔ, o be ye nane he fɔe gblegbleegble.” Yesu he nɔ nɛ e de lɛ ke: “Ke i fɔ we o he ɔ, lɛɛ o be blɔ fa mi nɔ́ ko ngɛ ye ngɔ.”  Simon Petro de lɛ ke: “Nyɔmtsɛ, lɛɛ pi ye nane ɔmɛ a he pɛ nɛ o ma fɔ, mohu ɔ, mo fɔ ye nine ɔmɛ a he kɛ ye yi mi hulɔ.” 10  Yesu de lɛ ke: “Nɔ fɛɛ nɔ nɛ e du momo ɔ, e he tsɔ kɛ pi si nɛ e hia we nɔ́ kpa ko hu pe e nanehi a he pɛ nɛ a ma fɔ. Nɛ nyɛɛ lɛɛ nyɛ he tsɔ, se tsa pi nyɛ tsuo.” 11  Ejakaa e le nɔmlɔ nɛ e ngɛ e se blɔ tsɔɔe ɔ. Enɛ ɔ he je nɛ e de ke: “Tsa pi nyɛ tsuo nɛ nyɛ he tsɔ” ɔ nɛ. 12  Jehanɛ ɔ, benɛ e fɔ a nane ɔmɛ a he ta nɛ e wo tadehi nɛ e wo ngɛ e tade ɔ nɔ ɔ ekohu ɔ, e kpale kɛ ya hi si ngɛ okplɔɔ ɔ he, nɛ e de mɛ ke: “Anɛ nyɛ nu nɔ́ nɛ i pee ha nyɛ ɔ sisi lo? 13  Nyɛ tsɛɛ mi ke ‘Tsɔɔlɔ’ kɛ ‘Nyɔmtsɛ,’ nɛ e sa jã, ejakaa jã nɛ i ji. 14  Enɛ ɔ he ɔ, ke imi nɛ i ji Nyɔmtsɛ kɛ Tsɔɔlɔ ɔ, i fɔ nyɛ nane he ɔ, lɛɛ e sa nɛ* nyɛ hu nyɛ fɔ nyɛ sibi a nane he. 15  Ejakaa i pee nɔ hyɛmi nɔ́ kɛ ha nyɛ, konɛ kaa bɔ nɛ i pee kɛ ha nyɛ ɔ, nyɛ hu nyɛɛ pee jã. 16  Niinɛ, ngɛ anɔkuale mi ɔ, i ngɛ nyɛ dee ke, nyɔguɛ nɔ kuɔ we pi e nyɔmtsɛ, nɛ jã kɛ̃ nɛ nɔ nɛ a tsɔ lɛ ɔ hu nɔ kuɔ we pi nɔ nɛ e tsɔ lɛ ɔ. 17  Ke nyɛ le ní nɛ ɔmɛ nɛ nyɛ peeɔ ɔ, nyɛ ngɛ bua jɔmi. 18  Pi nyɛ tsuo nyɛ he munyu nɛ i ngɛ tue ɔ; i le ni nɛmɛ nɛ i hla a. Se enɛ ɔ ba mi konɛ nɔ́ nɛ ngmami ɔ de ɔ nɛ e ba mi. Ngmami ɔ de ke: ‘Nɔ nɛ e yeɔ ye abolo ɔ wo e nane se ja* nɔ ngɔ si mi.’* 19  Kɛ je piɔ kɛ yaa a, i ngɛ nyɛ dee loko e ba mi, konɛ ke e ba mi ɔ, nyɛ he ye kaa imi ji lɛ. 20  Niinɛ, ngɛ anɔkuale mi ɔ, i ngɛ nyɛ dee ke, nɔ fɛɛ nɔ nɛ e ma ha nɔ fɛɛ nɔ nɛ i tsɔ lɛ ɔ hɛ mi ɔ, e ha imi hu hɛ mi, nɛ nɔ fɛɛ nɔ nɛ e ma ha mi hɛ mi ɔ, e ha Nɔ nɛ e tsɔ mi ɔ hu hɛ mi.” 21  Benɛ Yesu de ní nɛ ɔmɛ ta a, e hao ngɛ mumi mi, nɛ e ye odase ke: “Niinɛ, i ngɛ nyɛ dee ngɛ anɔkuale mi ke, nyɛ ti nɔ kake maa tsɔɔ ye se blɔ.” 22  Kaseli ɔmɛ bɔni a sibi hyɛmi, nɛ a li a ti nɔ nɛ he munyu nɛ e ngɛ tue ɔ. 23  Kaseli ɔmɛ a ti nɔ kake, nɔ nɛ Yesu suɔ lɛ ɔ hii si ngɛ Yesu kasa nya haa.* 24  Enɛ ɔ he ɔ, Simon Petro ma lɛ hɛ ngmɛ nɛ e de lɛ ke: “De wɔ nɔ nɛ e ngɛ e he munyu tue ɔ.” 25  Lɔ ɔ he ɔ, nɔ nɛ e hii si ngɛ Yesu kasa nya a hɛ lɛ kɛ su Yesu gugue mi haa nɛ e bi lɛ ke: “Nyɔmtsɛ, mɛnɔ?” 26  Yesu ha lɛ heto ke: “Nɔ nɛ ma po abolo ɔ kɛ sɔ mi nɛ ma ngɔ kɛ ha lɛ ɔ, lɛ ji nɔ ɔ nɛ.” Enɛ ɔ he ɔ, benɛ e ngɔ abolo ɔ kɛ sɔ mi ɔ, e ngɔ kɛ ha Yudas, Simon Iskariɔt binyumu ɔ. 27  Benɛ Yudas sɔle abolo popoe ɔ, kɛkɛ nɛ Satan sɛ e mi. Enɛ ɔ he ɔ, Yesu de lɛ ke: “Nɔ́ nɛ o ngɛ pee ɔ, pee lɛ esɔesɔ.” 28  Se nihi nɛ a kɛ lɛ ngɛ okplɔɔ ɔ he ɔ, a ti nɔ ko nɔ ko li nɔ́ he je nɛ e de lɛ jã a. 29  Ngɛ anɔkuale mi ɔ, a ti ni komɛ susu kaa akɛnɛ sika daka a ngɛ Yudas dɛ he je ɔ, Yesu ngɛ lɛ dee ke, “Ya he níhi nɛ maa hia wɔ kɛ ha gbijlɔ ɔ,” aloo kaa e ngɔ nɔ́ ko kɛ ya ha ohiatsɛmɛ ɔmɛ. 30  Enɛ ɔ he ɔ, benɛ e sɔle abolo popoe ɔ, oya nɔuu nɛ e je kpo. Jamɛ a be ɔ mi ɔ, je jɔ. 31  Enɛ ɔ he ɔ, benɛ e je kpo kɛ ho ɔ, Yesu de ke: “Amlɔ nɛ ɔ, a wo nɔmlɔ Bi ɔ hɛ mi nyami, nɛ a gu e nɔ kɛ wo Mawu hɛ mi nyami. 32  Mawu nitsɛ maa wo nɔmlɔ Bi ɔ hɛ mi nyami, nɛ e maa wo e hɛ mi nyami amlɔ nɔuu. 33  Bimɛ tsɔwi, be bɔɔ kɛkɛ nɛ e piɛ nɛ i kɛ nyɛ maa hi si. Nyɛ ma hla mi; nɛ kaa bɔ nɛ i de Yuda bi ɔmɛ ke, ‘He nɛ i yaa a, nyɛ be nyɛe maa ba’ a, amlɔ nɛ ɔ, nyɛ hu i ngɛ nyɛ dee jã nɔuu. 34  I ngɛ nyɛ kita ehe woe kaa nyɛɛ suɔ nyɛ sibi; kaa bɔ nɛ i suɔ nyɛ ɔ, nyɛ hu nyɛɛ suɔ nyɛ sibi jã nɔuu. 35  Ke suɔmi ngɛ nyɛ kpɛti ɔ, lɔ ɔ ma ha nɛ nihi tsuo maa le kaa nyɛ ji ye kaseli.” 36  Simon Petro de lɛ ke: “Nyɔmtsɛ, jije o yaa?” Yesu ha lɛ heto ke: “He nɛ i yaa a, o be nyɛe maa nyɛɛ ye se amlɔ nɛ ɔ, se o maa ba pee se.” 37  Petro de lɛ ke: “Nyɔmtsɛ, mɛni he je nɛ i be nyɛe nɛ ma nyɛɛ o se amlɔ nɛ ɔ? Ma ngɔ ye wami* kɛ fɔ si ngɛ o he.” 38  Yesu ha lɛ heto ke: “O maa ngɔ o wami kɛ fɔ si ngɛ ye he lo? Niinɛ, ngɛ anɔkuale mi ɔ, i ngɛ mo dee ke, kungwɔ ku be nɔ́ kpae nɛ́ o ma kua mi si etɛ.”

Sisi ningma

Aloo “fĩ e mlɛ mi.”
Aloo “fĩ e mlɛ mi.”
Aloo “e ji nyɛ blɔ nya ní tsumi kaa.”
Aloo “nane se kpo.”
Aloo “te si kɛ wo mi.”
Hela, “kpasa Yesu gugue.”
Aloo “susuma.”