Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Yohane 11:1-57

MI MUNYUHI

  • Lazaro gbenɔ (1-16)

  • Yesu wo Maata kɛ Maria a bua (17-37)

  • Yesu tle Lazaro si (38-44)

  • A so konɛ a gbe Yesu (45-57)

11  Jehanɛ ɔ, nyumu ko nɛ a tsɛɛ lɛ ke Lazaro ɔ be he wami; e je Betania, ngɛ Maria kɛ e nyɛmiyo Maata a kɔpe ɔ mi.  Maria nɛ ɔ lɛ e plɛ nu kɛ e he via kɛ pue Nyɔmtsɛ ɔ nɔ nɛ e ngɔ e yi bwɔmi kɛ tsu e nane ɔmɛ a he ɔ nɛ; e nyɛminyumu Lazaro lɛ e be he wami ɔ nɛ.  Enɛ ɔ he ɔ, Lazaro nyɛmiyi ɔmɛ tsɔ nɛ a kɛ sɛ gbi ya ha lɛ ke: “Nyɔmtsɛ, hyɛ! nɔ nɛ o suɔ e sane ɔ be he wami.”  Se benɛ Yesu nu he ɔ, e de ke: “Hiɔ nɛ ɔ, pi nɛ e ma ya gbe nya ngɛ gbenɔ mi, mohu ɔ, e maa pee Mawu hɛ mi nyami womi, konɛ a gu nɔ kɛ wo Mawu Bi ɔ hɛ mi nyami.”  Ngɛ anɔkuale mi ɔ, Yesu suɔ Maata kɛ e nyɛmiyo ɔ, kɛ Lazaro.  Se benɛ e nu kaa Lazaro be he wami ɔ, e kpale hi he nɛ e ngɛ ɔ ligbi enyɔ sɔuu.  Lɔ ɔ se ɔ, e de kaseli ɔmɛ ke: “Nyɛ ha nɛ waa kpale kɛ ho Yudea ya ekohu.”  Kaseli ɔmɛ de lɛ ke: “Rabi, lingmi nɛ ɔ pɛ nɛ Yudea bi ɔmɛ ka kaa a maa fiaa mo tɛ, nɛ o kpale yaa lejɛ ɔ ekohu lo?”  Yesu ha heto ke: “Pu si temi kɛ ya su pu si nɔmi hɛɛ ngmlɛfia 12, aloo pi jã? Ke je na nɛ nɔ ko ngɛ nyɛɛe ɔ, e tɛ we nɔ́ ko, ejakaa e naa je nɛ ɔ mi la a. 10  Se ke je jɔ nɛ nɔ ko ngɛ nyɛɛe ɔ, e tɛɔ si, ejakaa la a be e mi.” 11  Benɛ e de ní nɛ ɔmɛ ta a, e de hu ke: “Wa huɛ Lazaro hwɔ mahe, se i ngɛ blɔ hiae kɛ yaa lejɛ ɔ konɛ ma ya tsɛ̃ɛ lɛ.” 12  Kɛkɛ nɛ kaseli ɔmɛ de lɛ ke: “Nyɔmtsɛ, ke e ngɛ mahe hwɔe ɔ, lɛɛ e ma ná he wami.” 13  E gbenɔ ɔ he munyu mohu nɛ Yesu tu ɔ nɛ. Se mɛɛ lɛɛ a susu kaa mahe nɛ nɔ hwɔɔ kɛ jɔɔ e he ɔ he munyu nɛ e ngɛ tue. 14  Kɛkɛ nɛ Yesu gba mi kpoo nɛ e de mɛ ke: “Lazaro gbo, 15  nɛ nyɛ he ɔ, e ngɔ ye nya kaa i be lejɛ ɔ bɔ nɛ pee nɛ nyɛ he ye. Se nyɛ ha nɛ waa ho e ngɔ ya.” 16  Enɛ ɔ he ɔ, Toma, nɔ nɛ a tsɛɛ lɛ ke Hayo ɔ de e nyɛmimɛ kaseli ɔmɛ ke: “Nyɛ ha nɛ wɔ hu waa ya konɛ waa kɛ lɛ tsuo nɛ ya gbo.” 17  Benɛ Yesu su lejɛ ɔ, e na kaa Lazaro ye ligbi eywiɛ sɔuu momo ngɛ yɔkɔ* ɔ mi. 18  Betania kɛ Yerusalɛm kɛ we, a kpɛti kɛmi maa pee si tomi enyɔ.* 19  Nɛ Yuda bi ɔmɛ a kpɛti nihi fuu ba je ngmlaa ha Maata kɛ Maria, nɛ a ngɛ a bua woe ngɛ a nyɛminyumu ɔ he je. 20  Benɛ Maata nu kaa Yesu ma a, e ho konɛ e kɛ lɛ ya kpe; se Maria lɛɛ e hii si ngɛ we ɔ mi. 21  Kɛkɛ nɛ Maata de Yesu ke: “Nyɔmtsɛ, kaa o ngɛ hiɛ ɔ, jinɛ ye nyɛminyumu ɔ ko gbo we. 22  Se kɛ̃ ɔ, amlɔ nɛ ɔ po ɔ, i le kaa nɔ́ fɛɛ nɔ́ nɛ o ma bi Mawu ɔ, Mawu ma ha mo.” 23  Yesu de lɛ ke: “O nyɛminyumu ɔ maa te si.” 24  Maata de lɛ ke: “I le kaa e maa te si ngɛ nyagbe ligbi ɔ nɔ ngɛ gbogboehi a si tlemi ɔ mi.” 25  Yesu de lɛ ke: “Imi ji gbogboehi a si tlemi ɔ kɛ wami ɔ nɛ. Nɔ nɛ e heɔ mi yeɔ ɔ, ke e gbo po ɔ, e maa ba wami mi; 26  nɛ nɔ fɛɛ nɔ nɛ e ngɛ wami mi nɛ e heɔ mi yeɔ ɔ be gboe gblegbleegble. Anɛ o heɔ enɛ ɔ yeɔ lo?” 27  Maata de lɛ ke: “Ee, Nyɔmtsɛ, i heɔ yeɔ kaa mo ji Kristo ɔ, Mawu Bi ɔ, nɔ nɛ e ma je ɔ mi ɔ nɛ.” 28  Benɛ e de enɛ ɔ, e pue nɔ kɛ ho nɛ e ya tsɛ e nyɛmiyo Maria, nɛ e wo e tue mi ke: “Tsɔɔlɔ ɔ ngɛ hiɛ ɔ, nɛ e ngɛ mo tsɛe.” 29  Benɛ e nu enɛ ɔ, e te si pam nɛ e ho e ngɔ ya. 30  Jamɛ a be ɔ mi ɔ, Yesu sui kɔpe ɔ mi lolo, mohu ɔ, e ngɛ he nɛ Maata kɛ lɛ ba kpe ngɛ ɔ loloolo. 31  Benɛ Yuda bi ɔmɛ nɛ a kɛ Maria ngɛ we ɔ mi nɛ a ngɛ e bua woe ɔ na kaa e te si pam kɛ je kpo ɔ, a nyɛɛ e se, nɛ a susu kaa e yaa yɔkɔ* ɔ he konɛ e ya fo ya ngɛ lejɛ ɔ. 32  Benɛ Maria ya su he nɛ Yesu ngɛ ɔ nɛ e na Yesu ɔ, e kpla si ngɛ e nane nya nɛ e de lɛ ke: “Nyɔmtsɛ, kaa o ngɛ hiɛ ɔ, jinɛ ye nyɛminyumu ɔ ko gbo we.” 33  Benɛ Yesu na kaa e ngɛ ya foe nɛ Yuda bi ɔmɛ nɛ a piɛɛ Maria he kɛ ba a hu ngɛ ya foe ɔ, e ye aywilɛho ngɛ e mi,* nɛ e hao. 34  E bi mɛ ke: “Jije nyɛ to lɛ ngɛ?” A de lɛ ke: “Nyɔmtsɛ, moo ba nɛ o ba hyɛ.” 35  Yesu wɔle vo nyu. 36  Kɛkɛ nɛ Yuda bi ɔmɛ bɔni demi ke: “Hyɛ, e suɔ e sane nitsɛnitsɛ!” 37  Se a kpɛti ni komɛ bi ke: “Anɛ nyumu nɛ ɔ nɛ e bli nyumu ɔ nɛ e hɛ ngmɛ yu ɔ hɛ ngmɛ ɔ ko nyɛ we nɛ e tsi nɔ nɛ ɔ gbenɔ ɔ nya lo?” 38  Kɛkɛ nɛ benɛ Yesu kpale ye aywilɛho* ngɛ e mi ekohu ɔ, e ba yɔkɔ* ɔ he. Ngɛ anɔkuale mi ɔ, yɔkɔ ɔ ji tɛ puɔ nɛ a kɛ tɛ tsi nya. 39  Yesu de ke: “Nyɛ je tɛ ɔ.” Maata, nɔ nɛ e gbo ɔ nyɛmiyo ɔ de lɛ ke: “Nyɔmtsɛ, be nɛ ɔ mi ɔ, e ngɛ fu jee, ejakaa ligbi eywiɛ sɔuu ji nɛ ɔ nɛ.” 40  Yesu de lɛ ke: “Anɛ i de we mo kaa ke o he ye ɔ, o maa na Mawu hɛ mi nyami ɔ lo?” 41  Lɔ ɔ he ɔ, a je tɛ ɔ. Kɛkɛ nɛ Yesu wo e hɛ nɔ, nɛ e hyɛ hiɔwe nɛ e de ke: “Tsaatsɛ, i naa mo si kaa o bu mi tue. 42  Ngɛ anɔkuale mi ɔ, i le kaa o buɔ mi tue be fɛɛ be; se i de jã ngɛ nimli babauu nɛ a daa si ngɛ hiɛ ɔ he je, konɛ a he ye kaa mo lɛ o tsɔ mi.” 43  Benɛ e de ní nɛ ɔmɛ ɔ, e kɛ gbi nɛ nya wa kpa ngmlaa ke: “Lazaro, jee kpo!” 44  Nyumu ɔ nɛ e gbo ɔ je kpo kɛ ba, nɛ bo nɛ a kɛ blaa e nanehi kɛ e ninehi ɔ ngɛ e he, nɛ bo fĩ e hɛ mi. Yesu de mɛ ke: “Nyɛɛ pɛne lɛ nɛ nyɛ ha nɛ e ya.” 45  Enɛ ɔ he ɔ, Yuda bi fuu nɛ a ba Maria ngɔ nɛ a na nɔ́ nɛ Yesu pee ɔ he lɛ ye, 46  se a ti ni komɛ je kɛ ho Farisi bi ɔmɛ a ngɔ ya nɛ a ya bɔ mɛ nɔ́ nɛ Yesu pee ɔ. 47  Enɛ ɔ he ɔ, osɔfo nikɔtɔma amɛ kɛ Farisi bi ɔmɛ tsɛ Sanhedri bi ɔmɛ kpe nɛ a de ke: “Mɛni wa maa pee, ejakaa nyumu nɛ ɔ ngɛ okadihi fuu pee? 48  Ke wa ngmɛ lɛ blɔ kaa e ya nɔ jã a, mɛ tsuo a ma he lɛ maa ye, nɛ Roma bi ɔmɛ maa ba nɛ a ma ba ngɔ wa sɔlemi we ɔ* kɛ wa ma a ngɛ wa dɛ.” 49  Se a kpɛti nɔ kake nɛ a tsɛɛ lɛ ke Kayafa, nɛ lɛ ji osɔfo nɔkɔtɔma pe kulaa ngɛ jamɛ a jeha a mi ɔ de mɛ ke: “Nyɛ li nɔ́ ko nɔ́ ko kulaa, 50  jinɛ e sa nɛ nyɛ ko susu he nɛ nyɛ ko le kaa nyɛ ma ná he se ke nɔ kake gbo ha ni ɔmɛ mohu pe nɛ ma a tsuo hɛ mi ma kpata.” 51  Se pi lɛ nitsɛ e yi mi nɛ e to kɛ tu munyu nɛ ɔ, mohu ɔ, akɛnɛ osɔfo nɔkɔtɔma pe kulaa ji lɛ ngɛ jamɛ a jeha a mi he je ɔ, e gba kɛ fɔ si kaa Yesu ma gbo kɛ ha ma a, 52  nɛ pi kɛ ha ma a pɛ kɛkɛ, se mohu ɔ, konɛ e bua Mawu bimɛ nɛ a gbɛ kɛ fĩa amɛ a nya nɛ e pee mɛ kake. 53  Lɔ ɔ he ɔ, kɛ je jamɛ a ligbi ɔ se kɛ yaa a, a so kaa a maa gbe lɛ. 54  Enɛ ɔ he ɔ, Yesu nyɛɛ we ngɛ Yuda bi ɔmɛ a kpɛti nɛ nihi nɛ a na lɛ hu, mohu ɔ, e je lejɛ ɔ kɛ ho kpokpa nɛ e kɛ nga a nɔ kɛ we ɔ mi ya, nɛ e kɛ kaseli ɔmɛ ya hi ma ko nɛ a tsɛɛ ke Efraim ɔ mi. 55  Jehanɛ ɔ, Yuda bi ɔmɛ a He Tsɔmi ɔ su ta, nɛ nihi fuu je kɔpe ɔmɛ a mi nɛ a kuɔ kɛ ho Yerusalɛm ya konɛ a ya tsukɔ a he ngɛ kusumi nya loko He Tsɔmi ɔ nɛ e su. 56  A ngɛ Yesu hlae, nɛ benɛ a daa si ngɛ sɔlemi we ɔ, a ngɛ a sibi bie ke: “Kɛ nyɛ susu kɛɛ? Anɛ e be gbijlɔ ɔ bae kulaa lo?” 57  Se osɔfo nikɔtɔma amɛ kɛ Farisi bi ɔmɛ fã kaa ke nɔ ko ná le he nɛ Yesu ngɛ ɔ, e sa nɛ e ba bɔ amaniɛ, konɛ a nyɛ nɛ a ya nu lɛ.

Sisi ningma

Aloo “kaimi yɔkɔ.”
Maa pee kilomita etɛ. Hela, “maa pee stadia 15.”
Aloo “kaimi yɔkɔ.”
Hela, “mumi mi.”
Hela, “fa hmm.”
Aloo “kaimi yɔkɔ.”
Hela, “wa hiɛmɛ nɛ ɔ.”