Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Yohane 1:1-51

MI MUNYUHI

  • Munyu ɔ ba plɛ he lo (1-18)

  • Odase nɛ Yohane Nɔ Baptisilɔ ɔ ye ɔ (19-28)

  • Yesu, Mawu Jijɔ Bi ɔ (29-34)

  • Yesu kekleekle kaseli ɔmɛ (35-42)

  • Filipo kɛ Nataniɛl (43-51)

1  Sisije ɔ, Munyu ɔ ngɛ, nɛ Munyu ɔ kɛ Mawu lɛ ngɛ, nɛ Munyu ɔ ji mawu ko.  Sisije ɔ, nɔ nɛ ɔ kɛ Mawu lɛ ngɛ.  E nɔ lɛ níhi tsuo gu kɛ ba, nɛ nɔ́ kake ngmelu po bɛ nɛ pi e nɔ nɛ e gu kɛ ba. Nɔ́ nɛ ba  kɛ gu e nɔ ɔ ji wami, nɛ wami ɔ ji adesahi a la.  Nɛ la a ngɛ kpɛe ngɛ diblii ɔ mi, se diblii ɔ nyɛ we nɛ e ye e nɔ.  A tsɔ nyumu ko kaa Mawu nane mi dalɔ kɛ ba; e biɛ ji Yohane.  Nyumu nɛ ɔ ba kaa odasefo no, bɔ nɛ pee nɛ e ba ye la a he odase, konɛ kɛ gu e nɔ ɔ, nimli slɔɔtohi tsuo nɛ a nyɛ nɛ a he ye.  Pi lɛ ji jamɛ a la a, se e ba konɛ e ba ye jamɛ a la a he odase.  E be kɛe nɛ la nitsɛnitsɛ ɔ nɛ haa nimli slɔɔtohi tsuo la a maa ba je ɔ mi. 10  E ngɛ je ɔ mi momo, nɛ e nɔ nɛ je ɔ gu kɛ ba, se je ɔ li lɛ. 11  E ba lɛ nitsɛ e we mi, se lɛ nitsɛ e we bi ɔmɛ he we lɛ atuu. 12  Se nihi tsuo nɛ a ha lɛ hɛ mi ɔ, e ha mɛ he blɔ konɛ a ba pee Mawu bimɛ, ejakaa a heɔ e biɛ ɔ yeɔ. 13  Nɛ pi muɔ mi, aloo he lo nya, aloo adesa suɔmi nya nɛ a je kɛ fɔ mɛ, mohu ɔ, Mawu mi. 14  Enɛ ɔ he ɔ, munyu ɔ ba plɛ he lo, nɛ e ba hi si ngɛ wa kpɛti, nɛ wa na e hɛ mi nyami ɔ, kaa hɛ mi nyami nɛ bi kake too náa kɛ jeɔ e tsɛ ngɔ; nɛ Mawu dloomi kɛ anɔkuale hyi lɛ tɔ. 15  (Yohane ye e he odase, ee, e kpa ngmlaa ke: “Nɔ nɛ ɔ ji nɔ nɛ i de ngɛ e he ke, ‘Nɔ nɛ e ma ngɛ ye se ɔ sɛ ye hlami, ejakaa e ngɛ loko i ba’ a nɛ.”) 16  Ejakaa wɔ tsuo wa nine su dloomi nɔ ngɔ si dloomi nɔ kɛ je e ngɔ akɛnɛ dloomi hyi lɛ tɔtɔɔtɔ ɔ he je. 17  Ejakaa Mose nɔ lɛ a gu nɛ a ngɔ Mlaa a kɛ ha, se dloomi ɔ kɛ anɔkuale ɔ lɛɛ, Yesu Kristo nɔ nɛ a gu kɛ ba. 18  Adesa ko nɛ Mawu hyɛ; mawu kake too ɔ nɛ e ngɛ Tsɛ ɔ kasa nya* a lɛ e tsɔɔ bɔ nɛ Mawu ngɛ ha. 19  Enɛ ɔ ji odase nɛ Yohane ye benɛ Yuda bi ɔmɛ tsɔ osɔfohi kɛ Levi bi kɛ je Yerusalɛm kɛ ya e ngɔ nɛ a ya bi lɛ ke: “Mɛnɔ ji mo?” ɔ nɛ. 20  E laa we mɛ nɔ́ ko nɔ, mohu ɔ, e gba mi kpoo nɛ e de mɛ ke: “Pi imi ji Kristo ɔ.” 21  Nɛ a bi lɛ ke: “Lɛɛ mɛnɔ ji mo mɔ? Anɛ mo ji Eliya lo?” Nɛ e he nɔ ke: “Pi imi.” “Anɛ mo ji Gbalɔ ɔ lo?” Nɛ e ha heto ke: “Dɛbi!” 22  Enɛ ɔ he ɔ, a de lɛ ke: “Mɛnɔ ji mo? De wɔ konɛ wa nyɛ nɛ wa ná heto kɛ ya ha ni nɛmɛ nɛ a tsɔ wɔ ɔ. Mɛni o ngɛ dee ngɛ mo nitsɛ o he?” 23  E de ke: “Imi ji nɔ nɛ e gbi ngɛ pɛe wawɛɛ ngɛ nga a nɔ ke, ‘Nyɛ dla Yehowa* blɔ ɔ nɛ e da tlɔmɔɔ’ ɔ nɛ, kaa bɔ nɛ gbalɔ Yesaya de ɔ.” 24  Ni nɛmɛ nɛ a tsɔ mɛ kɛ ba a je Farisi bi ɔmɛ a mi. 25  Enɛ ɔ he ɔ, a bi lɛ sane nɛ a de lɛ ke: “Ke pi mo ji Kristo ɔ, aloo Eliya, aloo Gbalɔ ɔ, lɛɛ mɛni he je mɔ nɛ o baptisiɔ nihi ɔ?” 26  Yohane ha mɛ heto ke: “Imi lɛɛ i baptisiɔ ngɛ nyu mi. Nɔ ko daa si ngɛ nyɛ kpɛti nɛ nyɛ li lɛ, 27  nɔ nɛ e ma ngɛ ye se ɔ, e tokota nya kpa tete po, i sɛ nɔ nɛ e pɛneɔ.” 28  Ní nɛ ɔmɛ ya nɔ ngɛ Betania ngɛ Yɔdan Pa a se, he nɛ Yohane ngɛ nihi baptisie ngɛ ɔ. 29  E nɔ jena a, e na Yesu nɛ e ma e ngɔ nɛ e de ke: “Nyɛɛ hyɛ, Mawu Jijɔ Bi ɔ nɛ e ngɔɔ je ɔ he yayami ɔ kɛ yaa a ji nɛ ɔ nɛ! 30  Nɔ nɛ ɔ ji nɔ nɛ i de ngɛ e he ke: ‘Nyumu ko maa ba ngɛ ye se nɛ́ e sɛ ye hlami, ejakaa e ngɛ loko i ba’ a nɛ. 31  Imi po jinɛ i li lɛ, se i ba ngɛ nihi baptisie ngɛ nyu mi konɛ kɛ gu lɔ ɔ nɔ ɔ, a je lɛ kpo kɛ tsɔɔ Israel.” 32  Yohane ye e he odase hulɔ. E de ke: “I na mumi ɔ nɛ ngɛ si kplee kɛ je hiɔwe kɛ ma kaa lahuɛ, nɛ mumi ɔ ya nɔ nɛ e hi e nɔ. 33  Imi po jinɛ i li lɛ, se Nɔ nɛ e tsɔ mi ke ma ba baptisi ngɛ nyu mi ɔ de mi ke: ‘Nɔ nɛ o maa na kaa mumi ɔ ngɛ si kplee kɛ ma e nɔ, nɛ e maa ya nɔ nɛ e maa hi e nɔ ɔ, lɛ ji nɔ nɛ e baptisiɔ ngɛ mumi klɔuklɔu ɔ mi ɔ nɛ.’ 34  Nɛ i na nɔ́ nɛ ɔ, nɛ i ye he odase kaa nɔ nɛ ɔ ji Mawu Bi ɔ nɛ.” 35  E nɔ jena ekohu ɔ, Yohane kɛ e kaseli ɔmɛ a kpɛti ni enyɔ daa si, 36  nɛ benɛ e na Yesu nɛ e ngɛ nyɛɛe ɔ, e de ke: “Nyɛɛ hyɛ, Mawu Jijɔ Bi ɔ ji nɛ ɔ nɛ!” 37  Benɛ kaseli enyɔ ɔmɛ nu nɛ e de nɔ́ nɛ ɔ, a nyɛɛ Yesu se. 38  Kɛkɛ nɛ Yesu plɛ e he, nɛ benɛ e na kaa a ngɛ e se nyɛɛe ɔ, e bi mɛ ke: “Mɛni nyɛ ngɛ hlae?” A de lɛ ke: “Rabi, (nɛ e sisi ji, “Tsɔɔlɔ”), jije o hiɔ?” 39  Nɛ e de mɛ ke: “Nyɛɛ ba, nɛ nyɛ maa na.” Enɛ ɔ he ɔ, a ya nɛ a ya na he nɛ e ngɛ ɔ, nɛ a kɛ lɛ hi lejɛ ɔ ligbi kake; enɛ ɔ ya nɔ maa pee ngmlɛfia nyɔngmane* ɔ mi. 40  Ni enyɔ ɔmɛ nɛ a nu nɔ́ nɛ Yohane de ɔ nɛ a ya nyɛɛ Yesu se ɔ, a kpɛti nɔ kake ji Andrea, nɛ ji Simon Petro nyɛminyumu ɔ. 41  E na lɛ nitsɛ e nyɛminyumu Simon kekle, nɛ e de lɛ ke: “Wa na Mesia a” (nɛ e sisi ji “Kristo” ɔ), 42  nɛ e nyɛɛ e hɛ mi kɛ ya Yesu ngɔ. Benɛ Yesu hyɛ lɛ ɔ, e de ke: “Mo ji Simon, Yohane binyumu ɔ nɛ; a ma tsɛ mo ke Kefa” (nɛ e sisi ji “Petro”). 43  E nɔ jena a, Yesu ngɛ hlae nɛ e maa je kɛ ho Galilea ya. Kɛkɛ nɛ e na Filipo nɛ e de lɛ ke: “Ba pee ye se nyɛɛlɔ.” 44  Filipo je Betsaida, nɛ ji ma nɛ Andrea kɛ Petro je mi ɔ mi. 45  Filipo na Nataniɛl nɛ e de lɛ ke: “Wa na nɔ nɛ Mose ngma e he sane ngɛ Mlaa a mi, nɛ Gbali ɔmɛ hu ngma e he sane ɔ: Yesu, Yosɛf bi ɔ nɛ e je Nazarɛt ɔ.” 46  Se Nataniɛl bi lɛ ke: “Anɛ nɔ́ kpakpa ko ma nyɛ maa je Nazarɛt kɛ ba lo?” Filipo de lɛ ke: “Ba nɛ o ba hyɛ.” 47  Yesu na Nataniɛl nɛ e ma e ngɔ, nɛ e de ngɛ e he ke: “Nyɛɛ hyɛ, Israel no ngmingmiingmi nɛ lakpa ko be e mi ji nɛ ɔ nɛ.” 48  Nataniɛl bi lɛ ke: “Kɛ o plɛ kɛ le mi kɛɛ?” Yesu ha lɛ heto ke: “Benɛ o ngɛ fig tso ɔ sisi nɛ Filipo ná we nɛ e tsɛ mo lolo ɔ, i na mo.” 49  Nataniɛl he nɔ ke: “Rabi, mo ji Mawu Bi ɔ nɛ, mo ji Israel Matsɛ ɔ nɛ.” 50  Yesu ha lɛ heto ke: “Anɛ akɛnɛ i de mo ke i na mo ngɛ fig tso ɔ sisi ɔ he je nɛ o he ye ɔ lo? O maa na ní nguanguahi pe enɛ ɔmɛ.” 51  Lɔ ɔ se ɔ, e de lɛ ke: “Niinɛ, ngɛ anɔkuale mi ɔ, i ngɛ nyɛ dee ke, nyɛ maa na nɛ hiɔwe nya bli nɛ Mawu bɔfo ɔmɛ ngɛ kuɔe, nɛ a ngɛ kplee kɛ ngɛ nɔmlɔ Bi ɔ ngɔ bae.”

Sisi ningma

Aloo “nɛ e ngɛ Tsɛ ɔ gugue mi ɔ.” Jamɛ a blɔ he ɔ tsɔɔ kaa a suɔ nɔ ɔ wawɛɛ.
Hyɛ Munyu Komɛ A Sisi Tsɔɔmi.
Maa pee gbɔkuɛ ngmlɛ 4.