Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Roma Bi 13:1-14

MI MUNYUHI

  • Wa he nɛ waa kɛ maa wo blɔ nyahi a sisi (1-7)

    • Tóhi a womi (6, 7)

  • Suɔmi lɛ haa nɛ mlaa a baa mi (8-10)

  • Nyɛɛ nyɛɛ kaa bɔ nɛ a nyɛɛɔ piani ɔ (11-14)

13  Ha nɔ fɛɛ nɔ* nɛ e ba e he si kɛ ha blɔ nyahi nɛ a nɔ kuɔ ɔ,* ejakaa blɔ nya ko be nɛ pi Mawu ngɔ nɛ e je; Mawu lɛ e ngɔ blɔ nyahi tsuo nɛ ngɛ ɔ kɛ da a blɔ hehi ngɛ e sisi.  Enɛ ɔ he ɔ, nɔ fɛɛ nɔ nɛ e teɔ si kɛ woɔ blɔ nya a, e teɔ si kɛ siɔ Mawu blɔ nya tomi ɔ; nihi nɛ a te si kɛ wo lɛ ɔ maa ngɔ kojomi kɛ ba mɛ nitsɛmɛ a nɔ.  Ejakaa jamɛ a nɔ yeli ɔmɛ a he ngɛ gbeye, pi ngɛ nɔ́ kpakpa peemi he je, mohu ɔ, ngɛ nɔ́ yayami he je. Anɛ o suɔ kaa blɔ nya a he nɛ ko pee mo gbeye lo? Yaa nɔ nɛ o pee nɔ́ kpakpa, nɛ o ma ná yi jemi kɛ je e ngɔ;  ejakaa e ji Mawu sɔmɔlɔ kɛ ha mo konɛ e hi ha mo. Se ke o ngɛ nɔ́ yayami pee ɔ, lɛɛ moo ye gbeye, ejakaa e hɛɛ we klaate ɔ yaka gu. E ji Mawu sɔmɔlɔ, lue yelɔ, konɛ e je abofu kpo kɛ si nɔ nɛ e ngɛ nɔ́ yayami pee ɔ.*  Enɛ ɔ he ɔ, bɔ fɛɛ bɔ nɛ ji ɔ, e sa kaa nyɛɛ ba nyɛ he si kɛ ha mɛ,* pi ngɛ jamɛ a abofu ɔ he je kɛkɛ, mohu ɔ, ngɛ nyɛ he nile hu he je.  Lɔ ɔ he je nɛ nyɛ woɔ tóhi hulɔ ɔ nɛ; ejakaa a ji Mawu sɔmɔli kɛ ha nihi, nɛ daa nɛ ɔ, a ngɛ yi mi tomi nɛ ɔ nɔuu he ní tsue.  Nɔ́ nɛ sa mɛ tsuo ɔ, nyɛɛ ngɔ kɛ ha mɛ: nɔ nɛ e biɔ tó ɔ, nyɛɛ wo tó ɔ; nɔ nɛ e biɔ ke nyɛɛ wo ma hiɔ nɛ a po kɛ ha nyɛ ɔ, nyɛɛ wo; nɔ nɛ e sa gbeye yemi ɔ, nyɛɛ ngɔ jamɛ a gbeye yemi ɔ kɛ ha lɛ; nɔ nɛ e sa bumi ɔ, nyɛɛ ngɔ jamɛ a bumi ɔ kɛ ha lɛ.  Nyɛ ko hɛɛ nɔ ko nɔ ko nɔ́ ko he hiɔ kaa ja suɔmi nɛ nyɛ maa suɔ nyɛ sibi ɔ pɛ; ejakaa nɔ fɛɛ nɔ nɛ e suɔ e nyɛmi nɔmlɔ ɔ, e ye mlaa a nɔ.*  Ejakaa mlaa nɛ ji, “E sɛ nɛ o puɛ gba, e sɛ nɛ o gbe nɔmlɔ, e sɛ nɛ o ju, e sɛ nɛ o hɛ nɛ kɔ̃,” ke kita kpa ko hu ngɛ ɔ, e kpiti pomi ji: “E sa nɛ o suɔ o nyɛmi kaa bɔ nɛ o suɔ o he ɔ.” 10  Suɔmi pee we yayami kɛ si we nɔ nyɛmi; enɛ ɔ he ɔ, suɔmi ji mlaa a nɔ yemi.* 11  Nɛ nyɛɛ pee enɛ ɔ, ejakaa nyɛ le be ɔ, kaa ngmlɛfia a nɛ e sa kaa nyɛ hɛ nɛ tsɛ̃ kɛ je mahe mi ɔ su momo, ejakaa wa yi wami hemi ɔ su si ta haa pe be nɛ wa ba pee nihi nɛ a he ye ɔ. 12  Nyɔ ɔ kuɛ se mi kuɔ; e piɛ bɔɔ nɛ je maa na. Enɛ ɔ he ɔ, nyɛ ha nɛ wa sake diblii mi ní tsumi ɔmɛ kɛ pue he, nɛ nyɛ ha nɛ waa wo la a he ta hwumi ní ɔmɛ. 13  Nyɛ ha nɛ waa nyɛɛ ngɛ he tsɔmi mi kaa bɔ nɛ a nyɛɛɔ piani ɔ, pi ngɛ okplɔɔ ngmɛmihi* nɛ ngɛ hoo kɛ dã demi mi, pi ngɛ ajuama bɔmi kɛ nɔ buimi ngmlikiti* mi, pi ngɛ pɛ kɛ hunga jemi mi. 14  Mohu ɔ, nyɛɛ wo Nyɔmtsɛ Yesu Kristo ɔ, nɛ nyɛ ko hi níhi nɛ peeɔ he lo ɔ akɔnɔ ɔmɛ a he blɔ nya toe kɛ fɔ si.

Sisi ningma

Aloo “susuma fɛɛ susuma.”
Hela, “e ngɔ e he kɛ wo blɔ nyahi nɛ a nɔ kuɔ ɔmɛ a sisi.”
Aloo “e gbla nihi nɛ a ngɛ nɔ́ yayami pee ɔmɛ a tue.”
Hela, “nyɛɛ ngɔ nyɛ he kɛ wo a sisi.”
Hela, “e ha nɛ mlaa a ba mi.”
Hela, “suɔmi ji mlaa a mi bami.”
Aloo “hɛja jemihi.”
Aloo “ní peepee nɛ tsɔɔ kaa nɔ ko zo tɔ ywia.” Hela, aselʹgeia. Hyɛ Munyu Komɛ A Sisi Tsɔɔmi.