Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 8:1-34

MI MUNYUHI

  • A tsa kpititsɛ ko (1-4)

  • Ta buli a nɔkɔtɔma ko hemi kɛ yemi (5-13)

  • Yesu tsa nihi fuu ngɛ Kapenaum (14-17)

  • Bɔ nɛ a nyɛɛɔ Yesu se ha (18-22)

  • Yesu jɔɔ kɔɔhiɔ ngua ko he (23-27)

  • Yesu ha nɛ daimoniohi ya sɛ kpotoohi a mi (28-34)

8  Benɛ e kple si kɛ je yoku ɔ nɔ ɔ, asafo kuu nguahi nyɛɛ e se.  Nɛ hyɛ! kpititsɛ ko ba nɛ e ba kpla si ngɛ e hɛ mi nɛ e de lɛ ke: “Nyɔmtsɛ, ke o suɔ ɔ, o ma nyɛ ma ha nɛ ye he nɛ tsɔ.”  Lɔ ɔ he ɔ, Yesu kpa e nine mi, nɛ e ta e he, nɛ e de lɛ ke: “I suɔ! O he nɛ tsɔ.” Amlɔ nɔuu nɛ kpiti ɔ laa ngɛ e he.  Kɛkɛ nɛ Yesu de lɛ ke: “Hyɛ nɛ o ko de nɔ ko nɔ ko, mohu ɔ, yaa nɛ o ngɔ o he kɛ ya tsɔɔ osɔfo ɔ, nɛ o ngɔ nike ní nɛ Mose tsɔɔ kaa a kɛ ha a kɛ ya ha, konɛ lɔ ɔ nɛ pee odase kɛ ha mɛ.”  Benɛ e sɛ Kapenaum ma a mi ɔ, ta buli a nɔkɔtɔma ko ba e ngɔ nɛ e ba kpa lɛ pɛɛ  nɛ e de lɛ ke: “Nyɔmtsɛ, ye sɔmɔlɔ hule* nɛ e hwɔɔ si ngɛ we ɔ mi, nɛ e ngɛ nɔ́ nae wawɛɛ nitsɛ.”  Yesu de lɛ ke: “Ke i su lejɛ ɔ, ma tsa lɛ.”  Ta buli a nɔkɔtɔma a de lɛ ke: “Nyɔmtsɛ, i sɛ kaa ma ha nɛ o ba ye we mi, se moo lɛɛ moo tu munyu kɛkɛ, nɛ ye tsɔlɔ ɔ ma ná he wami.  Ejakaa imi hu i ngɛ nɔ ko sisi, nɛ imi hu i ngɛ ta buli ngɛ ye sisi, nɛ i deɔ nɔ kake ke, ‘Yaa!’ nɛ e yaa, nɛ i deɔ nɔ kpa hu ke, ‘Ba!’ nɛ e baa, nɛ i deɔ ye nyɔguɛ ke, ‘Pee enɛ ɔ!’ nɛ e peeɔ.” 10  Benɛ Yesu nu nɔ́ nɛ nyumu ɔ de ɔ, e nya kpɛ e he, nɛ e de nihi nɛ a ngɛ e se nyɛɛe ɔ ke: “I ngɛ nyɛ dee ngɛ anɔkuale mi ke, i nɛ nɔ ko ngɛ Israel nɛ e hemi kɛ yemi kle kaa nyumu nɛ ɔ nɔ́ ɔ. 11  Se i ngɛ nyɛ dee ke nihi fuu maa je puje he kɛ pusinɔ he kɛ ba, nɛ a kɛ Abraham, kɛ Isak, kɛ Yakɔb ma ba hi okplɔɔ he ngɛ hiɔwe Matsɛ Yemi ɔ mi; 12  Matsɛ Yemi ɔ mi bimɛ ɔmɛ lɛɛ a ma sake mɛ ngɔ fɔ diblii ɔ mi ngɛ we ɔ se. Lejɛ ɔ ji he nɛ a ma fo ya nɛ a ma kpe a lungu nya ngɛ.” 13  Lɔ ɔ se ɔ, Yesu de ta buli a nɔkɔtɔma a ke: “Yaa. E ba mi jã ha mo kaa bɔ nɛ o he ye ɔ.” Nɛ tsɔlɔ ɔ ná he wami ngɛ jamɛ a ngmlɛfia a mi nɔuu. 14  Nɛ benɛ Yesu ba Petro we ɔ mi ɔ, e na Petro nganyɛ ɔ nɛ asla bu lɛ si. 15  Lɔ ɔ he ɔ, e pɛtɛ e nine he, nɛ asla a po ngɛ e nɔ, nɛ e te si nɛ e bɔni Yesu sɔmɔmi. 16  Se benɛ e su gbɔkuɛ ɔ, nihi ngɔ nihi fuu nɛ daimoniohi ngɛ a mi kɛ ba, nɛ e kɛ e nya mi munyu hia mumi ɔmɛ ngɛ a mi, nɛ e tsa nihi tsuo nɛ a ngɛ nɔ́ nae ɔ, 17  bɔ nɛ pee nɛ nɔ́ nɛ Mawu de kɛ gu gbalɔ Yesaya nɔ ɔ nɛ ba mi. E de ke: “Lɛ nitsɛ e ngɔ wa gbɔjɔmi ɔmɛ, nɛ e tloo wa hiɔ ɔmɛ.” 18  Benɛ Yesu na nimli babauu nɛ bɔle lɛ ɔ, e fã ke a je kɛ ho wo ɔ se ya. 19  Kɛkɛ nɛ womi ngmalɔ ko ba nɛ e ba de lɛ ke: “Tsɔɔlɔ, ma nyɛɛ o se kɛ ya he fɛɛ he nɛ o maa ya a.” 20  Se Yesu de lɛ ke: “Kɔkɔbohi ngɛ muɔhi, nɛ hiɔwe lohwe pɛlitsɛmɛ hu ngɛ tsuhi, se nɔmlɔ Bi ɔ lɛɛ, e be he ko nɛ e kɛ e yi fɔɔ.” 21  Kɛkɛ nɛ kaseli ɔmɛ a kpɛti nɔ kpa hu de lɛ ke: “Nyɔmtsɛ, ngmɛɛ mi blɔ nɛ ma ya pu ye tsaatsɛ lolo.” 22  Yesu de lɛ ke: “Yaa nɔ nɛ o nyɛɛ ye se. Ha nɛ gbogboe ɔmɛ nɛ a pu a gbogboehi.” 23  Nɛ benɛ e ya sɛ lɛ mi ɔ, e kaseli ɔmɛ nyɛɛ e se. 24  Nɛ hyɛ! kɔɔhiɔ ngua ko hia ngɛ wo ɔ nɔ, nɛ oslɔke ɔ ngɛ kue kɛ ngɛ lɛ ɔ mi woe; se Yesu lɛɛ e ngɛ mahe hwɔe. 25  Nɛ a ba nɛ a ba tsɛ̃ɛ lɛ, nɛ a de lɛ ke: “Nyɔmtsɛ, kpɔ̃ wɔ, wa hɛ mi miɔ nɛ e ma kpata!” 26  Se e bi mɛ ke: “Mɛni he je nɛ nyɛ ngɛ gbeye yee* kikɛ nɛ ɔ? Nyɛ hemi kɛ yemi pi pɛ.” Kɛkɛ nɛ e te si nɛ e nga kɔɔhiɔ ɔ kɛ wo ɔ yi, nɛ lejɛ ɔ jɔ dii nitsɛnitsɛ. 27  Enɛ ɔ ha nɛ nyumu ɔmɛ a he mi po, nɛ a de ke: “Mɛni nɔmlɔ po ji nɛ ɔ? Kɔɔhiɔ kɛ wo po buɔ lɛ tue.” 28  Benɛ e ba su wo ɔ se je ngɛ Gadara kpokpa a nɔ ɔ, nyumuhi enyɔ nɛ daimoniohi ngɛ a mi je gɔ ɔ* mi nɛ a kɛ lɛ ba kpe. A he ngɛ gbeye wawɛɛ nitsɛ, enɛ ɔ he ɔ, nɔ ko nɔ ko nyɛ we nɛ e ná kã nɛ e gu jamɛ a blɔ ɔ nɔ. 29  Nɛ hyɛ! a kpa ngmlaa kɛ de ke: “Mawu Bi, mɛni sane waa kɛ mo ngɛ? Anɛ o ba hiɛ ɔ konɛ o ba pii wɔ loko be nɛ a to ɔ nɛ su lo?” 30  Kpotoohi babauu ngɛ ní yee ngɛ lokoo. 31  Enɛ ɔ he ɔ, daimonio ɔmɛ bɔni lɛ pɛɛ kpami ke: “Ke o hia wɔ ɔ, ha nɛ wa ya sɛ kpotoo ɔmɛ a mi.” 32  Nɛ e de mɛ ke: “Nyɛɛ ya!” Kɛkɛ nɛ a je ni ɔmɛ a mi nɛ a ya sɛ kpotoo ɔmɛ a mi, nɛ hyɛ! kpotoo ɔmɛ tsuo sa fo kɛ kple kɔ̃ ɔ kɛ ya nɔ wo ɔ mi, nɛ a gbo ngɛ nyu ɔ mi. 33  Se kpotoo nɔ hyɛli ɔmɛ tu fo kɛ ya ma a mi nɛ a ya sɛɛ nɔ́ nɛ ba a tsuo, kɛ nɔ́ nɛ ba nyumu ɔmɛ nɛ daimonio ɔmɛ ngɛ a mi ɔ nɔ ɔ hulɔ. 34  Nɛ hyɛ! nihi tsuo nɛ a ngɛ ma a mi ɔ je kpo konɛ a kɛ Yesu nɛ ya kpe, nɛ benɛ a na lɛ ɔ, a kpa lɛ pɛɛ kaa e je a kpokpa a nɔ kɛ ho.

Sisi ningma

Aloo “kplɔ.”
Aloo “tsui po.”
Aloo “kaimi yɔkɔ ɔmɛ a.”