Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 7:1-29

MI MUNYUHI

  • YOKU Ɔ NƆ FIƐƐMI Ɔ (1-27)

    • Nyɛɛ jɔɔ nihi kojomi (1-6)

    • Nyɛɛ ya nɔ nɛ nyɛɛ hi bie, nɛ nyɛɛ hi hlae, nɛ nyɛɛ hi sie (7-11)

    • Mlaa Nɛ Se Be (12)

    • Agbo tokofii (13, 14)

    • A yiblii nɛ nyɛɛ kɛ maa le mɛ (15-23)

    • Tsu ngɛ tɛ sa nɔ, tsu ngɛ zia nɔ (24-27)

  • Asafo kuu ɔmɛ a nya kpɛ a he ngɛ Yesu tsɔɔmi ɔ he (28, 29)

7  “Nyɛɛ jɔɔ nihi kojomi konɛ a ko kojo nyɛ;  ejakaa bɔ nɛ nyɛ kojoɔ nihi ha a, jã nɛ a maa kojo nyɛ, nɛ susumi nɔ́ nɛ nyɛɛ kɛ ngɛ susue ɔ, lɔ ɔ nɔuu nɛ a kɛ ma susu ha nyɛ.  Ke jã a, lɛɛ mɛni he je mɔ nɛ o hyɛɛ nga nyafii nɛ ngɛ o nyɛmi hɛ ngmɛ nɔ ɔ, se plai nɛ ngɛ mo nitsɛ o hɛ ngmɛ nɔ ɔ lɛɛ o nɛ ɔ?  Aloo kɛ o ma plɛ kɛ de o nyɛmi ke, ‘Ha nɛ ma je nga nyafii ɔ nɛ ngɛ o hɛ ngmɛ nɔ ɔ ha mo,’ be mi nɛ hyɛ! plai ngɛ mo nitsɛ o hɛ ngmɛ nɔ ɔ?  Osatotsɛ! Kekleekle ɔ, mo je plai nɛ ngɛ mo nitsɛ o hɛ ngmɛ nɔ ɔ, kɛkɛ ɔ, o maa hyɛ nɔ́ saminya kɛ je nga nyafii ɔ nɛ ngɛ o nyɛmi ɔ hɛ ngmɛ nɔ ɔ.  “Nyɛ ko ngɔ níhi nɛ a ngɛ klɔuklɔu ɔ kɛ ha gbehi, nɛ jã kɛ̃ nɛ nyɛ ko sake nyɛ adiagbahi kɛ pue kpotoohi a hɛ mi, konɛ a ko naa nɔ, nɛ lɔ ɔ se ɔ, a plɛ a hɛ mi kɛ wo nyɛ nɛ a tsɔtslɔɔ nyɛ mi.  “Nyɛɛ ya nɔ nɛ nyɛɛ hi bie, nɛ a ma ha nyɛ; nyɛɛ ya nɔ nɛ nyɛɛ hi hlae, nɛ nyɛ maa na; nyɛɛ ya nɔ nɛ nyɛɛ hi sie, nɛ a ma bli ha nyɛ;  ejakaa nɔ fɛɛ nɔ nɛ e biɔ ɔ, e nine suɔ nɔ, nɛ nɔ fɛɛ nɔ nɛ e hlaa a, e naa, nɛ nɔ fɛɛ nɔ nɛ e siɔ ɔ, a ma bli ha lɛ.  Niinɛ, nyɛ ti mɛnɔ nɛ ke e binyumu bi lɛ abolo ɔ, e ma ha lɛ tɛ? 10  Aloo ke e binyumu bi lɛ lo ɔ, e ma ha lɛ sinɔ? 11  Lɔ ɔ he ɔ, ke nyɛ yayami peeli po nyɛ le bɔ nɛ nyɛ haa nyɛ bimɛ ní kpakpahi ɔ, lɛɛ nyɛ Tsɛ ɔ nɛ e ngɛ hiɔwe ɔ maa ngɔ ní kpakpahi kɛ ha nihi nɛ biɔ lɛ ɔ hluu po pe jã! 12  “Enɛ ɔ he ɔ, níhi tsuo nɛ nyɛ suɔ kaa nihi nɛ a pee ngɔ ha nyɛ ɔ, e sa kaa nyɛ hu nyɛɛ pee ngɔ ha mɛ. Ngɛ anɔkuale mi ɔ, enɛ ɔ ji nɔ́ nɛ Mlaa a kɛ Gbali ɔmɛ tsɔɔ ɔ nɛ. 13  “Nyɛɛ sɛ agbo tokofii ɔ mi, ejakaa agbo nɛ e ngɛ gbajaa a, kɛ blɔ nɛ e bli ɔ kɛ nɔ yaa hɛ mi kpatami mi, nɛ nihi babauu lɛ a ngɛ mi sɛe; 14  se agbo nɛ e ngɛ tokofii, kɛ blɔ nɛ e nɔ nyɛɛmi yee ɔ kɛ nɔ yaa wami mi, nɛ nihi bɔɔ pɛ lɛ a naa jamɛ a blɔ ɔ. 15  “Nyɛɛ hyɛ nyɛ he nɛ hi ngɛ lakpa gbali a he. A ngɔɔ jijɔ he womi kɛ haa a he kɛ baa nyɛ ngɔ, se a mi mi je ɔ, a ji ogbeteehi nɛ hwɔ ngɛ mɛ yee wawɛɛ. 16  Yiblii nɛ a woɔ ɔ nɛ nyɛɛ kɛ ma yɔse mɛ. Nihi tsɔ we wai yiblii ngɛ miohi a nɔ hyɛ, nɛ jã kɛ̃ nɛ a tsɔ we fig ngɛ zezlehi hu a nɔ. Anɛ a peeɔ jã lo? 17  Jã kɛ̃ nɛ tso kpakpa fɛɛ tso kpakpa woɔ yiblii nɛ hi, se tso yaya* fɛɛ tso yaya* woɔ yiblii nɛ se nami be he. 18  Tso kpakpa be nyɛe maa wo yiblii nɛ se nami be he, nɛ jã kɛ̃ nɛ tso yaya* hu be nyɛe maa wo yiblii nɛ hi. 19  Tso fɛɛ tso nɛ e wui yiblii nɛ hi ɔ, a poɔ kɛ fɔɔ si, nɛ a sakeɔ kɛ fɔɔ la mi. 20  Enɛ ɔ he ɔ, ngɛ anɔkuale mi ɔ, yiblii nɛ jamɛ a nimli ɔmɛ woɔ ɔ nɛ nyɛɛ kɛ ma yɔse mɛ. 21  “Pi nɔ fɛɛ nɔ nɛ deɔ mi ke, ‘Nyɔmtsɛ, Nyɔmtsɛ’ ɔ, nɛ e maa sɛ hiɔwe Matsɛ Yemi ɔ mi, mohu ɔ, nɔ nɛ e peeɔ ye Tsɛ nɛ e ngɛ hiɔwe ɔ suɔmi nya ní ɔ pɛ lɛ e maa sɛ mi. 22  Jamɛ a ligbi ɔ, nihi babauu ma bi mi ke: ‘Nyɔmtsɛ, Nyɔmtsɛ, anɛ pi o biɛ mi nɛ wa gba ngɛ, nɛ pi o biɛ mi nɛ wa hia daimoniohi ngɛ, nɛ pi o biɛ mi nɛ wa pee he wami níhi fuu ngɛ lo?’ 23  Kɛkɛ ɔ, ma gba mi kpoo nɛ ma de mɛ ke: ‘I li nyɛ ngɛ he ko he ko! Nyɛɛ je ye nɔ kɛ ya se, nyɛ nihi nɛ nyɛ yi mlaa nɔ!’ 24  “Lɔ ɔ he ɔ, nɔ fɛɛ nɔ nɛ e nuɔ ye munyu nɛ ɔmɛ, nɛ e yeɔ nɔ ɔ, e ngɛ kaa nyumu ní lelɔ ko nɛ e ma e tsu ngɛ tɛ sa nɔ. 25  Hiɔmi ba nɛ wawɛɛ, nɛ nyu babauu ba ná tsu ɔ, nɛ kɔɔhiɔ fia kɛ si jamɛ a tsu ɔ, se e hule we, ejakaa a to sisi ngɛ tɛ sa nɔ. 26  Jehanɛ se hu ɔ, nɔ fɛɛ nɔ nɛ e nuɔ ye munyu nɛ ɔmɛ, nɛ e yi nɔ ɔ, e ngɛ kaa nyumu kuasia ko nɛ e ma e tsu ngɛ zia nɔ. 27  Hiɔmi ba nɛ wawɛɛ, nɛ nyu babauu ba ná tsu ɔ, nɛ kɔɔhiɔ fia ba ná jamɛ a tsu ɔ, nɛ e hule kɛ pue si butuu, nɛ e hulemi ɔ nya wa.” 28  Benɛ Yesu tu munyu nɛ ɔmɛ ta a, nɔ́ nɛ ba ji kaa asafo kuu ɔmɛ a nya kpɛ a he ngɛ bɔ nɛ e plɛ kɛ tsɔɔ ní ha a he, 29  ejakaa e tsɔɔ mɛ ní kaa nɔ ko nɛ e hɛɛ blɔ nya, se pi kaa bɔ nɛ a womi ngmali ɔmɛ tsɔɔ ní ɔ.

Sisi ningma

Hela, “sasɛ.”
Hela, “sasɛ.”
Hela, “sasɛ.”