Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 4:1-25

MI MUNYUHI

  • Abosiami ka Yesu (1-11)

  • Yesu je fiɛɛmi sisi ngɛ Galilea (12-17)

  • Kekleekle kaseli ɔmɛ a tsɛmi (18-22)

  • Yesu fiɛɛ, nɛ e tsɔɔ ní, nɛ e tsa hiɔhi (23-25)

4  Lɔ ɔ se ɔ, mumi ɔ ngɔ Yesu kɛ ho nga a nɔ ya nɛ Abosiami ya ka lɛ.  Benɛ e ha hwɔ nyɔ kɛ pia ligbi 40 se ɔ, hwɔ ye lɛ.  Kɛkɛ nɛ Nɔ Kalɔ ɔ ba nɛ e ba de lɛ ke: “Ke Mawu bi ji mo ɔ, de tɛ nɛ ɔmɛ konɛ a plɛ pee abolo.”  Se e de lɛ ke: “A ngma ke: ‘Pi abolo pɛ nɛ baa nɔmlɔ wami yi, mohu ɔ, munyu fɛɛ munyu nɛ jeɔ Yehowa* nya a.’”  Lɔ ɔ se ɔ, Abosiami ngɔ lɛ kɛ ho ma klɔuklɔu ɔ mi ya, nɛ e ngɔ lɛ kɛ ya da sɔlemi tsu ɔ yi mi,*  nɛ e de lɛ ke: “Ke Mawu bi ji mo ɔ, mo tsɔ kɛ ya fia si, ejakaa a ngma ke: ‘O he ɔ, e ma fã e bɔfo ɔmɛ’ nɛ ‘A maa hɛɛ mo ngɛ a dɛ mi, konɛ o nane nɛ ko si tɛ ko.’”  Yesu de lɛ ke: “A ngma hu ke: ‘E sɛ nɛ o ka Yehowa,* o Mawu ɔ.’”  Jehanɛ hu ɔ, Abosiami ngɔ lɛ kɛ ho yoku gagaaga ko nɔ ya, nɛ e ngɔ je ɔ mi matsɛ yemi ɔmɛ tsuo kɛ a hɛ mi nyami ɔ kɛ tsɔɔ lɛ.  Nɛ e de lɛ ke: “Ke o kpla si nɛ o ja mi si kake ɔ, ma ngɔ ní nɛ ɔmɛ tsuo kɛ ha mo.” 10  Kɛkɛ nɛ Yesu de lɛ ke: “Satan, jee hiɛ ɔ kɛ ho! Ejakaa a ngma ke: ‘Yehowa* o Mawu ɔ ji nɔ nɛ e sa kaa o ja, nɛ lɛ pɛ nɛ e sa kaa o sɔmɔ ngɛ blɔ klɔuu nɔ.’” 11  Kɛkɛ nɛ Abosiami si lɛ, nɛ hyɛ! hiɔwe bɔfohi ba nɛ a ba sɔmɔ* lɛ. 12  Jehanɛ ɔ, benɛ Yesu nu kaa a nu Yohane ɔ, e je kɛ ho Galilea ya. 13  Pee se ɔ, e je Nazarɛt nɛ e ya hi Kapenaum. Kapenaum ngɛ wo nɛ ngɛ Zebulɔn kɛ Naftali kpokpa amɛ a nɔ ɔ kasa nya. 14  E pee jã konɛ nɔ́ nɛ Mawu de kɛ gu gbalɔ Yesaya nɔ ɔ nɛ ba mi. E de ke: 15  “Oo Zebulɔn zugba kɛ Naftali zugba nɛ nyɛ ngɛ wo nya blɔ ɔ nɔ ngɛ Yɔdan Pa a se, je ma amɛ a Galilea! 16  Nihi nɛ a hii si ngɛ diblii mi ɔ na la ngua ko, nɛ nihi nɛ a hii si ngɛ gbenɔ hɔ̃ mi ɔ, la kpɛ ngɛ a nɔ.” 17  Kɛ je jamɛ a be ɔ mi ɔ, Yesu bɔni fiɛɛmi ke: “Nyɛ tsake nyɛ tsui, ejakaa hiɔwe Matsɛ Yemi ɔ su si ta.” 18  Benɛ e ngɛ nyɛɛe ngɛ Galilea Wo ɔ nya a, e na nyɛmimɛ enyɔ, Simon nɛ a tsɛɛ lɛ ke Petro hulɔ ɔ, kɛ e nyɛminyumu Andrea nɛ́ a ngɛ ya fɔe ngɛ wo ɔ mi, ejakaa a ji wo hɛli. 19  Nɛ e de mɛ ke: “Nyɛ ba nyɛɛ ye se, nɛ ma pee nyɛ wo hɛli nɛ a hɛɛ nimli.” 20  Amlɔ nɔuu nɛ a je a ya amɛ a he, nɛ a nyɛɛ e se. 21  Benɛ e je lejɛ ɔ, e na ni enyɔ komɛ nɛ a ji nyɛmimɛ, mɛ ji Yakobo, Zebedeo binyumu ɔ kɛ e nyɛminyumu Yohane. A kɛ a tsɛ Zebedeo ngɛ lɛ mi ngɛ a yahi kpɛe, nɛ e tsɛ mɛ. 22  Amlɔ nɔuu nɛ a si lɛ ɔ kɛ a tsɛ ɔ, nɛ a nyɛɛ e se. 23  Lɔ ɔ se ɔ, e ya kpa Galilea tsuo nɛ e tsɔɔ ní ngɛ a kpe he ɔmɛ, e fiɛɛ Matsɛ Yemi ɔ he sane kpakpa a, nɛ e ha nihi nɛ a gbɔjɔ ɔ ná he wami, nɛ e tsa hiɔ slɔɔtohi tsuo ngɛ nihi a he ɔ. 24  E he sane gbɛ fĩa Siria tsuo, nɛ a ngɔ nihi tsuo nɛ hiɔ slɔɔtoslɔɔtohi ngɛ a he kɛ nihi nɛ a ngɛ piie, kɛ nihi nɛ daimoniohi ngɛ a mi, kɛ kɔkɔtsɛmɛ, kɛ nihi nɛ a hule* ba ha lɛ nɛ e tsa mɛ. 25  Enɛ ɔ ha nɛ asafo kuu nguahi je Galilea kɛ Dekapoli* kɛ Yerusalɛm kɛ Yudea kɛ mahi nɛ a ngɛ Yɔdan Pa a se ɔmɛ a mi kɛ ba nyɛɛ e se.

Sisi ningma

Hyɛ Munyu Komɛ A Sisi Tsɔɔmi.
Aloo “he nɛ ya hiɔwe pe kulaa.”
Hyɛ Munyu Komɛ A Sisi Tsɔɔmi.
Hyɛ Munyu Komɛ A Sisi Tsɔɔmi.
Aloo “ye bua lɛ.”
Aloo “kplɔ.”
Aloo “Ma Nyɔngma Kpokpa a.”