Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 28:1-20

MI MUNYUHI

  • A tle Yesu si (1-10)

  • A ha ta buli nyɔ mi ní konɛ a ye lakpa (11-15)

  • A fã ke a pee nihi kaseli (16-20)

28  He Jɔɔmi Ligbi ɔ se ngɛ otsi ɔ we kekleekle ligbi ɔ nɔ benɛ je bɔni nami ɔ, Maria Magdalena kɛ Maria kaketsɛ ɔ ba konɛ a ba hyɛ yɔkɔ ɔ.  Nɛ hyɛ! zugba mimiɛɛmi nɛ nya wa ko ya nɔ, ejakaa Yehowa* bɔfo kple si kɛ je hiɔwe nɛ e ba kpɛne tɛ ɔ kɛ je yɔkɔ ɔ nya, nɛ e hii si ngɛ nɔ.  E ngɛ kpɛe kaa oslabai, nɛ e tade ɔ hu hiɛ futaa kaa snoo.  Ee, akɛnɛ buli ɔmɛ ngɛ lɛ gbeye yee he je ɔ, a he do blibliibli nɛ a pee kaa nihi nɛ a gbo.  Se bɔfo ɔ de yi ɔmɛ ke: “Nyɛ ko ye gbeye, ejakaa i le kaa nyɛ ngɛ Yesu, nɔ nɛ a gbe lɛ ngɛ tso nɔ ɔ hlae.  E be hiɛ ɔ, ejakaa a tle lɛ si kaa bɔ nɛ e de ɔ. Nyɛɛ ba, nyɛ ba hyɛ he nɛ jinɛ e fɔɔ si ngɛ ɔ.  Enɛ ɔ he ɔ, nyɛɛ ya esɔesɔ, nɛ nyɛ ya de e kaseli ɔmɛ ke a tle lɛ si kɛ je gbeje, nɛ hyɛ! e ngɛ nyɛ hlami sɛe kɛ yaa Galilea. Nyɛ maa na lɛ ngɛ lejɛ ɔ. Hyɛ! i de nyɛ.”  Lɔ ɔ he ɔ, benɛ a kɛ gbeye kɛ bua jɔmi babauu je kaimi yɔkɔ ɔ he esɔesɔ ɔ, a tu fo konɛ a ya bɔ e kaseli ɔmɛ amaniɛ.  Nɛ hyɛ! Yesu kɛ mɛ kpe, nɛ e de ke: “Nyɛ he manye!” A su e he nɛ a kpla si nɛ a pɛtɛ e nane he. 10  Kɛkɛ nɛ Yesu de mɛ ke: “Nyɛ ko ye gbeye! Nyɛɛ ya, nyɛ ya bɔ ye nyɛmimɛ ɔmɛ amaniɛ konɛ a ya Galilea, nɛ lejɛ ɔ nɛ a maa na mi ngɛ.” 11  Benɛ a ngɛ blɔ nɔ kɛ yaa a, buli ɔmɛ a ti ni komɛ ho ma a mi ya nɛ a ya sɛɛ nɔ́ nɛ ba a tsuo kɛ ha osɔfo nikɔtɔma amɛ. 12  Nɛ benɛ nimli nɛ ɔmɛ kɛ nikɔtɔma amɛ kpe nɛ a susu níhi a he ta a, a ha ta buli ɔmɛ sika hiɔ fuu, 13  nɛ a de ke: “Nyɛ de ke, ‘Nyɔ mi benɛ wa ngɛ mahe hwɔe ɔ, e kaseli ɔmɛ ba nɛ a ba ju lɛ.’ 14  Nɛ ke amlaalo ɔ tue gblɔ nɔ́ nɛ ɔ, wa maa tsɔɔ lɛ sane ɔ mi,* nɛ e he be hiae nɛ nyɛɛ hao.” 15  Enɛ ɔ he ɔ, a ngɔ sika hiɔ ɔ, nɛ a pee kaa bɔ nɛ a de mɛ ɔ, nɛ sane nɛ ɔ gbɛ fĩa kɛ ya tsitsaa ngɛ Yuda bi ɔmɛ a kpɛti kɛ ba si mwɔnɛ ɔ. 16  Se kaseli 11 ɔmɛ ho Galilea ya nɛ a ya yoku ɔ nɔ he nɛ Yesu de mɛ ke a maa kpe ngɛ ɔ. 17  Benɛ a na lɛ ɔ, a kpla si, se a ti ni komɛ a yi mi tɛ̃ mɛ. 18  Yesu su a he nɛ e kɛ mɛ tu munyu, nɛ e de ke: “A ngɔ he blɔhi tsuo nɛ ngɛ hiɔwe kɛ zugba a nɔ ɔ kɛ ha mi. 19  Enɛ ɔ he ɔ, nyɛɛ ya nɛ nyɛ ya pee nihi nɛ a ngɛ je ma amɛ tsuo a mi ɔ ye kaseli, nyɛɛ baptisi mɛ ngɛ Tsɛ ɔ biɛ mi, ngɛ Bi ɔ biɛ mi, kɛ ngɛ mumi klɔuklɔu ɔ biɛ mi, 20  nyɛɛ tsɔɔ mɛ nɛ a ye níhi tsuo nɛ i fã nyɛ ɔmɛ a nɔ. Nɛ hyɛ! i kɛ nyɛ ngɛ ligbi ɔmɛ tsuo kɛ yaa si níhi a blɔ nya tomi* ɔ nyagbe be ɔ.”

Sisi ningma

Hyɛ Munyu Komɛ A Sisi Tsɔɔmi.
Hela, “wa ma plɛ e yi mi.”
Aloo “yi nɔ.” Hyɛ Munyu Komɛ A Sisi Tsɔɔmi.