Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 27:1-66

MI MUNYUHI

  • A ngɔ Yesu kɛ ya ha Pilato (1, 2)

  • Yudas ya wo e kuɛ kpa (3-10)

  • Yesu ya da Pilato hɛ mi (11-26)

  • Nihi ye e he fɛu (27-31)

  • A ka lɛ ngɔ wo tso he ngɛ Golgota (32-44)

  • Yesu gbenɔ ɔ (45-56)

  • Yesu pumi ɔ (57-61)

  • A bu yɔkɔ ɔ he saminya (62-66)

27  Benɛ e su mɔtu ɔ, osɔfo nikɔtɔma amɛ kɛ ma nikɔtɔma amɛ tsuo kpe nɛ a so kɛ wo Yesu he konɛ a gbe lɛ.  Benɛ a fĩ lɛ se ɔ, a ngɔ lɛ kɛ ho nɛ a kɛ lɛ ya ha Pilato nɛ ji amlaalo ɔ.  Lɔ ɔ se ɔ, benɛ Yudas, nɛ ji e se blɔ tsɔɔlɔ ɔ na kaa a bu Yesu gbenɔ fɔ ɔ, e dɔ lɛ, nɛ e kpale sika hiɔ 30 ɔ se kɛ ya ha osɔfo nikɔtɔma amɛ kɛ nikɔtɔma amɛ,  nɛ e de ke: “I pee yayami kaa i tsɔɔ muɔ nɛ yayami ko be e he ɔ se blɔ.” A de ke: “Mɛni lɔ ɔ kɔɔ ngɛ wa he? O sane ji lɔ ɔ nɛ!”  Kɛkɛ nɛ e sake sika hiɔ ɔ ngɔ pue sɔlemi we ɔ nɛ e je. Lɔ ɔ se ɔ, e ho nɛ e ya wo e kuɛ kpã.  Se osɔfo nikɔtɔma amɛ ya kukuɔ sika a nɛ a de ke: “Mlaa ngmɛ́ blɔ kaa waa ngɔ kɛ to sika to he klɔuklɔu ɔ, ejakaa muɔ sika ji nɛ ɔ nɛ.”  Benɛ a kpe nɛ a susu he ɔ, a ngɔ sika a kɛ ya he buɛ puɛlɔ ɔ ngmɔ ɔ konɛ a kɛ pee nibwɔhi a pumi he.  Enɛ ɔ he ɔ, a tsɛɛ jamɛ a ngmɔ ɔ ke Muɔ Ngmɔ kɛ ba si mwɔnɛ ɔ.  Enɛ ɔ ha nɛ nɔ́ nɛ Mawu de kɛ gu gbalɔ Yeremia nɔ ɔ ba mi. E de ke: “A ngɔ sika hiɔ 30 ɔ, nɛ ji nyumu ɔ he jua nɛ a wo ɔ, nɔ nɛ Israel bi komɛ wo e he jua a, 10  nɛ a kɛ ngɔ buɛ puɛlɔ ɔ ngmɔ ɔ, kaa bɔ nɛ Yehowa* fã mi ɔ.” 11  Amlɔ nɛ ɔ, Yesu daa si ngɛ amlaalo ɔ hɛ mi, nɛ amlaalo ɔ bi lɛ ke: “Anɛ mo ji Yuda bi ɔmɛ a Matsɛ ɔ lo?” Yesu he nɔ ke: “Jã nɛ mo nitsɛ o ngɛ dee ɔ nɛ.” 12  Se benɛ osɔfo nikɔtɔma amɛ kɛ nikɔtɔma amɛ ngɛ e nya poe ɔ, e ha we heto. 13  Kɛkɛ nɛ Pilato bi lɛ ke: “Munyuhi babauu nɛ a ngɛ poe kɛ ngɛ o nɔ fɔe nɛ ɔ, anɛ o nui lo?” 14  Se e ha we lɛ heto, ohoo, munyu kake po ji e nya mi. Enɛ ɔ pee amlaalo ɔ nyakpɛ wawɛɛ. 15  Jehanɛ ɔ, nɔ́ ko nɛ amlaalo ɔ pɔɔ peemi ji kaa ngɛ gbijlɔ fɛɛ gbijlɔ nɔ ɔ, e ngmɛɛɔ nihi nɛ a wo mɛ tsu ɔ a ti nɔ ko he kɛ haa asafo kuu ɔ, nɔ nɛ a suɔ. 16  Jamɛ a be ɔ mi ɔ, a wo yayami peelɔ kpanaku ko nɛ a tsɛɛ lɛ ke Baraba a tsu. 17  Enɛ ɔ he ɔ, benɛ a bua a he nya a, Pilato bi mɛ ke: “Mɛnɔ nɛ nyɛ suɔ nɛ ma ngmɛɛ e he kɛ ha nyɛ, Baraba, aloo Yesu nɛ a ke a tsɛɛ lɛ ke Kristo ɔ?” 18  Ejakaa Pilato le kaa ninyɛ he je nɛ a ngɔ lɛ ha a nɛ. 19  Jehanɛ se hu ɔ, benɛ e hii si ngɛ e kojomi sɛ ɔ nɔ ɔ, e yo ɔ tsɔ nɛ a ngɔ sɛ gbi ko kɛ ba ha lɛ ke: “Koo ngɔ o he kɛ wo jamɛ a dalɔ ɔ sane ɔ mi, ejakaa e he je ɔ, i na nɔ́ wawɛɛ ngɛ nlami mi mwɔnɛ ɔ.” 20  Se osɔfo nikɔtɔma amɛ kɛ nikɔtɔma amɛ plɛ asafo kuu ɔmɛ a yi mi konɛ a kpa lɛ pɛɛ nɛ e ngmɛɛ Baraba he ha mɛ, se e ha nɛ a gbe Yesu. 21  Enɛ ɔ he ɔ, amlaalo ɔ bi mɛ ke: “Nimli enyɔ ɔmɛ a ti mɛnɔ nɛ nyɛ suɔ nɛ ma ngmɛɛ e he ha nyɛ?” A he nɔ ke: “Baraba.” 22  Pilato bi mɛ ke: “Lɛɛ mɛni ma pee Yesu nɛ a ke a tsɛɛ lɛ ke Kristo ɔ mɔ?” A he nɔ ke: “Sɛu lɛ!”* 23  E de ke: “Mɛni he je? Mɛni yayami e pee?” Se loloolo ɔ, a ya nɔ nɛ a kpa ngmlaa wawɛɛ ke: “Sɛu lɛ!” 24  Benɛ Pilato na kaa nɔ́ kpakpa ko ji e mɔde bɔmi ɔ mi kɛ bɛ se mohu ɔ, basabasa ngɛ si tee ɔ, e ngɔ nyu nɛ e fɔ e dɛ ngɛ asafo kuu ɔ hɛ mi, nɛ e de ke: “Imi lɛɛ i yi dalɔ nɛ ɔ muɔ he fɔ. Nyɛ nitsɛmɛ nyɛ sane ji lɔ ɔ nɛ.” 25  Enɛ ɔ he ɔ, ni ɔmɛ tsuo he nɔ ke: “Ha nɛ e muɔ ɔ nɛ ba waa kɛ wa bimɛ a nɔ.” 26  Kɛkɛ nɛ e ngmɛɛ Baraba he ha mɛ, se e ha nɛ a fiaa Yesu kpã, nɛ e ngɔ lɛ kɛ ha konɛ a ya gbe lɛ ngɛ tso nɔ. 27  Lɔ ɔ se ɔ, amlaalo ɔ ta buli ɔmɛ ngɔ Yesu kɛ ho amlaalo ɔ we ɔ mi ya, nɛ tabo ɔ tsuo ba bua kɛ bɔle lɛ kɛ kpe. 28  Nɛ a je e tade ɔmɛ ngɛ e he, nɛ a ngɔ tade klɔii tsutsuutsu ko kɛ wo* lɛ, 29  nɛ a ngɔ mio kɛ lo jlasi nɛ a kɛ wo e yi, nɛ a ngɔ go kɛ ha lɛ konɛ e hɛɛ ngɛ e hiɔ nine mi. Nɛ benɛ a kpla si ngɛ e hɛ mi ɔ, a ye e he fɛu ke: “Yuda bi ɔmɛ a Matsɛ, he manye!”* 30  Nɛ a su lada ngɔ pue e nɔ, nɛ a ngɔ go ɔ ngɛ e dɛ, nɛ a bɔni e yi mi nɔ́ fiami. 31  Nyagbe ɔ, benɛ a ye e he fɛu ta a, a je tade klɔii ɔ ngɛ e he nɛ a ngɔ tadehi nɛ e woɔ ngɛ e tade nɔ ɔ kɛ wo lɛ, nɛ a ngɔ lɛ kɛ ho konɛ a ya ka lɛ kɛ wo tso ɔ he. 32  Benɛ a ngɛ kpo jee ɔ, a na nyumu ko nɛ e je Kirene nɛ a tsɛɛ lɛ ke Simon. A nyɛ nyumu nɛ ɔ nɔ nɛ a ha lɛ ní tsumi kaa e tloo e sɛumi tso* ɔ. 33  Benɛ a ya su he ko nɛ a tsɛɛ ke Golgota, nɛ e sisi ji, Yikoklodonya a, 34  a ha lɛ wai nɛ́ a ngɔ duɔ* kɛ futu mi; se benɛ e sa e nya a, e kua ke e be nue. 35  Benɛ a ka lɛ kɛ wo tso ɔ he ta a, a fɔ sɔ kɛ dla tadehi nɛ e woɔ ngɛ e tade nɔ ɔ, 36  nɛ a hi si ngɛ lejɛ ɔ, nɛ a ngɛ e he bue. 37  Jehanɛ hu ɔ, a ngma sane nɛ a po fɔ e nɔ ɔ kɛ mɛtɛ e yi nɔ. A ngma ke: “Yesu, Yuda bi ɔmɛ a Matsɛ ɔ ji nɛ ɔ nɛ.” 38  Jamɛ a be ɔ mi ɔ, a sɛu juli enyɔ ngɔ piɛɛ e he, nɔ kake ngɛ e hiɔ nɔ, nɛ nɔ kake hu ngɛ e muɔ nɔ. 39  Nɛ nihi nɛ a ngɛ bee ɔ tu munyu yayahi kɛ si lɛ, nɛ a ngɛ a yi huanyae 40  nɛ a ngɛ dee ke: “Mo nɛ jinɛ o maa ku sɔlemi we ɔ ngɔ pue si nɛ o maa ngɔ ligbi etɛ kɛ ma a ji nɛ ɔ, he mo nitsɛ o yi wami! Ke Mawu bi ji mo ɔ, kple si kɛ je sɛumi tso* ɔ nɔ!” 41  Jã kɛ̃ nɛ osɔfo nikɔtɔma amɛ kɛ womi ngmali ɔmɛ kɛ nikɔtɔma amɛ hu bɔni e he fɛu yemi ke: 42  “E he ni kpahi a yi wami; se e nyɛ we nɛ e he lɛ nitsɛ e yi wami! Israel Matsɛ ji lɛ; amlɔ nɛ ɔ, ha nɛ e kple si kɛ je sɛumi tso* ɔ nɔ, nɛ wa ma he lɛ maa ye. 43  E ngɔ e hɛ kɛ fɔ Mawu nɔ; ke Mawu bua jɔ e he ɔ, ha nɛ e kpɔ̃ lɛ piɔ, ejakaa e de ke, ‘Mawu Bi ji mi.’” 44  Jã kɛ̃ nɛ juli ɔmɛ nɛ a sɛu mɛ ngɛ e kasa nya a hu ngɛ lɛ ahlua bɔe. 45  Kɛ je ngmlɛfia ekpane* ɔ nɔ kɛ yaa a, diblii wo ngɛ zugba a nɔ tsuo kɛ ya si ngmlɛfia nɛɛne* ɔ nɔ. 46  Maa pee ngmlɛfia nɛɛne ɔ mi ɔ, Yesu kɛ gbi nɛ nya wa kpa ngmlaa ke: “Eli, Eli, lama sabaktani?” nɛ e sisi ji, “Ye Mawu, ye Mawu, mɛni he je nɛ o kua mi ɔ?” 47  Benɛ ni nɛmɛ nɛ a daa si ngɛ lejɛ ɔ nu nɔ́ nɛ ɔ, a ti ni komɛ bɔni demi ke: “Nyumu nɛ ɔ ngɛ Eliya tsɛe.” 48  Amlɔ nɔuu nɛ a ti nɔ kake sa fo nɛ e ya ngɔ kutsa kɛ sɔ wai nɛ kuã mi, nɛ e ngɔ kɛ wo go nya, nɛ e ngɔ kɛ ha lɛ ke e nu. 49  Se ni nɛmɛ nɛ a piɛ ɔ de ke: “Ngmɛɛ e he! Ha nɛ waa hyɛ kaa Eliya ma ba he e yi wami lo.” 50  Yesu kɛ gbi nɛ nya wa kpa ngmlaa ekohu, kɛkɛ nɛ e ngmɛɛ e mumi ɔ he.* 51  Nɛ hyɛ! tsu mi pomi bo ɔ nɛ ngɛ jami he ɔ mi gba enyɔ kɛ je hiɔwe kɛ ba ma si, nɛ zugba mimiɛɛ, nɛ tɛ sa amɛ a mi gba. 52  Nɛ yɔkɔ* ɔmɛ a nya bli, nɛ ni klɔuklɔu ɔmɛ nɛ a ya hwɔ ɔ, a ti nihi fuu a gbogboe ɔmɛ je kpo* 53  (benɛ a tle lɛ si se ɔ, nihi nɛ a je gɔ ɔ mi kɛ ba a, sɛ ma klɔuklɔu ɔ mi), nɛ nihi fuu na mɛ. 54  Se benɛ ta buli a nɔkɔtɔma a kɛ nihi nɛ a ngɛ Yesu he bue ɔ na zugba mimiɛɛmi ɔ kɛ níhi nɛ ngɛ nɔ yae ɔ, a ye gbeye wawɛɛ nitsɛ, nɛ a de ke: “Niinɛ, Mawu Bi ji nɛ ɔ nɛ.” 55  Yihi babauu ngɛ lejɛ ɔ, nɛ a daa si ngɛ se lokoo kɛ ngɛ hyɛe. Yi nɛ ɔmɛ nyɛɛ Yesu se kɛ je Galilea nɛ a sɔmɔ lɛ; 56  a kpɛti ni komɛ ji Maria Magdalena kɛ Maria nɛ ji Yakobo kɛ Yose a nyɛ ɔ, kɛ Zebedeo binyumu ɔmɛ a nyɛ ɔ. 57  Jehanɛ ɔ, benɛ e su gbɔkuɛ nya si ɔ, nyumu niatsɛ ko nɛ a tsɛɛ lɛ ke Yosɛf nɛ e je Arimatia nɛ lɛ hu e ba pee Yesu kaselɔ ɔ ba. 58  Nyumu nɛ ɔ ya Pilato ngɔ nɛ e ya kpa lɛ pɛɛ kaa e ngɔ Yesu gbogboe ɔ kɛ ha lɛ. Kɛkɛ nɛ Pilato fã ke a ngɔ kɛ ha lɛ. 59  Yosɛf ngɔ gbogboe ɔ, nɛ e ngɔ klala kpakpa nɛ e he tsɔ kɛ blaa lɛ, 60  nɛ e ngɔ lɛ kɛ ya fɔ e yɔkɔ* ehe nɛ e kpɛ ngɛ tɛ sa mi ɔ mi. Nɛ benɛ e kpɛne tɛ ngua ko kɛ fɔ yɔkɔ* ɔ nya ta a, e je. 61  Se Maria Magdalena kɛ Maria kaketsɛ ɔ ya nɔ nɛ a hi si ngɛ lejɛ ɔ, ngɛ yɔkɔ ɔ hɛ mi. 62  E nɔ jena, nɛ ji He Dlami ɔ se ɔ, osɔfo nikɔtɔma amɛ kɛ Farisi bi ɔmɛ ya kpe ngɛ Pilato ngɔ, 63  nɛ a de lɛ ke: “Nyɔmtsɛ, wa kai kaa benɛ jamɛ a nɔ sisilɔ ɔ ngɛ wami mi ɔ, e de ke, ‘Ngɛ ligbi etɛ se ɔ, a ma tle mi si.’ 64  Lɔ ɔ he ɔ, mo fã konɛ a ya bu yɔkɔ ɔ he kɛ yaa si ligbi etɛ ɔ maa su, konɛ e kaseli ɔmɛ nɛ a ko ba nɛ a ba ju lɛ nɛ a de nihi ke, ‘A tle lɛ si kɛ je gbeje!’ Ke e ba jã a, nyagbe sisimi ɔ mi maa wa kulaa pe kekle nɔ́ ɔ.” 65  Pilato de mɛ ke: “Buli ji nɛ ɔmɛ nɛ. Nyɛɛ ya nɛ nyɛ ya bu he bɔ nɛ nyɛ ma nyɛ.” 66  Lɔ ɔ he ɔ, a ya nɛ a ya sɔu tɛ ɔ nya, nɛ a ha nɛ buli bu he.

Sisi ningma

Hyɛ Munyu Komɛ A Sisi Tsɔɔmi.
Aloo “gbee lɛ ngɛ tso nɔ.”
Kaa bɔ nɛ nyumu pueɔ bo, aloo nyumu fɔɔ bo konɔ ɔ.
Aloo “a ngɛ lɛ palee.”
Hyɛ Munyu Komɛ A Sisi Tsɔɔmi.
Nyu nɔ́ ko nɛ dooɔ.
Hyɛ Munyu Komɛ A Sisi Tsɔɔmi.
Hyɛ Munyu Komɛ A Sisi Tsɔɔmi.
Maa pee piani ngmlɛ 12.
Maa pee piani ngmlɛ 3.
Aloo “e gbo.”
Aloo “kaimi yɔkɔhi.”
Hela, “te si.”
Aloo “kaimi yɔkɔ.”
Aloo “kaimi yɔkɔ.”