Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 24:1-51

MI MUNYUHI

  • KRISTO BAMI Ɔ HE OKADI (1-51)

    • Ta hwumihi, hwɔ, zugba mimiɛɛmihi (7)

    • Sane kpakpa a nɛ a maa fiɛɛ (14)

    • Amanehlu ngua (21, 22)

    • Nɔmlɔ Bi ɔ we okadi ɔ (30)

    • Fig tso ɔ (32-34)

    • Kaa Noa ligbi ɔ (37-39)

    • Nyɛɛ ya nɔ nɛ nyɛɛ hwɔɔ (42-44)

    • Tsɔlɔ anɔkualetsɛ kɛ tsɔlɔ yayami (45-51)

24  Jehanɛ ɔ, benɛ Yesu ngɛ sɔlemi we ɔ jee ɔ, e kaseli ɔmɛ su e he nɛ a tsɔɔ lɛ tsuhi nɛ ngɛ sɔlemi we ɔ.  E de mɛ ke: “Tse nyɛ ngɛ ní nɛ ɔmɛ tsuo hyɛe? Ngɛ anɔkuale mi ɔ, i ngɛ nyɛ dee ke, a maa tsɛ̃ tɛ nɛ ɔmɛ tsuo kɛ pue si, nɛ a be tɛ ko sie ngɛ tɛ ko nɔ ngɛ hiɛ ɔ kɔkɔɔkɔ.”  Benɛ e hii si ngɛ Oliv Yoku ɔ nɔ ɔ, kaseli ɔmɛ su e he ngɛ laami mi nɛ a bi lɛ ke: “Mo de wɔ, mɛni be nɛ ní nɛ ɔmɛ tsuo maa ba mi, nɛ mɛni okadi nɛ e maa tsɔɔ kaa o ba* nɛ́ ma kadi níhi a blɔ nya tomi* ɔ nyagbe be ɔ”?  Yesu ha mɛ heto ke: “Nyɛɛ hyɛ nɛ hi nɛ nɔ ko nɛ kó sisi nyɛ,  ejakaa nihi fuu maa ba ngɛ ye biɛ mi nɛ a ma de ke, ‘Imi ji Kristo ɔ nɛ,’ nɛ a maa sisi nihi babauu.  Nyɛ maa nu ta hwumihi kɛ tahi a he amaniɛ bɔmihi a he. Nyɛɛ hyɛ nɛ hi nɛ nyɛ tsui ko po, ejakaa ní nɛ ɔmɛ maa ba mi kokooko, se kɛ̃ ɔ, nyagbe ɔ sui lolo.  “Ejakaa ma maa te si ngɔ wo ma nɛ matsɛ yemi maa te si ngɔ wo matsɛ yemi, nɛ hwɔ maa ba, nɛ zugba ma mimiɛɛ ngɛ he slɔɔtohi.  Ní nɛ ɔmɛ tsuo ji kɔɔmi sisije.  “Nɛ nihi maa ngɔ nyɛ kɛ wo amanehlu mi nɛ a maa gbe nyɛ, nɛ ye biɛ ɔ he je ɔ, je ma amɛ tsuo maa nyɛ nyɛ. 10  Jehanɛ se hu ɔ, nihi babauu a nane maa tɔ̃tɔ̃, nɛ a maa tsɔɔ a sibi a se blɔ nɛ a maa nyɛ a sibi. 11  Lakpa gbali fuu maa te si nɛ a maa sisi nihi babauu; 12  nɛ akɛnɛ nihi fuu be mlaa nɔ yee he je ɔ, suɔmi nɛ nihi babauu ngɛ ɔ, nya maa jɔ. 13  Se nɔ nɛ e ma fĩ si kɛ ya si nyagbe ɔ, a ma he e yi wami. 14  Nɛ sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ ngɛ zugba a nɔ hehi tsuo nɛ nimli ngɛ ɔ nɛ a kɛ maa ye je ma amɛ tsuo odase, nɛ lɔ ɔ se loko nyagbe ɔ maa ba. 15  “Enɛ ɔ he ɔ, ke nyɛ hɛ ngmɛ gba ma doku peemi nɔ́ nɛ e kpɔtɔɔ nɔ tsui nya nɛ gbalɔ Daniɛl tu he munyu ɔ nɔ kaa e daa si ngɛ he klɔuklɔu ɔ (ha ní kanelɔ ɔ nɛ kɔ se), 16  lɛɛ nihi nɛ a ngɛ Yudea a nɛ a bɔni fo tumi kɛ ya yoku ɔmɛ a nɔ. 17  Ha nɔ nɛ e ngɛ tsu yi mi ɔ nɛ e ko kple si kɛ ya ngɔ nɔ́ ko ngɛ e we mi, 18  nɛ nɔ nɛ e ngɛ ngmɔ mi ɔ hu nɛ e ko kpale e se nɛ e ya ngɔ tade nɛ e woɔ ngɛ e tade nɔ ɔ. 19  I ngɛ yihi nɛ a hɛɛ hɔ kɛ ni nɛmɛ nɛ bimwɔwi ngɛ a dɛ ngɛ jamɛ a be ɔ mi ɔ kpo mo* hae! 20  Nyɛɛ hi sɔlee konɛ nyɛ fo tumi ɔ nɛ ko ba ngɛ ahlabata be* mi aloo ngɛ He Jɔɔmi ligbi ɔ nɔ; 21  ejakaa jamɛ a be ɔ mi ɔ, amanehlu ngua maa ba nɛ́ eko kaa jã bɛ hyɛ kɛ je je ɔ sisije kɛ ba si amlɔ nɛ ɔ, ohoo, nɛ eko hu be bae gblegbleegble. 22  Ngɛ anɔkuale mi ɔ, ke a pui jamɛ a ligbi ɔmɛ a nɔ kpiti ɔ, a be he lo ko he lo ko yi wami hee; se ngɛ nihi nɛ a hla a he je ɔ, a maa po jamɛ a ligbi ɔmɛ a nɔ kpiti. 23  “Jamɛ a be ɔ mi ɔ, ke nɔ ko de nyɛ ke, ‘Hyɛ! Kristo ɔ ji nɛ ɔ nɛ,’ aloo, ‘Lɛ nɛ e ngɛ lejɛ ɔ nɛ!’ ɔ, nyɛ ko he ye. 24  Ejakaa lakpa Kristohi kɛ lakpa gbali maa te si nɛ a maa pee okadi nguanguahi kɛ nyakpɛ níhi konɛ a kɛ sisi nihi, nɛ ke e maa hi po ɔ, nihi nɛ a hla mɛ ɔ. 25  Hyɛ! i sɛ hlami nɛ i bɔ nyɛ kɔkɔ. 26  Lɔ ɔ he ɔ, ke nihi de nyɛ ke, ‘Hyɛ! E ngɛ nga a nɔ’ ɔ, nyɛ ko je kpo; ‘Hyɛ! E ngɛ se tsu ɔmɛ a mi’ ɔ, nyɛ ko he ye. 27  Ejakaa kaa bɔ nɛ oslabai gbaa ngɛ puje he nɛ e kpɛɔ kɛ yaa pusinɔ he ɔ, jã kɛ̃ nɛ e maa ba ke nɔmlɔ Bi ɔ ba* a. 28  He fɛɛ he nɛ gbogboe ngɛ ɔ, lejɛ ɔ nɛ kɔlehi ma bua a he nya ngɛ. 29  “Ngɛ jamɛ a ligbi ɔmɛ a mi ngɛ amanehlu ɔ se nɔuu pɛ ɔ, pu ɔ maa wo diblii, nɛ nyɔhiɔ ɔ be kpɛe, nɛ dodoe ɔmɛ ma tsɔ kɛ je hiɔwe kɛ ba nɔ si, nɛ he wamihi nɛ ngɛ hiɔwe ɔ ma mimiɛɛ. 30  Kɛkɛ ɔ, nɔmlɔ Bi ɔ he okadi ɔ maa je kpo ngɛ hiɔwe, nɛ wɛtsohi nɛ ngɛ zugba a nɔ tsuo ma fo ya boboobo, nɛ a maa na nɔmlɔ Bi ɔ nɛ e ma ngɛ bɔku ɔmɛ a mi kɛ he wami kɛ hɛ mi nyami babauu. 31  Nɛ e maa tsɔ e bɔfo ɔmɛ kɛ titimati pɛmi nɛ nya wa, nɛ a ma bua nihi nɛ e hla amɛ a nya kɛ je kɔɔhiɔ eywiɛ ɔmɛ a mi, kɛ maa je hiɔwe nyagbe he kake kɛ yaa su nyagbe he kpa. 32  “Jehanɛ ɔ, nyɛɛ kase nɔ́ nɛ ɔ kɛ je fig tso ɔ he nɔ́ he tomi nɔ́ ɔ mi: Ke e tsɛ̃ kɔni nɛ bahi ba nɔ pɛ kɛkɛ nyɛ le kaa mawulɛ be su ta. 33  Jã nɔuu kɛ̃ nɛ ke nyɛ hu nyɛ na ní nɛ ɔmɛ tsuo ɔ, nyɛ ná nɛ nyɛɛ le kaa e su sinya amɛ a nya haa. 34  Ngɛ anɔkuale mi ɔ, i ngɛ nyɛ dee ke, yi nɔ nɛ ɔ be bee kɛ ho gblegbleegble kɛ yaa si be nɛ ní nɛ ɔmɛ tsuo maa ba mi. 35  Hiɔwe kɛ zugba maa be kɛ ho, se ye munyu ɔmɛ lɛɛ a be bee kɛ ho kɔkɔɔkɔ. 36  “Jamɛ a ligbi ɔ kɛ ngmlɛfia a, nɔ ko nɔ ko li, hiɔwe bɔfo ɔmɛ li, nɛ jã kɛ̃ nɛ Bi ɔ hu li, se Tsɛ ɔ pɛ lɛ e le. 37  Ejakaa kaa bɔ nɛ níhi ya nɔ ngɛ Noa ligbi ɔmɛ a mi ɔ, jã kɛ̃ nɛ níhi maa ya nɔ ke nɔmlɔ Bi ɔ ba* a. 38  Ejakaa loko Nyu Kpekpemi ɔ maa ba a, jamɛ a be ɔ mi ɔ, nihi ngɛ ní yee nɛ a ngɛ ní nue, nyumuhi ngɛ yihi ngɔe nɛ a ngɔ yihi kɛ ngɛ gba hae kɛ ya si ligbi ɔ nɛ Noa sɛ daka a mi, 39  nɛ a yɔse we kɛ ya si be nɛ Nyu Kpekpemi ɔ ba nɛ e ba muɔɔ mɛ tsuo kɛ ho. Kaa bɔ nɛ e ba ngɛ jamɛ a be ɔ mi ɔ, jã kɛ̃ nɛ e maa ba ke nɔmlɔ Bi ɔ ba a. 40  Jamɛ a be ɔ mi ɔ, nyumuhi enyɔ maa hi ngmɔ mi; a maa ngɔ nɔ kake kɛ ho nɛ a ma kua nɔ kake. 41  Yihi enyɔ maa hi nɔ́ wɛɛe ngɛ wɛ tɛ nɔ; a maa ngɔ nɔ kake kɛ ho nɛ a ma kua nɔ kake. 42  Enɛ ɔ he ɔ, nyɛɛ ya nɔ nɛ nyɛɛ hwɔɔ, ejakaa nyɛ li ligbi nɔ nɛ nyɛ Nyɔmtsɛ ɔ ma. 43  “Se nɔ́ kake nɛ e sa kaa nyɛɛ le ji: Ke nɔ ko ngɛ we mi nɛ e le hwɔɔmi be* nɛ julɔ ɔ maa ba a, e maa fɔ nyɔ nɛ e be blɔ ngmɛe nɛ e ywia e we ɔ nɛ e sɛ mi. 44  Enɛ ɔ he ɔ, nyɛ hu nyɛ dla nyɛ he ngɔ to, ejakaa nɔmlɔ Bi ɔ ma ngɛ ngmlɛfia nɛ nyɛ susuu we kaa e maa ba a mi. 45  “Mɛnɔ tutuutu ji tsɔlɔ* anɔkualetsɛ kɛ ní lelɔ* ɔ nɛ e nyɔmtsɛ ɔ ngɔ lɛ kɛ da e we mi bimɛ a nya konɛ e ha mɛ a niye ní ngɛ be nɛ sa mi ɔ? 46  Jamɛ a tsɔlɔ* ɔ nɛ ke e nyɔmtsɛ ɔ ba nɛ e ma ba na lɛ kaa e ngɛ jã pee ɔ ngɛ bua jɔmi! 47  Ngɛ anɔkuale mi ɔ, i ngɛ nyɛ dee ke, e maa ngɔ lɛ kɛ da e níhi tsuo a nya. 48  “Se ke e ba kaa jamɛ a tsɔlɔ* yayami ɔ de ngɛ e tsui mi ke, ‘Ye nyɔmtsɛ ɔ se ngɛ kɛe,’ 49  nɛ e bɔni e nyɛmimɛ tsɔli* kpa amɛ kongomi nɛ e kɛ nihi nɛ a le mɛ kaa dã deli ɔ bɔni ní yemi nɛ a bɔni ní numi ɔ, 50  jamɛ a tsɔlɔ* ɔ nyɔmtsɛ ɔ maa ba ngɛ ligbi nɛ e hyɛ we blɔ ɔ nɔ kɛ ngmlɛfia nɛ e li ɔ mi, 51  nɛ e maa gbla e tue wawɛɛ nitsɛ nɛ e ma ha lɛ sihi he ngɛ he nɛ osatotsɛmɛ ɔmɛ ngɛ ɔ. Lejɛ ɔ ji he nɛ e ma fo ya nɛ e ma kpe e lungu nya ngɛ.

Sisi ningma

Hyɛ Munyu Komɛ A Sisi Tsɔɔmi.
Aloo “yi nɔ.” Hyɛ Munyu Komɛ A Sisi Tsɔɔmi.
Aloo “kusiɛ.”
Be mi nɛ fĩɛ yee wawɛɛ nɛ snoo nɛɛ ngɛ Israel ɔ.
Hyɛ Munyu Komɛ A Sisi Tsɔɔmi.
Hyɛ Munyu Komɛ A Sisi Tsɔɔmi.
Aloo “nyɔ mi be.”
Hela, “nyɔguɛ.”
Aloo “juɛmitsɛ.”
Hela, “nyɔguɛ.”
Hela, “nyɔguɛ.”
Hela, “nyɔguɛ.”
Hela, “nyɔguɛ.”