Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 23:1-39

MI MUNYUHI

  • Nyɛ ko kase womi ngmali ɔmɛ kɛ Farisi bi ɔmɛ (1-12)

  • Musu tloo womi ngmali ɔmɛ kɛ Farisi bi ɔmɛ (13-36)

  • Yesu ye Yerusalɛm he kɔmɔ (37-39)

23  Lɔ ɔ se ɔ, Yesu kɛ asafo kuu ɔmɛ kɛ e kaseli ɔmɛ tu munyu nɛ e de mɛ ke:  “Womi ngmali ɔmɛ kɛ Farisi bi ɔmɛ ngɔ Mose sɛ ɔ nɛ a hi nɔ.  Enɛ ɔ he ɔ, nɔ́ fɛɛ nɔ́ nɛ a ma de nyɛ ɔ, nyɛɛ pee, nɛ nyɛɛ ye nɔ, se nyɛ ko pee nyɛ ní kaa mɛ. Ejakaa a deɔ, se a pee we nɔ́ nɛ a deɔ ɔ.  A fĩɔ tlomihi nɛ jiɔ kɛ pueɔ nihi a ko nɔ, se mɛ nitsɛmɛ lɛɛ, a sume kaa a maa ngɔ a nine nguɛ kake kɛ ta he.  Nɔ́ fɛɛ nɔ́ nɛ a peeɔ ɔ, a peeɔ konɛ nihi nɛ na, ejakaa a peeɔ dakahi nɛ ngmamihi ngɛ mi nɛ́ a woɔ kɛ poɔ a he piɛ* ɔ agboagbohi, nɛ a peeɔ a tade ɔmɛ a nya deke ɔmɛ gagaaga.  A suɔ he nɛ nihi nɛ a he biɛ hiɔ ngɛ gbɔkuɛ okplɔɔ ngmɛmihi a sisi, nɛ a suɔ hɛ mi sɛhi* a nɔ himi ngɛ kpe he ɔmɛ,  nɛ a suɔ kaa nihi nɛ a fɔ mɛ ngɛ juahi a nɔ, nɛ a suɔ nɛ nihi nɛ a tsɛ mɛ ke Rabi.*  Se nyɛɛ lɛɛ, a kó tsɛ nyɛ ke Rabi, ejakaa nɔ kake pɛ ji nyɛ Tsɔɔlɔ, nɛ nyɛ tsuo ɔ, nyɛmimɛ ji nyɛ.  Jehanɛ se hu ɔ, nyɛ kó tsɛ nɔ ko ke nyɛ tsɛ ngɛ zugba a nɔ, ejakaa nɔ kake pɛ ji nyɛ Tsɛ, lɛ ji hiɔwe No ɔ nɛ. 10  Jã kɛ̃ nɛ a kó tsɛ nyɛ ke hɛ mi nyɛɛli, ejakaa nɔ kake pɛ ji nyɛ Hɛ Mi Nyɛɛlɔ, lɛ ji Kristo ɔ nɛ. 11  Se nɔ nɛ e ji nɔmlɔ ngua pe kulaa ngɛ nyɛ kpɛti ɔ, e sa nɛ e pee nyɛ sɔmɔlɔ. 12  Nɔ fɛɛ nɔ nɛ e woɔ e he nɔ ɔ, a maa ba lɛ si, nɛ nɔ fɛɛ nɔ nɛ e baa e he si ɔ, a ma wo e nɔ. 13  “Musu tloo nyɛ, womi ngmali kɛ Farisi bi, osatotsɛmɛ! akɛnɛ nyɛ nga hiɔwe Matsɛ Yemi ɔ nya ngɛ nimli a hɛ mi ɔ he je; ejakaa nyɛ nitsɛmɛ nyɛ sɛ we mi, nɛ jã kɛ̃ nɛ nihi nɛ a ma nɛ a ba sɛ mi ɔ hu, nyɛ ngmɛ́ mɛ blɔ nɛ a sɛ mi. 14  —— 15  “Musu tloo nyɛ, womi ngmali kɛ Farisi bi, osatotsɛmɛ! ejakaa nyɛ hiaa blɔ kɛ guɔ wo nɔ kɛ zugba gbigbli nɔ kɛ ya tsakeɔ nɔ kake kɛ baa Yuda bi ɔmɛ a jami ɔ mi, nɛ ke e tsake ɔ, nyɛ peeɔ lɛ nɔ nɛ sa kɛ ha Gehena* yami si enyɔ pe nyɛ nitsɛmɛ. 16  “Musu tloo nyɛ, blɔ tsɔɔli nɛ a hɛ ngmɛ yu nɛ a deɔ ke, ‘Ke nɔ ko kɛ sɔlemi we ɔ kã kita a, pi nɔ́ ko ji lɔ ɔ; se ke nɔ ko kɛ sika tsu nɛ ngɛ sɔlemi we ɔ kã kita a, lɛɛ e sa kaa e ye nɔ.’ 17  Kuasiahi kɛ hɛ yuyuili! Ngɛ anɔkuale mi ɔ, te nɔ́ nɛ he hia wawɛɛ nɛɛ, sika tsu ɔ, aloo sɔlemi we ɔ nɛ haa nɛ sika tsu ɔ he tsɔɔ ɔ? 18  Nyɛ deɔ hu ke, ‘Ke nɔ ko kɛ afɔle sami la tɛ ɔ kã kita a, pi nɔ́ ko ji lɔ ɔ, se ke nɔ ko kɛ nike ní nɛ ngɛ nɔ ɔ kã kita a, lɛɛ e sa kaa e ye nɔ.’ 19  Hɛ yuyuili! Ngɛ anɔkuale mi ɔ, te nɔ́ nɛ he hia nɛɛ, nike ní ɔ, aloo afɔle sami la tɛ ɔ nɛ haa nɛ nike ní ɔ he tsɔɔ ɔ? 20  Enɛ ɔ he ɔ, nɔ fɛɛ nɔ nɛ e kɛ afɔle sami la tɛ ɔ ma kã kita a, e kɛ afɔle sami la tɛ ɔ kɛ nɔ́ fɛɛ nɔ́ nɛ ngɛ nɔ ɔ lɛ ngɛ kita a kãe; 21  nɛ nɔ fɛɛ nɔ nɛ e kɛ sɔlemi we ɔ ma kã kita a, e kɛ sɔlemi we ɔ kɛ Nɔ nɛ e hiɔ lejɛ ɔ lɛ ngɛ kita a kãe; 22  nɛ nɔ fɛɛ nɔ nɛ e kɛ hiɔwe ma kã kita a, e kɛ Mawu matsɛ sɛ ɔ kɛ Nɔ nɛ e hii si ngɛ nɔ ɔ lɛ ngɛ kita a kãe. 23  “Musu tloo nyɛ, womi ngmali kɛ Farisi bi, osatotsɛmɛ! ejakaa nyɛ haa mint, kɛ dill, kɛ kumin mi dlami nyɔngma mi kakaaka, se nyɛ bui níhi nɛ a he hia ngɛ Mlaa a mi ɔ. Ní nɛ ɔmɛ ji dami sane yemi, kɛ mɔbɔ nami, kɛ anɔkuale yemi. E he hia nɛ nyɛɛ pee ní nɛ ɔmɛ, se e sɛ nɛ nyɛ ma nyɛ hɛ ngɔ fɔ ní kpahi a nɔ. 24  Tsɔɔli nɛ a hɛ ngmɛ yu nɛ a tsleɔ anunu kɛ pueɔ he, se a miɔ afukpɔngɔ! 25  “Musu tloo nyɛ, womi ngmali kɛ Farisi bi, osatotsɛmɛ! ejakaa nyɛ fɔɔ kplu ɔ kɛ kã a he, se a mi ɔ lɛɛ, hɛ tsumi kɛ nɔ nitsɛ e tsui nya ní peemi hyi mɛ tɔ. 26  Farisi bi hɛ yuyuili, nyɛ fɔ kplu ɔ kɛ kã a mi kekle, kɛkɛ ɔ, a he ɔ hu ma tsɔ. 27  “Musu tloo nyɛ, womi ngmali kɛ Farisi bi, osatotsɛmɛ! ejakaa nyɛ ngɛ kaa yɔkɔhi nɛ a ngɔ kalo kɛ kpa a he nɛ́ ngɛ anɔkuale mi ɔ, nihi naa kaa a ngɛ fɛu, se a mi ɔ hyi tɔ kɛ gbogboehi a wuhi kɛ ní saisaa nɛ a he tsɔ we. 28  Jã nɔuu kɛ̃ nɛ ngɛ kpo nɔ ɔ, nihi naa nyɛ kaa dali, se osato kɛ mlaa nɔ tɔmi hyi nyɛ tɔ. 29  “Musu tloo nyɛ, womi ngmali kɛ Farisi bi, osatotsɛmɛ! ejakaa nyɛ fiaa gbali ɔmɛ a yɔkɔ ɔmɛ, nɛ nyɛ dlaa dali ɔmɛ a yɔkɔ* ɔmɛ a he saminyayoo, 30  nɛ nyɛ deɔ ke, ‘Kaa wa hi si ngɛ wa nɛmɛ ɔmɛ a be ɔ mi ɔ, jinɛ wa ko piɛɛ we a he kɛ pue we gbali ɔmɛ a muɔ si.’ 31  Enɛ ɔ he ɔ, nyɛ nitsɛmɛ nyɛ ngɛ odase yee kɛ ngɛ nyɛ he sie kaa nihi nɛ a gbe gbali ɔmɛ ɔ a bimɛ ji nyɛ. 32  Ke jã a, lɛɛ nyɛɛ gbe ní tsumi nɛ nyɛ nɛmɛ ɔmɛ je sisi ɔ nya. 33  “Sinɔhi, sinɔ duɔtsɛmɛ a nina, kɛ nyɛ ma plɛ kɛ tu Gehena* kojomi ɔ nya fo kɛɛ? 34  Enɛ ɔ he je ɔ, i ngɛ gbali ɔmɛ kɛ juɛmitsɛmɛ ɔmɛ kɛ ma ní tsɔɔli ɔmɛ nyɛ ngɔ tsɔe. Nyɛ maa gbe a ti ni komɛ nɛ nyɛ maa sɛu mɛ ngɛ tsohi a nɔ, nɛ nyɛ maa fiaa a ti ni komɛ hu kpa ngɛ nyɛ kpe he ɔmɛ, nɛ nyɛ maa wa mɛ yi mi kɛ je ma kake mi kɛ ya ma kpa mi, 35  kɛkɛ ɔ, dali a muɔ tsuo nɛ nihi pue si ngɛ zugba a nɔ ɔ ma ba tloo nyɛ. Kɛ je Habɛl nɛ ji dalɔ ɔ muɔ ɔ nɔ, kɛ ba su Zakaria, Barakia bi ɔ nɛ nyɛ gbe lɛ ngɛ jami he ɔ kɛ afɔle sami la tɛ ɔ a kpɛti ɔ muɔ ɔ nɔ. 36  I ngɛ nyɛ dee ngɛ anɔkuale mi ke, ní nɛ ɔmɛ tsuo maa ba yi nɔ nɛ ɔ nɔ. 37  “Yerusalɛm, Yerusalɛm, mo nɛ o gbeɔ gbali ɔmɛ, nɛ o fiaa nihi nɛ a tsɔɔ mɛ o ngɔ ɔ tɛ. I bɔ mɔde si abɔ kaa ma bua o bimɛ ɔmɛ a nya kaa bɔ nɛ kungwɔ buaa e bimɛ a nya kɛ woɔ e pɛli sisi ɔ! Se o kplɛɛ we. 38  Hyɛ! A je nyɛ we ɔ he ngɔ ha nyɛ.* 39  I ngɛ nyɛ dee ke, kɛ je piɔ kɛ yaa a, nyɛ be mi nae hu kɛ yaa si be nɛ nyɛ ma de ke, ‘A jɔɔ nɔ nɛ e ma ngɛ Yehowa* biɛ ɔ mi ɔ!’”

Sisi ningma

A ji daka nyafinyafihi nɛ ngmamihi ngɛ mi nɛ Israel nyumuhi fĩɔ ngɛ a hɛ nya loo a nine he kaa sɛbɛ kɛ poɔ a he piɛ.
Aloo “he nɛ hi pe kulaa.”
Aloo “Tsɔɔlɔ.”
Hyɛ Munyu Komɛ A Sisi Tsɔɔmi.
Aloo “kaimi yɔkɔ.”
Hyɛ Munyu Komɛ A Sisi Tsɔɔmi.
E ma nyɛ maa pee kaa “e maa fɔ si gu kaa we doku.”
Hyɛ Munyu Komɛ A Sisi Tsɔɔmi.