Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Mateo 22:1-46

MI MUNYUHI

  • Yo kpeemi okplɔɔ ngmɛmi he nɔ́ he tomi nɔ́ ɔ (1-14)

  • Mawu kɛ Kaisare (15-22)

  • Gbogboehi a si tlemi ɔ he sane bimi (23-33)

  • Kitahi enyɔ nɛ pe kulaa (34-40)

  • Anɛ David bi ji Kristo ɔ lo? (41-46)

22  Yesu ngɔ nɔ́ he tomi níhi kɛ tsu ní ekohu benɛ e kɛ ni ɔmɛ ngɛ munyu tue ɔ. E de ke:  “A kɛ hiɔwe Matsɛ Yemi ɔ ma nyɛ maa to matsɛ ko nɛ e ngmɛ yo kpeemi okplɔɔ kɛ ha e binyumu ɔ he.  E tsɔ e nyɔguɛ ɔmɛ konɛ a ya tsɛ nihi nɛ e fɔ mɛ nine ɔ kɛ ba yo kpeemi okplɔɔ ngmɛmi ɔ sisi, se a sume kaa a maa ba.  E kpale tsɔ nyɔguɛ kpahi nɛ e de mɛ ke, ‘Nyɛ de nihi nɛ a fɔ mɛ nine ɔ ke: “Hyɛ! i gbe niye ní ɔ nya, i gbe ye na ku ɔmɛ kɛ ye lohwe ɔmɛ nɛ a wo zɔ ɔ, nɛ a gbe nɔ́ fɛɛ nɔ́ nya. Nyɛɛ ba yo kpeemi okplɔɔ ngmɛmi ɔ sisi.”’  Se a pui a nya mi nɛ a je kɛ ho, nɔ kake ho lɛ nitsɛ e ngmɔ mi ya, nɔ kpa hu ho konɛ e ya ye jua;  se ni nɛmɛ nɛ a piɛ ɔ lɛɛ, a nuu e nyɔguɛ ɔmɛ nɛ a pee mɛ nisɛ níhi, nɛ a gbe mɛ.  “Matsɛ ɔ mi mi fu wawɛɛ, nɛ e tsɔ e ta buli ɔmɛ nɛ a ya gbe jamɛ a nɔ gbeli ɔmɛ nɛ a sã a ma a.  Lɔ ɔ se ɔ, e de e nyɔguɛ ɔmɛ ke, ‘Be su nɛ wa maa je yo kpeemi okplɔɔ ngmɛmi ɔ sisi, se nihi nɛ i fɔ mɛ nine ɔ, a sɛ.  Lɔ ɔ he ɔ, nyɛɛ ya gbɛjegbɛ ɔmɛ nɛ a je ma a mi ɔmɛ a nɔ nɛ nyɛɛ fɔ nɔ fɛɛ nɔ nɛ nyɛ maa na a nine kɛ ba yo kpeemi okplɔɔ ngmɛmi ɔ sisi.’ 10  Kɛkɛ nɛ jamɛ a nyɔguɛ ɔmɛ je kpo kɛ ya gbɛjegbɛ ɔmɛ a nɔ nɛ a ya bua nihi tsuo nɛ a na a nya, nimli yayamihi kɛ nimli kpakpahi; nɛ tsu nɛ a ngɛ yo ɔ kpee ngɛ mi ɔ hyi tɔ kɛ nihi nɛ a ba okplɔɔ ngmɛmi ɔ sisi ɔ. 11  “Benɛ matsɛ ɔ ba konɛ e ba hyɛ nibwɔ ɔmɛ ɔ, e hɛ ngmɛ gba nyumu ko nɛ e wui yo kpeemi tade ɔ eko ɔ nɔ. 12  Enɛ ɔ he ɔ, e bi lɛ ke, ‘Awetsɛ, kɛ o plɛ kɛ ba hiɛ ɔ kɛɛ be mi nɛ o wui yo kpeemi tade ɔ eko ɔ?’ E nyɛ we nɛ e je nya. 13  Kɛkɛ nɛ matsɛ ɔ de e sɔmɔli ɔmɛ ke, ‘Nyɛɛ fĩ e nine kɛ e nane nɛ nyɛ sake lɛ ngɔ fɔ diblii ɔ mi ngɛ we ɔ se. Lejɛ ɔ ji he nɛ e ma fo ya nɛ e ma kpe e lungu nya ngɛ.’ 14  “Ejakaa a fɔ nihi babauu nine, se nihi bɔɔ pɛ nɛ a hla.” 15  Lɔ ɔ se ɔ, Farisi bi ɔmɛ ho nɛ a ya so bɔ nɛ a maa pee ha konɛ a gu e nya mi munyu nɔ nɛ́ a nine nɛ su e nɔ. 16  Enɛ ɔ he ɔ, a tsɔ a kaseli ɔmɛ kɛ nihi nɛ a fĩ Hɛrode ma kudɔmi kuu ɔ se ɔ kɛ ya e ngɔ, nɛ a ya bi lɛ ke: “Tsɔɔlɔ, wa le kaa o ji anɔkualetsɛ, nɛ o tsɔɔ Mawu blɔ ɔ ngɛ anɔkuale mi, nɛ o pee we níhi konɛ o kɛ sa nɔmlɔ ko hɛ mi, ejakaa o hyɛ we bɔ nɛ nihi ngɛ ha ngɛ kpo nɔ. 17  Lɔ ɔ he ɔ, mo de wɔ, kɛ o susu kɛɛ? Anɛ mlaa ngmɛɛ blɔ* kaa a wo tó* kɛ ha Kaisare aloo a ko wo?” 18  Se akɛnɛ Yesu le a susumi yayami ɔ he je ɔ, e bi mɛ ke: “Osatotsɛmɛ, mɛni he je nɛ nyɛ ngɛ mi kae ɔ? 19  Ma hyɛ sika nɛ a kɛ woɔ tó ɔ.” A ngɔ denario* kake kɛ ba ha lɛ. 20  E bi mɛ ke: “Mɛnɔ foni kɛ ningma ji nɛ ɔ?” 21  A ha lɛ heto ke: “Kaisare níhi.” Kɛkɛ nɛ e de mɛ ke: “Lɛɛ nyɛɛ ngɔ Kaisare níhi ngɔ ha Kaisare, se nyɛɛ ngɔ Mawu níhi ngɔ ha Mawu.” 22  Benɛ a nu nɔ́ nɛ ɔ, e pee mɛ nyakpɛ nɛ a je e he kɛ ho. 23  Jamɛ a ligbi ɔ, Saduki bi ɔmɛ nɛ mɛɛ a deɔ ke gbogboehi a si tlemi ko be ɔ ba nɛ a ba bi lɛ ke: 24  “Tsɔɔlɔ, Mose de ke: ‘Ke nyumu ko be bimɛ nɛ e gbo ɔ, e nyɛminyumu nɛ ngɔ e yo ɔ nɛ e kɛ lɛ nɛ fɔ bimɛ ha e nyɛminyumu ɔ.’ 25  Waa kɛ nyɛmimɛ nyumu kpaago komɛ hi si. Kekle nɔ ɔ ngɔ yo nɛ e gbo, nɛ akɛnɛ e be bimɛ he je ɔ, e si e yo ɔ ngɔ ha e nyɛminyumu ɔ. 26  Jã nɔuu nɛ e ba ngɛ nɔ enyɔne ɔ, kɛ nɔ etɛne ɔ, kɛ ya su nɔ kpaagone ɔ nɔ. 27  Nyagbe ɔ, yo ɔ ba gbo. 28  Lɛɛ ngɛ gbogboehi a si tlemi ɔ mi ɔ, ngɛ nimli kpaago ɔmɛ a kpɛti ɔ, mɛnɔ lɛ yo ɔ maa pee e yo? Ejakaa mɛ tsuo a kɛ lɛ hi si kaa a yo.” 29  Yesu he nɔ nɛ e de mɛ ke: “Nyɛ susumi ɔ dɛ, ejakaa nyɛ li Ngmami ɔ, nɛ nyɛ li Mawu he wami ɔ hulɔ; 30  ejakaa ngɛ gbogboehi a si tlemi ɔ mi ɔ, nyumuhi be yo ngɔe, nɛ a kɛ yihi hu be gba hae, mohu ɔ, a maa hi kaa bɔfohi nɛ a ngɛ hiɔwe. 31  Ngɛ nɔ́ nɛ kɔɔ gbogboehi a si tlemi ɔ he ɔ, anɛ nyɛ kane we nɔ́ nɛ Mawu de nyɛ ɔ hyɛ lo? E de ke: 32  ‘Imi ji Abraham Mawu ɔ, kɛ Isak Mawu ɔ, kɛ Yakɔb Mawu ɔ nɛ.’ E ji hɛ kali ɔmɛ a Mawu, se pi ni gbogboe ɔmɛ a Mawu.” 33  Benɛ asafo kuu ɔmɛ nu nɔ́ nɛ ɔ, e ní tsɔɔmi ɔ ha nɛ a nya kpɛ a he. 34  Benɛ Farisi bi ɔmɛ na kaa e ha nɛ munyu ta Saduki bi ɔmɛ a nya mi ɔ, a pee kake kɛ ba e ngɔ. 35  Nɛ a ti nɔ kake nɛ e le Mlaa a saminya a ka lɛ. E bi lɛ ke: 36  “Tsɔɔlɔ, mɛni ji kita nɛ pe kulaa ngɛ Mlaa a mi?” 37  E de lɛ ke: “‘E sa nɛ o suɔ Yehowa* o Mawu ɔ kɛ o tsui tsuo kɛ o susuma* tsuo kɛ o juɛmi tsuo.’ 38  Enɛ ɔ ji kita nɛ pe kulaa kɛ kekleekle nɔ́. 39  Enyɔne ɔ hu ngɛ kaa jã kɛ̃. Lɔ ɔ ji nɛ ɔ nɛ: ‘E sa nɛ o suɔ o nyɛmi kaa bɔ nɛ o suɔ o he ɔ.’ 40  Kita enyɔ nɛ ɔmɛ a he nɛ Mlaa a kɛ Gbali ɔmɛ tsuo kpla.” 41  Jehanɛ ɔ, benɛ Farisi bi ɔmɛ bua a he nya a, Yesu bi mɛ ke: 42  “Kɛ nyɛ susu ngɛ Kristo ɔ he ha kɛɛ? Mɛnɔ bi ji lɛ?” A ha lɛ heto ke: “David bi.” 43  E bi mɛ ke: “Lɛɛ kɛ e ba kɛɛ nɛ Mawu mumi ɔ ha nɛ David tsɛ lɛ ke Nyɔmtsɛ benɛ e de ke, 44  ‘Yehowa de ye Nyɔmtsɛ ɔ ke: “Hii si ngɛ ye hiɔ nɔ kɛ yaa si ma ngɔ o he nyɛli ɔmɛ kɛ wo o nane si”’ ɔ? 45  Ke David tsɛ lɛ ke Nyɔmtsɛ ɔ, lɛɛ kɛ e ba kɛɛ nɛ e peeɔ e bi mɔ?” 46  Nɛ nɔ ko nɔ ko nyɛ we nɛ e de nɔ́ ko kɛ ha lɛ heto, nɛ kɛ je jamɛ a ligbi ɔ nɔ kɛ yaa a, nɔ ko bɔɛ mɔde kaa e ma bi lɛ sane kpa ko hu.

Sisi ningma

Aloo “e da blɔ.”
Hela, “yi tó.” E ji tó nɛ a heɔ ngɛ nɔ fɛɛ nɔ dɛ.
Hyɛ Munyu Komɛ A Sisi Tsɔɔmi.
Hyɛ Munyu Komɛ A Sisi Tsɔɔmi.
Hyɛ Munyu Komɛ A Sisi Tsɔɔmi.