Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 20:1-34

MI MUNYUHI

  • Wai ngmɔ mi ní tsuli kɛ hiɔwo nɛ sɔ fiee (1-16)

  • A gba Yesu gbenɔ ɔ kɛ fɔ si ekohu (17-19)

  • Blɔ nya bimi ngɛ Matsɛ Yemi ɔ mi (20-28)

    • Yesu ji kpɔmi nɔ́ ngɛ nihi babauu a he (28)

  • A tsa nyumu hɛ yuyuili enyɔ (29-34)

20  “Ejakaa hiɔwe Matsɛ Yemi ɔ ngɛ kaa nyɔmtsɛ ngɛ we ko mi nɛ e je kpo mɔtu mla konɛ e ya hla apaatsɛmɛ nɛ a ya tsu ní ngɛ e wai ngmɔ mi.  Benɛ e kɛ apaatsɛmɛ ɔmɛ ye nya kaa ngɛ ligbi ɔ mi ɔ, e ma ha mɛ denario* kakaaka nɛ a kplɛɛ nɔ ɔ, e wo mɛ blɔ kɛ ho e wai ngmɔ ɔ mi ya.  Benɛ e je kpo ekohu ngɛ ngmlɛfia etɛne* ɔ mi ɔ, e na ni kpahi nɛ a daa si ngɛ jua a nɔ nɛ nɔ ko bɔɛ mɛ apaa;  nɛ e de mɛ ke, ‘Nyɛ hu nyɛɛ ya ye wai ngmɔ ɔ mi, nɛ ma wo nyɛ hiɔ nɛ sa.’  Kɛkɛ nɛ a ho. Maa pee ngmlɛfia ekpane* ɔ kɛ ngmlɛfia nɛɛne* ɔ mi ɔ, e kpale je kpo nɛ e ya pee jã kɛ̃.  Nyagbe ɔ, maa pee ngmlɛfia nyɔngma kɛ kakene* ɔ mi ɔ, e je kpo nɛ e na ni kpahi nɛ a daa si, nɛ e bi mɛ ke, ‘Mɛni he je nɛ nyɛ daa si ngɛ hiɛ ɔ ligbi mluku ɔ tsuo nɛ nɔ ko bɔɛ nyɛ apaa a?’  A he nɔ ke, ‘Ejakaa nɔ ko ha we wɔ ní tsumi.’ E de mɛ ke, ‘Nyɛ hu nyɛɛ ya wai ngmɔ ɔ mi.’  “Benɛ e su gbɔkuɛ ɔ, wai ngmɔtsɛ ɔ de nyumu nɛ e hyɛɛ e níhi a nɔ ɔ ke, ‘Tsɛ ní tsuli ɔmɛ nɛ o wo mɛ hiɔ. Moo je sisi kɛ je sekpɛtsɛmɛ ɔmɛ a nɔ nɛ o ya gbe nya ngɛ kekletsɛmɛ ɔmɛ a nɔ.’  Benɛ ngmlɛfia nyɔngma kɛ kakene bi ɔmɛ ba a, a ti nɔ fɛɛ nɔ nine su denario* kake nɔ. 10  Enɛ ɔ he ɔ, benɛ kekletsɛmɛ ɔmɛ ba a, a susu kaa a nine maa su hiɔwo fuu nɔ, se mɛ hu a ha mɛ denario* kakaaka. 11  Benɛ a nine su nɔ ɔ, a bɔni munyu huitihuiti tumi kɛ ngɛ nyɔmtsɛ ngɛ we ɔ mi ɔ sie, 12  nɛ a de ke, ‘Sekpɛtsɛmɛ nɛ ɔmɛ tsu ní ngmlɛfia kake pɛ, se wɔ nɛ wa gbo dengme kɛ tsu ní ligbi ɔ tsuo nɛ pu tsoo wɔ ɔ, o wo waa kɛ mɛ tsuo hiɔ fiee!’ 13  Se e de a kpɛti nɔ kake ke, ‘Awetsɛ, i tɔ̃ we o nɔ. Tse wa ye nya kaa ma ha mo denario* kake nɛ o kplɛɛ, aloo pi jã? 14  Moo ngɔ o nɔ́ ɔ nɛ o ho. I suɔ kaa ma ha sekpɛ nɔ nɛ ɔ kaa bɔ nɛ i ha mo ɔ nɔuu. 15  Anɛ i be he blɔ kaa i ngɔɔ imi nitsɛ ye níhi kɛ peeɔ nɔ́ nɛ i suɔ lo? Aloo kpakpa nɛ i peeɔ ɔ* he nɛ o hɛ ngmɛ ngɛ tsue* ngɛ ɔ?’ 16  Jã kɛ̃ nɛ sekpɛtsɛmɛ ma ba pee kekletsɛmɛ, nɛ kekletsɛmɛ ma ba pee sekpɛtsɛmɛ.” 17  Benɛ Yesu ngɛ kuɔe kɛ yaa Yerusalɛm ɔ, e tsɛ e kaseli 12 ɔmɛ kɛ ya he ko banee ngɛ blɔ ɔ nɔ, nɛ e de mɛ ke: 18  “Hyɛ! Wa ngɛ kuɔe kɛ yaa Yerusalɛm, nɛ a maa ngɔ nɔmlɔ Bi ɔ kɛ wo osɔfo nikɔtɔma amɛ kɛ womi ngmali ɔmɛ a dɛ mi. A maa bu lɛ gbenɔ fɔ 19  nɛ a maa ngɔ lɛ kɛ ha nihi nɛ a je je ma amɛ a mi ɔ nɛ a maa ye e he fɛu, nɛ a maa fiaa lɛ kpa, nɛ a maa gbe lɛ ngɛ tso nɔ; nɛ ngɛ ligbi etɛne ɔ nɔ ɔ, a ma tle lɛ si.” 20  Lɔ ɔ se ɔ, Zebedeo binyumu ɔmɛ a yayo kɛ e binyumu ɔmɛ ba Yesu ngɔ nɛ e ba kpla si nɛ e kɛ e hiami nɔ́ ko fɔ Yesu hɛ mi. 21  Yesu bi lɛ ke: “Mɛni o ngɛ hlae?” E ha lɛ heto ke: “De nɛ ye binyumu enyɔ nɛ ɔmɛ a ti nɔ kake nɛ e hi si ngɛ o hiɔ nɔ, nɛ nɔ kake hu nɛ e hi si ngɛ o muɔ nɔ ngɛ o Matsɛ Yemi ɔ mi.” 22  Yesu he nɔ ke: “Nyɛ li nɔ́ nɛ nyɛ ngɛ bie ɔ. Anɛ nyɛ ma nyɛ maa nu kplu nɛ i ma numi ɔ lo?” A he nɔ ke: “Wa ma nyɛ.” 23  E de mɛ ke: “Niinɛ, nyɛ maa nu ye kplu ɔ, se kaa nɔ ko maa hi si ngɛ ye hiɔ nɔ loo ye muɔ nɔ ɔ lɛɛ, pi ye blɔ nya ji lɔ ɔ, mohu ɔ, e ngɛ kɛ ha nihi nɛ ye Tsɛ ɔ dla ngɔ to ɔ.” 24  Benɛ ni nyɔngma amɛ nɛ a piɛ ɔ nu nɔ́ nɛ ɔ he ɔ, a mi mi fu nyɛmimɛ enyɔ ɔmɛ. 25  Se Yesu tsɛ mɛ kɛ ba e ngɔ nɛ e de mɛ ke: “Nyɛ le kaa je ma amɛ a nɔ yeli ɔmɛ yeɔ a nɔ, nɛ nimli ngua amɛ yeɔ a nɔ kɛ he wami. 26  E sɛ nɛ e ba jã ngɛ nyɛ kpɛti; mohu ɔ, nɔ fɛɛ nɔ nɛ e suɔ kaa e pee nɔmlɔ ngua ngɛ nyɛ kpɛti ɔ, e sa nɛ e pee nyɛ sɔmɔlɔ, 27  nɛ nɔ fɛɛ nɔ nɛ e suɔ kaa e ye kekleekle blɔ he ngɛ nyɛ kpɛti ɔ, e sa nɛ e pee nyɛ nyɔguɛ. 28  Kaa bɔ nɛ e ji ngɛ nɔmlɔ Bi ɔ blɔ fa mi ɔ, e ba, pi kaa a ba sɔmɔ lɛ, se mohu konɛ e ba sɔmɔ nɛ e ngɔ e wami* kɛ ha kaa kpɔmi nɔ́ nɛ e kɛ kpɔ̃ nihi babauu.” 29  Benɛ a ngɛ Yɛriko ma a mi jee ɔ, nimli babauu nyɛɛ e se. 30  Nɛ hyɛ! nyumu hɛ yuyuili enyɔ hii si ngɛ gbɛjegbɛ ɔ he, nɛ a nu kaa Yesu bee, nɛ a kpa ngmlaa ke: “Nyɔmtsɛ, David Bi, naa wɔ mɔbɔ!” 31  Se asafo kuu ɔ kã a hɛ mi, nɛ a de mɛ ke a pee kɔ̃; se a kpa ngmlaa wawɛɛ po pe kekle ɔ, nɛ a de ke: “Nyɔmtsɛ, David Bi, naa wɔ mɔbɔ!” 32  Enɛ ɔ he ɔ, Yesu da si, nɛ e tsɛ mɛ, nɛ e bi mɛ ke: “Mɛni nyɛ suɔ nɛ ma pee ha nyɛ?” 33  A de lɛ ke: “Nyɔmtsɛ, ha nɛ wa hɛ ngmɛ ɔmɛ nɛ a bli.” 34  A he pee Yesu mɔbɔ, nɛ e ta a hɛ ngmɛ ɔmɛ a he, nɛ amlɔ nɔuu nɛ a bɔni nɔ́ hyɛmi ekohu, nɛ a nyɛɛ e se.

Sisi ningma

Hyɛ Munyu Komɛ A Sisi Tsɔɔmi.
Maa pee mɔtu ngmlɛ 9.
Maa pee piani ngmlɛ 12.
Maa pee piani ngmlɛ 3.
Maa pee gbɔkuɛ ngmlɛ 5.
Hyɛ Munyu Komɛ A Sisi Tsɔɔmi.
Hyɛ Munyu Komɛ A Sisi Tsɔɔmi.
Hyɛ Munyu Komɛ A Sisi Tsɔɔmi.
Aloo “ye nɔ nɔ́ hami faa a.”
Hela, “Aloo o hɛ ngmɛ hí akɛnɛ i peeɔ kpakpa a he je lo?”
Aloo “susuma.”