Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 11:1-30

MI MUNYUHI

  • Yohane Nɔ Baptisilɔ ɔ yi jemi (1-15)

  • A kã yi nɔhi nɛ a he we munyu ɔ a hɛ mi (16-24)

  • Yesu je e Tsɛ ɔ yi kaa e dloo he si bali (25-27)

  • Yesu kuɛpã tso ɔ haa nɔ he jɔmi (28-30)

11  Benɛ Yesu kɛ blɔ tsɔɔmi nɛ ɔmɛ ha e kaseli 12 ɔmɛ ta a, e je lejɛ ɔ kɛ ho konɛ e ya tsɔɔ ní nɛ e fiɛɛ ngɛ a ma amɛ a mi.  Se benɛ Yohane ngɛ tsu ɔ mi ɔ, e nu Kristo ɔ ní tsumi ɔmɛ a he, nɛ e tsɔ e kaseli ɔmɛ  konɛ a ya bi lɛ ke: “Anɛ mo ji Nɔ Nɛ E Ma a lo, aloo e sa nɛ waa hyɛ nɔ kpa blɔ?”  Yesu ha mɛ heto ke: “Nyɛɛ ya nɛ nyɛ ya de Yohane níhi nɛ nyɛ ngɛ nue kɛ níhi nɛ nyɛ ngɛ nae ɔ:  Amlɔ nɛ ɔ, hɛ yuyuili ngɛ nɔ́ hyɛe, nɛ glɔtsɛmɛ ngɛ nyɛɛe, kpititsɛmɛ a he ngɛ tsɔe, nɛ nihi nɛ a nui nɔ́ ngɛ nɔ́ nue, a ngɛ gbogboehi a si tlee, nɛ a ngɛ sane kpakpa a fiɛɛe kɛ ngɛ ohiatsɛmɛ hae.  Nɔ nɛ ye he sane tɔ̃tɔ̃ we e nane ɔ ngɛ bua jɔmi.”  Benɛ Yohane kaseli ɔmɛ pue nɔ kɛ yaa a, Yesu bɔni Yohane he munyu tumi. E de asafo kuu ɔmɛ ke: “Mɛni nɛ nyɛ je kpo kɛ ya nga a nɔ konɛ nyɛ ya hyɛ ɔ? Go nɛ kɔɔhiɔ ngɛ lɛ mimiɛɛe lo?  Lɛɛ mɛni nɛ nyɛ je kpo kɛ ya konɛ nyɛ ya hyɛ ɔ? Nyumu ko nɛ e wo tade bɔdɔɔ* lo? Hyɛ, nihi nɛ a woɔ tade bɔdɔɔ ɔ, matsɛmɛ a wehi a mi nɛ a ngɛ.  Ke jã a, lɛɛ mɛni he je mɔ nɛ nyɛ je kpo ɔ? Anɛ konɛ nyɛ ya na gbalɔ ko lo? Ee, i ngɛ nyɛ dee ke, e pe gbalɔ kulaa. 10  Nɔmlɔ nɛ ɔ he nɛ a ngma ngɛ ke: ‘Hyɛ! i ngɛ ye tsɔlɔ ɔ tsɔe kɛ sɛ o hlami,* e ma dla o blɔ ɔ ngɔ to mo!’ ɔ nɛ. 11  Ngɛ anɔkuale mi ɔ, i ngɛ nyɛ dee ke, ngɛ nihi nɛ yihi fɔ mɛ a kpɛti ɔ, nɔ ko ti si hyɛ nɛ e pe Yohane Nɔ Baptisilɔ ɔ, se nɔ nyafii ngɛ hiɔwe Matsɛ Yemi ɔ mi ɔ pe lɛ. 12  Kɛ je Yohane Nɔ Baptisilɔ ɔ nɔ kɛ ba si amlɔ nɛ ɔ, hiɔwe Matsɛ Yemi ɔ ji oti nɛ nihi ngɛ mɔde bɔe wawɛɛ kaa a maa su he, nɛ nihi nɛ a ngɛ mɔde bɔe wawɛɛ ɔ, a nine ngɛ nɔ sue. 13  Gbali ɔmɛ kɛ Mlaa a tsuo gba kɛ ba su Yohane nɔ; 14  nɛ ke nyɛ suɔ kaa nyɛ maa kplɛɛ nɔ ɔ, lɛ ji ‘Eliya nɛ e maa ba a nɛ.’ 15  Ha nɔ nɛ e ngɛ tue ɔ nɛ e bu tue. 16  “Mɛnɔmɛ a he ma ngɔ yi nɔ nɛ ɔ kɛ to? A ngɛ kaa jokuɛwi nɛ a hii si ngɛ jua nɔ nɛ a tsɛ a huɛmɛ nɛ a kɛ mɛ fiɛɔ ɔ, 17  nɛ a ngɛ mɛ dee ke: ‘Wa kpa bɛ ha nyɛ, se nyɛ dui; wa wo ya, se nyɛ fo we.’ 18  Jã kɛ̃ nɛ benɛ Yohane ba a, e yi ní, nɛ e nui ní, se nyɛ de ke, ‘Daimonio ngɛ e mi.’ 19  Nɔmlɔ Bi ɔ lɛɛ nɛ e ba a, e yeɔ ní, nɛ e nuɔ ní, se nihi deɔ ke, ‘Hyɛ! Nyumu jiklɔɔtsɛ kɛ wai nulɔ, tó tsuli kɛ yayami peeli a huɛ.’ Se ngɛ enɛ ɔ tsuo se ɔ, níhi nɛ juɛmi tsuɔ ɔ, lɔ ɔ nɛ a kɛ buɔ lɛ dalɔ.”* 20  Kɛkɛ nɛ e tu munyu kɛ si mahi nɛ e tsu he wami ní tsumihi babauu ngɛ a mi ɔ, ejakaa a tsakee we a tsui. E de ke: 21  “Korazin, musu tloo mo! Betsaida, musu tloo mo! kaa a tsu nyakpɛ níhi nɛ a tsu ngɛ nyɛ mi ɔ ngɛ Tiro kɛ Sidon ɔ, jinɛ a ko ha kpekpe nɛ a ko hi si ngɛ la zu mi momoomo kɛ ko tsɔɔ kaa a tsake a tsui. 22  Se i ngɛ nyɛ dee ke e maa pee gbɔjɔɔ kɛ ha Tiro kɛ Sidon ngɛ Kojomi Ligbi ɔ nɔ pe nyɛ. 23  Nɛ mo Kapenaum, anɛ a ma wo o nɔ gojoo kɛ ya hiɔwe lo? Gbeje* nɛ o maa ya; ejakaa kaa a tsu he wami ní tsumihi nɛ a tsu ngɛ o mi ɔ ngɛ Sodom ɔ, jinɛ e ko hi si kɛ ba si mwɔnɛ ɔ ligbi nɛ ɔ. 24  Se i ngɛ mo dee ke, e maa pee gbɔjɔɔ kɛ ha Sodom zugba a ngɛ Kojomi Ligbi ɔ nɔ pe mo.” 25  Jamɛ a be ɔ mi ɔ, Yesu de ke: “Tsaatsɛ, hiɔwe kɛ zugba Nyɔmtsɛ, i ngɛ o yi jee ngɛ ma hɛ mi, ejakaa o ngɔ ní nɛ ɔmɛ kɛ laa juɛmitsɛmɛ kɛ ní leli, nɛ o je kpo ngɔ tsɔɔ jokuɛ tsɔwi. 26  Ee, Oo Tsaatsɛ, ngɛ anɔkuale mi ɔ, jã ji bɔ nɛ o suɔ. 27  Ye Tsɛ ɔ tu níhi tsuo kɛ wo ye dɛ mi, nɛ nɔ ko be nɛ e le Bi ɔ saminya, kaa ja Tsɛ ɔ; nɛ jã kɛ̃ nɛ nɔ ko be nɛ e le Tsɛ ɔ saminya, kaa ja Bi ɔ kɛ nɔ fɛɛ nɔ nɛ Bi ɔ suɔ kaa e ma ha nɛ e le Tsɛ ɔ pɛ. 28  Nyɛɛ ba ye ngɔ, nyɛ nihi tsuo nɛ nyɛ tloo tlomi nɛ e ngɛ nyɛ gbee ɔ, nɛ ma ha nɛ nyɛ he mi maa jɔ nyɛ. 29  Nyɛɛ ngɔ ye kuɛpã tso ɔ kɛ fɔ nyɛ nɔ nɛ nyɛɛ kase mi, ejakaa ye he jɔ, nɛ i baa ye he si kɛ jeɔ ye tsui mi, nɛ nyɛ he mi maa jɔ nyɛ.* 30  Ejakaa ye kuɛpã tso ɔ tloomi wɛ,* nɛ ye tlomi ɔ hu jiɔ we.”

Sisi ningma

Aloo “tade saminyayoo.”
Hela, “nyɛɛ o hɛ mi.”
Aloo “woɔ lɛ nguɔ.”
Aloo “Hades,” okadi peemi mi he ko nɛ gbogboe ɔmɛ ngɛ. Hyɛ Munyu Komɛ A Sisi Tsɔɔmi.
Aloo “nyɛ susumahi a he maa jɔ mɛ.”
Aloo “tloomi yi.”