Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Mateo 10:1-42

MI MUNYUHI

  • Bɔfo 12 ɔmɛ (1-4)

  • Sɔmɔmi ní tsumi ɔ he blɔ tsɔɔmihi (5-15)

  • A maa wa kaseli ɔmɛ yi mi (16-25)

  • Yee Mawu gbeye, se pi adesahi (26-31)

  • Pi tue mi jɔmi, se klaate (32-39)

  • Yesu kaseli ɔmɛ nɛ a ma ha mɛ hɛ mi (40-42)

10  Lɔ ɔ he ɔ, e tsɛ e kaseli 12 ɔmɛ kpe, nɛ e ha mɛ he wami ngɛ mumihi nɛ a he tsɔ we a nɔ, konɛ a nyɛ nɛ a hia mɛ, nɛ́ a tsa hiɔ slɔɔtohi kɛ gbɔjɔmi slɔɔtohi.  Bɔfo 12 ɔmɛ a biɛhi ji nɛ ɔmɛ ɔ nɛ: Kekleekle ɔ, Simon, nɔ nɛ a tsɛɛ lɛ ke Petro hulɔ ɔ, kɛ e nyɛminyumu Andrea; Zebedeo bi Yakobo kɛ e nyɛminyumu Yohane;  Filipo kɛ Batolomeo; Toma kɛ Mateo nɛ ji tó tsulɔ ɔ; Alfeo bi Yakobo; Tadeo;  Simon nɛ ji kãtsɛ ɔ; kɛ Yudas Iskariɔt, nɔ nɛ pee se ɔ, e tsɔɔ Yesu se blɔ ɔ.  Yesu tsɔ nimli 12 nɛ ɔmɛ, nɛ e kɛ blɔ tsɔɔmi nɛ ɔmɛ ha mɛ: “Nyɛ ko gba kɛ ya je ma amɛ a gbɛjegbɛ ko nɔ, nɛ nyɛ ko sɛ Samaria bi ɔmɛ a ma ko mi hulɔ;  mohu ɔ, nyɛ tsa nɔ nɛ nyɛɛ ya Israel we ɔ jijɔhi nɛ a laa amɛ a ngɔ.  Ke nyɛ yaa a, nyɛɛ fiɛɛ nɛ nyɛ de ke: ‘Hiɔwe Matsɛ Yemi ɔ su si ta.’  Nyɛ tsa hiɔtsɛmɛ, nyɛ tle gbogboehi a si, nyɛ ha nɛ kpititsɛmɛ a he nɛ tsɔ, nyɛɛ hia daimoniohi. Nyɛ ná lɛ yaka gu, nyɛɛ ngɔ kɛ ha yaka gu.  Nyɛ ko ngɔ sika tsu aloo sika hiɔ aloo akɔblee kɛ wo nyɛ mlɛmi fimi níhi nɛ nyɛɛ kɛ sika woɔ mi ɔmɛ a mi, 10  jã kɛ̃ nɛ ke nyɛ yaa a, nyɛ ko hɛɛ niye ní kotoku, aloo tade enyɔ,* aloo tokota, aloo dɛma tso, ejakaa ní tsulɔ ɔ, e nya mi ngma sa lɛ. 11  “Ma fɛɛ ma aloo kɔpe fɛɛ kɔpe nɛ nyɛ maa sɛ mi ɔ, nyɛ hla nɔ nɛ sa ngɛ lejɛ ɔ, nɛ nyɛɛ hi lejɛ ɔ kɛ yaa si be nɛ nyɛ maa je. 12  Ke nyɛ sɛ we ko mi ɔ, nyɛ fɔ nihi nɛ a ngɛ we ɔ mi ɔ. 13  Ke we ɔ sa a, lɛɛ nyɛ ha nɛ tue mi jɔmi nɛ nyɛ ha lɛ ɔ nɛ hi e nɔ; se ke we ɔ sɛ ɔ, lɛɛ nyɛ ha nɛ tue mi jɔmi nɛ nyɛ ha lɛ ɔ nɛ kpale kɛ ba nyɛ nɔ. 14  He fɛɛ he nɛ nyɛ maa ya nɛ nɔ ko be nyɛ hɛ mi hae, aloo e be nyɛ tue bue ɔ, ke nyɛ ngɛ jamɛ a we ɔ aloo jamɛ a ma a mi jee ɔ, nyɛ si nyɛ nane si konɛ bunyuku nɛ ngɛ nyɛ nane he ɔ nɛ je kɛ pue si. 15  I ngɛ nyɛ dee ngɛ anɔkuale mi ke, Kojomi Ligbi ɔ maa pee gbɔjɔɔ kɛ ha Sodom kɛ Gomora zugba a pe jamɛ a ma a. 16  “Hyɛ! i ngɛ nyɛ tsɔe kaa jijɔhi ngɛ ogbeteehi a kpɛti; enɛ ɔ he ɔ, nyɛ hɛ mi nɛ tɛ̃ kaa sinɔhi, se kɛ̃ ɔ, nyɛɛ pee nihi nɛ sane ko be a he kaa lahuɛhi. 17  Nyɛɛ hyɛ nyɛ he nɛ hi ngɛ nihi a he, ejakaa a maa ngɔ nyɛ kɛ ya kojomi hehi, nɛ a maa fiaa nyɛ kpa ngɛ a kpe he ɔmɛ. 18  Nɛ ye he ɔ, a maa ngɔ nyɛ kɛ ba amlaalohi kɛ matsɛmɛ a hɛ mi, nɛ lɔ ɔ maa pee odase yemi kɛ ha mɛ kɛ je ma amɛ. 19  Se ke a ngɔ nyɛ kɛ ya a, nyɛ ko hao ngɛ bɔ nɛ nyɛ maa tu munyu ha, aloo nɔ́ nɛ nyɛ ma de ɔ he, ejakaa a maa tsɔɔ nyɛ nɔ́ nɛ nyɛ ma de ngɛ jamɛ a ngmlɛfia a mi; 20  ejakaa pi nyɛ pɛ nɛ nyɛ ngɛ munyu ɔ tue ɔ, mohu ɔ, nyɛ Tsɛ ɔ mumi ɔ lɛ ngɛ munyu ɔ tue kɛ ngɛ nyɛ nɔ gue. 21  Jehanɛ se hu ɔ, nyɛmi maa ngɔ e nyɛmi kɛ ha konɛ a gbe lɛ, nɛ tsɛ hu maa ngɔ e bi kɛ ha, nɛ bimɛ maa te si ngɔ wo a fɔli nɛ a ma ha nɛ a gbe mɛ. 22  Nɛ ye biɛ ɔ he je ɔ, nihi tsuo maa nyɛ nyɛ, se nɔ nɛ e ma fĩ si kɛ ya si nyagbe ɔ, a ma he e yi wami. 23  Ke a wa nyɛ yi mi ngɛ ma ko mi ɔ, nyɛɛ tu fo kɛ ya ma kpa nɔ; ejakaa i ngɛ nyɛ dee ngɛ anɔkuale mi ke, nyɛ be nyɛe maa kpa mahi nɛ a ngɛ Israel kpɔ ɔ mi ɔ tsuo a mi nɛ ta loko nɔmlɔ Bi ɔ maa ba. 24  “Kaselɔ pa we e tsɔɔlɔ, nɛ jã kɛ̃ nɛ nyɔguɛ hu pa we e nyɔmtsɛ. 25  Ke kaselɔ ba pee kaa e tsɔɔlɔ, nɛ nyɔguɛ hu ba pee kaa e nyɔmtsɛ ɔ, lɔ ɔ kɛkɛ hiɛ. Ke nihi tsɛ nyɔmtsɛ ngɛ we ɔ mi ɔ ke Belzebuul* ɔ, lɛɛ kɛ a ma tsɛ e we mi bimɛ ɔmɛ ha kɛɛ? 26  Enɛ ɔ he ɔ, nyɛ ko ye mɛ gbeye, ejakaa nɔ́ ko be nɛ a bu nɔ, nɛ a be nɔ blie, nɛ nɔ́ ko be nɛ a ngɔ kɛ laa nɛ nihi be lee. 27  Nɔ́ nɛ i de nyɛ ngɛ diblii mi ɔ, nyɛ de ngɛ la nya, nɛ nɔ́ nɛ i wo nyɛ tue mi ɔ, nyɛɛ fiɛɛ ngɛ tsuhi a yi mi. 28  Nɛ nyɛ ko ye nihi nɛ a gbeɔ nɔmlɔ tso ɔ se a be nyɛe maa gbe susuma* a gbeye; mohu ɔ, nyɛɛ ye nɔ nɛ e ma nyɛ maa gbe susuma a kɛ nɔmlɔ tso ɔ tsuo ngɛ Gehena* a gbeye. 29  Tse sika nɛ a yeɔ ɔ mi nyafii pe kulaa* nɛ a kɛ heɔ otoklii enyɔ, aloo pi jã? Se kɛ̃ ɔ, a ti nɔ kake po nɔɛ zugba* nɛ́ nyɛ Tsɛ ɔ li he nɔ́ ko. 30  Se nyɛ yi bwɔmi tete po, a kane lɛ tsuo. 31  Lɔ ɔ he ɔ, nyɛ ko ye gbeye; nyɛ he jua wa kulaa pe otokliihi babauu. 32  “Enɛ ɔ he ɔ, nɔ fɛɛ nɔ nɛ e maa tsɔɔ kaa e le mi ngɛ nimli a hɛ mi ɔ, imi hu ma tsɔɔ kaa i le lɛ ngɛ ye Tsɛ nɛ e ngɛ hiɔwe ɔ hɛ mi. 33  Se nɔ fɛɛ nɔ nɛ e ma kua mi ngɛ nimli a hɛ mi ɔ, imi hu ma kua lɛ ngɛ ye Tsɛ nɛ e ngɛ hiɔwe ɔ hɛ mi. 34  Nyɛ ko susu kaa i ngɔ tue mi jɔmi kɛ ba zugba a nɔ; pi tue mi jɔmi nɛ i kɛ ba, mohu ɔ, klaate. 35  Ejakaa i ba konɛ ma ha nɛ mi gbami nɛ ba nihi a kpɛti, nyumu maa te si kɛ wo e tsɛ, nɛ biyo maa te si kɛ wo e yayo, nɛ nganyɛ* maa te si kɛ wo e nganyɛ.* 36  Niinɛ, nɔ nitsɛ e we mi bimɛ ma plɛ pee e he nyɛli. 37  Nɔ fɛɛ nɔ nɛ e suɔ e tsɛ aloo e nyɛ sane wawɛɛ pe imi ɔ, e sɛ kaa e ba peeɔ ye kaselɔ; nɛ nɔ fɛɛ nɔ nɛ e suɔ e binyumu aloo e biyo sane wawɛɛ pe imi ɔ, e sɛ kaa e ba peeɔ ye kaselɔ. 38  Nɛ nɔ fɛɛ nɔ nɛ e wo we e sɛumi tso* kɛ nyɛɛ we ye se ɔ, e sɛ kaa e ba peeɔ ye kaselɔ. 39  Nɔ fɛɛ nɔ nɛ e nine maa su e susuma* nɔ ɔ, e maa laa lɛ, se nɔ fɛɛ nɔ nɛ e susuma* maa laa lɛ ngɛ ye he ɔ, e nine maa su nɔ. 40  “Nɔ fɛɛ nɔ nɛ e ma ha nyɛ hɛ mi ɔ, e ha imi hu hɛ mi, nɛ nɔ fɛɛ nɔ nɛ e ma ha mi hɛ mi ɔ, e ha Nɔ nɛ e tsɔ mi ɔ hu hɛ mi. 41  Nɔ fɛɛ nɔ nɛ e haa gbalɔ hɛ mi akɛnɛ e ji gbalɔ he je ɔ, e nine maa su gbalɔ hiɔwo nɔ, nɛ nɔ fɛɛ nɔ nɛ e haa dalɔ hɛ mi akɛnɛ e ji dalɔ he je ɔ, e nine maa su dalɔ hiɔwo nɔ. 42  Nɛ nɔ fɛɛ nɔ nɛ e haa nimli tsɔwi nɛ ɔmɛ a ti nɔ kake nyu nɛ mi jɔ kplu kake kaa e nu akɛnɛ e ji kaselɔ he je ɔ, i ngɛ nyɛ dee ngɛ anɔkuale mi ke, e hiɔwo be lɛ bɔe kɔkɔɔkɔ.”

Sisi ningma

Aloo “tade kpa.”
Biɛ nɛ a kɛ tsɛɛ Satan, nɛ ji daimoni ɔmɛ a nɔkɔtɔma aloo a nɔ yelɔ ɔ.
Aloo “wami,” nɛ ji hɛ kɛ nɔ fɔmi nɛ nɔ ko ngɛ kaa e ma ná wami.
Hyɛ Munyu Komɛ A Sisi Tsɔɔmi.
Hela, “asarion kake.”
Aloo “ti kɛ ba mɛ zugba.”
Aloo “binyumu ɔ yo ɔ.”
Aloo “binyumu ɔ nyɛ ɔ.”
Hyɛ Munyu Komɛ A Sisi Tsɔɔmi.
Aloo “wami.”
Aloo “wami.”