Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Maako 7:1-37

MI MUNYUHI

  • Yesu kpa adesahi a kusumihi a he bo (1-13)

  • Níhi nɛ jeɔ tsui mi lɛ bleɔ nɔ (14-23)

  • Foinike yo ɔ hemi kɛ yemi ɔ (24-30)

  • Yesu tsa nyumu ko nɛ e tue nui nɔ́ (31-37)

7  Jehanɛ ɔ, Farisi bi ɔmɛ kɛ womi ngmali ɔmɛ a ti ni komɛ nɛ a je Yerusalɛm kɛ ba a ba bua a he nya ngɛ e ngɔ.  Nɛ a na e kaseli ɔmɛ ekomɛ nɛ a ngɛ ní yee kɛ ninehi nɛ a ble mɛ, nɛ tsɔɔ kaa a fɔ we a dɛ.*  (Ejakaa Farisi bi ɔmɛ kɛ Yuda bi ɔmɛ tsuo lɛɛ, ja a fɔ a dɛ kɛ ya si a kɔni si loko a yeɔ ní. A peeɔ jã kɛ fĩɔ blematsɛmɛ a kusumi ɔ se,  nɛ ke a je jua mi kɛ ba a, ja a fɔ a he loko a yeɔ ní. Kusumi kpahi fuu hu ngɛ nɛ a nine su nɔ, nɛ a ngmɛɛ we he. Ekomɛ ji kpluhi, kɛ buɛhi, kɛ akɔblee níhi nɛ a baptisiɔ mɛ.)  Enɛ ɔ he ɔ, Farisi bi ɔmɛ kɛ womi ngmali ɔmɛ bi lɛ ke: “Mɛni he je nɛ o kaseli ɔmɛ nyɛɛ we blematsɛmɛ ɔmɛ a kusumi ɔ se, mohu ɔ, a yeɔ ní kɛ ninehi nɛ a ble mɛ ɔ?”  E de mɛ ke: “Nyɛ osatotsɛmɛ, e da blɔ kaa Yesaya gba ngɛ nyɛ he ke, ‘Nimli nɛ ɔmɛ a nya kɛkɛ nɛ a kɛ woɔ ye hɛ mi nyami, se a tsui lɛɛ, e je ye he kɛ ho tsitsaa ya.  A yaa nɔ nɛ a jaa mi yaka gu, ejakaa nimli a mlaahi ji níhi nɛ a tsɔɔ.’  Nyɛ ngmɛɛɔ Mawu kita a he kɛ fɔɔ si, nɛ nyɛ mɛtɛɔ adesahi a kusumi he.”  Jehanɛ hu ɔ, e de mɛ ke: “Nyɛ guɔ ga blɔ nɔ kɛ kuaa Mawu kita a konɛ nyɛɛ hɛɛ nyɛ kusumi ɔ mi. 10  Kaa nɔ hyɛmi nɔ́ ɔ, Mose de ke, ‘Buu o tsɛ kɛ o nyɛ,’ nɛ e de hu ke, ‘Ha nɛ a gbe nɔ fɛɛ nɔ nɛ e maa tu e tsɛ loo e nyɛ he munyu yayami* ɔ.’ 11  Se nyɛɛ lɛɛ nyɛ deɔ ke, ‘Ke nɔ ko de e tsɛ loo e nyɛ ke: “Nɔ́ fɛɛ nɔ́ nɛ i ngɛ nɛ o ma ná he se ɔ, e ji kɔban (nɛ ji, nike ní nɛ a jɔɔ nɔ kɛ ha Mawu)” ɔ,’ 12  nyɛ ha we nɛ e pee nɔ́ kake ngmelu po kɛ ha e tsɛ loo e nyɛ hu. 13  Enɛ ɔ he ɔ, nyɛ ngɔ kusumi nɛ nyɛ ngɛ nihi tsɔɔe ɔ kɛ puɛ Mawu munyu ɔ. Nɛ nyɛ peeɔ níhi fuu kaa kikɛ nɛ ɔ.” 14  Kɛkɛ nɛ e tsɛ asafo kuu ɔ kɛ ba e ngɔ ekohu nɛ e de mɛ ke: “Nyɛ tsuo nyɛɛ bu mi tue, konɛ nyɛɛ nu sisi. 15  Nɔ́ ko nɔ́ ko be nɛ jeɔ kpo nɔ blɔ kɛ sɛɛ nɔmlɔ mi nɛ ma nyɛ ma ble lɛ; mohu ɔ, níhi nɛ jeɔ nɔmlɔ mi kɛ baa a ji níhi nɛ bleɔ lɛ.” 16  —— 17  Jehanɛ ɔ, benɛ e je asafo kuu ɔ he kɛ ya sɛ we ko mi ɔ, e kaseli ɔmɛ bɔni lɛ nɔ́ he tomi nɔ́ ɔ he sane bimi. 18  Lɔ ɔ he ɔ, e bi mɛ ke: “Anɛ nyɛ hu nyɛ nui nɔ́ sisi kaa mɛ lo? Anɛ nyɛ li kaa nɔ́ fɛɛ nɔ́ nɛ jeɔ kpo nɔ blɔ kɛ sɛɛ nɔmlɔ mi ɔ be nyɛe ma ble lɛ, 19  ejakaa pi e tsui mi nɛ e sɛɛ, se mohu e mi mi e sɛɛ, nɛ e ya jeɔ kpo ngɛ niase yami he lo?” Lɔ ɔ he ɔ, Yesu tsɔɔ kaa niye ní tsuo he tsɔ. 20  Jehanɛ se hu ɔ, e de ke: “Nɔ́ nɛ jeɔ nɔmlɔ mi kɛ baa a lɛ bleɔ lɛ. 21  Ejakaa nimli a mi mi je, nɛ ji a tsui mi nɛ susumi yayamihi, ajuama bɔmihi,* jumihi, nɔmlɔ gbemihi, 22  gba puɛmi ní peepeehi, hɛkɔ, yi wu tso ní peepeehi, nɔ sisimi, nɔ buimi ngmlikiti,* hɛ tsumi, musu bɔmi, he nɔ womi, kɛ nɔ́ sisi nuimi jeɔ kɛ baa. 23  Ní yayami nɛ ɔmɛ tsuo jeɔ nɔmlɔ mi mi je kɛ baa, nɛ a bleɔ nɔmlɔ.” 24  E te si kɛ je lejɛ ɔ nɛ e pue nɔ kɛ ho Tiro kɛ Sidon kpokpa a nɔ ya. E ya sɛ we ko mi ngɛ lejɛ ɔ, nɛ e sume kaa nɔ ko nɛ le, se e nyɛ we nɛ e ngɔ e he kɛ laa. 25  Amlɔ nɔuu ɔ, yo ko nɛ mumi ko nɛ he tsɔ we ngɛ e biyo mi ɔ nu e he nɛ e ba nɛ e ba kpla si ngɛ e nane nya. 26  Yo ɔ ji Hela no, nɛ e je* Foinike ngɛ Siria; nɛ e ya nɔ nɛ e de lɛ ke e hia daimonio ɔ kɛ je e biyo ɔ mi. 27  Se e de yo ɔ ke: “Kekleekle ɔ, ha nɛ bimɛ ɔmɛ nɛ a tɔ, ejakaa e dɛ blɔ kaa a ngɔɔ bimɛ ɔmɛ a niye ní ɔ kɛ pueɔ si ha gbe bimɛ.” 28  Se yo ɔ he nɔ ke: “Ee, Nyɔmtsɛ, se gbe bimɛ ɔmɛ nɛ a ngɛ okplɔɔ ɔ sisi ɔ yeɔ bimɛ tsɔwi ɔmɛ a niye ní bibli ɔ.” 29  Enɛ ɔ he ɔ, Yesu de lɛ ke: “Akɛnɛ o de jã he je ɔ, yaa; daimonio ɔ je o biyo ɔ mi.” 30  Kɛkɛ nɛ yo ɔ je kɛ ho e we mi ya nɛ e ya na jokuɛ wayoo ɔ nɛ hwɔɔ si ngɛ sa nɔ nɛ daimonio ɔ je e mi. 31  Benɛ Yesu kpale e se kɛ je Tiro kpokpa a nɔ ɔ, e gu Sidon kɛ ya be ngɛ Dekapoli kpokpa a* nɔ kɛ ba Galilea Wo ɔ nya. 32  A ngɔ nyumu ko nɛ e tue nui nɔ́ nɛ e nyɛ we munyu tumi kɛ ba ha lɛ ngɛ hiɛ ɔ, nɛ a kpa lɛ pɛɛ kaa e ngɔ e nine kɛ pue e nɔ. 33  Nɛ Yesu ngɔ lɛ kɛ je ni ɔmɛ a kpɛti kɛ ya se banee. Kɛkɛ nɛ e ngɔ e nine nguɛhi kɛ wo nyumu ɔ tue mi, nɛ benɛ e la lada se ɔ, e pɛtɛ nyumu ɔ lilɛ he. 34  Nɛ benɛ e hyɛ hiɔwe ɔ, e wo mumi wawɛɛ nɛ e de lɛ ke: “Efata,” nɛ e sisi ji, “Bli.” 35  Kɛkɛ nɛ e tue bɔni nɔ́ numi, nɛ e lilɛ kpa a pɛne nɛ e bɔni munyu tumi saminya. 36  Nɛ e bɔ mɛ kɔkɔ kaa a ko de nɔ ko nɔ ko, se si abɔ nɛ e ngɛ mɛ kɔkɔ bɔe ɔ, si abɔ nɛ a ngɛ jajee kɛ ngɛ nihi tsɔɔe. 37  Ngɛ anɔkuale mi ɔ, a nya kpɛ a he wawɛɛ nitsɛnitsɛ nɛ a de ke: “E peeɔ nɔ́ fɛɛ nɔ́ saminya. E haa nɛ tuekpokutsɛmɛ nuɔ nɔ́, nɛ amuɛtihi hu tuɔ munyu.”

Sisi ningma

Nɛ tsɔɔ kaa a he tsɔ we ngɛ kusumi nya.
Aloo “e ma jɛ e nyɛ loo e tsɛ.”
Hela munyungu nɛ ji porneiʹa a hiɛhiɛɛ peemi. Hyɛ Munyu Komɛ A Sisi Tsɔɔmi.
Aloo “ní peepee nɛ tsɔɔ kaa nɔ ko zo tɔ ywia.” Hela, aselʹgeia. Hyɛ Munyu Komɛ A Sisi Tsɔɔmi.
Aloo “a fɔ lɛ ngɛ.”
Aloo “Ma Nyɔngma Kpokpa a.”