Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Maako 6:1-56

MI MUNYUHI

  • A kua Yesu ngɛ e ma mi (1-6)

  • E kɛ sɔmɔmi ní tsumi ɔ he blɔ tsɔɔmihi ha Ni Nyɔngma Kɛ Enyɔ ɔmɛ (7-13)

  • Yohane Nɔ Baptisilɔ ɔ gbenɔ (14-29)

  • Yesu ha nihi 5,000 niye ní (30-44)

  • Yesu nyɛɛ nyu hɛ mi (45-52)

  • E tsa nihi ngɛ Genesarɛt  (53-56)

6  E je lejɛ ɔ nɛ e ba e ma a mi, nɛ e kaseli ɔmɛ nyɛɛ e se.  Ngɛ He Jɔɔmi Ligbi ɔ nɔ ɔ, e bɔni ní tsɔɔmi ngɛ kpe he ɔ, nɛ nihi nɛ a bu lɛ tue ɔmɛ a kpɛti nihi fuu a nya kpɛ a he, nɛ a bi ke: “Jije nyumu nɛ ɔ ná ní nɛ ɔmɛ kɛ je? Nɛ mɛni he je nɛ e sa kaa a dloo lɛ kɛ juɛmi kaa kikɛ, nɛ́ a gu e nine nɔ kɛ tsu he wami ní tsumi nɛ ɔmɛ ɔ?  Anɛ pi kapitɛ ɔ, Maria binyumu ɔ, kɛ Yakobo, Yosɛf, Yudas, kɛ Simon a nyɛminyumu ɔ ji nɛ ɔ lo? Nɛ pi e nyɛmiyi ɔmɛ nɛ a kɛ wɔ ngɛ hiɛ ɔ lo?” Lɔ ɔ he ɔ, a nane bɔni tɔ̃tɔ̃mi ngɛ e he.  Se Yesu de mɛ ke: “Gbalɔ hɛ mi ngɛ nyami, se pi ngɛ lɛ nitsɛ e ma mi kɛ e weku li a kpɛti kɛ lɛ nitsɛ e we mi.”  Enɛ ɔ he ɔ, e nyɛ we nɛ e tsu he wami ní tsumi ko ngɛ lejɛ ɔ kaa hiɔtsɛmɛ bɔɔ komɛ nɛ e ngɔ e ninehi kɛ pue a nɔ nɛ e tsa mɛ ɔ pɛ kɛkɛ.  Niinɛ, hemi kɛ yemi nɛ a be ɔ ha nɛ e nya kpɛ e he. Nɛ e ya kpa kɔpe ɔmɛ a nɔ kɛ bɔle si, nɛ e tsɔɔ ní.  Jehanɛ ɔ, e tsɛ Ni Nyɔngma Kɛ Enyɔ ɔmɛ nɛ e bɔni mɛ tsɔmi enyɔɔnyɔ, nɛ e ha mɛ he wami ngɛ mumihi nɛ a he tsɔ we ɔmɛ a nɔ.  Jehanɛ se hu ɔ, e wo mɛ mlaa kaa ke a yaa a, a ko hɛɛ nɔ́ ko nɔ́ ko kaa ja dɛma tso pɛ—a ko hɛɛ niye ní, aloo niye ní kotoku, aloo sika* ngɛ a mlɛmi fimi ní ɔmɛ a nya—  a wo tokota, se a ko wo tade enyɔ.* 10  Jehanɛ hu ɔ, e de mɛ ke: “He fɛɛ he nɛ nyɛ maa sɛ we ko mi ngɛ ɔ, nyɛɛ hi lejɛ ɔ kɛ yaa si be nɛ nyɛ maa je lejɛ ɔ. 11  Nɛ he fɛɛ he nɛ a be nyɛ hɛ mi hae, aloo a be nyɛ tue bue ngɛ ɔ, ke nyɛ ngɛ lejɛ ɔ jee ɔ, nyɛ si nyɛ nane si konɛ bunyuku nɛ ngɛ nyɛ nane he ɔ nɛ je kɛ pue si kɛ pee odase ha mɛ.” 12  Kɛkɛ nɛ a pue nɔ kɛ ho nɛ a ya fiɛɛ kaa nihi nɛ a tsake a tsui, 13  nɛ a hia daimoniohi babauu, nɛ a pɔ nihi fuu nɛ a be he wami ɔ nu nɛ a tsa mɛ. 14  Jehanɛ ɔ, Matsɛ Hɛrode nu nɔ́ nɛ ɔ, ejakaa Yesu biɛ pɛ kɛ kpa he fɛɛ he, nɛ nihi ngɛ dee ke: “A tle Yohane Nɔ Baptisilɔ ɔ si kɛ je gbeje, enɛ ɔ he je nɛ e nyɛ nɛ e ngɛ he wami ní nɛ ɔmɛ tsue ɔ nɛ.” 15  Se ni komɛ ngɛ dee ke: “Eliya.” Ni kpa komɛ hu ngɛ dee ke: “Gbalɔ ji lɛ kaa blema gbali ɔmɛ a ti nɔ kake.” 16  Se benɛ Hɛrode nu he ɔ, e de ke: “Yohane nɛ i po e yi ɔ, lɛ nɛ a tle lɛ si kɛ je gbeje.” 17  Ejakaa Hɛrode nitsɛ lɛ e tsɔ nɛ a ya nu Yohane, nɛ a fĩ lɛ nɛ a wo lɛ tsu ngɛ e nyɛminyumu Filipo yo Hɛrodia he je, ejakaa e ngɔ lɛ kɛ pee e yo. 18  Yohane hii Hɛrode dee ke: “Mlaa ngmɛ́ blɔ kaa o ngɔɔ o nyɛmi ɔ yo ɔ kɛ peeɔ o yo.” 19  Enɛ ɔ he ɔ, Hɛrodia ná e he abofu nɛ e suɔ kaa e maa gbe lɛ, se e nyɛ we. 20  Ejakaa Hɛrode ngɛ Yohane gbeye yee akɛnɛ e le kaa e ji dalɔ kɛ nɔ klɔuklɔu ɔ he je, lɔ ɔ he ɔ, e ngɔ lɛ kɛ to slɔkee. Benɛ e bu lɛ tue se ɔ, e li nɔ́ nɛ e maa pee, se kɛ̃ ɔ, e ya nɔ nɛ e kɛ bua jɔmi bu lɛ tue. 21  Se be nɛ sa ba su. Jamɛ a be ɔ mi ɔ, Hɛrode ngɛ e fɔmi ligbi yee nɛ e ngmɛ okplɔɔ gbɔkuɛ ko kɛ ha e nikɔtɔma amɛ, kɛ ta buli a nyatsɛmɛ ɔmɛ, kɛ nihi nɛ a he biɛ ngɛ Galilea a. 22  Nɛ Hɛrodia biyo ɔ ba nɛ e ba do, nɛ e muɔ nihi nɛ a kɛ lɛ ngɛ ní ɔ yee ɔmɛ a hɛ. Matsɛ ɔ de yoyo ɔ ke: “Mo de mi nɔ́ fɛɛ nɔ́ nɛ o suɔ, nɛ ma ha mo.” 23  Ee, e kã yoyo ɔ kita ke: “Nɔ́ fɛɛ nɔ́ nɛ o ma bi mi ɔ, ma ha mo, ke ye matsɛ yemi ɔ mi fã po, ma ha mo.” 24  Enɛ ɔ he ɔ, e ya e nyɛ ɔ ngɔ nɛ e ya bi lɛ ke: “Mɛni ma bi?” E de lɛ ke: “Yohane Nɔ Baptisilɔ ɔ yi.” 25  Amlɔ nɔuu nɛ e sa fo kɛ ya matsɛ ɔ ngɔ nɛ e ngɔ e ní bimi ɔ kɛ ya fɔ e hɛ mi. E de ke: “I suɔ nɛ o ngɔ Yohane Nɔ Baptisilɔ ɔ yi kɛ fɔ plɛɛte mi kɛ ba ha mi piɔ.” 26  E ngɛ mi kaa nɔ́ nɛ ɔ hao matsɛ ɔ wawɛɛ mohu lɛɛ, se ngɛ kita nɛ e kã a, kɛ nihi nɛ e fɔ mɛ nine* ɔmɛ a he je ɔ, e sume kaa e be lɛ nɔ́ nɛ e bi ɔ hae. 27  Enɛ ɔ he ɔ, amlɔ nɔuu nɛ matsɛ ɔ tsɔ e he buli ɔmɛ a ti nɔ kake, nɛ e fã lɛ ke e ya ngɔ Yohane yi kɛ ba. Lɔ ɔ he ɔ, e ya nɛ e ya po e yi ngɛ tsu ɔ mi 28  nɛ e ngɔ yi ɔ kɛ fɔ plɛɛte mi kɛ ba. E ngɔ kɛ ha yoyo ɔ, nɛ yoyo ɔ ngɔ kɛ ya ha e nyɛ ɔ. 29  Benɛ e kaseli ɔmɛ nu he ɔ, a ba nɛ a ba ngɔ e gbogboe ɔ nɛ a kɛ ya to ngɛ yɔkɔ* ko mi. 30  Bɔfo ɔmɛ ba bua kɛ bɔle Yesu kɛ kpe, nɛ a bɔ lɛ níhi nɛ a ya pee, kɛ níhi nɛ a ya tsɔɔ ɔ tsuo. 31  Nɛ e de mɛ ke: “Nyɛɛ ba, nyɛ pɛ nyɛ ya hi si ngɛ he ko banee nɛ nyɛɛ jɔɔ nyɛ he bɔɔ.” Ejakaa nihi babauu ngɛ bae nɛ a ngɛ yae, nɛ a ná we deka nɛ a kɛ maa ye ní tete po. 32  Lɔ ɔ he ɔ, mɛ pɛ a sɛ lɛ mi nɛ a pue nɔ kɛ yaa he ko banee. 33  Se nihi na mɛ nɛ a yaa, nɛ nihi fuu ná le, nɛ a je ma amɛ tsuo a mi nɛ a tu fo kɛ gu nane blɔ nɛ a ya su lejɛ ɔ si mɛ. 34  Jehanɛ ɔ, benɛ e kple si ɔ, e na asafo kuu ngua ko, nɛ a he pee lɛ mɔbɔ, ejakaa a ngɛ kaa jijɔhi nɛ a be hyɛlɔ. Nɛ e bɔni mɛ níhi fuu tsɔɔmi. 35  Be nɛ ɔ mi ɔ, je ngɛ jɔe, nɛ e kaseli ɔmɛ ba e ngɔ nɛ a ba de lɛ ke: “Hiɛmi nɛ ɔ tsɔ e he banee, nɛ je hu ngɛ jɔe. 36  Moo wo mɛ blɔ nɛ a ho, konɛ a ya ngmɔ si kɛ kɔpe ɔmɛ nɛ a bɔle wɔ ɔmɛ a mi, nɛ mɛ nitsɛmɛ a ya he ní nɛ a ye.” 37  E he nɔ ke: “Nyɛ ha mɛ nɔ́ ko nɛ a ye.” Enɛ ɔ he ɔ, a bi lɛ ke: “Anɛ e sa kaa waa ya nɛ wa ya he denario 200 nya abolo nɛ waa ngɔ kɛ ba ha ni ɔmɛ nɛ a ye lo?” 38  E de mɛ ke: “Abolo enyɛmɛ nyɛ ngɛ? Nyɛ ya hyɛ!” Benɛ a ya hyɛ ɔ, a de ke: “Enuɔ, kɛ lo enyɔ.” 39  Nɛ e fã ni ɔmɛ tsuo ke a hi si ngɛ nga mumu ɔ nɔ ngɛ kuuhi a mi. 40  Lɔ ɔ he ɔ, a hi si kuuhi kuuhi lafalafa kɛ nyingmi enuɔɔnuɔ. 41  Jehanɛ ɔ, e ngɔ abolo enuɔ ɔ kɛ lo enyɔ ɔ, e hyɛ hiɔwe nɛ e jɔɔ nɔ. Kɛkɛ nɛ e ku abolo ɔ mi nɛ e ngɔ kɛ ha e kaseli ɔmɛ konɛ a ngɔ kɛ ma ni ɔmɛ a hɛ mi, nɛ e gba lo enyɔ ɔ kɛ ha mɛ tsuo. 42  Nɛ mɛ tsuo a ye nɛ a tɔ, 43  nɛ a kukuɔ e bibli ɔ, nɛ e hyi kɛtɛ* 12 tɔtɔɔtɔ, lo ɔ piɛɛ we he. 44  Nihi nɛ a ye abolo ɔ, a yibɔ ji nyumuhi 5,000. 45  Lɔ ɔ se ɔ, oya nɔuu nɛ e ha nɛ e kaseli ɔmɛ sɛ lɛ ɔ mi, nɛ a sɛ e hlami kɛ ho wo ɔ se ya ngɛ Betsaida, nɛ lɛ nitsɛ e wo asafo kuu ɔ blɔ. 46  Se benɛ e kɛ mɛ ye sɛ ta a, e je kɛ ho yoku ɔ nɔ ya konɛ e ya sɔle. 47  Benɛ je jɔ ɔ, lɛ ɔ su wo ɔ kpɛti, se e piɛ lɛ pɛ ngɛ kpo. 48  Enɛ ɔ he ɔ, benɛ e na kaa lɛ ɔ hluimi ngɛ yee ha mɛ akɛnɛ a ngɛ kɔɔhiɔ kpee he je ɔ, maa pee nyɔ mi hwɔɔmi be eywiɛne* ɔ mi ɔ, e nyɛɛ wo ɔ hɛ mi kɛ ma a ngɔ; se e pee kaa nɔ́ nɛ e ngɛ a he bee. 49  Benɛ a hɛ ngmɛ gba e nɔ nɛ e ngɛ wo ɔ hɛ mi nyɛɛe ɔ, a juɛmi ji: “Mumi ko!” Nɛ a kpa ngmlaa. 50  Ejakaa mɛ tsuo a na lɛ nɛ a hao. Se amlɔ nɔuu ɔ, e kɛ mɛ tu munyu nɛ e de ke: “Nyɛ tsui ko po! Imi; nyɛ ko ye gbeye.” 51  Kɛkɛ nɛ e ya piɛɛ a he ngɛ lɛ ɔ mi, nɛ kɔɔhiɔ ɔ kpa fiami. Enɛ ɔ ha nɛ a nya kpɛ a he wawɛɛ nitsɛ, 52  ejakaa a nui nɔ́ nɛ abolo ɔ tsɔɔ ɔ sisi, nɛ loloolo ɔ, a tsui nui níhi a sisi mla. 53  Benɛ a po mi kɛ ba kpo ɔ, a ba Genesarɛt nɛ a ba wo lɛ ɔ osɛkɛ ngɛ wo ɔ nya. 54  Se benɛ a kple si kɛ je lɛ ɔ mi pɛ ɔ, nihi to e he hɛ. 55  A tu fo kɛ ya kpa lejɛ ɔ kpokpa a nɔ tsuo nɛ a kɛ nihi nɛ a be he wami nɛ a fɔɔ si ngɛ sa nɔ ɔ bɔni e ngɔ bami ngɛ he nɛ a nu kaa e ngɛ ɔ. 56  Nɛ he fɛɛ he nɛ e maa sɛ kɔpehi aloo mahi a mi, aloo ngmɔ si ngɛ ɔ, a ngɔɔ hiɔtsɛmɛ kɛ ba pueɔ jua amɛ a nɔ nɛ a kpaa lɛ pɛɛ kaa e ha nɛ a ta tade nɛ e wo ngɛ e tade ɔ nɔ ɔ nya deke ɔ he kɛkɛ. Nɛ nihi tsuo nɛ a ta he ɔ, a ná he wami.

Sisi ningma

Hela, “akɔblee.”
Aloo “a ko hɛɛ tade kpa kɛ piɛɛ nɔ́ nɛ a wo ɔ he.”
Aloo “nihi nɛ a hii si ngɛ okplɔɔ ɔ he ɔ.”
Aloo “kaimi yɔkɔ.”
Aloo “kusii.”
Maa pee makɛ ngmlɛ 3 kɛ ya si maa pee mɔtu ngmlɛ 6 benɛ pu je.