Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Maako 5:1-43

MI MUNYUHI

  • Yesu ha nɛ daimoniohi ya sɛ kpotoohi a mi (1-20)

  • Yairo biyo ɔ; yo ko ta tadehi nɛ Yesu wo ngɛ e tade ɔ nɔ ɔ he (21-43)

5  Kɛkɛ nɛ a ba wo ɔ se ngɛ Gerasene kpokpa a nɔ.  Nɛ benɛ Yesu kple si kɛ je lɛ ɔ mi ɔ, amlɔ nɔuu nɛ nyumu ko nɛ mumi ko nɛ he tsɔ we ngɛ lɛ kudɔe ɔ je gɔ* ɔ mi nɛ e kɛ lɛ ba kpe.  Gɔ ɔ mi nɛ e hiɔ, nɛ kɛ ba si jamɛ a be ɔ mi ɔ, nɔ ko nɔ ko nyɛ we nɛ e tsi e nya, aloo e fĩ lɛ kɛ kɔsɔkɔsɔ po.  Behi fuu ɔ, a bɔɔ lɛ pã nɛ a woɔ lɛ kɔsɔkɔsɔ, se e tsɔɔ kɔsɔkɔsɔ ɔ, nɛ e kuɔ pã amɛ; nɛ nɔ ko nɔ ko be he wami nɛ e kɛ yeɔ e nɔ.  Nɛ nyɔnyɔɔnyɔ kɛ piapiaapia a, e yaa nɔ nɛ e kpaa ngmlaa ngɛ gɔ ɔ mi kɛ yoku ɔmɛ a nɔ, nɛ e ngɔɔ tɛhi kɛ poɔ e he.  Se benɛ e hɛ ngmɛ gba Yesu nɔ ngɛ tsitsaa a, e tu fo nɛ e ya kpla si ngɛ e hɛ mi.  Kɛkɛ nɛ e kɛ gbi nɛ nya wa kpa ngmlaa ke: “Yesu, Mawu Hiɔwe Lokoo No ɔ Bi, mɛni sane i kɛ mo ngɛ? I ngɛ mo dee ke kã Mawu kita kaa o be mi piie.”  Ejakaa Yesu ngɛ lɛ dee ke: “Mo mumi nɛ he tsɔ we, jee kpo kɛ je nyumu ɔ mi.”  Se Yesu bi lɛ ke: “Kɛ a tsɛɛ mo kɛɛ?” Nɛ e ha heto ke: “A tsɛɛ mi ke Asafo,* ejakaa wa he hiɛ.” 10  Nɛ e ya nɔ nɛ e kpa Yesu pɛɛ kaa e ko fiee mumi ɔmɛ kɛ je ma a mi. 11  Jamɛ a be ɔ mi ɔ, kpotoohi a kuu ngua ko ngɛ ní yee ngɛ yoku ɔ nɔ. 12  Lɔ ɔ he ɔ, mumi ɔmɛ kpa lɛ pɛɛ ke: “Ha nɛ wa ya sɛ kpotoo ɔmɛ a kpɛti, konɛ waa sɛ a mi.” 13  Nɛ e ngmɛ mɛ blɔ, enɛ ɔ he ɔ, mumi ɔmɛ nɛ a he tsɔ we ɔ je kpo nɛ a ya sɛ kpotoo ɔmɛ a mi, nɛ kpotoo maa pee 2,000 ɔ tsuo sa fo kɛ kple kɔ̃ ɔ kɛ ya nɔ wo ɔ mi, nɛ a gbo ngɛ wo ɔ mi. 14  Se kpotoo nɔ hyɛli ɔmɛ tu fo nɛ a ya sɛɛ nɔ́ nɛ ba a ngɛ ma a kɛ kɔpe ɔmɛ a mi, nɛ ni ɔmɛ je kpo konɛ a ba hyɛ nɔ́ nɛ ba a. 15  Enɛ ɔ he ɔ, a ba Yesu ngɔ nɛ a ba na nyumu ɔ nɛ daimonio ngɛ e mi ɔ, nɔ nɛ jinɛ mumi yayami Asafo ngɛ e mi ɔ nɛ e wo tade kɛ hii si nɛ e juɛmi mi tsɔ, nɛ a ye gbeye. 16  Jehanɛ se hu ɔ, nihi nɛ a na nɔ́ nɛ ba nyumu ɔ nɛ daimonio ngɛ e mi ɔ kɛ kpotoo ɔmɛ a nɔ ɔ bɔ mɛ amaniɛ. 17  Lɔ ɔ he ɔ, a bɔni Yesu pɛɛ kpami kaa e je a kpokpa a nɔ kɛ ho. 18  Jehanɛ ɔ, benɛ e ngɛ lɛ ɔ mi sɛe ɔ, nyumu ɔ nɛ jinɛ daimonio ngɛ e mi ɔ kpa lɛ pɛɛ kaa e kɛ lɛ maa ya. 19  Se e kplɛɛ we, mohu ɔ, e de lɛ ke: “Ho we mi ya, yaa o weku li a ngɔ nɛ o ya sɛɛ níhi tsuo nɛ Yehowa* pee ha mo, kɛ mɔbɔ nɛ e na mo ɔ kɛ ha mɛ.” 20  Nyumu ɔ pue nɔ kɛ ho, nɛ e ya bɔni níhi tsuo nɛ Yesu pee kɛ ha lɛ ɔ jajemi ngɛ Dekapoli,* nɛ ni ɔmɛ tsuo a nya kpɛ a he. 21  Benɛ Yesu kpale sɛ lɛ mi nɛ e po mi kɛ ho wo ɔ se ya a, nimli babauu ba bua a he nya ngɛ e ngɔ ngɛ wo ɔ nya. 22  Kɛkɛ nɛ kpe he ɔ nɔ hyɛli ɔmɛ a kpɛti nɔ kake nɛ a tsɛɛ lɛ ke Yairo ɔ ba, nɛ benɛ e na Yesu ɔ, e kpla si ngɛ e nane nya. 23  E kpa lɛ pɛɛ si abɔ ke: “Ye biyo wayoo be he wami kulaa. I kpa mo pɛɛ, moo ba nɛ o ba ngɔ o ninehi kɛ pue e nɔ, konɛ e ná he wami nɛ e yi nɛ ná wami.” 24  Kɛkɛ nɛ Yesu kɛ lɛ ho nɛ nihi babauu nyɛɛ e se, nɛ a ngɛ lɛ tɔtɔe. 25  Jehanɛ ɔ, yo ko ngɛ nɛ muɔ ngɛ bee ngɛ e he jeha 12. 26  E na nɔ́ wawɛɛ ngɛ tsopatsɛmɛ fuu a dɛ mi, nɛ e dɛ mi ta, se e hiɔ ɔ jɔɛ, mohu ɔ, e mi ba wa. 27  Benɛ e nu Yesu he sane ɔ, e gu ni ɔmɛ a kpɛti ngɛ e se je kɛ ba, nɛ e ba ta tade nɛ Yesu wo ngɛ e tade ɔ nɔ ɔ he, 28  ejakaa e hii dee ke: “Ke i ta tade nɛ e wo ngɛ e tade ɔ nɔ ɔ he kɛkɛ ɔ, ma ná he wami.” 29  Nɛ amlɔ nɔuu ɔ, muɔ ɔ kpa bemi ngɛ e he, nɛ e nu he ngɛ e nɔmlɔ tso mi kaa a tsa e hiɔ gbeyegbeye ɔ ha lɛ. 30  Amlɔ nɔuu nɛ Yesu nu he ngɛ e mi kaa he wami je e mi, nɛ e plɛ e he ngɛ ni ɔmɛ a kpɛti nɛ e bi ke: “Mɛnɔ ta tade nɛ i wo ngɛ ye tade ɔ nɔ ɔ he ɔ?” 31  Se e kaseli ɔmɛ bi lɛ ke: “O na kaa asafo kuu ɔ ngɛ mo tɔtɔe, nɛ o pa ngɛ bie ke, ‘Mɛnɔ ta ye he ɔ?’” 32  Se e ngɛ e hɛ poe kaa e maa na nɔ nɛ e pee jã a lo. 33  Akɛnɛ yo ɔ ye gbeye, nɛ e he ngɛ doe blibliibli, nɛ e le nɔ́ nɛ pee lɛ he je ɔ, e ba nɛ e ba kpla si ngɛ e hɛ mi nɛ e de lɛ anɔkuale ɔ tsuo. 34  Yesu de lɛ ke: “Biyo, o hemi kɛ yemi ɔ tsa mo. Yaa ngɛ tue mi jɔmi mi, nɛ o hiɔ gbeyegbeye ɔ nɛ jɔ.” 35  Benɛ e ngɛ munyu ɔ tue nɛ e nya mɛ si lolo ɔ, nyumu komɛ je kpe he ɔ nɔ hyɛlɔ ɔ we ɔ mi kɛ ba nɛ a ba de ke: “O biyo ɔ gbo! Mɛni he je nɛ o pa ngɛ Tsɔɔlɔ ɔ nya gbae ɔ?” 36  Se Yesu tue gblɔ munyu nɛ a tu ɔ, nɛ e de kpe he ɔ nɔ hyɛlɔ ɔ ke: “Koo ye gbeye,* mo ná hemi kɛ yemi kɛkɛ.” 37  Jehanɛ ɔ, e ha we nɛ nɔ ko nɛ e nyɛɛ e se, kaa ja Petro, Yakobo, kɛ Yakobo nyɛminyumu Yohane pɛ. 38  Lɔ ɔ he ɔ, a ba su kpe he ɔ nɔ hyɛlɔ ɔ we ɔ mi, nɛ e na kaa lejɛ ɔ pee hoo, nɛ nihi ngɛ ya foe boboobo, nɛ a ngɛ kɔmɔ yee. 39  Benɛ e sɛ mi ɔ, e de mɛ ke: “Mɛni he je nɛ nyɛ ngɛ ya foe, nɛ nyɛ ha nɛ hiɛ ɔ pee hoo kikɛ nɛ ɔ? Jokuɛ ɔ gbo we, mohu ɔ, mahe nɛ e ngɛ hwɔe.” 40  Kɛkɛ nɛ a bɔni lɛ muɔmi nɛ a ngɛ e he fɛu yee. Se benɛ e je mɛ tsuo kpo ta a, e ngɔ jokuɛ ɔ tsɛ ɔ kɛ e nyɛ ɔ kɛ nihi nɛ a piɛɛ e he ɔ, nɛ e ya he nɛ jokuɛ ɔ ngɛ ɔ. 41  Kɛkɛ nɛ e pɛtɛ jokuɛ ɔ nine he nɛ e de lɛ ke: “Talita kumi,” nɛ e sisi ji, “Jokuɛ yoyo, i ngɛ mo dee ke, tee si!” 42  Nɛ amlɔ nɔuu nɛ yoyo ɔ te si nɛ e bɔni nyɛɛmi. (E ye jeha 12.) Nɛ oya nɔuu nɛ a bua jɔ a he wawɛɛ nitsɛnitsɛ. 43  Se e bɔ mɛ kɔkɔ si abɔ* kaa a kó ha nɛ nɔ ko nɛ e le nɔ́ nɛ ba a, nɛ e de ke, a ha yoyo ɔ nɔ́ ko nɛ e ye.

Sisi ningma

Aloo “kaimi yɔkɔ ɔmɛ.”
Hela, “Legion.”
Hyɛ Munyu Komɛ A Sisi Tsɔɔmi.
Aloo “Ma Nyɔngma Kpokpa a mi.”
Aloo “Kpa gbeye yemi.”
Aloo “e wo mɛ si veveeve.”