Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Maako 3:1-35

MI MUNYUHI

  • A tsa nyumu ko nɛ e nine gbo (1-6)

  • Nimli babauu nitsɛ ngɛ wo ɔ nya (7-12)

  • Bɔfo 12 ɔmɛ (13-19)

  • Musu bɔmi kɛ mumi klɔuklɔu ɔ simi (20-30)

  • Yesu yayo kɛ e nyɛminyumu ɔmɛ (31-35)

3  E kpale ya sɛ kpe he ko, nɛ nyumu ko nɛ e nine gbo ngɛ lejɛ ɔ.  Enɛ ɔ he ɔ, a ngɛ lɛ hyɛe totooto kaa e ma tsa nyumu ɔ ngɛ He Jɔɔmi Ligbi ɔ nɔ, konɛ a da lɔ ɔ nɔ nɛ a kɛ po e nya.  E de nyumu ɔ nɛ e nine gbo ɔ ke: “Tee si nɛ o ba da si ngɛ kpɛti ɔ.”  Lɔ ɔ se ɔ, e bi mɛ ke: “Ngɛ He Jɔɔmi Ligbi ɔ nɔ ɔ, anɛ mlaa ngmɛɛ blɔ kaa a pee nɔ́ kpakpa aloo a ye nɔ awi, kaa a he nɔ* ko yi wami aloo a gbe nɔ?” Se a pui e nya mi.  Benɛ e kɛ abofu hyɛ mɛ kɛ bɔle si kɛ kpe ɔ, e ye aywilɛho ngɛ a tsui nɛ a kplii ɔ he je, nɛ e de nyumu ɔ ke: “Kpa o nine ɔ mi.” Nɛ e kpa mi, nɛ he wami kpale ba e nine ɔ mi ekohu.  Enɛ ɔ he ɔ, Farisi bi ɔmɛ je kpo nɛ oya nɔuu nɛ a kɛ nihi nɛ a fĩ Hɛrode ma kudɔmi kuu ɔ se ɔ ya kpe, nɛ a so konɛ a gbe lɛ.  Se Yesu kɛ e kaseli ɔmɛ je kɛ ho wo ɔ nya ya, nɛ nimli babauu nitsɛ je Galilea kɛ Yudea nɛ a nyɛɛ e se.  Ni komɛ po je Yerusalɛm kɛ Idumea kɛ Yɔdan Pa a se kɛ Tiro kɛ Sidon ní ɔmɛ a mi, nimli babauu nitsɛ ba e ngɔ benɛ a nu níhi babauu nɛ e ngɛ pee ɔ.  Nɛ e de e kaseli ɔmɛ kaa a hla lɛ nyafii* ko kɛ ha lɛ bɔ nɛ pee nɛ asafo kuu ɔ nɛ a ko tɔtɔ lɛ. 10  Akɛnɛ e tsa nihi babauu he je ɔ, nihi tsuo nɛ hiɔhi nɛ a mi wa nu mɛ ɔ bu kɛ ba bɔle lɛ konɛ a ba ta e he. 11  Mumihi nɛ a he tsɔ we po, be fɛɛ be nɛ a maa na lɛ ɔ, a nɔɔ si ngɛ e hɛ mi nɛ a kpaa ngmlaa ke: “Mo ji Mawu Bi ɔ nɛ.” 12  Se behi fuu ɔ, e bɔɔ mɛ kɔkɔ kaa a ko ha nɛ nihi nɛ a le nɔ nɛ e ji. 13  E kuɔ yoku ko nɛ e tsɛ nihi tsuo nɛ e suɔ ɔ, nɛ a ba e ngɔ. 14  Nɛ e to nimli 12 a kuu ko sisi, nɛ e tsɛɛ mɛ ke bɔfohi hulɔ. Mɛ ji nihi nɛ a maa piɛɛ e he, nɛ e maa tsɔ mɛ konɛ a ya fiɛɛ, 15  nɛ a ma ná he wami nɛ a kɛ maa hia daimoniohi. 16  Nɛ nimli 12 nɛ a ngɛ kuu ɔ mi ɔ ji Simon, nɔ nɛ e wo lɛ biɛ hu ke Petro ɔ, 17  Zebedeo binyumu Yakobo, kɛ Yakobo nyɛminyumu Yohane, (e wo mɛ biɛ hu ke Boanejes, nɛ e sisi ji, “Oslabai Bimɛ”), 18  Andrea, Filipo, Batolomeo, Mateo, Toma, Alfeo bi Yakobo, Tadeo, Simon Kãtsɛ ɔ, 19  kɛ Yudas Iskariɔt, nɔ nɛ pee se ɔ, e tsɔɔ e se blɔ ɔ. Lɔ ɔ se ɔ, e ya we ko mi, 20  kɛkɛ nɛ asafo kuu ɔ nya ba bua ekohu, nɛ a nyɛ we nɛ a ye ní tete po. 21  Se benɛ e weku li ɔmɛ nu he ɔ, a je kpo konɛ a ya nu lɛ, ejakaa a ngɛ dee ke: “E yi puɛ.” 22  Womi ngmali nɛ a je Yerusalɛm kɛ ba a hu ngɛ dee ke: “Belzebuul* ngɛ e mi, nɛ daimonio ɔmɛ a nɔ yelɔ ɔ he wami nɛ e kɛ hiaa daimonio ɔmɛ ɔ nɛ.” 23  Enɛ ɔ he ɔ, benɛ e tsɛ mɛ kɛ ba e ngɔ ɔ, e kɛ mɛ tu munyu nɛ e ngɔ nɔ́ he tomi níhi kɛ tsu ní. E bi mɛ ke: “Kɛ e maa pee kɛɛ nɛ Satan maa hia Satan? 24  Matsɛ yemi fɛɛ matsɛ yemi nɛ mi gba nɛ teɔ si kɛ woɔ e he ɔ hɛ mi kpataa; 25  nɛ we fɛɛ we nɛ e mi gba nɛ e teɔ si kɛ woɔ e he ɔ be si dae. 26  Jã kɛ̃ nɛ ke Satan te si kɛ wo lɛ nitsɛ e he nɛ e mi gba a, e be nyɛe maa da si, mohu ɔ, e maa ba nyagbe. 27  Ngɛ anɔkuale mi ɔ, ke nɔ ko sɛ nyumu ko nɛ e he wa we mi nɛ e maa ju e níhi ɔ, ja e nu nyumu ɔ nɛ e he wa a nɛ e fĩ lɛ kekle. Ja e pee jã loko e ma nyɛ maa muɔɔ níhi nɛ ngɛ e we ɔ mi ɔ. 28  I ngɛ nyɛ dee ngɛ anɔkuale mi ke, yayami fɛɛ yayami nɛ nimli a bimɛ maa pee kɛ musu bɔmi munyuhi tsuo nɛ a maa tu ɔ, a maa ngɔ kɛ pa mɛ. 29  Se nɔ fɛɛ nɔ nɛ e maa bɔ musu kɛ si mumi klɔuklɔu ɔ, a kɛ be lɛ pae kɛ maa ya neneene, mohu ɔ, e maa ye yayami he fɔ kɛ maa ya neneene.” 30  E de enɛ ɔ, ejakaa a ngɛ dee ke: “Mumi nɛ he tsɔ we ngɛ e mi.” 31  Jehanɛ ɔ, e yayo kɛ e nyɛminyumu ɔmɛ ba, nɛ benɛ a ba da si ngɛ we ɔ se ɔ, a tsɔ nɔ ko konɛ e ya tsɛ lɛ kɛ ba. 32  Akɛnɛ nimli babauu bɔle lɛ kɛ kpe he je ɔ, a de lɛ ke: “Hyɛ! O yayo kɛ o nyɛminyumu ɔmɛ daa si ngɛ we ɔ se nɛ a ngɛ mo tsɛe.” 33  Se e he nɔ nɛ e bi mɛ ke: “Mɛnɔ ji ye yayo, nɛ mɛnɔmɛ ji ye nyɛmimɛ nyumuhi?” 34  Kɛkɛ nɛ e hyɛ nihi nɛ a hii si kɛ bɔle lɛ ɔ kɛ kpe, nɛ e de ke: “Hyɛ, ye yayo kɛ ye nyɛmimɛ nyumuhi ji nɛ ɔmɛ ɔ nɛ! 35  Nɔ fɛɛ nɔ nɛ e peeɔ Mawu suɔmi nya ní ɔ, jamɛatsɛ ɔ ji ye nyɛminyumu kɛ ye nyɛmiyo kɛ ye yayo.”

Sisi ningma

Aloo “susuma.”
Aloo “ahima.”
Biɛ nɛ a kɛ tsɛɛ Satan.