Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Luka 8:1-56

MI MUNYUHI

  • Yihi nɛ a piɛɛ Yesu he (1-3)

  • Ní dulɔ ɔ he nɔ́ he tomi nɔ́ ɔ (4-8)

  • Nɔ́ he je nɛ Yesu kɛ nɔ́ he tomi níhi tsu ní (9, 10)

  • A tsɔɔ ní dulɔ ɔ he nɔ́ he tomi nɔ́ ɔ sisi (11-15)

  • E sɛ nɛ a ha kane nɔ (16-18)

  • Yesu yayo kɛ e nyɛminyumu ɔmɛ (19-21)

  • Yesu jɔɔ kɔɔhiɔ ngua ko he (22-25)

  • Yesu ha nɛ daimoniohi ya sɛ kpotoohi a mi (26-39)

  • Yairo biyo ɔ; yo ko ta tadehi nɛ Yesu wo ngɛ e tade ɔ nɔ ɔ he (40-56)

8  Be bɔɔ se ɔ, e hia blɔ kɛ je mahi a mi kɛ ya mahi a mi, kɛ kɔpehi a mi kɛ ya kɔpehi a mi, nɛ e ngɛ fiɛɛe, nɛ e ngɛ Mawu Matsɛ Yemi ɔ he sane kpakpa a jajee. Nɛ Ni Nyɔngma Kɛ Enyɔ ɔmɛ piɛɛ e he,  nɛ yi komɛ nɛ e hia mumi yayamihi ngɛ a mi, nɛ e tsa a he hiɔhi ɔ hu piɛɛ e he. Mɛ ji: Maria, nɔ nɛ a tsɛɛ lɛ ke Magdalena nɛ daimoniohi kpaago je e mi ɔ;  Yoana, Hɛrode tsɔlɔ nɔkɔtɔma Kuza yo ɔ; Susana; kɛ yi kpahi fuu nɛ a ngɔ mɛ nitsɛmɛ a níhi kɛ ngɛ mɛ sɔmɔe ɔ.  Jehanɛ ɔ, benɛ nimli babauu ko kɛ nihi nɛ a je ma slɔɔtohi a nɔ ɔ ba bua a he nya ngɛ e ngɔ ɔ, e kɛ nɔ́ he tomi nɔ́ ko tsu ní. E de ke:  “Ní dulɔ ko je kpo konɛ e ya du ní. Benɛ e ngɛ ní ɔ due ɔ, ekomɛ ya pue blɔ ɔ he nɛ nihi naa a nɔ, nɛ hiɔwe lohwe pɛlitsɛmɛ ba ye.  Ekomɛ hu ya pue tɛ sa nɔ, nɛ benɛ a puɛ ɔ, a ngla, ejakaa a nɛ nyu.  Ekomɛ ya pue miohi a mi, nɛ mio ɔmɛ kɛ mɛ wa, nɛ a mia mɛ.  Se ekpa komɛ hu ya pue zu kpakpa nɔ, nɛ benɛ a puɛ ɔ, a wo yiblii kɛ bɔ he si 100.” Benɛ e de ní nɛ ɔmɛ ta a, e wo e gbi nɔ nɛ e de ke: “Ha nɔ nɛ e ngɛ tue nɛ e kɛ maa bu tue ɔ, nɛ e bu tue.”  Se e kaseli ɔmɛ bi lɛ kaa e tsɔɔ mɛ nɔ́ he tomi nɔ́ ɔ sisi. 10  E de ke: “Nyɛɛ lɛɛ a ha nyɛ he blɔ konɛ nyɛɛ nu Mawu Matsɛ Yemi ɔ he laami sanehi nɛ a ngɛ klɔuu ɔ sisi, se ni kpa amɛ lɛɛ ngɛ nɔ́ he tomi níhi a mi, konɛ hyɛmi lɛɛ a hi hyɛe, se a hi hyɛe yaka gu, nɛ a hi nue, se a ko nu sisi. 11  Jehanɛ ɔ, nɔ́ he tomi nɔ́ ɔ sisi ji nɛ ɔ nɛ: Wu ɔ ji Mawu munyu ɔ nɛ. 12  Ní nɛmɛ nɛ a ya pue blɔ ɔ he ɔ ji nihi nɛ a nuɔ munyu ɔ, nɛ Abosiami baa nɛ e ba jeɔ munyu ɔ ngɛ a tsui mi kɛ yaa konɛ a ko he ye nɛ a he a yi wami ɔ nɛ. 13  Ní nɛmɛ nɛ a ya pue tɛ sa nɔ ɔ ji nihi nɛ ke a nu munyu ɔ, a kɛ bua jɔmi kplɛɛɔ nɔ, se a be sipoku. A heɔ yeɔ be bɔɔ, se ngɛ ka be mi ɔ, a kuaa hemi kɛ yemi ɔ. 14  Ngɛ ní nɛmɛ nɛ a ya pue miohi a mi ɔ blɔ fa mi ɔ, mɛ ji nihi nɛ a nuɔ munyu ɔ, se yeyeeye peemi, kɛ ní nami, kɛ je mi ngɔɔmi yemi sisiɔ mɛ, nɛ ní nɛ ɔmɛ haa nɛ a gboɔ kulaa nɛ a wui yiblii kpakpa. 15  Ngɛ ní nɛmɛ nɛ a ya pue zu nɛ hi ɔ nɔ ɔ blɔ fa mi ɔ, mɛ ji nihi nɛ ke a kɛ tsui nɛ hi kɛ tsui kpakpa nu munyu ɔ, a pɛtɛɔ he nɛ a kɛ hɛ mi miami woɔ yiblii ɔ nɛ. 16  “Nɔ ko be nɛ ke e su kane ɔ, e ngɔɔ nɔ́ kɛ buɔ nɔ, aloo e ngɔɔ kɛ maa sa tso sisi, mohu ɔ, e ngɔɔ kɛ maa kane tso nɔ konɛ ni nɛmɛ nɛ a baa mi ɔ nɛ a na la a. 17  Ejakaa nɔ́ ko be nɛ a ngɔ kɛ laa nɛ e be kpo jee, nɛ jã kɛ̃ nɛ nɔ́ ko nɔ́ ko be nɛ a laa nɔ saminya nɛ nihi be lee gblegbleegble, aloo e be kpo jee nɛ nihi nɛ a na. 18  Enɛ ɔ he ɔ, nyɛɛ hyɛ bɔ nɛ nyɛ buɔ tue ha a saminya, ejakaa nɔ fɛɛ nɔ nɛ e ngɛ nɔ́ ko ɔ, a ma ha lɛ fuu ngɔ piɛɛ he, se nɔ fɛɛ nɔ nɛ e be nɔ́ ko ɔ, nɔ́ nɛ e susu kaa e ngɛ ɔ po a ma kpɔ̃ ngɛ e dɛ.” 19  Jehanɛ ɔ, e yayo kɛ e nyɛminyumu ɔmɛ ba e ngɔ, se asafo kuu ɔ he je ɔ, a nyɛ we nɛ a su e he. 20  Enɛ ɔ he ɔ, nihi de lɛ ke: “O yayo kɛ o nyɛminyumu ɔmɛ daa si ngɛ we ɔ se nɛ a ngɛ mo hlae.” 21  E he nɔ nɛ e de mɛ ke: “Ye yayo kɛ ye nyɛmimɛ nyumuhi ji ni nɛ ɔmɛ nɛ a nuɔ Mawu munyu ɔ nɛ a yeɔ nɔ ɔ nɛ.” 22  Ligbi ko ɔ, e kɛ e kaseli ɔmɛ sɛ lɛ ko mi, nɛ e de mɛ ke: “Nyɛ ha nɛ waa po mi kɛ ya taku ɔ se je.” Enɛ ɔ he ɔ, a sɛ lɛ mi nɛ a pue nɔ. 23  Se benɛ a ngɛ lɛ ɔ hluie kɛ yaa a, mahe nɔ e nɔ. Nɛ kɔɔhiɔ nɛ nya wa ko kple kɛ ba taku ɔ nɔ, nɛ nyu bɔni a lɛ ɔ mi sɛmi, nɛ a yi fĩ. 24  Enɛ ɔ he ɔ, a ya nɛ a ya tsɛ̃ɛ lɛ, nɛ a de lɛ ke: “Tsɔɔlɔ, Tsɔɔlɔ, wa hɛ mi miɔ nɛ e ma kpata!” Kɛkɛ nɛ e te si nɛ e nga kɔɔhiɔ ɔ kɛ nyu ɔ nɛ pee hamahama a yi, nɛ a he jɔ, nɛ lejɛ ɔ jɔ dii. 25  Kɛkɛ nɛ e bi mɛ ke: “Jije nyɛ hemi kɛ yemi ɔ ngɛ?” Se gbeye nu mɛ nɛ a nya kpɛ a he, nɛ a de a sibi ke: “Mɛnɔ po ji nɛ ɔ? Ejakaa e fãa kɔɔhiɔ kɛ nyu po nɛ a buɔ lɛ tue.” 26  Nɛ a ya sa kpo ngɛ Gerasene kpokpa a nɔ ngɛ Galilea hanɔ. 27  Benɛ Yesu kple si kɛ je lɛ ɔ mi ɔ, nyumu ko nɛ e je ma a mi nɛ daimonio ngɛ e mi ɔ kɛ lɛ ba kpe. Be babauu ji nɛ ɔ nɛ e wui tade, nɛ e hí we mi, mohu ɔ, gɔ* mi nɛ e hiɔ. 28  Benɛ e hɛ ngmɛ gba Yesu nɔ ɔ, e hia ngmlaa nɛ e ba kpla si ngɛ e hɛ mi, nɛ e kɛ gbi nɛ nya wa de ke: “Yesu, Mawu Hiɔwe Lokoo No ɔ Bi, mɛni sane i kɛ mo ngɛ? I kpa mo pɛɛ, ko pii mi.” 29  (Ejakaa jamɛ a be ɔ mi ɔ, Yesu ngɛ mumi nɛ e he tsɔ we ɔ fãe ke e je kpo ngɛ nyumu ɔ mi. Mumi ɔ nu lɛ si abɔ,* nɛ a ngɔ kɔsɔkɔsɔ kɛ fĩ lɛ si abɔ, nɛ a bɔ lɛ pã nɛ a bu e he si abɔ, se e tsɔɔ kɔsɔkɔsɔ ɔ, nɛ daimonio ɔ kudɔɔ lɛ kɛ yaa hehi nɛ tsɔ a he banee ɔ.) 30  Yesu bi lɛ ke: “Kɛ a tsɛɛ mo kɛɛ?” E he nɔ ke: “A tsɛɛ mi ke Asafo,”* ejakaa daimoniohi fuu ngɛ e mi. 31  Nɛ a ya nɔ nɛ a kpa lɛ pɛɛ kaa e ko fã mɛ kaa a ya sɛ muɔ voo ɔ mi. 32  Jamɛ a be ɔ mi ɔ, kpotoohi babauu ngɛ ní yee ngɛ yoku ɔ nɔ, enɛ ɔ he ɔ, a kpa lɛ pɛɛ kaa e ngmɛ mɛ blɔ nɛ a ya sɛ kpotoo ɔmɛ a mi, nɛ e ngmɛ mɛ blɔ. 33  Kɛkɛ nɛ daimonio ɔmɛ je nyumu ɔ mi nɛ a ya sɛ kpotoo ɔmɛ a mi, nɛ kpotoo ɔmɛ sa fo kɛ kple kɔ̃ ɔ kɛ ya nɔ taku ɔ mi, nɛ a gbo. 34  Se benɛ kpotoo nɔ hyɛli ɔmɛ na nɔ́ nɛ ba a, a tu fo nɛ a ya sɛɛ ngɛ ma a mi, kɛ kɔpe ɔmɛ a mi. 35  Nɛ nihi je kpo konɛ a ya hyɛ nɔ́ nɛ ba a. A ba Yesu ngɔ nɛ a ba na nyumu ɔ nɛ daimonio ɔmɛ je e mi ɔ nɛ e wo tade, nɛ́ e juɛmi mi tsɔ, nɛ́ e hii si ngɛ Yesu nane nya, nɛ a ye gbeye. 36  Nihi nɛ a na a de mɛ bɔ nɛ nyumu ɔ nɛ jinɛ daimonio ɔmɛ ngɛ e mi ɔ plɛ kɛ ná he wami ha. 37  Kɛkɛ nɛ nihi babauu nɛ a ngɛ Gerasene kpokpa a nɔ ɔ de Yesu kaa e je a ngɔ kɛ ho, ejakaa gbeye nu mɛ wawɛɛ. Kɛkɛ nɛ e ya sɛ lɛ ɔ mi konɛ e je. 38  Se nyumu ɔ nɛ daimonio ɔmɛ je e mi ɔ ya nɔ nɛ e kpa lɛ pɛɛ kaa e kɛ lɛ maa ya, se e wo nyumu ɔ blɔ kɛ ho, nɛ e de lɛ ke: 39  “Kpale o se kɛ ho we mi ya, nɛ o ya nɔ nɛ o hi nɔ́ nɛ Mawu pee ha mo ɔ sɛɛe.” Enɛ ɔ he ɔ, nyumu ɔ pue nɔ kɛ ho, nɛ e ya bɔni níhi tsuo nɛ Yesu pee kɛ ha lɛ ɔ jajemi ngɛ ma a mi tsuo. 40  Benɛ Yesu kpale kɛ ba a, asafo kuu ɔ nya e he, ejakaa mɛ tsuo a ngɛ lɛ blɔ hyɛe. 41  Se hyɛ! nyumu ko nɛ a tsɛɛ lɛ ke Yairo ɔ ba; nyumu nɛ ɔ ji kpe he ɔ nɔ hyɛlɔ. Nɛ e ba kpla si ngɛ Yesu nane nya nɛ e bɔni lɛ pɛɛ kpami kaa e ba e we ɔ mi, 42  ejakaa e biyo kake pɛ nɛ e ngɛ, nɛ e ye maa pee jeha 12 ɔ ngɛ gboe. Benɛ Yesu yaa a, asafo kuu ɔmɛ tɔtɔ lɛ. 43  Jehanɛ ɔ, yo ko ngɛ nɛ muɔ ngɛ bee ngɛ e he jeha 12, nɛ nɔ ko nɔ ko nyɛ we nɛ e tsa lɛ. 44  E gu Yesu se, nɛ e ta tade nɛ e wo ngɛ e tade ɔ nɔ ɔ nya deke ɔ he, nɛ amlɔ nɔuu ɔ, muɔ nɛ ngɛ bee ngɛ e he ɔ se po. 45  Lɔ ɔ he ɔ, Yesu bi ke: “Mɛnɔ ta ye he ɔ?” Benɛ ni ɔmɛ tsuo ngɛ dee ke a tɛ e he ɔ, Petro de lɛ ke: “Tsɔɔlɔ, asafo kuu ɔmɛ bɔle mo kɛ kpe nɛ a ngɛ mo tɔtɔe.” 46  Se Yesu de ke: “Nɔ ko ta ye he, ejakaa i na kaa he wami je ye mi.” 47  Benɛ yo ɔ na kaa e be nyɛe maa ngɔ e he kɛ laa a, e ba kɛ he domi blibliibli, nɛ e ba kpla si ngɛ Yesu hɛ mi, nɛ ngɛ ni ɔmɛ tsuo a hɛ mi ɔ, e jaje nɔ́ he je nɛ e ta e he ɔ, kɛ bɔ nɛ e ná he wami amlɔ nɔuu ɔ. 48  Se e de yo ɔ ke: “Biyo, o hemi kɛ yemi ɔ tsa mo. Yaa ngɛ tue mi jɔmi mi.” 49  Benɛ e ngɛ munyu ɔ tue nɛ e nya mɛ si lolo ɔ, nɔ ko je kpe he ɔ nɔ hyɛlɔ ɔ we ɔ mi kɛ ba nɛ e ba de ke: “O biyo ɔ gbo; ko gba Tsɔɔlɔ ɔ nya hu.” 50  Benɛ Yesu nu nɔ́ nɛ ɔ, e de lɛ ke: “Koo ye gbeye, mo ná hemi kɛ yemi kɛkɛ, nɛ a ma he e yi wami.” 51  Benɛ e su we ɔ mi ɔ, e ha we nɛ nɔ ko nɛ e nyɛɛ e se kɛ sɛ mi, kaa ja Petro, Yohane, Yakobo, kɛ yoyo ɔ tsɛ ɔ kɛ e nyɛ ɔ pɛ. 52  Se ni ɔmɛ tsuo ngɛ ya foe nɛ a ngɛ kɔmɔ yee wawɛɛ. Lɔ ɔ he ɔ, e de ke: “Nyɛ kpa ya fomi, ejakaa yoyo ɔ gbo we, mohu ɔ, mahe nɛ e ngɛ hwɔe.” 53  Kɛkɛ nɛ a bɔni lɛ muɔmi nɛ a ngɛ e he fɛu yee, ejakaa mɛɛ lɛɛ a le kaa e gbo. 54  Se e pɛtɛ yoyo ɔ nine he nɛ e wo e gbi nɔ kɛ tsɛ lɛ ke: “Jokuɛ yoyo, tee si!” 55  Nɛ yoyo ɔ mumi* ɔ kpale ba e mi ekohu, nɛ e te si amlɔ nɔuu, nɛ Yesu fã ke a ha lɛ nɔ́ ko nɛ e ye. 56  E fɔli ɔmɛ a bua jɔ wawɛɛ nitsɛ, se Yesu de mɛ ke a ko de nɔ ko nɔ́ nɛ ba a.

Sisi ningma

Aloo “kaimi yɔkɔ ɔmɛ a.”
E ma nyɛ maa pee kaa “E nu lɛ be kɛkɛɛ.”
Hela, “Legion.”
Aloo “wami.”