Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Luka 5:1-39

MI MUNYUHI

  • A gbe lo ngɛ nyakpɛ blɔ nɔ; kekleekle kaseli (1-11)

  • A tsa kpititsɛ ko (12-16)

  • Yesu tsa nɔ ko nɛ e hule (17-26)

  • Yesu tsɛ Levi (27-32)

  • Hwɔ hami he sane bimi (33-39)

5  Ligbi ko ɔ, benɛ Yesu daa si ngɛ Genesarɛt taku ɔ* nya a, nihi babauu ba pue e nɔ nɛ a ngɛ Mawu munyu ɔ tue bue.  Nɛ e na lɛ enyɔ nɛ a mwɔ mɛ si ngɛ taku ɔ nya, se wo hɛli ɔmɛ je a mi nɛ a ya ngɛ a ya amɛ a he fɔe.  E ya sɛ lɛ ɔ kake nɛ ji Simon nɔ́ ɔ mi, nɛ e de lɛ ke e tsɛ̃ lɛ ɔ kɛ ya nyu ɔ nɔ bɔɔ. Kɛkɛ nɛ e hi si, nɛ e ngɛ lɛ ɔ mi nɛ e kɛ bɔni asafo kuu ɔmɛ ní tsɔɔmi.  Benɛ e jɔɔ munyu ɔ tumi ɔ, e de Simon ke: “Nyɛɛ tsɛ̃ kɛ ya he nɛ mi kuɔ ɔ, nɛ nyɛɛ fɔ nyɛ ya amɛ konɛ nyɛɛ gbe lo.”  Se Simon he nɔ nɛ e de ke: “Tsɔɔlɔ, nyɔ nɛ ɔ mi ɔ, wa tsu ní wawɛɛ nitsɛ, se wa nɛ nɔ́ ko, se kɛ̃ ɔ, ngɛ o munyu ɔ nya a, ma pue ya a.”  Benɛ a pee jã a, a gbe* lo babauu. Nɛ ngɛ anɔkuale mi ɔ, a ya amɛ bɔni gbami.  Enɛ ɔ he ɔ, a fɔ a huɛmɛ nɛ a ngɛ lɛ kpa a mi ɔ nine kaa a ba ye bua mɛ, nɛ a ba nɛ a ba wo lɛ enyɔ ɔmɛ tsuo a mi lo tɔtɔɔtɔ, nɛ lɛ ɔmɛ bɔni mumi.  Benɛ Simon Petro na enɛ ɔ, e kpla si ngɛ Yesu nane nya nɛ e de lɛ ke: “Nyɔmtsɛ, jee ye kasa nya, ejakaa yayami peelɔ ji mi.”  Ejakaa e kɛ nihi nɛ a piɛɛ e he ɔmɛ a he mi po ngɛ lo babauu nɛ a gbe ɔ he je, 10  nɛ jã kɛ̃ nɛ Zebedeo binyumu ɔmɛ nɛ ji Yakobo kɛ Yohane nɛ a kɛ Simon tsuɔ ní ɔ hu a he mi po. Se Yesu de Simon ke: “Jɔɔ gbeye yemi. Kɛ je amlɔ nɛ ɔ kɛ yaa a, o maa nuu nimli hɛ ngmengmle.” 11  Nɛ a ngɔ lɛ ɔmɛ kɛ ba kpo, nɛ a si nɔ́ fɛɛ nɔ́ nɛ a nyɛɛ e se. 12  Be kpa ko hu ɔ, benɛ Yesu ngɛ ma amɛ eko mi ɔ, hyɛ! nyumu ko ngɛ lejɛ ɔ nɛ kpiti pue e nɔmlɔ tso ɔ tsuo! Benɛ e na Yesu ɔ, e kpla si nɛ e ngɔ e hɛ mi kɛ bu si, nɛ e kpa lɛ pɛɛ ke: “Nyɔmtsɛ, ke o suɔ ɔ, o ma nyɛ ma ha nɛ ye he nɛ tsɔ.” 13  Enɛ ɔ he ɔ, e kpa e nine mi, nɛ e ta e he, nɛ e de lɛ ke: “I suɔ! O he nɛ tsɔ.” Amlɔ nɔuu nɛ kpiti ɔ laa ngɛ e he. 14  Kɛkɛ nɛ e bɔ nyumu ɔ kɔkɔ kaa e ko de nɔ ko. E de lɛ ke: “Mohu ɔ, yaa nɛ o ngɔ o he kɛ ya tsɔɔ osɔfo ɔ, nɛ o ya sã afɔle nɛ Mose tsɔɔ kaa ke kpititsɛ ko he tsɔ nɛ́ e sã a, konɛ lɔ ɔ nɛ pee odase kɛ ha mɛ.” 15  Se e he sane ɔ ya nɔ nɛ e gbɛ fĩa, nɛ asafo kuu nguahi ba bua a he nya konɛ a bu lɛ tue nɛ́ e tsa a he hiɔhi. 16  Se e pɔɔ hehi nɛ a tsɔ a he banee ɔ yami, nɛ e ya sɔleɔ ngɛ lejɛ ɔmɛ. 17  Jehanɛ ɔ, ligbi ko benɛ e ngɛ ní tsɔɔe ɔ, Farisi bi ɔmɛ kɛ Mlaa tsɔɔli ɔmɛ nɛ a je Galilea kɛ Yudea kɛ Yerusalɛm kɔpe ɔmɛ tsuo a mi kɛ ba a hii si ngɛ lejɛ ɔ; nɛ Yehowa* he wami ɔ ngɛ e nɔ konɛ e kɛ tsa hiɔtsɛmɛ. 18  Nɛ hyɛ! nyumu komɛ tloo nyumu ko nɛ e hule* nɛ e fɔɔ si ngɛ sa nɔ, nɛ a ngɛ mɔde bɔe kaa a kɛ lɛ maa sɛ mi konɛ a ngɔ lɛ kɛ ya fɔ Yesu hɛ mi. 19  Se asafo kuu ɔ he je ɔ, a nyɛ we nɛ a ngɔ lɛ kɛ sɛ mi, enɛ ɔ he ɔ, a kuɔ kɛ ya tsu ɔ yi mi, nɛ a ngmɛɛ hiɔtsɛ ɔ kɛ sa a nɛ e hwɔɔ si ngɛ nɔ ɔ tsuo he bɔɔbɔɔbɔɔ kɛ gu puɔ nɛ a je ngɛ tsu ɔ yi mi ɔ mi kɛ ba zugba ngɛ Yesu hɛ mi tutuutu ngɛ ni ɔmɛ a kpɛti. 20  Benɛ e na hemi kɛ yemi nɛ a ngɛ ɔ, e de ke: “Etsɛ, a ngɔ o he yayami ɔmɛ kɛ pa mo.” 21  Kɛkɛ nɛ womi ngmali ɔmɛ kɛ Farisi bi ɔmɛ bɔni susumi ke: “Mɛnɔ ji nɛ ɔ nɛ e tuɔ musu bɔmi munyuhi ɔ? Mɛnɔ ma nyɛ maa ngɔ yayami kɛ pa kaa ja Mawu pɛ?” 22  Se akɛnɛ Yesu kɔ níhi a se nɛ e na a susumi ɔ he je ɔ, e he nɔ nɛ e bi mɛ ke: “Mɛni nyɛ ngɛ susue ngɛ nyɛ tsui mi ɔ? 23  Demi nɛ a ma de ke, ‘A ngɔ o he yayami ɔmɛ kɛ pa mo,’ kɛ ‘Tee si nɛ o nyɛɛ’ ɔ, te nɛ lɛ e demi ngɛ gbɔjɔɔ? 24  Se bɔ nɛ pee nɛ nyɛɛ le kaa nɔmlɔ Bi ɔ ngɛ he blɔ ngɛ zugba a nɔ kaa e ngɔɔ yayamihi kɛ pa a—” e de nyumu ɔ nɛ e hule* ɔ ke: “I ngɛ mo dee ke, Tee si, ngɔɔ o sa a, nɛ o ho o we mi ya.” 25  Kɛkɛ nɛ e te si ngɛ a hɛ mi, nɛ e wo nɔ́ nɛ e hwɔɔ si ngɛ nɔ ɔ, nɛ e je kɛ ho e we mi ya. Nɛ benɛ e yaa a, e ngɛ Mawu hɛ mi nyami woe. 26  Nɛ ni ɔmɛ tsuo a nya kpɛ a he wawɛɛ nɛ a bɔni Mawu hɛ mi nyami womi. Gbeye nu mɛ, nɛ a ngɛ dee ke: “Wa na nyakpɛ níhi mwɔnɛ ɔ!” 27  Enɛ ɔ se ɔ, e je kpo nɛ e ya na tó tsulɔ ko nɛ a tsɛɛ lɛ ke Levi ɔ nɛ e hii si ngɛ tó tsumi he ɔ, nɛ e de lɛ ke: “Ba pee ye se nyɛɛlɔ.” 28  Nɛ e si nɔ́ fɛɛ nɔ́, nɛ e te si, nɛ e bɔni e se nyɛɛmi. 29  Lɔ ɔ se ɔ, Levi ngmɛ okplɔɔ ngua ko ngɛ e we ɔ mi ha lɛ, nɛ tó tsuli kɛ nihi babauu kɛ mɛ ba ngɛ ní yee. 30  Kɛkɛ nɛ Farisi bi ɔmɛ kɛ a womi ngmali ɔmɛ bɔni munyu huitihuiti tumi kɛ ngɛ e kaseli ɔmɛ sie ke: “Mɛni he je nɛ nyɛɛ kɛ tó tsuli kɛ yayami peeli yeɔ ní ɔ?” 31  Yesu ha mɛ heto ke: “Nihi nɛ a ngɛ he wami ɔ hia we tsopatsɛ, se ni nɛmɛ nɛ a be he wami lɛɛ a hiaa. 32  I ba nɛ ma ba tsɛ yayami peeli konɛ a tsake a tsui, se pi dali.” 33  A de lɛ ke: “Yohane kaseli ɔmɛ pɔɔ hwɔ hami kɛ pɛɛ kpami nɛ mi wa, nɛ jã kɛ̃ nɛ Farisi bi ɔmɛ a kaseli ɔmɛ hu peeɔ, se moo lɛɛ o kaseli ɔmɛ yeɔ ní nɛ a nuɔ ní.” 34  Yesu de mɛ ke: “Tse nyɛ be nyɛe ma ha nɛ ayɛflo huno ɔ huɛmɛ ɔmɛ nɛ a ha hwɔ be mi nɛ ayɛflo huno ɔ kɛ mɛ ngɛ ɔ, aloo nyɛ ma nyɛ? 35  Se ngɛ anɔkuale mi ɔ, be ma nɛ a maa ngɔ ayɛflo huno ɔ kɛ je a he; jamɛ a be ɔ mi loko a maa ha hwɔ.” 36  E ngɔ nɔ́ he tomi nɔ́ ko hu kɛ tsu ní. E de mɛ ke: “Nɔ ko pui tade ehe nɛ e woɔ ngɛ e tade nɔ ɔ nya kɛ ta we tade momo mi. Ke e pee jã a, bo ehe ɔ ma hia kɛ je tade momo ɔ mi, ejakaa bo ehe ɔ kɛ tade momo ɔ sɔɛ. 37  Jã kɛ̃ nɛ nɔ ko ngɔɛ wai ehe kɛ wui lohwe he womi wai tɔ momohi a mi. Ke e pee jã a, wai ehe ɔ ma ha nɛ lohwe he womi wai tɔ ɔmɛ ma pɛ́, nɛ wai ɔ ma kpa kɛ pue si, nɛ lohwe he womi wai tɔ ɔmɛ ma puɛ. 38  Mohu ɔ, e sa nɛ a ngɔ wai ehe kɛ wo lohwe he womi wai tɔ ehehi a mi. 39  Nɔ ko be nɛ ke e nu wai momo ta a, e suɔ kaa e maa nu wai ehe, ejakaa e deɔ ke, ‘Momo ɔ hi saminya.’”

Sisi ningma

Nɛ ji, Galilea Wo ɔ.
Hela, “ya amɛ du lo.”
Hyɛ Munyu Komɛ A Sisi Tsɔɔmi.
Aloo “kplɔ.”
Aloo “kplɔ.”