Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Luka 3:1-38

MI MUNYUHI

  • Be nɛ Yohane ní tsumi ɔ je sisi (1, 2)

  • Yohane fiɛɛ baptisimi (3-20)

  • Yesu baptisimi ɔ (21, 22)

  • Yesu Kristo weku kpa a (23-38)

3  Ngɛ Kaisare Tiberio nɔ yemi ɔ we jeha nɛ ji nyɔngma kɛ enuɔne ɔ mi, benɛ Pontio Pilato ji amlaalo ngɛ Yudea, nɛ Hɛrode* ji kpokpa* nɔ yelɔ ngɛ Galilea, nɛ e nyɛminyumu Filipo hu ji kpokpa nɔ yelɔ ngɛ Iturea kɛ Trakoniti ma a nɔ, nɛ Lisania ji kpokpa nɔ yelɔ ngɛ Abilene,  ngɛ osɔfo nikɔtɔmahi Anas kɛ Kayafa a be ɔ mi ɔ, Mawu kɛ sɛ gbi ha Zakaria binyumu Yohane ngɛ nga a nɔ.  Enɛ ɔ he ɔ, e ya mahi tsuo nɛ ngɛ Yɔdan Pa a he ɔmɛ a mi, nɛ e ya ngɛ baptisimi nɛ e peeɔ tsui tsakemi kɛ ha yayami pami he okadi ɔ fiɛɛe  kaa bɔ nɛ a ngma ngɛ gbalɔ Yesaya womi ɔ mi ɔ. A ngma ke: “Nɔ ko gbi ngɛ pɛe wawɛɛ ngɛ nga a nɔ ke: ‘Nyɛ dla Yehowa* blɔ ɔ! Nyɛ ha nɛ e gbɛjegbɛ ɔmɛ nɛ a da tlɔmɔɔ.  E sa nɛ a tsi dɔgba fɛɛ dɔgba, nɛ a ba yoku fɛɛ yoku kɛ yoku nyafii fɛɛ yoku nyafii si; nɛ a pee blɔhi nɛ a kpɛ̃ ɔ tlɔmɔɔ, nɛ blɔhi nɛ a nɔ ngɛ googagooga a, a ha nɛ a nɔ nɛ da;  nɛ he lohi tsuo* maa na Mawu yi wami hemi ɔ.’”*  Enɛ ɔ he ɔ, e bɔni asafo kuu ɔmɛ nɛ a ngɛ kpo jee kɛ ngɛ e ngɔ bae ɔ demi ke: “Nyɛ sinɔ duɔtsɛmɛ a nina, mɛnɔ bɔ nyɛ kɔkɔ ke nyɛɛ tu abofu nɛ ma a nya fo?  Lɛɛ nyɛɛ wo yiblii nɛ tsɔɔ kaa nyɛ tsake nyɛ tsui mɔ. Nyɛ ko hi nyɛ he dee ke, ‘Wɔɔ lɛɛ wa tsɛ ji Abraham.’ Ejakaa i ngɛ nyɛ dee kaa Mawu ma nyɛ ma je bimɛ kɛ je tɛ nɛ ɔmɛ a mi kɛ ha Abraham.  Niinɛ, gbiɛ ɔ fɔɔ si ngɛ tso ɔmɛ a sipoku ɔ nɔ momo. Lɔ ɔ he ɔ, tso fɛɛ tso nɛ e wui yiblii nɛ hi ɔ, a maa po kɛ fɔ si, nɛ a ma sake kɛ fɔ la mi.” 10  Nɛ asafo kuu ɔmɛ ngɛ lɛ bie ke: “Lɛɛ mɛni e sa kaa waa pee mɔ?” 11  E ha mɛ heto ke: “Ha nɔ nɛ e ngɛ tade enyɔ* ɔ nɛ e kɛ nɔ nɛ e be eko ɔ nɛ gba, nɛ nɔ nɛ e ngɛ nɔ́ ko nɛ e maa ye ɔ, lɛ hu e pee jã nɔuu.” 12  Tó tsuli po ba konɛ e baptisi mɛ, nɛ a bi lɛ ke: “Tsɔɔlɔ, mɛni e sa kaa waa pee?” 13  E de mɛ ke: “Nyɛ ko he tó ɔ pe bɔ nɛ e sa kaa nyɛ he.” 14  Jehanɛ se hu ɔ, ta buli ba ngɛ lɛ bie ke: “Mɛni e sa kaa waa pee?” Nɛ e de mɛ ke: “Nyɛ ko wa nɔ ko yi mi,* nɛ nyɛ ko po nɔ ko nya yaka gu, mohu ɔ, nyɛ bua nɛ jɔ níhi nɛ nyɛ ngɛ ɔmɛ a he.”* 15  Jehanɛ ɔ, ni ɔmɛ ngɛ blɔ hyɛe, nɛ mɛ tsuo a ngɛ Yohane he susue ngɛ a tsui mi ke, “Anɛ lɛ ji Kristo ɔ lo?” 16  Yohane ha mɛ heto nɛ e de mɛ tsuo ke: “Imi lɛɛ, i ngɔɔ nyu kɛ baptisiɔ nyɛ, se nɔ ko nɛ e nɔ kuɔ pe mi ma, nɛ e tokota nɔ kpã tete po, i sɛ nɔ nɛ e pɛneɔ. Lɛɛ lɛɛ e maa ngɔ mumi klɔuklɔu, kɛ la kɛ baptisi nyɛ. 17  E hɛɛ e ngma mi sami nɔ́ ɔ ngɛ e dɛ mi, nɛ e maa bɛɛ e ngma mi sami he ɔ nyaii nɛ e ma bua ngma a nya kɛ wo e nito he ɔ, se tsakati ɔ lɛɛ, e maa ngɔ la nɛ be hie gbemi kɛ maa sã.” 18  Jehanɛ se hu ɔ, e wo ni ɔmɛ ga kpahi fuu, nɛ e ya nɔ nɛ e fiɛɛ sane kpakpa a kɛ ha mɛ. 19  Se akɛnɛ Yohane kã Hɛrode nɛ ji kpokpa nɔ yelɔ ɔ hɛ mi ngɛ e nyɛminyumu ɔ yo Hɛrodia, kɛ ní yayamihi tsuo nɛ e pee ɔ he he je ɔ, 20  e kpale pee nɔ́ nɛ ɔ ngɔ si jamɛ a ní ɔmɛ tsuo nɛ e pee ɔ nɔ: E wo Yohane tsu. 21  Jehanɛ ɔ, benɛ a baptisi ni ɔmɛ tsuo ɔ, a baptisi Yesu hulɔ. Benɛ e ngɛ sɔlee ɔ, hiɔwe nya bli, 22  nɛ mumi klɔuklɔu ɔ kple si kɛ ba e nɔ kaa lahuɛ henɔ, nɛ gbi ko pɛ kɛ je hiɔwe ke: “Mo ji ye Bi nɛ i suɔ; ye bua jɔ o he.” 23  Benɛ Yesu je e ní tsumi ɔ sisi ɔ, e ye maa pee jeha 30, nɛ kaa bɔ nɛ nihi susuɔ ɔ,e ji Yosɛf bi,Heli bi, 24  Matat bi,Levi bi,Melki bi,Yanai bi,Yosɛf bi, 25  Matatia bi,Amɔs bi,Nahum bi,Esli bi,Nagai bi, 26  Maat bi,Matatia bi,Semein bi,Yosek bi,Yoda bi, 27  Yoanan bi,Resa bi,Zerubabɛl bi,Shealtiɛl bi,Neri bi, 28  Melki bi,Adi bi,Kosam bi,Elmadam bi,Er bi, 29  Yesu bi,Elieza bi,Yorim bi,Matat bi,Levi bi, 30  Simeon bi,Yudas bi,Yosɛf bi,Yonam bi,Eliakim bi, 31  Melea bi,Mena bi,Matata bi,Natan bi,David bi, 32  Jɛse bi,Obɛd bi,Boaz bi,Salmon bi,Naashon bi, 33  Aminadab bi,Aani bi,Hezron bi,Perɛz bi,Yuda bi, 34  Yakɔb bi,Isak bi,Abraham bi,Tera bi,Nahɔ bi, 35  Seruk bi,Reu bi,Pelɛk bi,Eba bi,Shela bi, 36  Kainan bi,Apashad bi,Shɛm bi,Noa bi,Lamɛk bi, 37  Metusela bi,Enɔk bi,Yared bi,Mahalalel bi,Kainan bi, 38  Enɔsh bi,Sɛt bi,Adam bi,Mawu bi.

Sisi ningma

Nɛ ji Herode Antipa, Hyɛ Munyu Komɛ A Sisi Tsɔɔmi.
Hela, “tetrake ɔ.”
Hyɛ Munyu Komɛ A Sisi Tsɔɔmi.
Aloo “adesahi tsuo.”
Aloo “nɔ́ nɛ Mawu maa pee kɛ he nihi a yi wami ɔ.”
Aloo “e ngɛ tade kpahi.”
Aloo “ye nɔ ko amimi.”
Aloo “nyɛ hiɔwo nɛ sa nyɛ hɛ mi.”