Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

Luka 18:1-43

MI MUNYUHI

  • Yalɔyo nɛ gbaa nɔ nya a he nɔ́ he tomi nɔ́ ɔ (1-8)

  • Farisi no ɔ kɛ tó tsulɔ ɔ (9-14)

  • Yesu kɛ jokuɛ tsɔwi ɔmɛ (15-17)

  • Nɔ yelɔ niatsɛ ɔ sane bimi ɔ (18-30)

  • A gba Yesu gbenɔ ɔ kɛ fɔ si ekohu (31-34)

  • Hɛ yuyuilɔ nɔ́ balɔ ɔ bɔni nɔ́ hyɛmi ekohu (35-43)

18  Lɔ ɔ se ɔ, e ya nɔ nɛ e ngɔ nɔ́ he tomi nɔ́ ko kɛ tsu ní kɛ tsɔɔ mɛ kaa e he hia nɛ a sɔle be fɛɛ be nɛ a ko kpa.*  E de mɛ ke: “Kojolɔ ko hi ma ko mi, e yi Mawu gbeye nɛ e bui adesa hulɔ.  Yalɔyo* ko hu hi jamɛ a ma a mi. E hii kojolɔ ɔ ngɔ yae nɛ e ya hii lɛ dee ke, ‘Hyɛ nɛ o ye dami sane ha mi ngɛ nɔ nɛ i kɛ lɛ ná sane ɔ wa kpɛti.’  Ngɛ anɔkuale mi ɔ, jinɛ kojolɔ ɔ sume kaa e maa pee jã, se e ngɛ mi hluu ɔ, e de e he ke, ‘E ngɛ mi kaa i yi Mawu gbeye nɛ i bui nɔ ko nɔ ko mohu lɛɛ,  se akɛnɛ yalɔyo* nɛ ɔ ba hii ye nya gbae he je ɔ, ma hyɛ nɛ ma ye dami sane konɛ e ko ngɔ e sane ɔ kɛ ba hi ye nya gbae kpamisaa.’”*  Kɛkɛ nɛ Nyɔmtsɛ ɔ de ke: “E ngɛ mi kaa pi dalɔ ji kojolɔ ɔ mohu lɛɛ, se nyɛɛ hyɛ nɔ́ nɛ e de!  Ngɛ anɔkuale mi ɔ, e ngɛ mi kaa Mawu toɔ e tsui si kɛ haa e nihi nɛ e hla a mohu lɛɛ, se ke a kpaa ngmlaa kɛ tsɛɔ lɛ nyɔ kɛ pia a, anɛ e be dami sane yee ha mɛ lo?  I ngɛ nyɛ dee ke, e maa ye dami sane ha mɛ oya nɔuu. Se ke nɔmlɔ Bi ɔ ba a, ngɛ anɔkuale mi ɔ, anɛ e maa na hemi kɛ yemi* nɛ ɔ ngɛ zugba a nɔ lo?”  E ngɔ nɔ́ he tomi nɔ́ nɛ ɔ hu kɛ tsu ní nɛ e kɛ tsɔɔ nihi nɛ a he ye kaa mɛɛ lɛɛ dali ji mɛ nɛ a kɛ ni kpahi pee we nɔ́ ko ɔ ní. E de ke: 10  “Nyumuhi enyɔ kuɔ kɛ ya sɔlemi we ɔ konɛ a ya sɔle. Nɔ kake ɔ, Farisi no ji lɛ, nɛ nɔ kake lɛɛ e ji tó tsulɔ. 11  Farisi no ɔ da si nɛ e bɔni sɔlemi ngɛ e yi mi ke, ‘Oo Mawu, i naa mo si kaa i be kaa ni kpa amɛ. I be kaa ojo fiali, yayami peeli, gba puɛli, aloo tó tsulɔ nɛ ɔ po. 12  I haa hwɔ si enyɔ daa otsi; i haa nɔ́ fɛɛ nɔ́ nɛ ye nine suɔ nɔ ɔ mi mi dlami nyɔngma mi kake.’ 13  Se tó tsulɔ ɔ lɛɛ, e daa si ngɛ se lokoo, nɛ e sume po kaa e ma wo e hɛ nɔ kɛ hyɛ hiɔwe, mohu ɔ, e ngɛ e gugue gbee nɛ e ngɛ dee ke, ‘Oo Mawu, yayami peelɔ ji mi, moo na mi mɔbɔ.’ 14  I ngɛ nyɛ dee ke, nyumu nɛ ɔ kple kɛ ho e we mi ya nɛ a bu lɛ dalɔ pe Farisi no ɔ. Ejakaa nɔ fɛɛ nɔ nɛ e woɔ e he nɔ ɔ, a ma pue e hɛ mi si, se nɔ fɛɛ nɔ nɛ e baa e he si ɔ, a ma wo e nɔ.” 15  Jehanɛ ɔ, nihi hu ngɔ a bimwɔwi kɛ ngɛ e ngɔ bae konɛ e ta a he, se benɛ kaseli ɔmɛ na enɛ ɔ, a bɔni ni ɔmɛ a hɛ mi kami. 16  Se Yesu tsɛ bimwɔwi ɔmɛ kɛ ba e ngɔ nɛ e de ke: “Nyɛ ha nɛ jokuɛ tsɔwi ɔmɛ nɛ a ba ye ngɔ, nɛ nyɛ ko bɔ mɔde kaa nyɛ maa tsi mɛ blɔ, ejakaa nihi kaa jã a, a nɔ́ ji Mawu Matsɛ Yemi ɔ nɛ. 17  I ngɛ nyɛ dee ngɛ anɔkuale mi ke, nɔ fɛɛ nɔ nɛ e he we Mawu Matsɛ Yemi ɔ kaa bɔ nɛ jokuɛ nyafii maa pee ɔ, e be mi sɛe gblegbleegble.” 18  Nɛ nɔ yeli ɔmɛ a ti nɔ kake bi lɛ ke: “Tsɔɔlɔ Kpakpa, mɛni nɛ e sa kaa ma pee konɛ ma ná neneene wami?” 19  Yesu de lɛ ke: “Mɛni he je nɛ o tsɛ mi ke nɔ kpakpa a? Nɔ ko be nɛ e ji nɔ kpakpa kaa ja Mawu pɛ. 20  O le kita amɛ: ‘Ko puɛ gba, koo gbe nɔmlɔ, koo ju, koo ye lakpa odase, buu o tsɛ kɛ o nyɛ.’” 21  Kɛkɛ nɛ nyumu ɔ de ke: “I ye enɛ ɔmɛ tsuo a nɔ kɛ je ye jokuɛwi a si tɔɔ.” 22  Benɛ Yesu nu nɔ́ nɛ ɔ, e de lɛ ke, “Se kɛ̃ ɔ, e piɛ mo nɔ́ kake: Yaa jua níhi nɛ o ngɛ ɔ nɛ o gba nɔ́ nɛ o ma ná a kɛ ha ohiatsɛmɛ, nɛ o ma ná juetli ngɛ hiɔwe; konɛ o ba pee ye se nyɛɛlɔ.” 23  Benɛ e nu munyu nɛ ɔ, e hao wawɛɛ, ejakaa e ji niatsɛ kpanaa. 24  Yesu hyɛ lɛ nɛ e de ke: “E he maa wa wawɛɛ nitsɛ kɛ ha nihi nɛ a ngɛ sika a kaa a maa sɛ Mawu Matsɛ Yemi ɔ mi! 25  Ngɛ anɔkuale mi ɔ, e ngɛ gbɔjɔɔ ha afukpɔngɔ kaa e maa gu ní kpɛmi abui hɛ ngmɛ mi pe kaa niatsɛ maa sɛ Mawu Matsɛ Yemi ɔ mi.” 26  Nihi nɛ a nu munyu nɛ ɔ bi ke: “Mɛnɔ po nɛ a ma nyɛ ma he e yi wami?” 27  E de ke: “Níhi nɛ adesahi nyɛ we peemi ɔ, Mawu lɛɛ e nyɛɔ peeɔ.” 28  Se Petro de ke: “Hyɛ! Wa je wa níhi a he nɛ wa ba nyɛɛ o se.” 29  Yesu de mɛ ke: “Ngɛ anɔkuale mi ɔ, i ngɛ nyɛ dee ke, nɔ ko be nɛ e si we aloo yo aloo nyɛmimɛ nyumuhi aloo fɔli aloo bimɛ ngɛ Mawu Matsɛ Yemi ɔ he je 30  nɛ́ e nine be babauu nɔ sue ngɛ be nɛ ɔ mi, nɛ ngɛ níhi a blɔ nya tomi* nɛ ma a mi ɔ, e ma ná neneene wami.” 31  Jehanɛ ɔ, e ngɔ Ni Nyɔngma Kɛ Enyɔ ɔmɛ kɛ ya se nɛ e de mɛ ke: “Hyɛ! Wa ngɛ kuɔe kɛ yaa Yerusalɛm, nɛ níhi tsuo nɛ gbali ɔmɛ ngma ngɛ nɔmlɔ Bi ɔ he ɔ maa ba mi. 32  Kaa nɔ hyɛmi nɔ́ ɔ, a maa ngɔ lɛ kɛ ha nihi nɛ a je je ma amɛ a mi ɔ, nɛ a maa ye e he fɛu, nɛ a maa pee lɛ níhi nɛ sɛ, nɛ a ma su lada ngɔ pue e nɔ. 33  Nɛ ke a fiaa lɛ kpa ta a, a maa gbe lɛ, se ngɛ ligbi etɛne ɔ nɔ ɔ, e maa te si.” 34  Se a nui ní nɛ ɔmɛ ekoeko sisi, ejakaa a ngɔ munyu nɛ ɔmɛ kɛ laa mɛ, nɛ a nui níhi nɛ e de ɔmɛ a sisi. 35  Jehanɛ ɔ, benɛ e piɛ bɔɔ nɛ Yesu maa su Yɛriko ɔ, nyumu ko nɛ e ji hɛ yuyuilɔ hii si ngɛ gbɛjegbɛ ɔ he nɛ e ngɛ ní bae. 36  Akɛnɛ e nu kaa nihi babauu ngɛ bee he je ɔ, e bɔni bimi kaa mɛni lɛ ngɛ nɔ yae. 37  A de lɛ ke: “Yesu, Nazarɛt no ɔ lɛ e bee!” 38  Kɛkɛ nɛ e kpa ngmlaa ke: “Yesu, David Bi, naa mi mɔbɔ!” 39  Nɛ nihi nɛ a ngɛ hɛ mi ɔ bɔni e hɛ mi kami nɛ a de lɛ ke e pee kɔ̃, se e ya nɔ nɛ e ngɛ ngmlaa kpae wawɛɛ po pe kekle ɔ ke: “David Bi, naa mi mɔbɔ!” 40  Enɛ ɔ he ɔ, Yesu da si nɛ e fã ke a ngɔ nyumu ɔ kɛ ba e ngɔ. Benɛ e ba su Yesu ngɔ ɔ, Yesu bi lɛ ke: 41  “Mɛni o suɔ nɛ ma pee ha mo?” E de ke: “Nyɔmtsɛ, ha nɛ ma hyɛ nɔ́ ekohu.” 42  Kɛkɛ nɛ Yesu de lɛ ke: “O hɛ ngmɛ ɔ nɛ e bɔni nɔ́ hyɛmi ekohu; o hemi kɛ yemi ɔ tsa mo.” 43  Nɛ amlɔ nɔuu ɔ, e bɔni nɔ́ hyɛmi, nɛ e bɔni e se nyɛɛmi, nɛ e ngɛ Mawu hɛ mi nyami woe. Jehanɛ hu ɔ, benɛ ni ɔmɛ tsuo na nɔ́ nɛ ɔ, a je Mawu yi.

Sisi ningma

Hela, “nɛ́ a kɔni mi nɛ ko jɔ̃ ngɛ he.”
Aloo “Ahoyo.”
Aloo “ahoyo.”
Aloo “e ko ba hi mi kɔ̃ fiae nɛ ma ba gbo.”
Aloo “hemi kɛ yemi kaa kikɛ.” Hela, “hemi kɛ yemi ɔ.”
Aloo “yi nɔ.” Hyɛ Munyu Komɛ A Sisi Tsɔɔmi.