Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

Luka 13:1-35

MI MUNYUHI

  • Nyɛ tsake nyɛ tsui ke pi jã a a ma kpata nyɛ hɛ mi (1-5)

  • Fig tso nɛ wui yiblii ɔ he nɔ́ he tomi nɔ́ ɔ (6-9)

  • A tsa yo nɛ e kpɛ ɔ ngɛ He Jɔɔmi Ligbi ɔ nɔ (10-17)

  • Sinapi wu ɔ kɛ masa a he nɔ́ he tomi nɔ́ ɔ (18-21)

  • Sinya tokofii ɔ mi sɛmi biɔ mɔde bɔmi (22-30)

  • Hɛrode, “jamɛ a kɔkɔbo ɔ” (31-33)

  • Yesu ye Yerusalɛm he kɔmɔ (34, 35)

13  Jamɛ a be ɔ mi ɔ, nihi nɛ a ngɛ lejɛ ɔ bɔ lɛ Galilea bi nɛ Pilato ngɔ a muɔ kɛ futu a we afɔlehi nɛ a sã a mi ɔ he amaniɛ.  E he nɔ nɛ e de mɛ ke: “Anɛ nyɛ susu kaa jamɛ a Galilea bi ɔmɛ ji yayami peeli pe Galilea bi kpa amɛ tsuo akɛnɛ a na amanehlu nɛ ɔ he je lo?  Ohoo, pi jã; se ke nyɛ tsakee we nyɛ tsui ɔ, nyɛ tsuo nyɛ hɛ mi ma kpata jã nɔuu.  Aloo nihi 18 nɛ mɔ ɔ nɛ ngɛ Siloam ɔ hule ngɔ pue a nɔ nɛ a gbo ɔ, anɛ nyɛ susu kaa a ye fɔ pe ni kpahi tsuo nɛ a ngɛ Yerusalɛm ɔ lo?  Ohoo, pi jã; se ke nyɛ tsakee we nyɛ tsui ɔ, nyɛ tsuo nyɛ hɛ mi ma kpata kaa bɔ nɛ a hɛ mi kpata a.”  Lɔ ɔ se ɔ, e ya nɔ nɛ e kɛ nɔ́ he tomi nɔ́ nɛ ɔ tsu ní. E de ke: “Nyumu ko du fig tso ngɛ e wai ngmɔ mi, nɛ e ba nɛ e ba hyɛ kaa e maa na yiblii ngɛ nɔ lo, se e nɛ eko.  Kɛkɛ nɛ e de wai ngmɔ nɔ hyɛlɔ ɔ ke, ‘Jeha etɛ sɔuu ji nɛ ɔ nɛ i baa nɛ i ba hyɛɛ kaa ma na yiblii ngɛ fig tso nɛ ɔ nɔ lo, se i nɛ eko. Poo lɛ kɛ fɔ si! Mɛni he je nɛ e maa hi zugba a nɔ yaka gu ɔ?’  Se wai ngmɔ nɔ hyɛlɔ ɔ he nɔ nɛ e de lɛ ke, ‘Nyɔmtsɛ, mo ha nɛ e hi si jeha kake ekohu nɛ ma tsua he nɛ ma wo sisi kuku zu.  Ke e wo yiblii hwɔɔ se ɔ, lɛɛ e hi saminya; se ke e wui yiblii ɔ, lɛɛ ha nɛ a po ngɔ fɔ si.’” 10  Jehanɛ ɔ, ngɛ He Jɔɔmi Ligbi ɔ nɔ ɔ, e ya ngɛ ní tsɔɔe ngɛ kpe he ko. 11  Nɛ hyɛ! yo ko ngɛ lejɛ ɔ nɛ gbɔjɔmi mumi* ko ngɛ e mi jeha 18 sɔuu; e kpɛ, nɛ e nyɛ we nɛ e kpãa e mi kulaa. 12  Benɛ Yesu na lɛ ɔ, e tsɛ lɛ, nɛ e de lɛ ke: “Yo, a je o gbɔjɔmi ɔ ngɛ o nɔ.” 13  Nɛ e ngɔ e ninehi kɛ pue e nɔ, nɛ amlɔ nɔuu ɔ, e mi kpã, nɛ e bɔni Mawu hɛ mi nyami womi. 14  Se akɛnɛ kpe he ɔ nɔ hyɛlɔ ɔ bua jɔɛ kaa Yesu tsa nɔ ngɛ He Jɔɔmi Ligbi ɔ nɔ he je ɔ, e de asafo kuu ɔ ke: “Ligbi ekpa ngɛ nɛ e sa kaa a kɛ tsu ní; lɔ ɔ he ɔ, nyɛɛ ba nɛ a tsa nyɛ ngɛ jamɛ a ligbi ɔmɛ a nɔ, se pi ngɛ He Jɔɔmi ligbi nɔ.” 15  Se Nyɔmtsɛ ɔ de lɛ ke: “Osatotsɛmɛ, anɛ ngɛ He Jɔɔmi Ligbi ɔ nɔ ɔ, nyɛ ti nɔ fɛɛ nɔ pɛne we e na ku aloo e teji ngɛ tsu mi kɛ ji kpo konɛ e ya ha lɛ nɔ́ ko nɛ e nu lo? 16  Lɛɛ e sɛ kaa a pɛneɔ yo nɛ ɔ nɛ e ji Abraham biyo nɛ Satan bɔ lɛ pã jeha 18 sɔuu ji nɛ ɔ ngɛ He Jɔɔmi Ligbi ɔ nɔ lo?” 17  Nɛ benɛ e de ní nɛ ɔmɛ ɔ, zo gbe nihi tsuo nɛ a te si ngɔ wo lɛ ɔ, se asafo kuu ɔ tsuo bɔni nyami ngɛ nyakpɛ níhi tsuo nɛ e pee ɔ he. 18  Kɛkɛ nɛ e ya nɔ nɛ e de ke: “Kɛ Mawu Matsɛ Yemi ɔ ngɛ kɛɛ, nɛ mɛni he ma nyɛ ma ngɔ kɛ to? 19  E ngɛ kaa sinapi wu nɛ nyumu ko ngɔ nɛ e ya du ngɛ e we abɔɔ mi, nɛ e wa nɛ e ba pee tso, nɛ hiɔwe lohwe pɛlitsɛmɛ ba pee tsu ngɛ e kɔni ɔmɛ a nɔ.” 20  E de hu ke: “Mɛni he ma nyɛ ma ngɔ Mawu Matsɛ Yemi ɔ kɛ to? 21  E ngɛ kaa masa nɛ yo ko ngɔ kɛ futu ma ehe susumi ní* nguahi etɛ mi kɛ ya si ma a tsuo gbo.”* 22  Nɛ e hia blɔ kɛ je mahi a mi kɛ ya mahi a mi, kɛ kɔpehi a mi kɛ ya kɔpehi a mi nɛ e ya tsɔɔ ní, nɛ e tsa e blɔ hiami ɔ nɔ kɛ ya su Yerusalɛm. 23  Jehanɛ ɔ, nyumu ko bi lɛ ke: “Nyɔmtsɛ, anɛ nihi bɔɔ ko pɛ a yi wami nɛ a ma he lo?” E de mɛ ke: 24  “Nyɛɛ bɔ mɔde wawɛɛ nitsɛ nɛ nyɛɛ sɛ sinya tokofii ɔ mi, ejakaa i ngɛ nyɛ dee ke nihi babauu ma hla kaa a maa sɛ mi, se a be nyɛe. 25  Ke wetsɛ ɔ te si nɛ e ngmɛ sinya a mi ɔ, nyɛ maa da si ngɛ sinya a se nɛ nyɛ maa hi sie, nɛ nyɛ maa hi dee ke, ‘Nyɔmtsɛ, mo bli wɔ.’ Se e ma ha nyɛ heto ke: ‘I li he nɛ nyɛ je.’ 26  Kɛkɛ ɔ, nyɛ ma bɔni demi ke, ‘Wa ye ní, nɛ wa nu ní ngɛ o hɛ mi, nɛ o tsɔɔ ní ngɛ wa blɔ ngua amɛ a nɔ.’ 27  Se e ma de nyɛ ke, ‘I li he nɛ nyɛ je. Nyɛɛ je ye nɔ kɛ ya se, nyɛ nihi nɛ nyɛ tsuɔ níhi nɛ dɛ blɔ!’ 28  Lejɛ ɔ ji he nɛ nyɛ ma fo ya nɛ nyɛ ma kpe nyɛ lungu nya ngɛ, be mi nɛ nyɛ maa na Abraham, Isak, Yakɔb, kɛ gbali ɔmɛ tsuo ngɛ Mawu Matsɛ Yemi ɔ mi, se nyɛɛ lɛɛ a ma sake nyɛ ngɔ fɔ tsu ɔ se ɔ. 29  Jehanɛ hu ɔ, nihi maa je puje he kɛ pusinɔ he kɛ yiti je kɛ woyi je kɛ ba, nɛ a ma ba hi okplɔɔ ɔ he ngɛ Mawu Matsɛ Yemi ɔ mi. 30  Nɛ hyɛ! nihi nɛ a kpɛ se ɔ ma ba sɛ hlami, nɛ nihi nɛ a sɛ hlami ɔ ma ba kpɛ se.” 31  Ngɛ jamɛ a ngmlɛfia a mi nɔuu ɔ, Farisi bi komɛ ba nɛ a ba de lɛ ke: “Tee si nɛ o je hiɛ ɔ kɛ ho, ejakaa Hɛrode ngɛ hlae kaa e maa gbe mo.” 32  Nɛ e de mɛ ke: “Nyɛɛ ya nɛ nyɛ ya de jamɛ a kɔkɔbo ɔ ke, ‘Hyɛ! i ngɛ daimoniohi hiae nɛ i ngɛ nihi tsae mwɔnɛ ɔ, nɛ hwɔɔ hu ma pee jã, nɛ ligbi etɛne ɔ nɔ ɔ, ma gbe nya.’ 33  Se kɛ̃ ɔ, e sa nɛ ma tsa ye blɔ hiami ɔ nɔ mwɔnɛ ɔ, kɛ hwɔɔ, kɛ hwɔɔ se, ejakaa e be nyɛe maa ba mi kaa a maa gbe gbalɔ ko ngɛ he kpa ko kaa ja Yerusalɛm. 34  Yerusalɛm, Yerusalɛm, mo nɛ o gbeɔ gbali ɔmɛ, nɛ o fiaa nihi nɛ a tsɔɔ mɛ o ngɔ ɔ tɛ. I bɔ mɔde si abɔ kaa ma bua o bimɛ ɔmɛ a nya kaa bɔ nɛ kungwɔ buaa e bimɛ a nya kɛ woɔ e pɛli sisi ɔ! Se o kplɛɛ we. 35  Hyɛ! A je nyɛ we ɔ he ngɔ ha nyɛ. I ngɛ nyɛ dee ke, kɛ je piɔ kɛ yaa a, nyɛ be mi nae hu kɛ yaa si be nɛ nyɛ ma de ke: ‘A jɔɔ nɔ nɛ e ma ngɛ Yehowa* biɛ ɔ mi ɔ!’”

Sisi ningma

Aloo “mumi nɛ haa nɛ nɔ jeɔ kpa.”
Hela, “sea susumi ní.” Sea kake peeɔ lita 7.33.
Aloo “sa.”
Hyɛ Munyu Komɛ A Sisi Tsɔɔmi.