Yaa mi ní ɔ nɔ

Yaa e mi ní ɔ mi

Yehowa Odasefohi

Moo hla gbi Dangme

2 Tɛsalonika Bi 1:1-12

MI MUNYUHI

  • Fɔmi (1, 2)

  • Tɛsalonika bi ɔmɛ a hemi kɛ yemi ɔ ngɛ wae (3-5)

  • Tue gboli a he lue yemi (6-10)

  • A sɔle kɛ ha asafo ɔ (11, 12)

1  Paulo, Silvano,* kɛ Timoteo, kɛ ya ha Tɛsalonika bi asafo ɔ nɛ e kɛ Mawu nɛ ji wa Tsɛ ɔ kɛ Nyɔmtsɛ Yesu Kristo pee kake ɔ:  Nyɛ nine nɛ su dloomi kɛ tue mi jɔmi nɛ je Mawu nɛ ji Tsɛ ɔ kɛ Nyɔmtsɛ Yesu Kristo ngɔ ɔ nɔ.  Nyɛmimɛ, e ji wa blɔ nya ní tsumi kaa be fɛɛ be ɔ, wa maa na Mawu si kɛ ha nyɛ. Enɛ ɔ sa saminya, ejakaa nyɛ hemi kɛ yemi ɔ ngɛ wae wawɛɛ nitsɛ, nɛ suɔmi nɛ nyɛ ti nɔ fɛɛ nɔ ngɛ kɛ ha e sibi ɔ ngɛ hiɛe.  Enɛ ɔ ha nɛ wɔ nitsɛmɛ wa fĩaa ngɛ nyɛ he ngɛ Mawu asafo ɔmɛ a kpɛti, ngɛ si nɛ nyɛ fĩ kɛ hemi kɛ yemi nɛ nyɛ je kpo ngɛ yi mi wamihi tsuo kɛ nɔ́ namihi* nɛ nyɛɛ kɛ ngɛ kpee ɔmɛ a mi* ɔ he je.  Enɛ ɔ ji Mawu dami kojomi ɔ nɔ mi mami nɛ ma ha nɛ a bu nyɛ kaa nihi nɛ a sa kɛ ha Mawu Matsɛ Yemi ɔ, nɛ́ ngɛ anɔkuale mi ɔ, nyɛ ngɛ nɔ́ nae ngɛ he ɔ nɛ.  Enɛ ɔ he ɔ, e da ngɛ Mawu blɔ fa mi kaa nihi nɛ a ngɔɔ amanehlu kɛ baa nyɛ nɔ ɔ, lɛ hu e kɛ amanehlu maa ba a nɔ kɛ to mɛ nane mi.  Se nyɛ nihi nɛ nyɛ ngɛ amanehlu nae ɔ, e ma ha nyɛ he mi jɔmi kɛ piɛɛ wa he ngɛ Nyɔmtsɛ Yesu kɛ e bɔfohi nɛ a ngɛ he wami ɔmɛ a kpo jemi kɛ maa je hiɔwe  ngɛ la nɛ ngɛ tsoe gegeege ɔ mi, be mi nɛ e kɛ nihi nɛ a li Mawu kɛ nihi nɛ a bui wa Nyɔmtsɛ Yesu Kristo sane kpakpa a tue ɔ maa to ní ɔ.  Nimli nɛ ɔmɛ ma ná kojomi tue gblami nɛ ji neneene hɛ mi kpatami kɛ je Nyɔmtsɛ ɔ hɛ mi, kɛ e hɛ mi nyami he wami ɔ mi, 10  be nɛ e maa ba konɛ a wo e kɛ e ni klɔuklɔu ɔmɛ a hɛ mi nyami ɔ, nɛ ngɛ jamɛ a ligbi ɔ nɔ ɔ, a maa na kaa e he ngɛ nyakpɛ ngɛ nihi tsuo nɛ a he ye ɔmɛ a kpɛti, ejakaa odase nɛ wa ye ɔ, nyɛɛ kɛ hemi kɛ yemi pɛtɛ he. 11  Enɛ ɔ he ɔ, wa sɔleɔ kɛ haa nyɛ be fɛɛ be, konɛ wa Mawu ɔ nɛ bu nyɛ kaa nihi nɛ a sa e tsɛmi ɔ, nɛ e ngɔ e he wami ɔ kɛ tsu ní kpakpahi tsuo nɛ saa e hɛ mi kɛ hemi kɛ yemi ní tsumi fɛɛ hemi kɛ yemi ní tsumi kɛ pi si. 12  Bɔ nɛ pee nɛ a wo wa Nyɔmtsɛ Yesu biɛ ɔ hɛ mi nyami ngɛ nyɛ mi, kɛ nyɛ hu ngɛ e mi, ngɛ wa Mawu ɔ kɛ Nyɔmtsɛ Yesu Kristo dloomi ɔ nya.

Sisi ningma

A tsɛɛ lɛ hu ke Silas.
Aloo “amanehluhi.”
Aloo “nɛ nyɛ ngɛ nya dae.”