Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

1 Yohane 2:1-29

MI MUNYUHI

  • Yesu, kpatami afɔle ko (1, 2)

  • Mawu kita amɛ a nɔ yemi (3-11)

    • Kita ehe kɛ kita momo (7, 8)

  • Yi mi tomi he je nɛ e ngma (12-14)

  • Nyɛ ko suɔ je ɔ (15-17)

  • Antikristo ɔ he kɔkɔ bɔmi (18-29)

2  Ye bimɛ tsɔwi, i ngɛ nyɛ ní nɛ ɔmɛ ngmae konɛ nyɛ ko pee yayami ko. Se kɛ̃ ɔ, ke nɔ ko pee yayami ko po ɔ, wa ngɛ yemi kɛ bualɔ* ko ngɛ Tsɛ ɔ ngɔ, lɛ ji Yesu Kristo, dalɔ ɔ nɛ.  Nɛ lɛ ji kpatami afɔle* kɛ ha wa he yayami ɔmɛ, se kɛ̃ ɔ, pi kɛ ha wɔ pɛ, mohu ɔ, kɛ ha je ɔ tsuo hulɔ.  Ke wa yaa nɔ nɛ wa yeɔ e kita amɛ a nɔ ɔ, lɔ ɔ lɛ haa nɛ wa yɔseɔ kaa wa ba le lɛ ɔ nɛ.  Nɔ nɛ e deɔ ke, “I ba le lɛ,” se kɛ̃ ɔ, e yi e kita amɛ a nɔ ɔ, e ji lakpatsɛ, nɛ anɔkuale ɔ be nɔmlɔ nɛ ɔ mi.  Se nɔ fɛɛ nɔ nɛ e yeɔ e munyu ɔ nɔ ɔ, ngɛ anɔkuale mi ɔ, suɔmi nɛ jamɛatsɛ ɔ ngɛ kɛ ha Mawu ɔ pi si. Kɛ gu enɛ ɔ nɔ ɔ, wa leɔ kaa waa kɛ lɛ pee kake.  Nɔ nɛ e deɔ ke kake peemi ngɛ e kɛ lɛ a kpɛti ɔ, e ji e blɔ nya ní tsumi kaa e maa ya nɔ maa nyɛɛ kaa bɔ nɛ jamɛ a nɔ ɔ nyɛɛ ɔ.  Nihi nɛ i suɔ, pi kita ehe ko nɛ i ngɛ nyɛ ngmae, mohu ɔ, kita momo nɛ nyɛ nine su nɔ kɛ je sisije ɔ. Kita momo nɛ ɔ ji munyu nɛ nyɛ nu ɔ nɛ.  Jehanɛ hu ɔ, i ngɛ nyɛ kita ehe ko ngmae, nɛ ngɛ e blɔ fa mi kɛ nyɛ hu nyɛ blɔ fa mi ɔ, e ji anɔkuale, ejakaa diblii ɔ ngɛ bee kɛ yaa, nɛ anɔkuale la a ngɛ kpɛe momo.  Nɔ nɛ e deɔ ke e ngɛ la a mi, se kɛ̃ ɔ, e nyɛɔ e nyɛmi ɔ, e ngɛ diblii ɔ mi loloolo. 10  Nɔ nɛ e suɔ e nyɛmi ɔ, e hiɔ la a mi, nɛ nane tɔ̃tɔ̃mi nɔ́ ko be e mi. 11  Se nɔ nɛ e nyɛɔ e nyɛmi ɔ, e ngɛ diblii ɔ mi, nɛ e ngɛ nyɛɛe ngɛ diblii ɔ mi, nɛ e li he nɛ e yaa, ejakaa diblii ɔ yu e hɛ ngmɛ. 12  Bimɛ tsɔwi, i ngɛ nyɛ ngmae, ejakaa e biɛ ɔ he ɔ, a ngɔ nyɛ he yayami ɔmɛ kɛ pa nyɛ. 13  Tsɛmɛ, i ngɛ nyɛ ngmae, ejakaa nyɛ ba le nɔ nɛ e ngɛ kɛ je sisije ɔ. Nihewi, i ngɛ nyɛ ngmae, ejakaa nyɛ ye nɔ yayami ɔ nɔ kunimi. Bimɛ tsɔwi, i ngɛ nyɛ ngmae, ejakaa nyɛ ba le Tsɛ ɔ. 14  Tsɛmɛ, i ngɛ nyɛ ngmae, ejakaa nyɛ ba le nɔ nɛ e ngɛ kɛ je sisije ɔ. Nihewi, i ngɛ nyɛ ngmae, ejakaa nyɛ he wa, nɛ Mawu munyu ɔ ngɛ nyɛ mi, nɛ nyɛ ye nɔ yayami ɔ nɔ kunimi. 15  Nyɛ ko suɔ je ɔ aloo níhi nɛ ngɛ je ɔ mi ɔ. Ke nɔ ko suɔ je ɔ, Tsɛ ɔ suɔmi ɔ be e mi; 16  ejakaa nɔ́ fɛɛ nɔ́ nɛ ngɛ je ɔ mi ɔ—níhi nɛ peeɔ he lo ɔ akɔnɔ kɛ níhi nɛ peeɔ hɛ ngmɛ ɔ akɔnɔ kɛ níhi nɛ nɔ ko ngɛ nɛ e kɛ fĩaa—pi Tsɛ ɔ ngɔ nɛ e je, mohu ɔ, je ɔ mi e je. 17  Jehanɛ se hu ɔ, je ɔ ngɛ bee kɛ yaa, nɛ jã kɛ̃ nɛ e mi níhi nɛ peeɔ nɔ akɔnɔ ɔ hu ngɛ bee kɛ yaa, se nɔ nɛ e peeɔ Mawu suɔmi nya ní ɔ maa hi si kɛ maa ya neneene. 18  Bimɛ tsɔwi, nyagbe ngmlɛfia a ji nɛ ɔ nɛ, nɛ kaa bɔ nɛ nyɛ nu kaa antikristo ɔ ma a, amlɔ nɛ ɔ po ɔ, antikristohi babauu je a he kpo, nɛ anɔkuale nɛ ɔ ha nɛ wa le kaa nyagbe ngmlɛfia a ji nɛ ɔ nɛ. 19  A je wa kpɛti kɛ ho, se kɛ̃ ɔ, pi wa we bi ji mɛ;* ejakaa kaa wa we bi ji mɛ ɔ, jinɛ a kɛ wɔ ko hi si. Se a je kpo konɛ e pee heii kaa pi nihi tsuo ji wa we bi. 20  Nyɛɛ lɛɛ nɔ klɔuklɔu ɔ pɔ nyɛ nu, nɛ nyɛ tsuo nyɛ le. 21  Pi kaa nyɛ li anɔkuale ɔ he je nɛ i ngɛ nyɛ ngmae ɔ, mohu ɔ, akɛnɛ nyɛ le, nɛ́ lakpa ko ji anɔkuale ɔ mi ɔ he je. 22  Anɛ pi nɔ nɛ e kplɛɛ we nɔ kaa Yesu ji Kristo ɔ ji lakpatsɛ ɔ lo? Antikristo ɔ ji nɔ nɛ e kuaa Tsɛ ɔ kɛ Bi ɔ nɛ. 23  Nɔ fɛɛ nɔ nɛ e kuaa Bi ɔ, e be Tsɛ ɔ hulɔ. Se nɔ fɛɛ nɔ nɛ e heɔ Bi ɔ atuu ɔ, e ngɛ Tsɛ ɔ hulɔ. 24  Nyɛɛ lɛɛ, e sa nɛ níhi nɛ nyɛ nu kɛ je sisije ɔ nɛ hi nyɛ mi. Ke níhi nɛ nyɛ nu kɛ je sisije ɔ ngɛ nyɛ mi ɔ, nyɛɛ kɛ Bi ɔ maa pee kake, nɛ nyɛɛ kɛ Tsɛ ɔ hu maa pee kake. 25  Jehanɛ se hu ɔ, nɔ́ nɛ lɛ nitsɛ e wo wɔ he si ɔ ji nɛ ɔ nɛ—wami nɛ ngɛ kɛ yaa neneene ɔ. 26  Nihi nɛ a ngɛ mɔde bɔe kaa a maa sisi nyɛ ɔmɛ a he je nɛ i ngɛ nyɛ ní nɛ ɔmɛ ngmae ɔ nɛ. 27  Nɛ nyɛɛ lɛɛ, nu nɛ e pɔ nyɛ ɔ ngɛ nyɛ mi, nɛ nyɛ hia we nɔ ko nɛ e hi nyɛ ní tsɔɔe; mohu ɔ, nu nɛ e pɔ nyɛ ɔ ngɛ nyɛ níhi tsuo tsɔɔe, nɛ e ji anɔkuale nɛ tsa pi lakpa. Kaa bɔ nɛ e* tsɔɔ nyɛ ɔ, nyɛɛ kɛ lɛ* nɛ pee kake. 28  Enɛ ɔ he ɔ, bimɛ tsɔwi, nyɛɛ ya nɔ nɛ nyɛɛ kɛ lɛ nɛ pee kake nɛ́ ke a je lɛ kpo ɔ, wa nyɛ nɛ waa tu munyu faa konɛ ke e ba a, waa kɛ zo nɛ ko yu wa he ngɛ e he. 29  Ke nyɛ le kaa dalɔ ji lɛ ɔ, nyɛ ná nɛ nyɛɛ le hu kaa nɔ fɛɛ nɔ nɛ peeɔ nɔ́ nɛ da a, a fɔ lɛ kɛ je e mi.

Sisi ningma

Aloo “mi dalɔ.”
Aloo “afɔle nɛ a kɛ dlaa nɔ ko kɛ Mawu a kpɛti.”
Aloo “a piɛɛ we wa he.”
Aloo “nu nɛ a pɔ nyɛ ɔ.”
Aloo “nɔ nɛ e pɔ nyɛ nu ɔ.”