Yaa mi ní ɔ nɔ

Yaa munyuyi tsɔwi ɔmɛ a nɔ

Yaa e mi ní ɔ mi

Yehowa Odasefohi

Dangme

Baiblo ɔ Ngɛ Intanɛti ɔ Nɔ | NGMAMI KLƆUKLƆU Ɔ—JE EHE BAIBLO

1 Petro 1:1-25

MI MUNYUHI

  • Fɔmi (1, 2)

  • Fɔmi ehe kɛ ha hɛ kɛ nɔ fɔmi nɛ ngɛ hɛ ngmengmlee (3-12)

  • Nyɛɛ pee klɔuklɔu kaa bimɛ nɛ a buɔ tue (13-25)

1  Petro, Yesu Kristo bɔfo, kɛ ya ha ma se bi nɛ a gbɛ fĩa Ponto, Galatia, Kapadokia, Asia, kɛ Bitinia a, kɛ ya ha nihi nɛ a hla mɛ  ngɛ níhi nɛ Mawu nɛ ji Tsɛ ɔ sɛɔ hlami leɔ ɔ nya, nɛ a kɛ mumi ɔ tsu a he, kɛ yi mi tomi ɔ kaa a bu tue, nɛ a ngɔ Yesu Kristo muɔ ɔ kɛ fĩa a nɔ ɔ: Dloomi kɛ tue mi jɔmi nɛ hiɛ kɛ ha nyɛ.  A je Mawu nɛ ji wa Nyɔmtsɛ Yesu Kristo Tsɛ ɔ yi, ejakaa ngɛ e mɔbɔ nami babauu ɔ nya a, e ha nɛ a fɔ wɔ ehe kɛ ha hɛ kɛ nɔ fɔmi nɛ ngɛ hɛ ngmengmle kɛ gu si nɛ e tle Yesu Kristo kɛ je gbeje ɔ nɔ,  kɛ ha gbosi ní ko nɛ e puɛ we nɛ mu be he nɛ e kpa we ɔ. A ngɔ kɛ to ngɛ hiɔwe kɛ ha nyɛ,  nyɛ nihi nɛ a kɛ Mawu he wami ɔ ngɛ nyɛ he bue kɛ gu hemi kɛ yemi nɔ, kɛ ha yi wami hemi ko nɛ a pee klaalo nɛ a ma je kpo ngɛ nyagbe be ɔ mi ɔ.  Enɛ ɔ he ɔ, nyɛ ngɛ nyae wawɛɛ nitsɛ, e ngɛ mi kaa e sa nɛ ka slɔɔtohi nɛ ha nɛ nyɛɛ hao be kpiti ko mohu,  konɛ nyɛ hemi kɛ yemi ɔ nɛ a ka nɛ a hyɛ, nɛ́ e he jua wa pe sika tsu nɛ hɛ mi kpataa ngɛ la nɛ a kɛ ka nɛ a hyɛ* ɔ tsuo se ɔ nɛ e pee yi jemi kɛ hɛ mi nyami kɛ bumi kɛ ha nyɛ ngɛ Kristo Yesu kpo jemi ɔ mi.  E ngɛ mi kaa nyɛ nɛ lɛ hyɛ mohu lɛɛ, se nyɛ suɔ lɛ. E ngɛ mi kaa nyɛ nɛ lɛ amlɔ nɛ ɔ, se kɛ̃ ɔ, nyɛ heɔ lɛ yeɔ, nɛ nyɛ ngɛ nyae wawɛɛ kɛ bua jɔmi nɛ hí kalemi nɛ hɛ mi ngɛ nyami,  be mi nɛ nyɛ suu nyɛ hemi kɛ yemi ɔ he oti ɔ nɛ ji nyɛ yi wami hemi ɔ he ɔ.* 10  Ngɛ yi wami hemi nɛ ɔ he ɔ, gbali ɔmɛ nɛ a gba kɛ kɔ dloomi nɛ a maa dloo nyɛ ɔ he ɔ bi níhi a mi saminya, nɛ a hla níhi a mi fitsofitso. 11  A ya nɔ nɛ a hla be tutuutu aloo be nɛ mumi nɛ ngɛ a mi ɔ ngɛ tsɔɔe kɛ kɔ Kristo ɔ he, be mi nɛ mumi ɔ sɛ hlami nɛ e ye amanehluhi nɛ Kristo maa na, kɛ hɛ mi nyami nɛ maa nyɛɛ se kɛ ba a he odase ɔ. 12  A je kpo ngɔ tsɔɔ mɛ kaa pi mɛ nitsɛmɛ a he nɛ a ngɛ sɔmɔe, se nyɛ mohu nɛ a ngɛ sɔmɔe ngɛ nɔ́ nɛ amlɔ nɛ ɔ, a gu ni nɛmɛ nɛ a jaje sane kpakpa a kɛ tsɔɔ nyɛ ngɛ mumi klɔuklɔu nɛ a tsɔ kɛ je hiɔwe ɔ he wami nya a nɔ kɛ fia he adafi kɛ tsɔɔ nyɛ ɔ he je. Hiɔwe bɔfohi suɔ wawɛɛ kaa a maa le kikɛmɛ a ní nɛ ɔmɛ a mi fitsofitso. 13  Lɔ ɔ he ɔ, nyɛɛ pee nyɛ juɛmi klaalo kɛ ha ní tsumi; nyɛ hɛ nɛ hi nyɛ he nɔ saminya; nyɛɛ ngɔ nyɛ hɛ kɛ nɔ fɔmi ɔ kɛ ma dloomi nɛ a maa dloo nyɛ ngɛ Yesu Kristo kpo jemi ɔ mi ɔ nɔ. 14  Akɛnɛ nyɛ ji bimɛ nɛ a buɔ tue he je ɔ, nyɛ ha nɛ akɔnɔhi nɛ nyɛ ná be ko nɛ be benɛ nyɛ li nɔ́ ko ɔ nɛ kpa nyɛ kudɔmi,* 15  se kaa bɔ nɛ Nɔ Klɔuklɔu ɔ nɛ e tsɛ nyɛ ɔ ngɛ ɔ, nyɛɛ pee nihi nɛ a ngɛ klɔuklɔu ngɛ je mi bami tsuo mi, 16  ejakaa a ngma ke: “E sa nɛ nyɛɛ pee klɔuklɔu, ejakaa i ngɛ klɔuklɔu.” 17  Nɛ ke nyɛ ngɛ Tsɛ ɔ, nɔ nɛ e kojoɔ nɔ fɛɛ nɔ ngɛ e ní tsumihi a he nɛ e hlɛ nɔ mi ɔ tsɛe ɔ, lɛɛ nyɛɛ kɛ gbeye yemi nɛ ba nyɛ je mi ngɛ be nɛ nyɛɛ kɛ hiɔ si kaa ma se bi ɔ mi. 18  Ejakaa nyɛ le kaa pi níhi nɛ a puɛɔ, kɛ sika hiɔ aloo sika tsu nɛ a kɛ ha nɛ nyɛ ye nyɛ he* kɛ je nyɛ yaka si himi blɔ nɛ nyɛ nɛmɛ ɔmɛ ngɔ* kɛ ha nyɛ ɔ he. 19  Mohu ɔ, a kɛ muɔ nɛ he jua wa, nɛ ngɛ kaa jijɔ bi nɛ kpa ko kɛ mu ko be e he ɔ muɔ, nɛ ji Kristo nɔ́ ɔ lɛ pee jã. 20  Ngɛ anɔkuale mi ɔ, a sɛ hlami nɛ a le lɛ loko a to je ɔ sisi, se a je lɛ kpo heii ngɛ be ɔmɛ a nyagbe ɔ mi ngɛ nyɛ he je. 21  Kɛ gu e nɔ ɔ, nyɛ ba plɛ nihi nɛ a he ye ngɛ Mawu, nɔ nɛ e tle lɛ si kɛ je gbeje nɛ e wo e hɛ mi nyami ɔ mi, konɛ nyɛ hemi kɛ yemi ɔ kɛ nyɛ hɛ kɛ nɔ fɔmi ɔ nɛ hi Mawu mi. 22  Amlɔ nɛ ɔ nɛ nyɛ tsu nyɛ he* kɛ gu anɔkuale ɔ tue nɛ nyɛ bu ɔ nɔ, nɛ́ lɔ ɔ ha nɛ nyɛ ba suɔ nyɛmimɛ a sane nɛ osato be mi ɔ, nyɛɛ suɔ nyɛ sibi wawɛɛ nitsɛ kɛ je nyɛ tsui mi. 23  Ejakaa a ha nɛ a fɔ nyɛ ehe, pi kɛ gu wu* nɛ puɛɔ nɔ, se mohu kɛ gu nɔ́ nɛ e puɛ we nɔ, kɛ gu Mawu hɛ kalɔ ɔ nɛ e ngɛ kɛ yaa neneene ɔ munyu ɔ nɔ. 24  Ejakaa “he lohi* tsuo ngɛ kaa nga, nɛ a hɛ mi nyami ɔ tsuo ngɛ kaa nga nɔ mɔmɔhi; nga gbliɔ, nɛ mɔmɔ wɔleɔ, 25  se Yehowa* munyu ɔ hiɔ si kɛ yaa neneene.” Nɛ “munyu” nɛ ɔ ji sane kpakpa a nɛ a jaje kɛ tsɔɔ nyɛ ɔ nɛ.

Sisi ningma

Aloo “tsu he.”
Aloo “nyɛ susumahi a yi wami hemi ɔ he ɔ.”
Aloo “puɛmi kaa bɔ nɛ a puɛɔ buɛ ɔ.”
Hela, “kpɔ̃ nyɛ.”
Aloo “nɛ nyɛ nɛmɛ ɔmɛ gu kusumihi a nɔ.”
Aloo “susumahi a he.”
Nɛ ji, wu nɛ ma nyɛ maa wo yiblii.
Aloo “adesahi.”
Hyɛ Munyu Komɛ A Sisi Tsɔɔmi.