Lucaden pa Jehovah pe gidonyo i tim me wibye pi gin ma Baibul pwonyo. Pe wadiyo luloc me moko tam mo, pe wabolo kwir pi pati nyo ngat mo keken, pe wacung me bedo lutela i gamente, dok pe wadonyo i tim mo keken me loko gamente. Waye ni Baibul miyo tyen lok mucwiny me timo jami magi.

•   Walubo lanen pa Yecu ma okwero bedo lacungo wibye. (Jon 6:15) En opwonyo lulub kore ni ‘pe gubedo jo me lobo’ dok otito ka maleng ni omyero pe gucwak tung ka mo keken ka odok i lok me wibye.—Jon 17:14, 16; 18:36; Marako 12:13-17.

•   Wan wacwako Ker pa Lubanga keken ma Yecu oloko i kome i kare ma en owacci: “Dok kwena maber me Ker-ri kibititone i wi lobo ducu me bedo caden bot rok ducu.” (Matayo 24:14) Macalo lucungo pi Ker pa Lubanga, ma kiminigi tic me tito pi binone, wan pe wacwako tung ka mo keken ka odok i lok me wibye i twok lobo ducu, kadi wa i lobo ma wabedo iye.—2 Jo Korint 5:20; Jo Epeco 6:20.

•   Kit macalo pe wacwako tung ka mo keken-ni, watwero lok agonya i kom Ker pa Lubanga bot jo ma gitye ki tam mapatpat me wibye. Watute me nyuto i lokwa ki ticwa ni wajenge i kom Ker pa Lubanga me cobo pekki ducu me lobo-ni.—Jabuli 56:11.

•   Kit macalo pe wadonyo i tim me wibye, man omiyo watye ma waribbe kacel macalo utmege i twok lobo ducu. (Jo Kolocai 3:14; 1 Petero 2:17) Ki tungcel, dini ma girwako wigi i tim me wibye gikelo apokapoka i kin jo me dinigi.—1 Jo Korint 1:10.

 Woro pi gamente. Kadi bed pe wadonyo i tim me wibye, waworo twero pa gamente ma tye ka loyowa. Man rwatte ki cik me Baibul ma waco ni: “Dano acel acel myero owiny luloc ma giloye.” (Jo Roma 13:1) Walubo cik, waculo mucoro, dok wacwako yub pa gamente me kelo berbedo bot lutedero. Pe wanywako i tute mo keken me loko gamente, ento walubo tira ma Baibul miyo ni waleg “pi luker ki jo ma tye i rwom ma malo,” tutwalle ka gitye ka moko tam ma twero gudo worowa.—1 Temceo 2:1, 2.

 Waworo bene twero pa jo mukene me moko tam pigi kengi ka odok i lok me wibye. Me labolle, pe watemo balo yub me bolo kwir nyo gengo jo ma gumoko tamgi me bolo kwir.

 Tika bedowa ma pe wacwako tung ka mo ka odok i lok me wibye pud ocakke acaka i kare-ni? Pe. Lukwena ki Lukricitayo mukene me cencwari me acel bene onongo pe gidonyo i tim me wibye. Buk mo acel ma wiye tye ni Beyond Good Intentions waco ni: “Kadi bed Lukricitayo macon onongo gingeyo ni omyero giwor luloc, ento onongo pe gidonyo i tim me wibye.” I yo acel-lu, buk ma wiye tye ni On the Road to Civilization waco ni Lukricitayo macon onongo “pe giye bedo luloc pa gamente.”

 Tika bedowa ma pe wacwako tung ka mo ka odok i lok me wibye balo berbedo pa lobo moni? Pe. Wan wabedo lutedero ma gimaro kuc dok lutela pa gamente pe myero gubed ki lworo mo keken i komwa. Ma lubbe ki bedowa ma pe wacwako tung ka mo i lok me wibye, ripot mo ma kicoyo i mwaka 2001 owaco ni: “I kare-ni, jo mogo pe gimaro tam man ma Lucaden pa Jehovah gumoko-ni; dok meno aye tyen lok mumiyo luloc aconya macon me Nazi ki Communist guunogi.” Ento, kadi bed luloc me Soviet guunogi, Lucaden pa Jehovah “pud gumedde ki lubo cik. Gin bene gubedo jo ma gigenne dok gutiyo matek i fam mapol ki cuma madongo dok pe gukelo ayela i kom luloc me Communist.” Ripot-ti ogik ki waco ni, i kare-ni bene, niye ki tic pa Lucaden pa Jehovah “pe balo kuc ki berbedo pa lobo mo keken.”