Cit atir i jami ma tye

Cit atir ka ma nyuto lok ma tye iye

 LOK MA I POK NGEYE | LUBANGA NENO LWENY NINING?

Kit ma Lubanga Onongo Neno ki Lweny i Kare pa Jo Icrael

Kit ma Lubanga Onongo Neno ki Lweny i Kare pa Jo Icrael

Jo magi onongo kitye ka diyogi macalo opii. Gin gulego labongo keng ni Lubanga myero olargi—kadi bed ni pe oyotoyot. Jo magi aye Luicrael, jo pa Lubanga, ma gukwo i kare macon. Jo ma onongo tye ka diyogi aye Luejipt, ma onongo gitye oteka i kare meno. (Nia 1:13, 14) Pi mwaki mapol, jo Icrael gubedo ka kuro ni Lubanga olargi ki i bedo opii i cing jo Ejipt. Lacen, kare ma Lubanga myero olargi kwede oromo. (Nia 3:7-10) Baibul wacci Lubanga olwenyo i kom jo Ejipt en kikome. En okelo can madongo mapat pat, dok i ngeye oneko kabaka me Ejipt kacel ki monnye i Nam Makwar. (Jabuli 136:15) Lubanga Jehovah onyuto ni ebedo “oteka lweny” pi jone.Nia 15:3, 4.

 Kit ma Lubanga olwenyo kwede i kom jo Ejipt en kikome-ni nyuto ni en pe dag lweny ducu. I kine mukene, en onongo waco ni jone Luicrael myero gucit ka lweny. Me labolle, en ocikogi me lweny i kom jo Kanaan ma onongo kitgi raco tutwal-li. (Nwoyo Cik 9:5; 20:17, 18) En ociko Kabaka Daudi ni olweny i kom jo Piliciti ma onongo gidiyo jo Icrael-li. Lubanga bene onyutte diro me lweny ma oweko en oloyo jo Piliciti.2 Camuel 5:17-25.

Lok magi ma kicoyogi i Baibul-li ginyuto ni ka ce kitye ka keto bura nyo lutim mogo maraco gidiyo jo Icrael, ci Lubanga onongo weko kilwenyo me gwoko jone ki dong woro me ada. Ento, nen kong lok adek magi ma pigi tego-ni ma lubbe ki lweny ma Lubanga onongo cwako:

  1. LUBANGA KEKEN AYE ONONGO MOKO ANGA MA MYERO OLWENY. I nino mo acel, Lubanga owaco bot jo Icrael ni: “Lweny man pe wun aye wubilwenyo.” Pingo en owaco kumeno? Lubanga kikome aye onongo bilweny pi jone. (2 Tekwaro 20:17; 32:7, 8) En olwenyo pi jone tyen mapol ata, calo lweny ma waneno i acakki me pwony man. I nino mukene, Lubanga ociko jo Icrael me lwenyo lweny ma en cwako, calo me gwoko Lobo ma Kiciko Pire wek pe kikwany woko ki botgi.Nwoyo Cik 7:1, 2; Yocwa 10:40.

  2. LUBANGA KEKEN AYE ONONGO MOKO AWENE MA MYERO KILWENY IYE. Lutic pa Lubanga onongo myero gudi cwinygi kun gikuro kare ma Lubanga ocimo me lweny i kom jo ma gurumo ka ngetgi ma gitimo jami maraco dok gidiyogi. Ka pe Lubanga aye ocikogi, gin onongo pe myero gutug lweny ki wigi i kom lumonegi. Lubanga onongo pe cwakogi ka gunyuto dit wic. Ki lok ada, Baibul nyuto atir ni ka Luicrael onongo gungwete me cito ka lweny ma Lubanga pe owaccigi, adwogine onongo bedo marac adada. *

  3. LUBANGA CWINYE PE YOM KA DANO GITO, KADI WA JO MARACO. Lubanga Jehovah aye Wang It me Kwo dok en aye Ocweyo dano ducu. (Jabuli 36:9) Pi meno, en pe mito neno ka dano to. Ento, ki cwercwiny madit, tye jo mogo ma gituko diro wek luwotgi guden can dok gineko jo mukene. (Jabuli 37:12, 14) Me juko tim ma kit meno, Lubanga i kine mukene oweko kilwenyo i kom jo maraco. Kadi bed ni pi mwaki magi ducu ma en oweko jo Icrael gulwenyo lweny ma kit meno, en pud “lakica” dok ‘kiniga pe omake oyot’ i kom jo ma giuno Luicrael. (Jabuli 86:15) Me labolle, en ociko ni ma peya jo Icrael gulwenyo i kom gang moni, gin myero kong ‘gumi dwan me kuc i kome,’ wek jo me gang meno gubed ki kare me loko kitgi dok pe kilweny i komgi. (Nwoyo Cik 20:10-13) I yo meno, Lubanga onyuto ni ‘cwinye pe bedo yom me neno ka latim marac to, ento emito en onguti owek timo bal ci olokke odwog bote wek obed kwo.’Ejekiel 33:11, 14-16. *

Kit ma dong watyeko nenone kwede i kare pa jo Icrael-li, Lubanga onongo neno lweny calo yo matir me giko deno can kacel ki tim maraco mapat pat. Ento Lubanga keken aye onongo moko awene ma lweny ma kit meno myero otimme iye ki dong anga ma myero olweny. Lubanga tika onongo lwenyo i yo me gero ma weko en neko dano mapol ata? Pe kumeno. En dag tim gero. (Jabuli 11:5) Tika kit ma Lubanga neno kwede ki lweny olokke i kare ma Wode, Yecu Kricito ocako ticce me pwony i cencwari me acel?

^ para. 7 Me labolle, i nino mo acel, ki loyo jo Icrael calo gwok i kare ma gutugo lweny i kom jo Amalek ki Kanaan kadi bed Lubanga onongo ogengogi ni pe gucit ka lweny. (Wel 14:41-45) Mwaki mapol i nge lweny meno, Kabaka Yocia ma obedo lagenni orune ka tugo lweny labongo cwak pa Lubanga ma oweko kwone orweny.2 Tekwaro 35:20-24.

^ para. 8 Jo Icrael pe gumiyo lok me kuc bot jo Kanaan ma onongo gitye ka lweny i komgi-ni. Pingo? Pien onongo kimiyo mwaki 400 kulu bot jo Kanaan wek gulok yo me kwogi. I kare ma jo Icrael gibino ka lweny i komgi, onongo dong tek adada bot jo Kanaan me loko yo me kwogi marac-ci. (Acakki 15:13-16) Pi meno, onongo myero kijwergi woko matwal. Ento, jo Kanaan mogo ma guloko yo me kwogi gubwot oweko pe kinekogi.Yocwa 6:25; 9:3-27.

Kadi bed ni Lubanga olwenyo i kom Lukanaan, en pe oneko jo mogo calo Rakab ki jo me pacone