Cit atir i jami ma tye

Cit atir ka ma nyuto lok ma tye iye

Lapeny pa Lukwan Bukkewa

Lapeny pa Lukwan Bukkewa

Nga ma obedo Gog ki Magog ma kitito pire i buk pa Ejekiel-li?

Pi mwaki mapol, bukkewa obedo ka tito ni meno Gog ki Magog obedo nying ma kimiyo ki Catan Larac-ci i kare ma kibole piny ki i polo. Niango man onongo jenge i buk me Niyabo pien waco ni Catan Larac-ci aye bitelo lweny i kom jo pa Lubanga i twok lobo ducu. (Yabo 12:1-17) Pi meno, onongo kitamo ni Gog bene obedo nying Catan.

Ento, kit ma kitito kwede lok man okelo lapeny mapol ma pigi tego. Pingo? Nen kong lok man: I kare ma tye ka lok i kom kare ma kibiloyo iye Gog, Jehovah owaco ni: “Abimiyo komi dong doko cam pa kwa winyo ducu ma camo ringo ki pa nguu-gu.” (Ejek. 39:4, NW) Jehovah dok omedo ni: “I nino meno abimiyo kabedo me yik bot Gog i lobo Icrael . . . Gog ki jo me dul monnye ducu gibiyikogi kunnu.” (Ejek. 39:11) Ento “kwa winyo ducu ma camo ringo ki pa nguu-gu” gitwero camo kom cwec me cwiny nining? Kitwero miyo “kabedo me yik” bot Catan i lobo nining? Baibul nyuto ka maleng ni Catan kibitweyo i bur ma tere pe gik pi mwaka 1,000, pe ni kibicamo kome nyo giyike.Yabo 20:1, 2.

Kitito botwa ni i agikki me mwaka 1,000, kibigonyo Catan ki i bur ma tere pe gik-ki dok “en bikatti woko cito ka bwolo rok ducu ma tye i but piny, ma en aye Gog ki Magog, bicokogi bene pi lweny.” (Yabo 20:8) Ento Catan twero bwolo Gog nining ka en obedo Gog? Pi meno, “Gog” pe obedo Catan ma kiloko i kome i buk pa Ejekiel-li nyo Niyabo.

Ci dong, anga ma obedo Gog ki Magog? Me gamo lapeny man, omyero wangi Ginacoya me niang anga ma bilweny i kom jo pa Lubanga. Baibul pe loko i kom lweny pa “Gog ki Magog” keken ento bene loko i kom lweny pa “kabaka me lobo ma yo tung acam” ki pa “luker me lobo.” (Ejek. 38:2, 10-13; Dan. 11:40, 44, 45; Yabo 17:14; 19:19) Lweny magi mono gicung pi lweny aryo mapat pat? Pe kumeno. Baibul tye ka lok i kom lweny acel ento otiyo ki nying mapat pat. Pingo wawaco kumeno? Pien Ginacoya wacciwa ni rok ducu gibiribo wigi kacel i lweny man me agikki  ma bitugo lweny me Armagedon-ni.Yabo 16:14, 16.

Ka waporo Ginacoya magi ducu ma giloko i kom lweny me agikki ma bitimme i kom jo pa Lubanga-ni, man miyo waniang ni Gog ki Magog pe obedo nying Catan ento lobbe ma guribbe kacel. Tika “kabaka me lobo ma yo tung acam” aye bitelo lobbe magi? Pe waromo wacone ni tye kumeno. Ento lok meno twero rwatte ki gin ma Jehovah owaco i kom Gog ni: ‘Ia ki i kabedoni ma tye ka mabor i lobo ma tye yo tung acam. Ibibino kun itelo wi dul mony madit dok matek ma askari ma gitye iye gua ki i rok ducu, gin ducu jo ma ngweco ki aguragura.’Ejek. 38:6, 15.

I yo acel-li, lanebi Daniel, ma obedo yalwak pa Ejekiel-li oloko i kom kabaka me lobo ma yo tung acam ni: “Lok ma biwinnye kun a ki yo tung wokceng ki yo tung acam bimiyo cwinye poto; en bia cito kunnu ki twon akeca madit ka jwero dano woko ki neko jo mapol bene. En biguro kemane madito i kin nam ki got maleng me deyo; ci kare me tone biromo ma nongo ngat mo ma konye dong pe.” (Dan. 11:44, 45) Man rwatte ki lok ma buk pa Ejekiel waco i kom gin ma Gog bitimone.Ejek. 38:8-12, 16.

Gin ango ma bitimme i nge lweny man me agikki-ni? Daniel wacciwa ni: “I kare meno Mikael [Yecu Kricito] bibino [i Amagedon], ma en rwot madit ma loyo rokwu [nicakke 1914]. Dok kare me can bibedo tye, kit can macalo man peya onen cakke wa con i kare pa rok mo-ni nio kwede wa i kare meno. I kare meno aye gibilaro iye rokwu, jo ma gibinongo yam gicoyo nyingi i buk.” (Dan. 12:1) Gin man ma Yecu bitimo macalo lawang Lubanga-ni kitito pire bene i Niyabo 19:11-21.

Ento, anga ma obedo “Gog ki Magog” ma kitito pire i Niyabo 20:8? I kare me atematema ma bibedo me agikki i tum pa mwaka 1,000, jo ma gibijemo i kom Jehovah gibinyuto cwiny me nek ma “Gog ki Magog” tye kwede, rok ma bilweny i kom jo pa Lubanga i agikki me twon can madit atika-ni. Jo magi ducu gibinekogi woko matwal! (Yabo 19:20, 21; 20:9) Pi meno, rwatte me wacone ni jo ducu ma gibijemo i kare me Mwaka Alip Acel-li kilwongogi ni “Gog ki Magog.”

Wan macalo lutino kwan ma gikwedo Lok pa Lubanga kore ki kore, wakuro ki yomcwiny me neno anga ma bibedo “kabaka me lobo ma yo tung acam” i anyim. Ento, labongo paro pi anga ma bitelo wi lobbe magi, wan wangeyo ni jami aryo magi wang ma gutimme: (1) Gog ki Magog kacel ki monnye wang ma kiloyogi dok kijwerogi woko; ki (2) Yecu Kricito ma tye ka loc macalo Kabaka-ni bilaro jo pa Lubanga ci cwalogi i lobo manyen me kuc kun gwokogi i yo maber.Yabo 7:14-17.