Cit atir i jami ma tye

Cit atir ka ma nyuto lok ma tye iye

Tika Ibibedo ma ‘Ikiyo Piny’?

Tika Ibibedo ma ‘Ikiyo Piny’?

“Pi meno wuki [piny], pien pe wungeyo nino kadi wa cawa.”—MAT. 25:13.

1, 2. (a) Gin ango ma Yecu owaco ma lubbe ki kare me agikki? (b) Lapeny mene ma wabinyamo i pwony man?

TEM kong goyo i wi cal Yecu ma obedo i Wi Got Jeituni, got ma onongo nen ki i ot pa Lubanga ka itye i Jerucalem. En onongo tye kacel ki lukwenane angwen, Petero, Anderiya, Yakobo ki dong Jon. Gin guketo cwinygi adada ka winyo lok pa Yecu i kare ma en tye ka tito botgi gin mo ma bikelo yomcwiny i anyim. En otito botgi jami mapol ma lubbe ki kare me agikki me lobo pa Catan-ni kacel ki kare ma en biloc kwede i Ker pa Lubanga. En otittigi ni i kare meno, “lagwok ot ma lagen dok maryek” bicung pire i lobo kany kun miyo bot luticce cam me cwiny i kare ma gimito kikome.Mat. 24:45-47

2 I nge tyeko waco lok meno, Yecu obolo carolok i kom anyira apar. (Kwan Matayo 25:1-13.) I pwony man, wabinyamo lapeny magi: (1) Lok ango ma pire tek ma tye i carolok man? (2) Jo ma kiwirogi ma gin lugen gutiyo ki tira ma i carolok man nining, ki dok okelo adwogi maber ango? (3) Wan ki acel acel waromo nongo adwogi maber ki i carolok pa Yecu-ni nining?

 LOK ANGO MA PIRE TEK MA TYE I CAROLOK MAN?

3. I kare mukato angec, bukkewa otito carolok madok i kom anyira apar-ri nining, dok adwogine obedo ningo?

3 Kit ma waneno kwede i pwony mukato-ni, lagwok ot ma lagen i kareni pe loko tutwal i kom kit ma lok moni me Baibul ocobbe kwede ento tutwalle i kom pwony ma wanongo ki iye. I kare mukato angec, bukkewa i kine mukene obedo ka tito ni jami mapat pat ma Yecu oloko i komgi i carolokke madok i kom anyira apar-ri gicung pi gin mo, jami magi kwako tara, moo, cupa medo ki dong mukene. Tika tye lok ada ni keto tamwa i jami matinotino ogengowa keto cwinywa i kom lok ma pigi teko ma gitye i carolok man? Lagam pi lapeny man pire tek adada dok gudo wan ducu.

4. I carolok ma Yecu obolo-ni, wan watwero ngeyo (a) lanyom nining? (b) anyira nining?

4 Kong wanenu lok ma pire tek ma Yecu owaco i carolok man. Mukwongo, tam i kom jo ma kiloko i komgi i carolok madok i kom anyira apar-ri. Anga ma obedo lanyom i carolok-ki? Ki lok ada, Yecu onongo tye ka lok i kome kekene. I nino mukene bene, Yecu owacci ebedo lanyom! (Luka 5:34, 35) Ento, anyira apar-ri kono? I carolok-ki, Yecu owacci tic ma anyira apar-ri gitye kwede aye me kuro lanyom ka bino kun nongo giweko taragi lyel. Nen kong gin mukene ma Yecu owaco bot lulub kore ma kiwirogi ma gitye “romi manok[-ni].” En owaco ni: “Wubed ma wutweyo pyerwu, kun tarawu lyel; wubed macalo jo ma kuro laditgi ka bidwogo nia ki i karama me nyom.” (Luka 12:32, 35, 36) Medo i kom meno, lakwena Paulo gin ki lakwena Jon gucoyo ni jo ma kiwirogi ma gilubo kor Kricito gitye macalo nyako ger. (2 Kor. 11:2; Yabo 21:2) Ada, carolok ma Yecu obolo i Matayo 25:1-13 omiyo macalo tira ki dok cik bot lulub kore ma kiwirogi.

5. Yecu owaco ni carolokke-ni bicobbe awene?

5 Awene ma tira ma Yecu omiyo-ni bicobbe iye? Gin ma Yecu owaco i agikki me carolokke-ni miniwa lagamme, en owaco ni: ‘lanyom obino.’ (Mat. 25:10) Kit ma wanyamo kwede i Wi Lubele me Julai 1, 2013, lok ma Yecu owaco i Matayo cura 24 ki 25 loko tyen aboro kulu i kom ‘binone.’ Ka mo keken ma Yecu oloko pi binone, en onongo tye ka lok i kom twon can madit atika-ni, kare ma ebibino iye ka ngolo kop kacel ki jwero lobo man marac-ci. Pi meno, carolok man bicobbe i kare me agikki ento bio i agikkine i kare me twon can madit atika-ni.

6. Lok ango ma pire tek ma tye i carolok man?

6 Lok ango ma pire tek ma tye i carolok man? Nen kong lok ma Yecu owaco ma peya obolo carolok man. Yecu onongo pud oa ka lok i kom “lagwok ot ma lagen dok maryek.” Lagwok ot meno obedo gurup matidi pa jo ma kiwirogi ma onongo gibitelo lulub kor Kricito i kare me agikki-ni. Yecu ociko co magi ni omyero gubed jo ma lugen. I ngeye, en bene otiyo ki carolok man me ciko lulub kore ducu ma kiwirogi ma gikwo i kare me agikki me bedo ma ‘gikiyo piny’ wek pe gukeng motgi me kwo i polo. (Mat. 25:13) Kong dong wanyamu carolok man kun waneno kit ma jo ma kiwirogi guketo kwede tirane i tic.

JO MA KIWIROGI GUTIYO KI TIRA MA I CAROLOK MAN NINING?

7, 8. (a) Jami aryo mene ma oweko anyira maryek-ki gubedo atera? (b) Jo ma kiwirogi gunyuto nining ni gitye ma giyubbe?

7 Carolok pa Yecu-ni nyuto ni anyira maryek-ki onongo gitye atera dok gubedo  ka kuro lanyom ka iporo ki anyira ma lumingngi. Pingo? Gin gutimo meno pi jami aryo: gin onongo guyubbe dok wanggi obedo twolo. Anyira ma kiwacigi ni gubed ma wanggi twolo i dyerwor kun gikuro lanyom-mi, onongo myero guwek taragi obed ka lyel dok gukur piny pi cawa malac nio ka lanyom obino. Ento, ka iporo ki anyira ma lumingngi, anyira abic onongo guyubbe maber adada pien gin gubino ki moo mukene i cupagi medo i kom ma onongo tye i taragi. Tika jo ma kiwirogi bene gubedo ma guyubbe?

8 Gin gubedo ma guyubbe! I kare man me agikki-ni, Lukricitayo ma kiwirogi gitimo ticgi calo anyira maryek-ki pien guyubbe me tiyo ticgi ki gen nio wa i agikki. Gin gingeyo ni wek gibed lugen i ticgi pi Jehovah, omyero gijal jami mapol me kom ma tye i lobo pa Catan-ni. Gimine me tic pi Jehovah keken ki cwinygi ducu labongo tamone ni nino mo gibigikone woko, ento gitiyo pire pi mar ki gengi i kome kacel ki Wode. Gin gigwoko gennegi kun gikwero cwiny me lobo man marac-ci, ma opong ki miti me jami me kom, tim tarwang, ki dong cwiny me woro me jami. Pi meno, gin gitye atera dok bene gimedde ameda ki ryeny kadi bed ni nen calo Lanyom tye ka galle.Pil. 2:15.

9. (a) Lok me poyo wic ango ma Yecu omiyo ma lubbe ki nino? (b) I yo ma nining ma Lukricitayo ma kiwirogi gujolo kwede woo ma winye ni: “Nen, lanyom dong bino!”? (Nen lok ma tye i tere piny.)

9 Anyira maryek-ki bene gubedo atera pi bino pa lanyom pien gin gubedo ma wanggi twolo. Tika twere pi Lakricitayo acel acel ma kiwiro me nino woko i kare ma nongo en tye ka kuro lanyom? Meno twere. Nge ni Yecu owaco ni anyira apar-ri “ducu nino omako wanggi, ci gunino woko” pien nen calo lanyom ogalle. Yecu onongo ngeyo ni kadi bed ni ngat moni tye atera dok tye ki miti, en pud romo doko goro pi roc ma watye kwede. Jo ma kiwirogi ma gin lugen gulubo tira man dok gutiyo matek adada me bedo ma wanggi twolo. I carolok ma Yecu obolo-ni, anyira-ni ducu gua cut i kare ma woo owinye i cwiny dyewor ni: “Nen, lanyom dong bino!” Ento anyira maryek keken aye gukanyo nio wa i agikki. (Mat. 25:5, 6; 26:41) Ento jo ma kiwirogi ma gin lugen i kareni kono? I kare man me agikki-ni, gin gujolo woo ma winye ni: “Nen, lanyom dong bino!” Gin bene gudiyo cwinygi kun gibedo atera me kuro bino pa Lanyom. * Ento, agikki me carolok man loko tutwalle i kom kare mo i anyim.

MOT PI ANYIRA MARYEK KI PWOD PI ANYIRA MA LUMINGNGI

10. Lapeny mene ma myero wapenye kwede ma lubbe ki gwenyo lok ma obedo i kin anyira maryek-ki ki anyira ma lumingngi?

10 I agikki me carolok ma Yecu obolo-ni, anyira ma lumingngi gupenyo anyira maryek-ki ni guminigi moo wek giket i taragi. Ento anyira maryek-ki gukwero konyogi. (Kwan Matayo 25:8, 9.) Gwenyo lok meno kelo lapeny man: “Awene ma Lukricitayo ma lugen gukwero konyo ngat mo ma openyo pi kony?” Wi myero opo i kom kare ma carolok meno bicobbe iye. Wiwa myero pe owil ni  alokaloka manyen ma kitimo i niangowa tye ni Yecu ma en aye Lanyom-mi bibino ka ngolo kop tung i agikki me twon can madit atika-ni. Tika but carolok man loko i kom gin ma bitimme ma nongo kare meno me twon can madit atika-ni peya ogik? Nen calo tye kumeno, pien i kare meno jo ma kiwirogi nongo dong kityeko keto lanyut me agikki i tur nyimgi.

11. (a) Ngo ma bitimme ma nongo twon can madit atika-ni peya ocakke? (b) Gin ango ma anyira maryek-ki onongo gitye ka wacone i kare ma guwacci anyira ma lumingngi gucit bot jo ma gicato moo?

11 Pi meno, ma peya twon can madit atika-ni ocakke, jo ducu ma kiwirogi ma pud gitye i lobo kany nongo dong kiketo lanyut me agikki i tur nyimgi. (Yabo 7:1-4) Nicakke i kare meno, ngene kene ni wang ma gucito i polo. Ento tam kong i kom mwaki ma nongo twon can madit atika-ni peya ocakke. Ngo ma bitimme i kom jo ma kiwirogi ma pe gubedo ma wanggi twolo nyo pe gugwoko gennegi? Gin gibikeng motgi me cito i polo. Ngene kene ni pe kibiketo lanyut me agikki i tur nyimgi ma nongo twon can madit atika-ni peya ocakke. I kare meno, Lukricitayo mukene ma gin lugen kibiwirogi ki cwiny maleng. Ka twon can madit atika-ni ocakke, jo meno ma gin lumingngi gibibedo ki ur me neno kit ma kijwero kwede Babilon Madit. Meno aye kare ma gin gibiniang ni kara onongo pe gitye atera me jolo Lanyom ka obino. I kare meno ma cawa nongo dong pe-ni, ngo ma bitimme ka ce gupenyo pi kony? Carolok ma Yecu obolo-ni miniwa lagamme. Anyira maryek-ki gukwero miyo moogi bot anyira ma lumingngi ento guwaco ni gin myero gucit bot jo ma cato moo. Ento wi myero opo ni man otimme “i cwiny dyewor.” Tika onongo gubinongo jo ma gicato moo i cawa meno? Pe. Cawa onongo dong okato woko.

12. (a) I kare me twon can madit atika-ni, ngo ma bitimme i kom ngat mo keken ma kiwiro ento pe ogwoko gennene ma nongo peya kiketo lanyut me agikki? (b) Gin ango ma bitimme i kom jo ma gubedo calo anyira ma lumingngi?

12 Ki bene, i kare me twon can madit atika-ni, jo ma kiwirogi pe gibikonyo luwotgi ma pe gugwoko gennegi. Kony mo bibedo peke matwal. Kare nongo dong pe. Gin ango ma bitimme i komgi? Yecu otito gin ma bitimme i kare ma anyira ma lumingngi gucito ka wilo moo: “Lanyom obino; jo ma nene gitye ma guyubbe gudonyo kacel kwede i ot i karama me nyom, ci giloro doggola woko.” Ka inen Kricito obino i deyone tung i agikki me twon can madit atika-ni, en bicoko kacel jo ma lugen ma kiwirogi i polo. (Mat. 24:31; 25:10; Jon 14:1-3; 1 Tec. 4:17) Kibiloro doggola woko bot jo ma pe gin lugen calo anyira ma lumingngi. Gin gibikok kun gibako doggi ni: “Ladit, ladit, yab doggola botwa do!” Ento, lagam ma kibiminigi romo aroma ki lagam ma kimiyo bot jo ma gubedo dyegi i cawa meno me ngolo kop: “Ada awaco botwu ni, an gira pe angeyowu.”Mat. 7:21-23; 25:11, 12.

13. (a) Pingo pe myero wabed ki tam ni jo mapol ma kiwirogi ma gilubo kor Kricito pe gibigwoko gennegi? (b) Pingo lok me cik ma Yecu omiyo-ni nyuto gen ma en tye kwede? (Nen cal ma tye i pot karatac 13.)

13 Gin ango ma waromo mokone ma lubbe ki gin ma dong wanyamo-ni? Yecu mono onongo tye ka wacci jo mapol ma kiwirogi pe gibigwoko gennegi ma weko mitte ni myero kile kakagi? Pe. Wi myero opo ni en onongo pud oa ka ciko “lagwok ot ma lagen dok maryek” ni pe myero kite odok rac. Man pe te lokke ni en onongo mito ni gin ma kit meno otimme.  I yo acel-lu, carolok man onongo tye ki cik magwar adada. Kit macalo anyira abic onongo gitye luming ki anyira abic onongo giryek-ki, man te lokke ni ngat acel acel ma kiwiro romo yero me bedo ma oyubbe nyo ma wange twolo, nyo laming ki dok pe lagen. Man aye bene gin ma lakwena Paulo ocoyo me ciko Lukricitayo luwote ma kiwirogi. (Kwan Jo Ibru 6:4-9; por ki Nwoyo Cik 30:19.) Nge ni lok ma Paulo ocoyo-ni gwar adada, ento en bene onyuto gen ni ‘jami mabeco’ tye anyim pi omegine ki lumegine ma gin Lukricitayo. I yo ma kit meno, lok me cik ma Yecu omiyo i carolokke-ni nyuto ni en bene tye ki gen acel-li i kom jo ma kiwirogi. Kricito ngeyoni ngat acel acel ma kiwiro romo gwoko gennene dok nongo mot mamwonya adada!

“ROMI MUKENE” PA KRICITO GINONGO ADWOGI MABER NINING?

14. Pingo “romi mukene” bene giromo nongo adwogi maber ki i carolok pa anyira apar-ri?

14 Tika omyero watam ni “romi mukene” pa Kricito pe gibinongo mot mo keken pien carolok ma Yecu obolo madok i kom anyira apar-ri tye tutwalle pi lulub kore ma kiwirogi? (Jon 10:16) Pe wacel! Wi myero opo ni lok ma pire tek ma tye i carolok man yot adada: “Wuki [piny]” Tika man kwako jo ma kiwirogi keken? Yecu con owacci: ‘Lok ma awaco botwu-ni, awaco bot dano ducu ni, Wuki piny.’ (Mar. 13:37) Yecu mito ni lulub kore ducu myero guyub cwinygi me tic ki gen dok bene gin weng gubed ma wanggi twolo. Pi meno, Lukricitayo ducu myero gulub lanen maber pa jo ma kiwirogi pien gin giketo ticwa me pwony-nyi bedo mukwongo i kwogi. Wan ducu ki acel acel bene wiwa myero opo ni anyira ma lumingngi gupenyo anyira maryek-ki ni gupokigi moo mogo. Penygi-ni poyo wiwa ni wan ducu myero wabed lugen bot Lubanga, wabed ma wayubbe, ki dok ma wangwa twolo ento pe ngat mukene aye myero otim jami magi piwa. Wan ducu wabicung i nyim Langolkop matir ma Jehovah aye ocimo. Omyero wabed atera. Dok en dong cok dwogo adada!

Kit ma anyira ma lumingngi gupenyo kwede pi moo-ni, man nyuto ni pe tye ngat mo ma romo bedo lagen nyo ma wange twolo piwa

15. Pingo nyom pa Kricito kacel ki nyako gerre tye me yomcwiny bot Lukricitayo ducu me ada?

15 Lukricitayo ducu gibinongo adwogi maber ki i carolok ma Yecu obolo madok i kom nyom. Ki lok ada, anga i kinwa ma cwinye pe yom pi nyom meno ma bitimme i anyim-mi? I nge lweny me Armagedon, jo ma kiwirogi nongo dong gitye i polo ka ma gin gibidoko nyako ger pa Kricito. (Yabo 19:7-9) Dano ducu ma gitye i lobo gibinongo adwogi maber ki i nyom man ma bitimme i polo-ni pien bikelo loc ma pud ber loyo pi jo ducu. Kadi bed ni genwa tye me kwo i polo nyo i lobo, wamoku tamwa me pwonyo jami ma pigi tego ki i carolok man ma kibolo i kom anyira apar-ri. Wan ducu myero wacung wunu ma pe watagge kun wabedo ma nongo wayubbe ki dok ma wangwa twolo wek wanong mit pa kwo mamwonya ma Jehovah oyubo piwa i kare me anyim.

^ para. 9 I carolok ma Yecu obolo-ni, kare kong okato i nge winyo woo ma wacci, “Nen, lanyom dong bino!” (tyeng 6) ki dong bino pa lanyom (tyeng 10). I kare me agikki-ni, jo ma kiwirogi guniang lanyut ma moko ka maleng ni Yecu dong tye ka loc. Gin gingeyo ni en ‘obino’—tye ka loyo Ker pa Lubanga. Katala ma gitye kwede aye me bedo ma wanggi twolo nio ka en obino nyo odwogo.