Cit atir i jami ma tye

Cit atir ka ma nyuto lok ma tye iye

 LOK MA I POK NGEYE | KIT ME NONGO YOMCWINY I TICCI

Kit me Nongo Yomcwiny i Tic Matek

Kit me Nongo Yomcwiny i Tic Matek

“Aniang bene ni man obedo mot ma Lubanga omiyo bot dano, kun mito ni dano acel acel myero ocam cam, dok omat mat-gu, dok onong yomcwiny ma a i kom ticce ducu ma en tiyo.” (Latitlok 3:13) Ka Lubanga mito ni wanong yomcwiny i ticwa, ci mono pe pore ni en myero onyutiwa kit me nongo yomcwiny meno? (Icaya 48:17) Tye me yomcwiny ni en nyutiwa kun tiyo ki Baibul. Nen kong tira ma Baibul miyo i kom kit me nongo yomcwiny i ticci.

BED KI NENO MUPORE I KOM TIC

Kadi bed ni ticci kwako tic ki wi, nyo keroni, nge ni “kit tic ducu [matek] ma dano tiyo magoba tye iye.” (Carolok 14:23) Magoba ma nining? Mukwongo, tic matek konyowa me nongo jami ma mitte me kom. Ki lok ada, Lubanga ocikke me miyo jami ma mitte me kom bot jo ma giwore ki cwiny me ada. (Matayo 6:31, 32) Ento en bene mito ni watim ma ka megwa kun watiyo matek me yenyo kwo i yo ma rwatte.2 Jo Tecalonika 3:10.

Pi meno, myero wanen ticwa macalo yo me cobo yub ma watye kwede. Tic obedo yo maber me cobo katala ma i wiwa. Joshua, ma tye ki mwaka 25 owaco ni, “Nongo jami me kom piri obedo gin ma pire tek. Ka ce iromo culo pi jami ma imito, ci nongo ticci tye ka timo gin ma myero otim.”

Medo i kom meno, tic matek weko ibedo ki awaka pi ticci. Ki lok ada, tic matek pe yot. Ka wapwonnye me moko i kom ticwa—kadi bed ni waco komwa nyo tek—man bimiyo wanongo yomcwiny pien watimo gin matir. Man bene nyuto ni waloyo lweny i kom atematema me bedo abeda labongo tic matek. (Carolok 26:14) Ka watimo meno,  ci wabinongo yomcwiny madit i ticwa. Aaron ma kiloko i kome i pwony mukato-ni owaco ni, “amaro kit ma awinyo kwede i nge tiyo tic matek i nino meno. Twero bedo ni aol matek—dok dano pe guneno ticca—ento nongo angeyo ni olo to acobo gin mo.”

KET CWINYI I TICCI

Baibul loko maber i kom laco “makwiri i ticce” ki dako ma “tiyo tic matek ki cinge.” (Carolok 22:29; 31:13) Ngene kene ni ngat moni pe doko ladiro labongo tute. Dok jo manok keken aye gimaro timo jami ma pe gingeyo maber. Oromo bedo ni meno aye gin mumiyo dano mapol pe ginongo yomcwiny i ticgi; gin pe giketo tek me dongo dirogi i tic meno.

I kom lok, ngat moni romo nongo yomcwiny i tic mo keken ka ce en keto cwinye me pwonyo tic meno maber. William, ma tye ki mwaka 24 owaco ni, “Ka itute ki keroni ducu i timo tic moni dok bene ineno adwogine, man keli yengo madit adada. Pe itwero winyo kumeno ka itiyo tic wiye wiye nyo itiyo tic manok keken.”

TAM I KOM KIT MA TICCI KONYO KWEDE JO MUKENE

Gwokke ki i owic me bedo ka tamo i kom wel cente ma inongo keken. Ma ka meno, penye kekeni ki lapeny macalo magi: ‘Pingo tic man pire tek? Ngo ma onongo bitimme ka ce pe kitimo—nyo pe kitimo i yo matir? Ticca konyo jo mukene nining?’

Ber me tamo tutwalle i kom lapeny me agikki-ni, pien tic kelo yengo madit ka waneno kit ma konyo kwede jo mukene. Yecu kikome owaco ni: “Yomcwiny madwong makato tye i miino loyo i gamo.” (Tic pa Lukwena 20:35, Baibul pa Katoli.) Mapat ki jo mogo ma ginongo kony ki i ticwa—calo luwil ki ludito tic—tye jo mukene ma bene ginongo adwogi maber. I kin jo magi tye iye jo me odiwa ki lucan.

Jo me odiwa. Ka lawi ot tiyo matek me miyo jami ma mitte bot jo me ode, ci en konyogi i yo aryo. Mukwongo, en neno ni gitye ki jami ma mitte me kom calo cam, bongi, ki dong kabedo. Pi meno, en nongo tye ka cobo tic ma Lubanga omiye me ‘konyo lupacone.’ (1 Temceo 5:8) Me aryo, lawi ot ma tiyo matek nongo tye ka nyuto lanen maber i kom kit ma pire tek kwede me tic matek. Shane, ma kiloko i kome i pwony mukato-ni owaco ni, “Babana tye lanen maber pien en tiyo matek. En ngat ma genne ma otiyo matek pi kwone olu, tutwalle macalo pundi bao. Lanenne opwonya kit ma pire tek kwede me tic ki cingi me yubo jami ma konyo jo mukene.”

Lucan. Lakwena Paulo omiyo tam bot Lukricitayo ni myero ‘guti tic matek ki cinggi, wek gunong gin mo ma myero gupok ki jo ma megi pe.’ (Jo Epeco 4:28) Ada, ka watiyo matek me nongo jami me kom piwa ki pi jo me odiwa, man bene biminiwa kare me konyo lucan. (Carolok 3:27) Pi meno, tic matek romo konyowa me nongo yomcwiny madit ma tye i miino.

 TIM TIC MAKATO MA MYERO ITI

I Pwonnye me Wi Got, Yecu owaco ni: “Ka ce dano mo odiyi tektek ni iting yecce icit kwede i wot me mairo acel, wot kwede wot me mairo aryo.” (Matayo 5:41) Itwero lubo cik meno ma iye lac-ci i ticci nining? Ma ka timo tic ma mitte keken, yeny yo me timo tic makato meno. Ket yub me tiyo ticci maber adada nyo tyekone con. Bed ki awaka i kom tic mo keken ma itiyo kadi bed ni tidi.

Ka itiyo tic makato ma myero iti, ci man bimiyo inongo yomcwiny i ticci. Pingo? Pien in aye idoro ticci. Itye ka tiyo tic mapol pien in aye imito, ento pe ni ngat mo aye odiyi. (Pilemon 14) Ma lubbe ki meno, wiwa twero po i kom cik ma iye lac ma tye i Carolok 12:24: “Dano ma omiyo kwone me tiyo tic matek bedo ki twero me loyo luwote, ento ngat ma lawackom gibikete ka tiyo tic muroni mapek.” Ada, jo manok keken aye gibitiyo tic muroni mapek nyo macalo opii. Ento, ngat ma tiyo tic ma myero eti keken twero tamo ni etye macalo iwacci opii ma cobo miti pa jo mukene kare ducu. Ki tungcel, ngat ma tiyo tic makato ma myero eti—kun timo pienni en aye oyero—nongo tye ka doro kwone. En pud nongo tye ladit ma doro ticce.

PE ITI LABONGO YWEYO

Tic matek ber, ento wiwa myero bene opo ni tye jami mogo ma pigi tego i kwo makato tic. Ada, Baibul cuko cwinywa me tiyo tic matek. (Carolok 13:4) Ento pe myero wabed jo ma dong gitiyo cawa ducu. Latitlok 4:6 waco ni: “Ka itye ki jami manok ma romo pongcing keken, kun itiyo kwede inongo ni itye ki kuc i cwinyi, ber kato jami ma tye pongcing aryo ma kuc pe iye mupong ki tic matek, dok ma rom ki ryemo kor yamo ma kodo.” Pwony ango ma wanongo? Ngat ma tiyo labongo yweyo pe binongo yomcwiny i tutene ka ce ticce tero cawa kacel ki kerone ducu. Macalo adwogine, ticce doko gin ma konye pe calo “ryemo kor yamo.”

Baibul konyowa me bedo ki neno mupore i kom tic. Kadi bed ni Baibul waco ni myero waket cwinywa i ticwa, ento bene miniwa tira ni: “Wuket pi jami ma pigi tego obed mukwongo.” (Jo Pilipi 1:10, NW) Jami ma pigi tego-ni gubedo ngo? Magi kwako cwalo cawa me bedo kacel ki jo me pacowa ki luremwa. Ento ma dong pigi tego loyo aye timo jami me cwiny calo kwano Lok pa Lubanga ki lwodo lok i kom gin ma wakwano.

Jo ma gitiyo kun bene giketo pi jami ma pigi tego bedo mukwongo ginongo yomcwiny madit i ticgi. William, ma kiloko i kome malo-ni owaco ni, “Ladit ticca mo acel obedo lanen maber adada pien en tiyo matek ento bene keto pi jami ma pigi tego bedo mukwongo. En tiyo matek dok tye ki wat maber ki jo ma miye tic pien en tiyo ticce ki diro. I nge tyeko ticce, en ngeyo kit me weko ticce kun loko tamme i kom jo me ode ki worone. Tika ingeyo gin mukene? En tye i kin jo ma cwinygi pud dong yom loyo ma angeyo!”