Cit atir i jami ma tye

Cit atir ka ma nyuto lok ma tye iye

Wuwek Jehovah Ojing dok Ogwok Nyomwu

Wuwek Jehovah Ojing dok Ogwok Nyomwu

“Ka pe Rwot [Jehovah] aye ma okuro gang, lakurpiny bedo dyewor ma wange twolo nono.”—JAB. 127:1b.

1, 2. (a) Pingo Luicrael 24,000 gukeng mot mapol? (b) Pingo lok man pire tek botwa?

I KARE ma rok me Icrael onongo cok leyo Lobo ma Kiciko Pire-ni, jo alip mapol gutimo “abor i kom anyira Moab.” Macalo adwogine, Jehovah oneko dano 24,000. Go kong—jo Icrael onongo dong gicok nongo ginaleyagi ma gukuro pi kare malac-ci, ento gin gukeng mot mapol pienni gupoto i abita.Wel 25:1-5, 9.

2 Can meno marac tutwal ma opoto i komgi-ni, tye macalo labol ma “gicoyo me cikowa, wan jo ma agikki piny oo i komwa-ni.” (1 Kor. 10:6-11) Kit ma dong wadonyo matut “i kare me agikki[-ni],” lutic pa Lubanga dong gicok donyo i lobo manyen ka ma kit ma atir bedo iye. (2 Tem. 3:1; 2 Pet. 3:13) Ento, tye me cwer cwiny ni lutic mogo pa Jehovah pe gugwoko gennegi. Gin gudonyo i tim me tarwang dok gukayo adwogi maraco. Jo magi bene gitwero keng kwo ma pe tum i Paradic i lobo kany.

3. Pingo jo munyomme gimito tira kacel ki gwok pa Jehovah? (Nen cal ma tye i pot karatac man.)

3 I kareni tim tarwang tye ma onya adada, pi meno co  ki mon gimito tira kacel ki gwok pa Jehovah wek tutegi me gwoko nyomgi pe opot nono. (Kwan Jabuli 127:1.) Wabinyamo kit ma luot giromo jingo kwede nyomgi kun gigwoko cwinygi, ginyikke cok bot Lubanga, giruko kit manyen, giloko lok maber i kingi, ki dong gicobo mitigi me buto.

GWOK CWINYI

4. Gin ango ma oweko Lukricitayo mogo gudonyo i tim carocaro?

4 Gin ango ma twero ywayo Lakricitayo moni me donyo i tim tarwang? Peko man pol kare cakke ki i wangwa. Yecu otito ni: “Dano mo ma neno dako ce paro ni ebed kwede, meno nongo dong otimo abor woko kwede ki i cwinye.” (Mat. 5:27, 28; 2 Pet. 2:14) Lukricitayo mapol gudonyo i tim carocaro pien gubedo ka neno jami nyo kwano bukke ma tugo miti me buto nyo gubedo ka neno jami macilo ki i intanet. Jo mogo gubedo ka galowanggi ki vidio, tuko goga, nyo yub mogo me telebijon madok i kom tim me buto. Jo mukene gucito ka myel i dyewor, ka neno myel ma dano gilunyo iye bongi-gi nyo i kabedo mogo ma ki rweyo iye kom dano i yo ma pe opore.

5. Pingo omyero wagwok cwinywa?

5 Jo mogo gidonyo i atematema pien pe gicito bot luotgi ka gimito cukocwiny. Wakwo i lobo ma dano gipe ki cwiny me jukke-ken dok ginongo yomcwiny ki i timo tim carocaro. Medo i kom meno, watwero cako mito ngat mapat ki luotwa pien cwinywa bwolowa dok opong ki gin marac. (Kwan Jeremia 17:9, 10.) Yecu owaco ni: “Gin ma a ki i cwiny dano aye tam maraco, nek, abor, cot.”Mat. 15:19.

6, 7. (a) Ngo ma twero timme ka miti maraco odongo i cwiny ngat moni? (b) Ngo ma waromo timone wek pe watim bal i kom Jehovah?

6 Ka miti maraco odongo i cwiny jo aryo ma gimitte, gin gitwero cako nyamo lok ma myero gulok ki luotgi keken. I nge kare manok, gin gicako miyo tyen lok mogo ma tere pe wek gibed kacel. Gibedo ka rwatte teretere, kun gitimme calo gucom acoma. Ka miti ma i cwinygi woto ki medde, man miyo ginongo ni tek tutwal me timo gin matir. Ka wat ma tye i kingi woto ki dongo, ginongo ni tek tutwal me gikone kadi bed gingeyo ni pe gitye ka timo gin matir.Car. 7:21, 22.

7 Pien nongo wigi owil woko i kom Jehovah, miti maraco kacel ki lok ma giboko miyo gicako timo jami mogo ma myero gutim bot coggi nyo mongi keken calo mako cing, doto dog, yweyo kom i yo me mar, bongo dul kom i yo ma tugo miti me buto ki dong nyuto mar i yo mukene. Macalo adwogine, ‘mitigi aye ma bitogi.’ Ka mitigi dong oyac, ci “nywalo bal”—ma man obedo tim tarwang. (Yak. 1:14, 15) Man pud dong rac ya! Man onongo pe obitimme ka ce jo aryo magi guweko Jehovah okonyogi me dongo woro pi yub me nyom. Ento ngat moni romo dongone nining?

MEDDE KI NYIKKE COK BOT LUBANGA

8. Liremwa ki Jehovah gwokowa nining wek pe wadony i tim carocaro?

8 Kwan Jabuli 145:20. Liremwa ki Jehovah gwokowa wek pe wadony  i tim carocaro. Ka wapwonyo lok i kom kit mamwonya pa Lubanga, dok watute matek me ‘lubo kite pien wan litinone ma en maro kun wabedo ka lubo yo me mar,’ man bikonyowa me kwero lajwac “tim kwele ki tim caro caro ducu.” (Ep. 5:1-4) Jo munyomme myero guti matek me keto deyo i kom nyomgi kun gigwoko bedo maleng pien gingeyo ni “Lubanga bingolo kop i kom lutim tim me abor.”Ibru 13:4.

9. (a) Gin ango ma okonyo Yucepu pe me donyo i tim tarwang? (b) Pwony ango ma wanongo ki i lanen pa Yucepu-ni?

9 Lutic mogo pa Lubanga gudonyo i atematema me timo bal pien gubedo ka tero kare kacel ki lutic luwotgi ma pe gubedo Lucaden i nge tyeko tic. Kadi wa i cawa me tic, pud giromo donyo i atematema. I kare ma en tye i gang ticce, bulu mo mamwonya adada ma nyinge Yucepu oniang ni dako pa ladit ticce mite ki kwok matino. Nino ki nino, en otemo bite me buto kwede. Ka kare owec, “dako-nu omake ki bongone, kun wacci, ‘But kweda.’” Ento Yucepu ongweco woko ki bote. Gin ango ma okonyo Yucepu me gwoko gennene i atematema man? En omoko tamme liking pe me balo watte ki Lubanga. Pien Yucepu ocung matek, en orwenyo dog ticce ki dok kitweye i buc, ento Jehovah ogoyo laa i kome. (Acak. 39:1-12; 41:38-43) Kadi bed ni watye i gang ticwa nyo ka mukene, Lukricitayo myero gugwokke ki i gin mo keken ma twero miyo gidonyo i atematema gin ki ngat mo ma pe gunyomme kwede.

WURUK KIT MANYEN

10. Ruko kit manyen gwokowa nining ki i tim tarwang?

10 Pien kit pa dano manyen “giketo i cal pa Lubanga kikome i ada me kit ma atir ki maleng,” man bigwoko jo munyomme wek pe gudony i tim tarwang. (Ep. 4:24) Jo ma giruko kit manyen-ni ‘gineko’ dul komgi ma lubbe ki “abor, caro, mit me kom, ki par marac ma kelo lewic, ki woro me jami.” (Kwan Jo Kolocai 3:5, 6.) Lok man ni “wunek[-ki]” nyuto ni omyero waket tek me lweny ki miti maraco me donyo i tim tarwang. Omyero wagwokke ki i gin mo keken ma romo tugo miti me buto ki ngat ma pe wanyomme kwede. (Yubu 31:1) Ka wagwoko cik pa Lubanga, man bimiyo wapwonye me ‘kwero gin marac’ kun ‘wamoko matek i kom gin maber.’Rom. 12:2, 9.

11. Ruko kit manyen romo jingo nyom nining?

11 Ka waruko kit manyen-ni, ci nongo watye ka poro kit Jehovah. (Kol. 3:10) Wat i kin co ki mon jing ka gitute matek pe me donyo i tim carocaro kun ‘giparo pi can pa luwotgi, gibedo ki kica, mwolo, woro ki diyo cwiny.’ (Kol. 3:12) Gin bene gibedo ki yomcwiny i nyomgi ka ‘giweko kuc pa Kricito aye loyo cwinygi.’ (Kol. 3:15) Pud dong kelo adwogi maber ya ka jo munyomme ‘gimare kekengi ki cwinygi ducu’! Ginongo yomcwiny madit ka ‘ngat acel acel telo yo i miyo deyo bot lawote.’Rom. 12:10.

12. Kit macalo mene ma itamo ni pire tek wek yomcwiny obed i nyom moni?

12 I kare ma kipenyo Sid kit mene ma oweko gitye ki yomcwiny i nyomgi, en owaco ni: “Mar aye obedo kit ma  pire tek loyo ma wabedo ka dongone kare ducu i kwowa. Ki bene wanongo ni woro obedo kit ma pire tek adada.” Dakone ma nyinge Sonja bene oye lokke, kun medo ni: “Nyuto cwiny me kica obedo kit ma pire tek. Dok bene watemo nyuto mwolo kadi bed ni i kine mukene pe yot.”

WUBED KA LOKO LOK MABECO

13. Gin ango ma twero miyo nyom moni cung matek, dok pingo?

13 Yo maber adada me gwoko nyomwa wek ocung matek aye ka waloko ki luotwa i yo me kica. Pud dong rac ya ka jo munyomme pe giloko ki woro i kingi kun giloko ki jo ma pe gingeyo nyo lee ma gigwokogi paco i yo me woro! Ka ‘keccwiny, wang-ic, kiniga, ki dong da’ gitye i nyom, man bimiyo wat ma tye i kin luot doko goro. (Ep. 4:31) Pi meno, jo munyomme myero gujing wat ma tye i kingi kun giloko i yo me kica, woro, ki dong mwolo.Ep. 4:32.

14. Gin ango ma omyero pe watim?

14 Baibul wacci tye “kare me ling alinga.” (Latit. 3:7) Man pe te lokke ni omyero waling alinga litik kare ducu kun pe waboko lok. Min ot mo i lobo Germany owaco ni, “Ka meno otimme, ci twero cwero cwiny luotwu mada.” Ento, en omedo ni: “Kadi bed ni pe yot me diyo cwinyi ka itye ki par mapol, pe ber me nyuto kinigani ka maleng wek iwiny maber. Man bimiyo iwaco nyo itimo gin mo ma cwero cwiny luotwu, dok meno nyayo peko anyaya.” Ki lok ada, laco gin ki dakone pe gicobo pekkigi ki daa nyo ling alinga. Ma ka meno, gin gijingo nyomgi ka gicobo peko oyotoyot kun pe giweko doko lok madit ma gidaa iye.

15. Loko lok mabeco romo jingo nyom nining?

15 Wat ma i kin jo munyomme doko tek ka gikwanyo cawa me tito tamgi ki kit ma giwinyo kwede ki cwinygi. Kit ma wawaco kwede gin moni pire  tek rom aroma ki gin ma wawaco. Pi meno, kadi bed ni jami pe yot, tute matek me nenone ni iloko i yo me kica, kun inyuto i dwani ki nyig lok ma itiyo kwede. Man bimiyo bedo yot pi luotwu me winyo lokki. (Kwan Jo Kolocai 4:6.) Laco gin ki dakone gitwero jingo nyomgi kun ‘giloko lok mabeco keken ma dongo tam pa dano i yo ma mitte wek gunong kony ki iye.’Ep. 4:29.

Laco gin ki dakone gitwero jingo nyomgi kun giloko lok mabeco (Nen paragraf me 15)

WUCOB MITIWU ME BUTO

16, 17. Pingo pire tek pi laco ki dako me tamo i kom kit ma ngat acel acel winyo kwede ki i cwinye ki dok me cobo mitigi me buto?

16 Jo munyomme bene gitwero jingo nyomgi ka ce gitamo pi gin ma konyo luotgi, kun giketo mitine bedo mukwongo. (Pil. 2:3, 4) Co kacel ki mon myero gucob mitigi me buto dok gutam i kom kit ma ngat acel acel winyo kwede ki i cwinye.Kwan 1 Jo Korint 7:3, 4.

17 Tye me cwer cwiny ni luot mogo pe ginyuto mar nyo pe gicobo mitigi me buto, dok co mogo gitamo ni ka gitero mongi i yo me kica, ci nongo gigoro. Baibul waco ni: “Wun co wubed ki monwu ki niang maber.” (1 Pet. 3:7) Laco myero oniang ni cobo miti pa dakone pe kwako mere rwatte i buto keken. Dako obinongo mit pa rwatte i buto ka ce cware nyutte mar dok tere i yo me kica i kare mukene mapat ki buto keken. Ka gin aryo ducu ginyuto mar kacel ki niango, ci ngat man bicobo miti pa lawote dok gibibedo ki yomcwiny.

18. Co ki mon giromo jingo nyomgi nining?

18 Kadi bed ni pe tye tyen lok mo ma opore pi timo tim abor, ento ka jo munyomme pe gicobo mitigi me buto, man twero miyo ngat moni donyo i atematema me timo tim me abor. (Car. 5:18; Latit. 9:9) Pi meno, Baibul cuko cwiny jo munyomme ni: “Dano acel acel pe myero okwer pi kome bot lawote, kono gwok nyo pi kare manok mo keken ma wuyubo ayuba dok wuye kacel.” Pingo? “Wek Catan pe obitwu, pi miti ma wutye kwede ma pe jukke.” (1 Kor. 7:5) Pud dong bibedo gin marac ya ka jo munyomme guweko Catan obitogi pi ‘mitigi ma pe jukke’ ci gutimo tim abor! Ento, ka ngat munyomme ‘pe lubo gin ma konye keken, ento lubo gin ma konyo lawote bene’ kun cobo mitine me buto macalo yo me nyuto mar, man bijingo nyomgi.1 Kor. 10:24.

MEDDE KI GWOKO NYOMWU

19. Gin ango ma myero wamok tamwa me timone, ki dok pingo?

19 Wacok donyo i lobo manyen ka ma kit ma atir bedo iye. Man aye gin mumiyo cobo miti me kom twero miyo wapoto i can madit kit ma otimme kwede i kom Luicrael 24,000 ma guto i Tim me Moab. I nge lok i kom can meno mutimme-ni, Lok pa Lubanga cikowa ni: “Ngat mo ma tamo ni etwero cung myero ogwokke wek pe opoti.” (1 Kor. 10:12) Pi meno, pire tek adada pi jo munyomme me jingo nyomgi kun gibedo lugen bot Wongi me polo ki bot luotgi. (Mat. 19:5, 6) Man aye dong kare ma mitte tutwal ni ‘waket tek wek Lubanga pe onong roc mo nyo bal mo i komwa, ento onong watye ki kuc.’2 Pet. 3:13, 14.