Cit atir i jami ma tye

Cit atir ka ma nyuto lok ma tye iye

Lubanga Tika Winyo Aremwa?

Lubanga Tika Winyo Aremwa?

KIT MA LUBANGA OCWEYO KWEDE KI DANO

Dano ma winyo arem pa ngat mukene “tamo kit ma onongo etwero winyo kwede ka ebedo ngat ma tye ki arem meno.” Daktar ma nyinge Rick Hanson ma okwano two wic, otito ni “winyo arem pa ngat mukene obedo gin ma tye i remowa.”

TAM KONG: Pingo watye ki kero me winyo arem pa jo mukene, kun man obedo kit ma pe nonge i cwec mukene? Baibul tito ni Lubanga ocweyo dano i calle. (Acakki 1:26) Man te lokke ni watwero poro ki dok nyuto kit pa Lubanga. Pi meno, ka wawinyo arem pa jo mukene dok man tugo cwinywa me konyogi, nongo watye ka nyuto kit pa Lacwecwa Jehovah, ma en lakica tutwal-li.​—Carolok 14:31.

GIN MA BAIBUL PWONYOWA I KOM KICA PA LUBANGA

Lubanga winyo aremwa dok cwinye cwer ka neno watye ka deno can. Baibul oloko kit man i kom jo Icrael, ma guciro can macalo opii i Ejipt, dok lacen gubedo ka wot i aroo pi mwaki 40 ni: “I cangi ducu en bene oneno iye can.” (Icaya 63:9) Lubanga pe ongeyo pi pekogi angeya keken. En owinyo aremgi. Owaco ni, “Dong atyeko neno atwom pa jona.” (Nia 3:7) Lubanga owaco ni, “Ngat ame ogudo komwu ogudo tong wang Rwot [Jehovah].” (Jekaria 2:8, Lango Baibul) Ka jo mukene gucwero cwinywa, en bene cwinye cwer.

Baibul cuko cwinywa ni kadi bed wawinyo ni konywa pe dok pe wapore pi kica pa Lubanga, ento “Lubanga dit kato cwinywa woko, dok ngeyo lok ducu.” (1 Jon 3:19, 20) Lubanga ngeyowa maber kato kit ma wan wangene kwede kekenwa. En ngeyo maber adada kwo ma watye ka kato ki iye, tamwa, kacel ki kit ma wawinyo kwede. En bene paro piwa.

Watwero nongo kwe cwiny, ryeko, ki kony ki bot Lubanga, kun wangeyo ni en konyo jo ma piny oloyogi

 Ginacoya cuko cwinywa ni

  • “Ibilwongo, ci Rwot [Jehovah] gamo dogi, ibikok bote, en bigamo ni; ‘An ene.’”​—ICAYA 58:9.

  • “An keken aye angeyo yub ma atye kwede piwu, man Rwot ma owaco, yub me berbedo ento pe yub pi gin marac, yub pi kelo botwu kare me anyim ma wutye ki gen pire-ni. Ci wubibino bota wulega, an abiwinyo legawu.”​—JEREMIA 29:11, 12.

  • “Ityeko piko pig wanga i opokoni! Meno ducu pe kicoyo i bukki?”​—JABULI 56:8, Baibol.

LUBANGA NENO, NIANG DOK WINYO AREMWA

Tika bedo ki ngec ni Lubanga winyo aremwa twero konyowa me kanyo peko ma watye ka kato ki iye? Nen kong peko ma Maria okato ki iye:

“I nge to pa awobina ma onongo tye ki mwaka 18 keken, kwo obedo tek adada dok awinyo calo ngat mo onongo pe winyo aremma. En onongo otwoyo two kanca pi mwaki aryo. Abedo ki akemo i kom Jehovah ni pingo pe ocange!”

“I nge mwaki abicel, larema mo me kacokkewa ma lamar dok lakica ociko ite i kare ma awacce ni awinyo ni Jehovah pe mara. I nge winyo lokka pi cawa malac labongo ngolo doga, en otitta wang ginacoya ma ogudo cwinya adada. Otitta 1 Jon 3:19, 20, ma wacci: ‘Lubanga dit kato cwinywa woko, dok ngeyo lok ducu.’ En otito ni Jehovah niang pekowa ducu.

“Kadi bed kit meno, onongo pud atye ki akemo madwong! Ci lacen akwano Jabuli 94:19, ma waco ni: ‘Ka atamo pi jami mapol, in ikweyo cwinya ki kicani.’ Awinyo calo kicoyo tyeng meno pira! I agikkine, anongo kwe cwiny ki lok bot Jehovah i kom pekona, kun angeyo ni en tero ite, winyo dok niang pekona.”

Pud dong kweyo cwinywa ya me ngeyo ni Lubanga niang dok winyo aremwa! Ka tye kit meno, ci pingo pekki ki deno can tye ka medde ameda? Tika tye kit meno pien Lubanga tye ka miniwa pwod pi balwa? Lubanga tika bitimo gin mo me giko pekki ducu? Lapeny magi kibigamogi i pwony ma gilubo man.