Cit atir i jami ma tye

Cit atir ka ma nyuto lok ma tye iye

Itwero Kwo pi Naka i Lobo Kany

Itwero Kwo pi Naka i Lobo Kany

MAN PUD DONG OBEDO GEN MAMWONYA YA! Lacwecwa ocikke me miniwa kwo ma pe tum i lobo kany. Pol pa dano ginongo ye i lok meno tek adada. Jo mogo giwacci, ‘Dano weng myero guto, meno aye kit ma jami woto kwede, kwo ki to.’ Jo mukene giye ni kwo me labed naka twere ento pe i lobo kany. Giwaco ni ngat moni nongo kwo me labed naka ka en oto ci ocito i polo. In kono, itamo ningo?

Ma pud peya imoko tammi, pingo pe kong inen lagam ma Baibul miyo i kom lapeny adek magi: Pingo kit ma kicweyo kwede dano nyuto ni onongo myero gubed kwo pi naka? Yub pa Lubanga pi dano ki pi lobo-ni onongo tye nining i kare ma en ocweyo dano? To ocako bino i kom dano nining?

KICWEYO DANO I YO MA DOK PAT

Ka ingiyo cwec pa Lubanga ducu ma i lobo kany, inongo ni dano aye ma kicweyo i yo ma dok pat. Nining? Baibul nyuto ni dano keken aye kicweyogi i ‘cal’ pa Lubanga. (Acakki 1:26, 27) Meno tyen lokke ngo? Meno tere ni Lubanga ocweyowa ki kit mabeco ma en bene tye kwede, calo mar ki ngolo kop atir.

Medo i kom meno, Lubanga omiyo bot dano kero me tam ki moko tam, yero gin maber ki marac, dok ki miti me ngeyo ki bedo larem Lubanga. Meno aye gin ma oweko wanongo mit pa wer nyo lwod, neno ginacweya nyo cal ma ladiro ogoyo, dok wabedo ki ur i kom dit pa jami ma i dan polo. Ma dong pire tek loyo, watwero dongo wat macok ki Lacwecwa. Jami ma kit man weko dano bedo pat adada ki cwec mukene-ni ducu.

Tam kong i kom lok man: Tika onongo Lubanga bicweyowa ki kero me pwonyo jami manyen ma yomo cwinywa ci weko wakwo pi mwaki manok keken? Ada pa lok man tye ni, Lubanga ocweyowa ki kero magi wek wanong mit pa kwo i lobo kany pi naka.

YUB PA LUBANGA MUKWONGO

Jo mukene gitamo ni Lubanga pe ocweyo dano me kwo i lobo kany pi naka. Giwaco ni Lubanga ocweyo lobo me bedo calo ka temo jo, wek enen jo ma gupore me kwo pi naka i polo kacel kwede. Ka onongo tam meno tye atir, ci man weko Lubanga aye ma nongo tye ka kelo peko ki deno can ducu ma tye i lobo kany, pe kumeno? Lakodi tam meno pe rwatte ki kit pa Lubanga. Baibul loko i  kom Lubanga ni: “En ngolo kop atir i yone ducu. Lubanga ma lagen ma pe ngolo kop alenga; kite atir ma pe tye ki bal mo.”​—Nwoyo Cik 32:4.

Baibul nyuto ka maleng yub pa Lubanga pi lobo-ni i lok man: “Polo obedo jami pa Rwot [Jehovah] kene, ento omiyo lobo bot dano, ni gubed iye.” (Jabuli 115:16) Ki lok ada, Lubanga ocweyo lobo maleng adada ni obed paco pa wan dano matwal, dok ominiwa jami ducu ma wamito wek wanong mit pa bedo kwo pi naka.​—Acakki 2:8, 9.

“Polo obedo jami pa Rwot [Jehovah] kene, ento omiyo lobo bot dano, ni gubed iye.”​—Jabuli 115:16

Baibul bene loko atir i kom yub pa Lubanga pi dano. En omiyo tic bot laco ki dako mukwongo ni myero ‘gupong lobo, gulo bene; dok gulo wa rec ma i nam, ki winyo me polo, ki gin ducu makwo ma giwoto i wi lobo.’ (Acakki 1:28) Man obedo twon mot ki tic madit me loko lobo ducu wek odok paradic! Adada, Adam gin ki Kawa kicweyogi me kwo pi naka i lobo kany kacel ki likwayogi, ento pe i polo.

PINGO WATO?

Pingo i kare-ni wato? Baibul tittiwa ni cwec me cwiny acel mo ma Lubanga ocweyo otemme me balo yub pa Lubanga i poto me Eden. Lacen kicako lwonge ni Catan Larac-ci. En otimo man nining?

Catan obwolo lunyodowa mukwongo, Adam gin ki Kawa me jemo i kom Lubanga. I kare ma Catan owaco ni Lubanga otwonogi gin mo maber​—ma meno aye twero me moko gin maber ki marac—​man oweko lunyodowa gucayo Lubanga ci guye tam pa Catan. Adwogine obedo nining? Guto kit ma Lubanga onongo ocikogi kwede. Gurwenyo mot me kwo pi naka i Paradic i lobo kany.​—Acakki 2:17; 3:1-6; 5:5.

Jemo pa Adam gin ki Kawa okelo adwogi marac adada wa i kare-ni. Lok pa Lubanga waco ni: “Bal yam obino i lobo kun wok ki i dano acel [Adam], ka dong to obino pi bal, kit meno bene to onya oromo kin dano ducu.” (Jo Roma 5:12) Wato pien walako bal ki to ki bot lunyodowa mukwongo, ento pe ni to onongo obedo ‘yub’ pa Lubanga.

ITWERO KWO PI NAKA I LOBO KANY

Jemo ma otimme i Eden-ni pe obalo yub pa Lubanga pi dano ki lobo matwal. Mar pa Lubanga ki kite me ngolo kop atir, oweko en oyenyo yo me larowa ki i bal alaka ki to. Lakwena Paulo otito ni: “Mucara me bal en to, ento mot ma Lubanga miyowa nono, en aye kwo ma pe tum i Yecu Kricito Rwotwa.” (Jo Roma 6:23) Ki mar, Lubanga omiyo “Wode acel keken [Yecu Kricito], wek dano ducu ma ye en owek to, ento obed ki kwo ma pe tum.” (Jon 3:16) I kare ma Yecu ojalo kwone calo ginkok, en okoko jami ducu ma Adam orwenyo. *

Cokcok-ki, cikke pa Lubanga pi dano ki lobo dong bicobbe. Anyim mamwonya man twero bedo megi ka ilubo lok ma Yecu owaco ni: “Wudony ki i doggola mading, pien doggola ma tero dano i to lac, dok yone gipiro maber, dok jo ma donyo ki iye pol. Pien doggola ma tero dano i kwo ding, ki yone bene rac, dok jo ma nongo yo meno ginok.” (Matayo 7:13, 14) Anyimmi tye i cingi. Ngo ma dong ibitimo pi anyimmi?

^ para. 17 Pi ngec mukene i kom ngo ma ginkok twero timo piri, nen dul me 5 i buk me Baibul Twero Pwonyowa Gin Ango? ma Lucaden pa Jehovah aye gucoyo dok nonge bene i kabedowa me intanet me www.jw.org/ach.