Cit atir i jami ma tye

Cit atir ka ma nyuto lok ma tye iye

In Aye Iyero Anyimmi!

In Aye Iyero Anyimmi!

TIKA ITWERO YERO KIT MA ANYIMMI BIBEDO KWEDE? Jo mukene gitamo ni jami ducu ma timme i komgi dong kiyubo woko con, pi meno pe gitwero yero gin mo keken ma timme i kwogi. Ka gutemo cobo yub moni ci oloyogi, giilo cinggi woko. Giwaco ni, “onongo dong kiyubo ni obed kumeno.”

Jo mukene cwinygi balle woko ka guneno ni pe tye yo mo me bwot ki i dic kacel ki peko me lobo ma wakwo iye-ni. Oromo bedo ni guyelle matek me yubo kwogi​—ento dok ginongo ni jami calo lweny, turo cik, can ma poto atura, ki two bedo ka balo yubgi kare ki kare. Man weko gipenye ni, ‘Pingo dok pud ayelle?’

Tye ada gire ni jami ma timme i kwowa twero balo yubwa woko. (Latitlok 9:11) Ento, ka odok i kom kwo me labed naka i anyim, in aye ma iromo yerone. Ki lok ada, Baibul nyuto ni kwoni me anyim jenge i kom gin ma iyero. Nen kong gin ma Baibul waco.

Moses, latela pa rok me Icrael, owaco botgi i kare ma gicok donyo i Lobo ma Kiciko Pire ni: “Atyeko keto i nyimwu kwo ki to, gum ki lok me ceno dano; mumiyo wuyer kwo wek wun ki likwayowu wubed makwo, ma kun wumaro Rwot Lubangawu, wuworo doge ci wumoko i kome matek.”​Nwoyo Cik 30:15, 19, 20.

“Atyeko keto i nyimwu kwo ki to, gum ki lok me ceno dano; mumiyo wuyer kwo.”​—Nwoyo Cik 30:19

Ada! Lubanga olaro jo Icrael ki i opii i lobo Ejipt ci omiyo botgi kare me yero kwo me yomcwiny i Lobo ma Kiciko Pire-ni. Ento kwo meno onongo pe bibino pire kene. Me nongo mot magi, onongo mitte ni “guyer kwo.” I yo ma nining? ‘Ka gimaro Lubanga, giworo doge, kun gimoko i kome matek.’

I kare-ni bene, gin ma kit meno tye i nyimmi, dok gin ma iyero bimoko kit ma anyimmi bibedo kwede. Ka iyero me maro Lubanga, me winyo lokke, ki me moko matek i kome, ci nongo itye ka yero kwo—kwo ma pe tum i paradic i lobo kany. Kong dong wanenu ngo ma jami adek magi kwako.

YER ME MARO LUBANGA

Mar aye kit pa Lubanga ma pire tek loyo. Lakwena Jon ocoyo ni, “Lubanga en mar.” (1 Jon 4:8) Man aye ma oweko i kare ma kipenyo Yecu cik mene ma pire tek loyo, en ogamo ni: ‘Mar Jehovah Lubangani ki cwinyi ducu, ki kwoni ducu, ki tammi ducu.’ (Matayo 22:37) Bedo ki wat macok ki Lubanga pe jenge i kom lwore, nyo lubo cikke latowang ento jenge i kom mar-ri pire. Pingo mitte ni wayer me mare?

Mar pa Jehovah tye calo mar pa lanyodo pi lutinone. Kadi bed ni gitye ki roc, lunyodo ma lumar gipwonyo lutinogi, gicuko cwinygi, giminigi cwak, dok giminigi tira pien gimitti gubed ki yomcwiny ki kwo maber. Gin ango ma lunyodo mito ki bot lutinogi? Gimito ni lutinogi omargi dok gulub jami ma gupwonyogi kwede wek gubed ki kwo maber. Itamo ni Wonwa me polo pe mito ni wan lutinone wanyut bote pwoc pi jami ma en otimo piwa?

 WINY LOK PA LUBANGA

I leb ma kikwongo coyo iye Baibul, nyig lok man ni “winy” twero gonye ni “lub ngo ma kiwacci.” Man tika pe gin ma nongo watye ka waco ki lutino, ka wawaccigi ni, “Wuwiny lunyodowu”? Pi meno, winyo lok pa Lubanga te lokke ni walub ngo ma en wacciwa. Pe watwero winyo lok pa Lubanga kit ma wawinyo kwede lok pa luwotwa, ento wawinyo lokke ka wakwano dok waketo i tic ngo ma tye i Baibul.​—1 Jon 5:3.

Yecu onyuto kit ma pire tek kwede me winyo lok pa Lubanga i kare ma en owacci: “Dano pe bibedo kwo ki kwon keken, ento bedo kwo ki lok ducu ma a ki i dog Lubanga.” (Matayo 4:4) Kit macalo camo dek pire tek kwede-ni, pwonyo lok i kom Lubanga pire tek makato. Pingo? Kabaka Solomon ma onongo ryek adada-ni owacci: “Ryeko twero gwoko dano kit ma lim gwoko ki ngat ma tye kwede; ryeko gwoko kwo pa ngat maryek, man aye ber me bedo ki ngec.” (Latitlok 7:12) Ngec ki ryeko ma a ki bot Lubanga twero gwokowa dok konyowa me moko tam ma weko wanongo mot me kwo ma pe tum i anyim.

MOK MATEK I KOM LUBANGA

Wi opo i kom lapor pa Yecu ma waneno i pwony ma okato-ni, ma en owaco ni: “Doggola ma tero dano i kwo ding, ki yone bene rac, dok jo ma nongo yo meno ginok.” (Matayo 7:13, 14) Ka watye ka wot i yo ma kit meno, bedo ber ka wanongo ngat ma ngeyo yo meno maber dok wawoto cok kwede, wek wacob yubwa me nongo kwo ma pe tum. Pi meno, watye ki tyen lok maber adada me bedo cok ki Lubanga. (Jabuli 16:8) Watwero timmo man nining?

Nino ducu, watye ki jami ma mitte ni watimgi dok bene tye mukene ma cwinywa mito ento cawa nongo pe romo. Jami ma kit meno weko tic makowa adada nyo wiro tamwa woko, ci weko pe wabedo ki kare me neno gin ma Lubanga mito ki botwa. Man aye tyen lok ma oweko Baibul poyo wiwa ni: “Wugwokke maber i kwo ma wubedo kwede; pe wubed macalo jo ma kwiya piny, ento calo jo maryek. Kare ma tye myero iti kwede i yo maber, pien nino me kare-ni opong ki gin marac.” (Jo Epeco 5:15, 16) Wabedo cok ki Lubanga ka watwa kwede obedo gin ma pire tek loyo i kwowa.​—Matayo 6:33.

IN AYE MYERO IYER

Kadi bed ni pe tye gin mo ma itwero timone wek ilok jami ma otimme angec, pud itwero yero anyim maber piri ki pi jo ma imarogi. Baibul nyutiwa ni, Wonwa me polo, Jehovah, marowa matek dok en wacciwa ngo ma en mito ni watim. Nen kong lok pa lanebi Mika:

“Rwot [Jehovah] dong onyutti gin maber, in dano: gin ma Rwot mito ki boti en aye timo tic ma nen atir, ki maro kica, ki wot kacel ki Lubangani ki mwolo!”​Mika 6:8.

Tika ibiye lwongo pa Jehovah me wot kwede, wek inong mot ma en oyubo pi jo ma woto kwede? In aye myero iyer!